মাস্ক পৰিধান নকৰাকৈ ইন্দোৰৰ অনুষ্ঠানত মন্ত্ৰী : সমালোচনাৰ সন্মুখীন হৈ ভুল স্বীকাৰ মধ্যপ্ৰদেশৰ গৃহমন্ত্রীৰ

দৈনন্দিন বাৰ্তা ডেস্ক : ইন্দোৰৰ এক অনুষ্ঠানলৈ বুধবাৰে যোৱাৰ সময়ত মুখত মাস্ক পৰিধান কৰা নাছিল মধ্যপ্ৰদেশৰ গৃহমন্ত্রী নৰোত্তম মিশ্রই ৷ তাৰ পাচতে মন্ত্ৰীজন কৈছিল, মই কোন অনুষ্ঠানতে মাস্ক পিন্ধা নাই ৷ কি হ’ব? ইয়াৰ পাচতে সমালোচনাৰ সন্মুখীন হয় মন্ত্ৰীজন ৷ আজি নিজৰ দোষ স্বীকাৰ কৰি কয়, এতিয়াৰ পৰা মাস্ক পিন্ধিব ৷ দেশত কৰ’নাত আক্ৰান্তৰ সংখ্যা বৃদ্ধি পাই আছে ৷ মধ্যপ্রদেশত কৰ’না সংক্ৰমণৰ নিৰিখত ইন্দোৰ একেবাৰে ওপৰত ৷ ২০,৮৩৪ জন সংক্রামিত হৈছে৷ মৃত্যু হৈছে ৫১৬ জন। সেই ইন্দোৰতে বুধবাৰে এক অনুষ্ঠানলৈ মাস্ক নিপিন্ধাকৈ গৈছিল নৰোত্তম মিশ্র। তাৰ পাচতে বিৰোধী কংগ্ৰেছৰ আক্ৰমণ, কৰ’না বিধি কেৱল সাধাৰণ মানুহৰ বাবে প্ৰযোজ্য ! টুইটাৰত মধ্যপ্রদেশৰ কংগ্রেছ মুখপাত্র নৰেন্দ্র ছালুজাই লিখে, কাৰোবাৰ মিশ্ৰৰ বিৰুদ্ধে ব্যৱস্থা লোৱাৰ সাহস আছেনে ? নিয়ম কি কেৱল সাধাৰণ মানুহৰ বাবে ? নিজৰ ভুল স্বীকাৰ কৰি মিশ্ৰই জনালে, মাস্ক পিন্ধাৰ ক্ষেত্ৰত মই আইন বিৰুদ্ধ কাম কৰিছো ৷ প্ৰধানমন্ত্ৰীৰ অনুভূতিৰ লগতো মিলা নাই ৷ মই ভুল স্বীকাৰ কৰিছো আৰু দুঃখ প্রকাশ কৰিছো ৷ মই মাস্ক পিন্ধিম৷ সকলোকে অনুৰোধ কৰিছো, তেওঁলোকে যিন মাস্ক পিন্ধে আৰু সামাজিক দূৰত্ব বিধি মানে ৷ বুধবাৰে অৱশ্যে সমালোচনাৰ মুখত পৰি মিশ্ৰই কয়, শাৰীৰিক সমস্যা আছে৷ তেওঁ মাস্ক পিন্ধিলে শ্বাসৰ কষ্ট হয় ৷