আইপিএলৰ টাইটল স্পনছৰ ড্ৰিম ইলেভেন

দৈনন্দিন বাৰ্তা ডেস্ক : চলিত বছৰৰ আইপিএলৰ টাইটল স্পনছৰৰ নাম ঘোষণা কৰিলে ভাৰতীয় ক্ৰিকেট নিয়ন্ত্ৰণ ব’ৰ্ডে ৷ চীনা কোম্পানী ভিভ’ৰ নাম প্ৰত্যাহাৰৰ পাচত নতুন টাইটল স্পনছৰৰ বাবে আহ্বান কৰা হৈছিল ৷ বিচিচিআইয়ে আগতেই জনাইছিল, ১৮ আগষ্ট দিনটোত আইপিএল-১৩ৰ টাইটল স্পনছৰৰ নাম ঘোষণা কৰিব ৷ মঙলবাৰে সকলো দিশ বিবেচনা কৰি ড্ৰিম ইলেভেনক মূল স্পনছৰ হিচাপে বাচনি কৰে ৷ অৰ্থাৎ সংযুক্ত আৰৱ আমিৰশ্বাহিত আয়োজন কৰা আইপিএলৰ নতুন নাম হ’ব ড্রিম ইলেভেন আইপিএল। আইপিএল গভর্নিং কাউন্সিলৰ চেয়াৰমেন ব্ৰিজেছ পেটেলে জনায় যে ২২২ কোটি টকাৰ চুক্তিত এই অনলাইন গেমিং কোম্পানীৰ সৈতে এবছৰ চুক্তি কৰা হৈছে ৷ উল্লেখ্য যে যোৱা জুন মাহত লাডাখ সীমান্তত ভাৰত-চীন সংঘৰ্ষত ২০ জন ভাৰতীয় জোৱান শ্বহীদ হৈছিল ৷ তাৰ পাচত চীনৰ বিৰুদ্ধে ক্ষোভৰ জুই জ্বলি উঠে ৷ এনে পৰিস্থিতিত বিচিচিআইয়ে চীনা ম’বাইল কোম্পানী ভিভ’ক টাইটেল স্পনছৰৰ পৰা আঁতৰ কৰে ৷ উল্লেখ্য যে আইপিএলৰ টাইটেল স্পনছৰৰ বাবে ৰিলায়েন্স, আদানী গ্ৰুপ, কোকাকোলা, বাবা ৰামদেৱৰ পাতঞ্জলি আদিয়ে আগ্ৰহ প্ৰকাশ কৰিছিল ৷ অৱশেষত ড্ৰিম ইলেভেনে এই স্পনছৰৰ সুবিধা লাভ কৰে ৷