দুদিন জখলাবন্ধা চিকিৎসালয় বন্ধ : জখলাবন্ধা চিকিৎসালয়ত চিকিৎসক, চিকিৎসা কৰ্মীৰ স্বাৱ পৰীক্ষা, হ’ম কোৱাৰেণ্টানৰ নিৰ্দেশ ।
কলিয়াবৰ : কভিড-১৯ সংক্ৰমিত ধুতিৰাম মুণ্ডাৰ সংক্ৰমণক লৈ স্বাস্থ্য বিভাগৰ বৰমূৰীয়াৰ আলোচনা জখলাবন্ধা চিকিৎসালয়ত। কভিড – ১৯ সংক্ৰমণৰ প্ৰতিৰোধকল্পে জখলাবন্ধা চিকিৎসালয় দুদিনৰ বাবে বন্ধৰ নিৰ্দেশ উৰ্দ্ধতন কৰ্তৃপক্ষৰ। এশ শতাংশ পৰিস্কৰণৰ ব্যৱস্থা হোৱাৰ পিচত অহা মঙ্গলবাৰৰ পৰাহে চিকিৎসা সেৱা পুনৰ আৰম্ভ হব। জখলাবন্ধা চিকিৎসালয়লৈ যোৱা ২৫ জুন বৃহস্পতিবাৰে জ্বৰ আৰু পায়খানাত আক্ৰান্ত হৈ চিকিৎসাৰ বাবে আহিছিল নিজৰিৰ ধুতিৰাৰাম মুণ্ডা। চিকিৎসা সেৱা গ্ৰহণ কৰি শনিবাৰে ঘৰলৈ উভতাৰ পিছত কডিড – ১৯ সংক্ৰমণ প্ৰমাণিত হোৱাত হাহাকাৰ পৰিৱেশৰ সৃষ্টি হয় চিকিৎসালয়ত। যোৱা ২০ জুনত বহিঃ ৰাজ্যৰ পৰা আহি স্বাৱ পৰীক্ষা কৰিবলৈ দিছিল যদিও ধুতিৰামে এই বিষয়ে চিকিৎসকক অৱগত কৰা নাছিল। সেই লৈ পোনপটীয়াকৈ সংস্পৰ্শলৈ অহা চিকিৎসক-চিকিৎসাকৰ্মী সহ চিকিৎসালয়ৰ আন সকলোৰে পৰীক্ষাৰ বাবে স্বাৱ সংগ্ৰহ কৰে। সেই লৈ নগাঁও জিলাৰ যুটীয়া স্বাস্থ্য সঞ্চালক অতুল চন্দ্ৰ পাটৰ উপস্থিত হৈ জখলাবন্ধা চিকিৎসালয়ৰ অধীক্ষক তথা মহকুমা স্বাস্থ্য বিষয়া ডা° খেমন্ত শইকীয়া আৰু চিকিৎসকৰ সৈতে এক আলোচনাত মিলিত হয়। কলিয়াবৰ মহকুমাধিপতি বিতুপন নেওগেও চিকিৎসক প্ৰতিনিধি দলটোৰে বিষয়টোৰ সন্দৰ্ভত মত বিনিযভয় কৰে। উল্লেখযোগ্য যে, কলিয়াবৰৰ নিজৰিৰ ধুতিৰাম মুণ্ডা (৪৫)ৰ লগত অহা জিকিল এক্কা (২৪) আৰু গোবিন্দ মূড়া (২৫)ৰো কভিড – ১৯ সংক্ৰমণ প্ৰমাণিত হোৱাত তিনিওকে নগাঁও চিকিৎসালয়লৈ শনিবাৰেই প্ৰেৰণ কৰে। শনিবাৰে সন্ধ্যা কুঁৱৰীটোলৰ একেটা পৰিয়ালৰ সাতজনক কভিড – ১৯ সংক্ৰমিত হোৱাৰ পিছত চিকিৎসালয়লৈ নিয়াৰ সময়ত ব্যাপক উত্তেজনাৰ সৃষ্টি হয় কলিয়াবৰত। আৰক্ষীৰ প্ৰত্যক্ষ সহযোগতহে স্বাস্থ্য কৰ্মীয়ে আটাইকে নগাঁও চিকিৎসালয়লৈ প্ৰেৰণ কৰিবলৈ সক্ষম হয়।