চিকিৎসকক আতিশয্যৰ প্ৰতিবাদত বুধবাৰে নাগালেণ্ডত ২৪ ঘণ্টাৰ বাবে চিকিৎসা ব্যৱস্থা বন্ধ ঘোষণা

দৈনন্দিন বাৰ্তা ডেস্ক : আৰক্ষীয়ে চিকিৎসকক আতিশয্য কৰাৰ অভিযোগত নাগালেণ্ড ইন-ছাৰ্ভিচ ডক্টৰছ এছ’চিয়েছনে অহা বুধবাৰে পুৱা ৬ বজাৰ পৰা ২৪ ঘণ্টাৰ বাবে ৰাজ্যখনৰ সকলো স্বাস্থ্য সেৱা সম্পূৰ্ণ বন্ধ ঘোষণা কৰিছে ৷ নাগালেণ্ড ইন-ছাৰ্ভিচ ডক্টৰছ এছ’চিয়েছনৰ সভাপতি ডাঃ ৰিতু থুৰ আৰু সম্পাদক ডাঃ আবু ছীকহোছে এক বিবৃতিত কয়, চিকিৎসকৰ বিপক্ষে আৰক্ষীয়ে যি বৰ্বৰতা প্ৰদৰ্শন কৰিছে তাৰ অভিযোগত সম্পূৰ্ণ বন্ধ ঘোষণাৰে প্ৰতিবাদ জনোৱা হৈছে ৷ অৱশ্যে জৰুৰীকালীন সেৱা অব্যাহত থাকিব বুলি সভাপতি আৰু সম্পাদকে জনাইছে ৷ নাগালেণ্ড ইন-ছাৰ্ভিচ ডক্টৰছ এছ’চিয়েছনৰ তৰফৰ পৰা জনাই যে যোৱা ৩ এপ্ৰিলত ডিমাপুৰত ডাঃ নোজেজল ছিজু আৰু ১৭ এপ্ৰিলত ঊষাত ডাঃ মংগশ্বিটুঙক আৰক্ষীয়ে বৰ্বৰভাৱে আতিশয্য কৰিছিল ৷ আনহাতে ঊষাত ২১ আগষ্টৰ নিশা ডাঃ আটোকাক আইআৰবি জোৱানে আতিশয্য কৰিছিল ৷ ইয়াৰ পাচতে ৰাজ্যৰ গৃহ বিভাগে এখন তিনিজনীয়া সদস্যৰ সমিতি তদন্তৰ বাবে গঠন কৰি দিছিল ৷ এই সমিতিয়ে ২৩ আগষ্টত দায়িত্ব লয় আৰু সাত দিনৰ ভিতৰত প্ৰতিবেদন দাখিল কৰাৰ কথা ৷