নাজিৰা
নাজিৰা মহকুমাত ৰাজহুৱা বিতৰণ ব্যৱস্থাৰ অনিয়ম সন্দৰ্ভত সঘনাই অভিযোগ উত্থাপিত হোৱাৰ সময়তে নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামীয়ে তৎপৰতাৰে অনুসন্ধান কৰি দুগৰাকী সুলভ মূল্য এজেণ্টক নিলম্বিতকৰণ কৰে। নাজিৰাৰ শেনৰ আলিৰ পবন বৰগোহাঁই আৰু মাদুৰি গোহাঁই গাৱঁৰ মাখন বৰগোহাঁই নামৰ দুয়োজন এজেণ্টৰ ওপৰত ৰাষ্ট্ৰীয় খাদ্য সুৰক্ষা আঁচনিৰ অধীনত বিতৰণত অনিময়ৰ আশ্ৰয় লোৱাৰ অভিযোগ লাভ কৰাৰ পাছতে মহকুমাধিপতিয়ে তৎকালে অনুসন্ধান কৰোৱাই নিলম্বিতকৰণ নিৰ্দেশ জাৰি কৰে। লগতে মহকুমাধিপতিয়ে সকলো সুলভ মূল্য দোকানৰ এজেণ্টক দুৰ্নীতিৰ আশ্ৰয় নল’বৰ বাবে সকীয়াই দিয়ে বুলি নাজিৰা মহকুমা তথ্য আৰু জনসংযোগ বিভাগৰ তৰফৰ পৰা এক বিবৃতি যোগে জানিবলৈ দিয়ে৷