ক’ৰোনাত মৃত্যুৰ সংখ্যাত ইটালীক পিছ পেলাই বিশ্বৰ পঞ্চম স্থানত ভাৰত

দৈনন্দিন বাৰ্তা ডেস্ক : ভাৰতত ক’ৰোনাত আক্ৰান্তৰ সংখ্যা বৃদ্ধি পাই আছে ৷ কেন্দ্ৰীয় স্বাস্থ্য মন্ত্ৰালয়ৰ মতে যোৱা ২৪ ঘণ্টাত নতুনকৈ ৫৫,০৭৮ জন লোক ক’ৰোনাত আক্ৰান্ত হৈছে৷ ফলত দেশত ক’ৰোনাত আক্ৰান্তৰ মুঠ সংখ্যাটো হ’ল ১৬ লাখ ৩৮ হাজাৰ ৮৭০ জন৷ অৰ্থাৎ যোৱা দুদিনত এক লাখৰো অধিক লোক ক’ৰোনাত আক্ৰান্ত হৈছে৷ ইপিনে ক’ৰোনাত মৃত্যুৰ হিচাপত ইতিমধ্যে ফ্ৰান্স আৰু স্পেইনক পিছ পেলাইছিল ভাৰতে৷ শেহতীয়া তথ্য মতে মৃত্যুৰ নিৰিখত ইটালীক পিছ পেলালে ভাৰতে৷ ইউৰোপৰ দেশ ইটালীত ক’ৰোনাত ৩৫,১৩২ জন লোকৰ মৃত্যু হৈছিল৷ বৃহস্পতিবাৰৰ বিভিন্ন ৰাজ্যৰ তথ্য মতে ভাৰতত ৩৫,৭৪৮ জন লোকৰ মৃত্যু হৈছে৷ ফলত ক’ৰোনাত মৃত্যুৰ নিৰিখৰ তালিকাত পঞ্চম স্থান পালেগৈ ভাৰত৷ ভাৰতত যোৱা ২৪ ঘণ্টাত ৭৭৯ জনৰ মৃত্যু হয়৷ ইয়াৰ ভিতৰত কেৱল মহাৰাষ্ট্ৰত ১৪৭২৯ জন লোকৰ মৃত্যু হয় ৷ তাৰ পাছতে দিল্লীত ৩৯৩৬, তামিলনাডুত ৩৮৩৮ জনৰ মৃত্যু হৈছে৷ দেশত প্ৰতিদিনে মানুহৰ ক’ৰোনা পৰীক্ষা হৈ আছে৷ যোৱা ২৪ ঘণ্টাত ৬ লাখ ৪২ হাজাৰ ৫৮৮ জন লোকৰ পৰীক্ষা হয়৷ আনহাতে দেশত সংক্ৰমণৰ হাৰ হ’ল ৮.৫৭ শতাংশ ৷