সদায় শূন্য সহনশীলতাৰ কথা কোৱা বিজেপি চৰকাৰে স্বাস্থ্য বিভাগত কিমান সহনশীলতাৰে উন্নয়ন কৰিছে তাৰেই এক বাস্তৱ প্ৰতিছব্বি দেখুৱাম এই প্ৰতিবেদনৰ জৰিয়তে। বঙাইগাঁও জিলাৰ মাণিকপুৰ মহাত্মা গান্ধী আদৰ্শ চিকিৎসালয়ৰ ওপৰ মহলাত থকা কোভিড চেন্টাৰত নৰক যন্ত্ৰণা ভোগ কৰি দিন অতিবাহিত কৰিছে কোভিড ৰোগীয়ে ।কোঠালিৰ ভিতৰত নাই কনো চাফ চিকুনতা, প্ৰশ্ৰাৱগাৰ , সৌচাগাৰ, বাথৰূমৰ কদৰ্য ৰূপ দেখিলে আপোনাৰ চকু কপালত উঠিব। তাত্পৰ্যপূৰ্ণ কথাটো হ’ল এজন কোভিড ৰোগী ৰিলিজ লোৱাৰ পিছত বিছনা চেনিটাইজ নকৰাকৈয়ে একেখন বিছনাতে আন কোভিড ৰোগীয়ে নিজে চাফ চিকুণ কৰি থাকিব লগীয়া হৈছে। পানীৰ টেপ খুলিলেই ব্যৱহাৰৰ অনুপযোগী ৰঙা চাহ সদৃশ পানী ওলায়। স্নান কৰাটো দুৰৈৰ কথা হাতেৰে চুলেই নানান ৰোগ সংক্ৰমণ হ’ব পাৰে। দৈনিক ৩ লিটাৰ পেকেজিং খোৱা পানী দিয়ে দায়িত্ব সামৰিছে বিয়াগোম স্বাস্থ্য বিভাগে। মুঠতে মাণিকপুৰ মহাত্মা গান্ধী আদৰ্শ চিকিৎসালয়ত এক অৰাজকতাৰ মাজেৰে চলিছে স্বাস্থ্য সেৱা। চৰকাৰে কোটি কোটি টকা খৰচ কৰিছে কোভিট ৰোগী থকা চেন্টাৰ তথা ৰোগীৰ বাবে। কিন্তু প্ৰকৃততে কোভিডৰ বাবে আৱন্টিত ধনৰ সদ ব্যৱহাৰ হৈছেনে। ভূক্তভোগী কোভিট ৰোগীয়ে ইয়াৰ এক বিহীত ব্যৱস্থা গ্ৰহণ কৰাৰ বাবে স্বাস্থ্য বিভাগৰ লগতে উপায়ুক্ত মহোদয়ক আৰু মনিকপুৰ ৰাজ চক্ৰ বিষয়া আহ্বান জনাইছে।
