কেৱল আনুষ্ঠানিক নিয়ম পালন কৰিলে কোঁচগাঁৱৰ ৰাইজে ৷ জামুগুৰিহাটৰ কালীয়দমন ক্ষেত্ৰত উৎসাহহীনভাবে উদযাপন ২২৫ বছৰীয়া পৰম্পৰা

জামুগুৰিহাট : গৌৰৱোজ্জ্বল দ্বি-শতবৰ্ষ অতিক্ৰম কৰা জামুগুৰিহাটৰ কালীয়দমন ক্ষেত্ৰত যেন এইবেলি বিৰাজ কৰিছে নিমাওমাও পৰিৱেশ ৷ পূৰ্ৱৰ সেই উৎসাহ উদ্দীপনাৰ পৰিৱৰ্তে এইবাৰ দেখা পোৱা গৈছে গাঁওবাসীৰ সেমেকা দুচকু ৷ বিগত দীৰ্ঘ ইতিহাসত, ২২৫ বছৰীয়া গৌৰৱোজ্জ্বল কালীয়দমন নাটৰ ভাওনা মহোৎসৱ এইবেলি মহামাৰী সদৃশ ক’ৰনাৰ বাবেই বাতিল কৰিবলগীয়া হোৱাত গাঁওবাসী দুখিত তথা মৰ্মাহত হৈ পৰিছে৷ গুৰুজনাৰ তিৰোভাৱ তিথিৰ বিশেষ দিনটোত প্ৰতিবছৰেই নিৰবিচ্চিন্নভাৱে গাঁওবাসীয়ে যথেষ্ট উৎসাহ উদ্দীপনাৰে উদযাপন কৰি আহিছিল তিথিভাগৰ লগতে নিশালৈ কালীয়দমন নাটৰ ভাঁওনা ৷ য’ত ৰাজ্যৰ ভিন্ন প্ৰান্তৰ হাজাৰ হাজাৰ ভক্তপ্ৰাণ ৰাইজ কালীয়দমন ক্ষেত্ৰত সমবেত হৈ শৰাই শলিতা আগবঢ়াই আৰু মনোবাঞ্চা পূৰণৰ অৰ্থে ভগৱানৰ ওচৰত আশীষ বিচাৰি সেৱা গ্ৰহণ কৰি আহিছিল ৷ গাঁওবাসীয়েও দূৰণীবতিয়া ভকত বৈঞ্চৱসকলৰ লগতে কালীয়দমন ক্ষেত্ৰলৈ অহা প্ৰতিগৰাকী ভকত বৈঞ্চৱক বিগত বৰ্ষসমুহত ভকতিৰ অমিয়া পান কৰাবলৈ চেষ্টাৰ ক্ৰুটি কৰা নাছিল ৷ কিন্তু এইবেলি সম্পূৰ্ণ বিপৰীত এক ছবি দেখা পাবলগীয়া হোৱাত গাঁওবাসীৰ মাজত বিৰাজ কৰিছে এক বুজাব নোৱাৰা দুখৰ অনুভৱ ৷ যদিওবা অনুষ্টুপীয়াকৈ গাঁওবাসীয়ে গুৰুজনাৰ তিৰোভাৱ তিথিভাগ সম্পূৰ্ণ চৰকাৰী নীতি নিয়মৰ মাজেৰে পালন কৰিছে তথাপিও নিশাৰ সকলোৰে আকৰ্ষণৰ কেন্দ্ৰবিন্দু কালীয়দমন ভাঁওনা মহোৎসৱভাগ বাতিল কৰিবলগীয়া হোৱা বিষয়টিয়ে যথেষ্ট মনোকষ্ট দিছে গাঁওবাসীক ৷ অৱশ্যে মহামাৰী ক’ৰণাৰ এই সংকটৰ পৰা বিশ্ববাসীক পৰিত্ৰাণ দিবৰ বাবে ভগৱন্তৰ ওচৰত সেৱা লৈ আশীৰ্বাদ বিচাৰিলে গাঁওবাসীয়ে ৷ উল্লেখ্য যে ১৭৯৫ চনৰে পৰা ধৰ্মীয় বিশ্বাসক সাৰোগত কৰি গুৰুজনাৰ তিৰোভাৱ তিথিৰ দিনটোত জামুগুৰিহাটৰ কোঁচগাঁৱৰ গঞা ৰাইজে নিৰবিচিন্নভাবে অনুষ্ঠিত কৰি অহা মহোৎসৱ ভাগ বিগত দীৰ্ঘ ইতিহাসত মহামাৰীৰ বাবে বাতিল কৰিবলগীয়া হোৱাৰ কথা এয়ে প্ৰথম ৷