দীপান্বিতাৰ সময়তহে গুৰুত্ব লাভ কৰে মৃৎ শিল্পীয়ে

বৃহস্পতি বাৰে অনুষ্ঠিত হবলগীয়া পোহৰৰ উৎসৱ দীপাৱলীত সমগ্ৰ ৰাজ্য পোহৰাবৰ বাবে সাজু হৈছে অসমৰ মৃৎ শিল্পী সমাজ। ইতিমধ্যে দীপাৱলীক সম্পূৰ্ণ নতুন আৰু আকৰ্ষনীয় কৰিবলৈ দেশী বিদেশী সকলো কোম্পানী তথা ব্যাৱসায় প্ৰতিষ্ঠান সমুহ তৎপৰ হৈ পৰিছে। ইয়াৰ মাজতে নলবাৰী আৰু কামৰূপ জিলাৰ সীমামূৰীয়া বৰলীয়া নদীৰ পশ্চিম পাৰত পূৰ্ণখুমদুম হীৰাপাৰাৰ মৃৎশিল্পী সকলেও পিছ পৰি ৰোৱা নাই বিভিন্ন সৰু ডাঙৰ মাটিৰ চাকি তৈয়াৰ কৰি ৰাইজৰ পদুলি পোহৰাবলৈ। গাওঁ খনৰ প্ৰায় ৪৬ ঘৰ মানুহে কম বেছি পৰিমাণে প্ৰায় দুই লক্ষাধিক মাটিৰ চাকি তৈয়াৰ কৰি  দীপান্বিতাত বিক্ৰী কৰি কৰিবলৈ সক্ষম হৈছে।পূৰ্ব পুৰুষৰ পৰা পৰাম্পৰাগত ভাবে চলি অহা এই শিল্প টোক অশেষ কষ্টৰে জীয়াই ৰাখিছে।আনহাতে ৰাজ্য চৰকাৰৰ অবহেলাৰ বাবেই কুমাৰ আৰু হীৰা সম্প্ৰদায়ৰ লোকে জীয়াই ৰখা মৃৎশিল্পী সকলে মৃত্যু ৰ সৈতে যুঁজ দিবলগীয়া হৈছে। সম্প্ৰতি অসমৰ সকলো ঠাইৰ হীৰা সম্প্ৰদায়ৰ লোকসকলৰ অৱস্হা বৰ দুখজনক হোৱাৰ কাৰণটো হৈছে অত্যাধুনিক প্লাষ্টিকৰ সামগ্ৰী বজাৰত উভৈনদী হোৱাত। যাৰ বাবে আজিৰ সমাজে মাটিৰ চাকি বাচন-বৰ্তন ব্যৱহাৰ কৰিবলৈ অপৰাগ। চৰকাৰী অবহেলা , বিভিন্ন দ’ল সংগঠনৰ অবহেলা, জন প্ৰতিনিধি সকলৰ চৰম প্ৰৱঞ্চনাৰে বছৰ ধৰি অৱহেলিত হৈ থকাত ৰাজ্যৰ বিভিন্ন প্ৰান্তৰ মৃৎশিল্পী সকলৰ লগতে পূৰ্ণখুমদুম হীৰাপাৰাৰ ৪৬ ঘৰ মৃৎশিল্পীৰ জীৱন নিৰ্বাহ কৰাটো তীব্ৰ প্ৰত্যাহ্বানৰ সম্মুখীন হ’বলগীয়া হৈছে।গাওঁ খনৰ জেষ্ঠ কনিষ্ঠ  মৃৎশিল্পী ক্ৰমে লোহিত চন্দ্ৰ হীৰা, সুৰেন হীৰা, শৰৎ হীৰা, নিৰদা হীৰা , ৰামেশ্বৰ হীৰা,ভূৱনেশ্বৰ হীৰা, নিৰদা হীৰা, খৰ্গেশ্বৰ হীৰা,  হৰকান্ত হীৰা, অমূল্য হীৰা, হৰেন হীৰা, কৈলাস হীৰা, থানেশ্বৰ হীৰা, বেলো হীৰা, মহাদেৱ হীৰা, ৰাজিন হীৰা, লক্ষ্মী হীৰা, মালতী হীৰা আদিয়ে চৰকাৰী আঁচনিৰ পৰা আজিও বঞ্চিত হৈ আহিছে। অতি কষ্টসাধ্য হৈ পৰিছে তেওঁ লোকৰ জীৱন যাপন। বিশ্বজুৰি আতংকৰ সৃষ্টি কৰা ক’ৰোনা ভাইৰাছ সংক্ৰমণৰ বাবে বিগত দুই বছৰ ধৰি অতি কষ্টৰে তৈয়াৰ কৰা মাটিৰ বাচন বৰ্তন নিজৰ ঘৰতে পৰি আছে। তেওঁলোকৰ হাতৰ পৰশত সৃষ্টি হোৱা মাটিৰ কলহ , চৰু, টেকেলি, মুটকি, চাকি, কুমাৰ আৰু, ঘট, মাটিৰ বেংক ইত্যাদি অনেক সামগ্ৰী আজি অনাদৃত অৱহেলিত। তথাপিও বহুত কষ্টৰে তৈয়াৰ কৰা এই মনোমোহা সামগ্ৰী সমুহ তেওঁলোকে ভাৰ বান্ধি কান্ধত তুলি ঘগ্ৰাপাৰ, বৰাজোল খাতিকুছি,  দিহজাৰী ,আল্লিয়া, ৰঙিয়া, দ্বাৰকুছি, বালিসত্ৰ, সত্ৰ পাণ্ডুলা ইত্যাদি বজাৰত বিক্ৰী কৰি এই ক্ষুদ্ৰ ব্যাৱসায় তথা জীবিকাৰ আহিলাটো জীয়াই ৰাখিছে। বৰলীয়া নদী আৰু বৰভাগৰ বাঢ়নী পানীয়ে গাওঁ খনৰ সৰু সৰু জুপুৰী সমুহ ধ্বংস কৰাৰ উপৰিও মাটিৰ বাচন বৰ্তন সমুহো ধ্বংস কৰি আহিছে। তথাপিও চৰকাৰ তথা জন প্ৰতিনিধি সকলে তেওঁ লোকৰ সমস্যা সমুহৰ প্ৰতি গুৰুত্ব প্ৰদান নকৰাৰ অভিযোগ উত্থাপিত হৈ আহিছে। ইপিনে প্লাষ্টিকৰ সামগ্ৰী ৰাজ্যৰ চুকে কোনে ভৰি পৰাত এতিয়া মাটিৰ বাচন বৰ্তন সমুহো অনাদৃত অৱহেলিত হৈ পৰিছে।পূৰ্বৰ দৰে ধৰ্মীয় কাম-কাজত মাটিৰ বাচন বৰ্তন ব্যাৱহাৰৰ পৰিবৰ্তে প্লাষ্টিকৰ সামগ্ৰী ব্যাৱহাৰ কৰিবলৈ ধৰাত মৃৎশিল্পী সকলৰ বাবে অভিশাপ স্বৰূপ নৌ  হৈ পৰিছে। ইমানৰ পিছতো গাওঁ বাসীক কোনো ধৰণৰ সহায় সাহায্য কৰিবলৈ কোনো জনপ্ৰতিনিধি আগবাঢ়ি নহাত আক্ষেপ প্ৰকাশ কৰিছে বয়োজেষ্ঠ মৃৎশিল্পী সকলে। বিগত ১৫ বছৰীয়া কংগ্ৰেছৰ শাসন কালত এই সকল মৃৎশিল্পীক গুৰুত্ব প্ৰদান নকৰা বুলি আক্ষেপ প্ৰকাশ কৰাৰ পিছতো ৰাজ্যৰ বিজেপিৰ মিত্ৰশক্তিৰ চৰকাৰ খনেও কোনো ধৰণৰ গুৰুত্ব প্ৰদান কৰা নাই বুলি অভিযোগ উত্থাপিত হৈছে। উল্লেখ্য যে গাওঁ খনৰ পূব ফালটো হাজো সমষ্টি, পশ্চিম ফালে বৰক্ষেত্ৰী সমষ্টিৰ অন্তৰ্গত হোৱা বাবে কোনো জনপ্ৰতিনিধিয়ে সেই সকল হীৰা সম্প্ৰদায়ৰ লোক সকলক গুৰুত্ব নিদিয়াৰ অভিযোগ গাওঁ বাসীৰ। এতিয়াও গাওঁ খনৰ বহুত পৰিয়াল প্ৰধান মন্ত্ৰী আৱাস যোজনাৰ গৃহৰ পৰাও বঞ্চিত হৈ আছে। নাই কোনো বিশুদ্ধ খোৱা পানীৰ ব্যৱস্থা। এতিয়াও বহুত পৰিয়াল ভঙা ঘৰ, ভঙা চালিৰ তলত থাকিব লগীয়া হৈছে। তথাপিও তেওঁলোকে নিজৰ পূৰ্ব পুৰুষৰ কৰ্ম মাটিৰ বাচন বৰ্তন তৈয়াৰ কৰি গ্ৰাহকৰ অপেক্ষাত আছে।