বিশ্বৰ প্ৰথমজন ফুটবলাৰ হিচাপে চেম্পিয়নছ লীগত এক অনন্য আদৰ্শ মেছিৰ
লিয়নেল মেছিয়ে পুনৰ অভিলেখ গঢ়িলে। এইবাৰ তেওঁ নিজৰ অভিলেখ ভংগ কৰি নতুন অভিলেখ গঢ়িলে। বুধবাৰে বেনফিকাৰ বিৰুদ্ধে পি এছ জিৰ জাৰ্চি পিন্ধি মেচখনৰ প্ৰথমটো গ’ল দিয়ে আৰ্জেণ্টিনাৰ ছুপাৰষ্টাৰগৰাকীয়ে। আৰু ঠিক তেতিয়াই চেম্পিয়নছ লীগত নতুন অভিলেখৰ মালিক হৈ পৰিল মেছি।
৩৫ বছৰীয়া তাৰকা ফুটবলাৰগৰাকীয়ে চেম্পিয়নছ লীগৰ ৪০টা ভিন্ন দলৰ বিৰুদ্ধে গ’ল দিয়াৰ নজিৰ গঢ়ি তুলিছিল। সেইটোৱেই হৈছে বিশ্বৰ যিকোনো দলৰ বিৰুদ্ধে যিকোনো ফুটবলাৰৰ সৰ্বাধিক গ’ল। এই মেচৰ পূৰ্বে সংখ্যা আছিল ৩৯। বেনফিকাৰ বিৰুদ্ধে মেছিয়ে এটা গ’ল দিয়াৰ লগে লগে তেওঁ শীর্ষলৈ গ’ল৷
চেম্পিয়নছ লীগত আৰ্চেনালৰ বিৰুদ্ধে মেছিয়ে সৰ্বাধিক গ’ল দিছিল। উত্তৰ লণ্ডনৰ দলটোৰ বিৰুদ্ধে তেওঁ সৰ্বাধিক ৯টা গ’ল দিছিল। চেম্পিয়নছ লীগত সৰ্বাধিক গ’লৰ মালিক ক্ৰিষ্টিয়ানো ৰোনাল্ডো। তেওঁ মুঠ ১৪০টা গ’লৰ মালিক। তালিকাত দ্বিতীয় স্থানত আছে মেছি। তেওঁৰ মুঠ ১২৬টা গ’ল আছে। তৃতীয় স্থানত বহু পিছ পৰি আছে বাৰ্চিলোনাৰ ৰবাৰ্ট লেৱাণ্ডোস্কি। তেওঁ ৮৯টা গ’লৰ মালিক। ৰিয়েল মাদ্রিদৰ কৰিম বেনজেমাই ৮৬টা গ’ল দিয়ে৷
বেনফিকাৰ বিৰুদ্ধে খেলখনত জয়ী হ’ব নোৱাৰিলে পি এছ জিয়ে। ১-১ গ’লত ড্ৰ’ কৰি সন্তুষ্ট হ’ব লাগিব। এই মেচখনৰ পূৰ্বে পি এছ জিয়ে জুভেন্টাছৰ বিৰুদ্ধে ২-১ আৰু মাকাবি হাইফাৰ বিৰুদ্ধে ৩-১ গ’লত জয়লাভ কৰিছিল। দিনটোৰ আৰম্ভণিতে মেছিয়ে গ’ল দিয়াৰ পাছতো পি এছ জিয়ে অগ্ৰগতি বেছি দিন ধৰি ৰাখিব নোৱাৰিলে।