গুৱাহাটী প্ৰেছ ক্লাবত অসমৰ খিলঞ্জীয়া মুছলিম জনগোষ্ঠীৰ সংবাদমেল

নাজিৰা : “চৰকাৰ সলনি হ’ল, কিন্তু বাংলাদেশী লবিৰ প্ৰভাৱৰ পৰা চৰকাৰ মুক্ত নহ’ল।” শাসনাধিষ্ট চৰকাৰ খনৰ বিৰূদ্ধে এই গুৰুতৰ অভিযোগ গৰিয়া মৰিয়া দেশী সমন্বয় ৰক্ষী সমিতিৰ। ইছলাম ধৰ্মী খিলঞ্জীয়া সংগঠনৰ উমেহতীয়া মঞ্চ গৰিয়া মৰিয়া দেশী সমন্বয় ৰক্ষী সমিতিৰখনৰ হৈ আজি গুৱাহাটী প্ৰেছ ক্লাবত অনুষ্ঠিত সংবাদ মেলত সম্বোধন কৰি সমিতিখনৰ মুখ্য আহ্বয়ক সদৌ অসম গৰিয়া মৰিয়া দেশী জাতীয় পৰিষদৰ সভাপতি হাফিজুল আহমেদ, সমন্বয়ক দেশী জনগোষ্ঠীয় মঞ্চৰ সভাপতি হেদায়েত উল্লাহ, সদৌ অসম গৰিয়া মৰিয়া যুৱ ছাত্ৰ পৰিষদৰ সাধাৰণ সম্পাদক মইনুল হক আৰু উপদেষ্টা সদৌ অসম গৰিয়া মৰিয়া যুৱ ছাত্ৰ পৰিষদৰ মুখ্য উপদেষ্টা চেলিম আহমেদে কয় যে বিগত বাজেট অধিবেশনত চৰকাৰখনে বিত্তমন্ত্ৰী হিমন্ত বিশ্ব শৰ্মাৰ জৰিয়তে গৰিয়া মৰিয়া দেশী জলহা আদি জনগোষ্ঠীৰ বাবে ১০০ কৌটি টকা ধাৰ্যৰে সুকীয়া উন্নয়ন নিগম তথা জৰীপ ঘোষণা কৰিছিল। আৰু তাৰ পাছত সংখ্যালঘু বিভাগৰ মন্ত্ৰী ডাঙৰীয়াই ও দলসমূহক আনুষ্ঠানিক ভাগে আমন্ত্ৰণ কৰি বিষয়টো আগবঢ়াই আলোচনা কৰে। কিন্তু সকলো ভেকো ভাওনাত পৰিণত হ’ল – আমো নাই ফৰ্মূতিও নাই! আজিলৈ চৰকাৰখনে ঘোষণা কৰা মতে একো কাৰ্যকৰী কৰা পৰিলক্ষিত নহল। নেতাসকলে ক্ষোভ প্ৰকাশ কৰি কয় যে চৰকাৰখনে বাংলাদেশী মূলৰ মুচলমান লবিৰ হাতোৰাত বন্দী হৈ প্ৰতিশ্ৰুতি পালনত এনেদৰে ব্যৰ্থ হৈছে, নহ’লে উক্ত ঘোষণা কিয় কাৰ্যকৰী কৰিব বিচৰা নাই? বিগত ৭৩ বছৰ ধৰি ইছলামধৰ্মী খিলঞ্জীয়া বিৰোধী এক বিশেষ লবিয়ে চৰকাৰসমূহৰ ওপৰত প্ৰভাৱ বিস্তাৰ পেলাই অহা পৰিলক্ষিত হৈ আহিছে আৰু বৰ্তমানৰ চৰকাৰ খনেও তেনে এক প্ৰভাৱৰ পৰা মুক্ত হ’ব পৰা নাই। যদি তেনেকুৱাই হৈছে তেন্তে সেয়া অসমৰ খিলঞ্জীয়া ৰাইজৰ বাবে অতি দুৰ্ভাগ্যজনক। লোকক দেখুৱাই বাংলাদেশী হিন্দু প্ৰীতি আৰু ভিতৰি ভিতৰি বাংলাদেশী মুচলমান প্ৰীতি কৌশল পৰিহাৰ কৰি চৰকাৰ খনে প্ৰতিশ্ৰুতি সমূহ শীঘ্ৰে কাৰ্যকৰী কৰাৰ ব্যৱস্থা গ্ৰহণ কৰক। অন্যথা গৰীয়া মৰিয়া দেশী সকলে চৰকাৰৰ এই প্ৰতাৰণাৰ উচিত গণতান্ত্ৰিক প্ৰত্যুত্তৰ দিবলৈ বাধ্য থাকিব। সমিতিখনৰ নেতৃবৃন্দই ইয়াৰ উপৰিও শাসনাধিষ্ট চৰকাৰখনক সংখ্যালঘু বিভাগত ছাত্ৰ বৃত্তিৰ নামত ঘটা ৫o১ কোটি ৪০ লাখ টকাৰ কেলেংকাৰীৰ উচ্চ পৰ্যায়ৰ তদন্ত কৰি দোষীক শাস্তি বিহাৰ দাবী জনায়।