বটদ্ৰৱা উন্নয়ন খণ্ডত আচনি ৰূপায়ণৰ নামত লুন্ঠনৰ বজাৰ । একাধিক পঞ্চায়তৰ দায়িত্ব বহন কৰিছে কেবাজনো পঞ্চায়ত সচিবে ।
এ জে আকন্দ, নগাঁও
দুৰ্নীতি-ভ্ৰষ্টাচাৰৰ বাবে কংগ্ৰেছ চৰকাৰক অসম ৰাইজে উৎখাত কৰি দুৰ্নীতিৰ ক্ষেত্ৰত শূন্য শহনশীলতা গ্ৰহণ কৰাৰ শ্লোগান দিয়া বিজেপিক শাসনৰ গাদীত বহাইছিল। কিন্তু সৰ্বানন্দ সোনোৱাল নেতৃত্বাধীন চৰকাৰখনৰ দিনতো বিভিন্ন বিভাগত একাংশ বিষয়া-কৰ্মচাৰীয়ে কংগ্ৰেছ চৰকাৰৰ দিনৰ পদাংক অনুকৰণ কৰি দুৰ্নীতিয়ে নীতি কৰি তোলাৰ অভিযোগ সৰ্বত্ৰ উঠিছে। বিশেষকৈ পঞ্চায়ত আৰু গ্ৰামোন্নয়ন বিভাগত বিভিন্ন আঁচনি ৰূপায়ণৰ নামত চলিছে লুন্ঠনৰাজৰ অঘোষিত প্ৰতিযোগিতা। শেহতীয়াকৈ নগাঁও জিলাৰ গ্ৰামোন্নয়ন বিভাগৰ অন্তৰ্গত বটদ্ৰৱা উন্নয়ন খণ্ডত সংঘটিত হৈ আহিছে ব্যাপক দুৰ্নীতি। উত্থাপিত অভিযোগ অনুসৰি, উন্নয়ন খণ্ডটোৰ অন্তৰ্গত গাঁও পঞ্চায়ত সমুহত এম জি এনৰেগা, চতুৰ্থ বিত্তীয় আয়োগ, এচ অ’ডি পি আদি আঁচনি ৰূপায়ণত ব্যাপক কেলেংকাৰী সংঘটিত হৈছে। ১৫টা গাঁও পঞ্চায়তৰে গঠিত উন্নয়ন খণ্ডটোৰ অধিকাংশ পঞ্চায়ত সচিবে খুলিছে লুন্ঠনৰ বজাৰ। ইয়াৰে একাংশ পঞ্চায়ত সচিবে একেটা পঞ্চায়ত দীৰ্ঘদিন কাৰ্য সম্পাদন কৰি জনপ্ৰতিনিধি আৰু কনিষ্ঠ অভিযন্তাৰে মিলি ৰাইজৰ স্বাৰ্থক জলাঞ্জলি দি চলাইছে গৈছে ইটোৰ পিছত সিটো দুৰ্নীতি। ইয়াৰে একাংশ পঞ্চায়ত সচিবে একাধিক পঞ্চায়ত সচিবৰ দায়িত্ব গ্ৰহণ কৰি চলাইছে অবাধ লুন্ঠন। প্ৰাপ্ত তথ্য মতে, গুনমনি হাজৰিকাৰ দায়িত্বত আছে বিলটিয়া আৰু কান্দুলিমাৰী গাঁও পঞ্চায়ত, চন্দন নাথৰ দায়িত্বত আছে ধুপাগুৰি আৰু আমলখি পঞ্চায়ত, আব্দুৰ ৰেজ্জাকৰ দায়িত্ব আছে অকল ধনিয়াভেটি, আমিৰ উদ্দিনৰ দায়িত্বত আছে অকল টুকটুকী পঞ্চায়ত, জয়চান্দ দাসৰ দায়িত্বত আছে শলগুৰি, ৰঞ্জিত বৰাৰ দায়িত্বত আছে কদমনি আৰু বটদ্ৰৱা পঞ্চায়ত, দীপক হাজৰিকাৰ দায়িত্বত আছে ভোমাৰাগুৰি আৰু কটহগুৰি পঞ্চায়ত, প্ৰদীপ বৰাৰ দায়িত্বত আছে ৰামপুৰ সত্ৰ আৰু চহৰীয়া পঞ্চায়ত, মন্টু বৰাৰ দায়িত্বত আছে উপৰ- ডুমডুমীয়া আৰু শিলপুখুৰী গাঁও পঞ্চায়তত। একাংশ শাসকীয় দলটোৰ একাংশ নেতা-পালিনেতাৰ ছত্ৰছায়াত থাকি এই সকল পঞ্চায়ত সচিবে বছৰ বছৰ ধৰি একেটা পঞ্চায়তত থাকি লুন্ঠন চলাই গৈছে যদিও তেওঁলোকৰ বিৰুদ্ধে বিভাগীয় কৰ্তৃপক্ষই ব্যৱস্থা গ্ৰহণ কৰিবলৈ সাহস গোটাব পৰা নাই। বিভিন্ন আচনি ৰূপায়ণৰ ক্ষেত্ৰত কাম চোৱা চিতাৰ দায়িত্বত থকা এই সমগ্ৰ দুৰ্নীতি-অনিয়ম কাৰ্যৰ লগত কনিষ্ঠ অভিযন্তা আব্দুল হাচিম আৰু ঠিকা ভিত্তিক অভিযন্তা যুগত কাকতি জৰিত থকাৰ গুৰুতৰ অভিযোগ উঠিছে। এই সকলে পঞ্চায়ত সচিব আৰু কনিষ্ঠ অভিযন্তাৰ দপদপনি ইমানেই বৃদ্ধি পাইছে যে কাৰো গুৰু গোহাঁই নমনা হৈছে বুলি চৰ্চা চলিছে। এই ক্ষেত্ৰত বিভাগীয় কৰ্তৃপক্ষক ব্যৱস্থা গ্ৰহনৰ দাবী জনাইছে সচেতন মহলে।