প্ৰত্যেকটো প্ৰত্যাহ্বানৰ মুখামুখী হ’ব পৰাকৈ ছাত্ৰ-ছাত্ৰীসকলক নিজকে প্ৰস্তুত কৰাৰ আহ্বান মন্ত্ৰী কেশৱ মহন্তৰ ।
কলিয়াবৰ : প্ৰত্যেকটো প্ৰত্যাহ্বানৰ মুখামুখী হ’ব পৰাকৈ নিজকে প্ৰস্তুত কৰিবলৈ আহ্বান মন্ত্ৰী কেশৱ মহন্তৰ। আজি প্ৰথমখন অভিনন্দন অনুষ্ঠানত মন্ত্ৰী তথা কলিয়াবৰ সমষ্টিৰ বিধায়কে কৰ’নাৰ এই জটিল সময়ছোৱাত ছাত্ৰ-ছাত্ৰীসকলে সন্মুখীন হোৱা গতানুগতিক জীৱনৰ প্ৰত্যাহ্বানক নেওচি নতুন উদ্যমেৰে সফলতাৰ পথত অগ্ৰসৰ হ’বলৈ আহ্বান জনাই। কৰ’না সংক্ৰমণৰ প্ৰতি লক্ষ্য ৰাখি স্থান বিশেষে সীমিত সংখ্যক ছাত্ৰ-ছাত্ৰীক অভিনন্দন অনুষ্ঠান কলিয়াবৰত। আজিৰে পৰা কলিয়াবৰত মন্ত্ৰী তথা স্থানীয় বিধায়ক কেশৱ মহন্তৰ অভিনন্দন অনুষ্ঠান আৰম্ভ হৈছে। কৰ’না সংক্ৰমণৰ প্ৰতি লক্ষ্য ৰাখি পাঁচটা স্থানত সীমিত সংখ্যক ছাত্ৰ-ছাত্ৰীক অভিনন্দন জনোৱা পৰ্ব আৰম্ভ হৈছে। ২০২০ বৰ্ষৰ মুঠ ২০৪ জন কীৰ্তিমান ছাত্ৰ-ছাত্ৰীক আজি শিশু বিদ্যাপীঠ উচ্চ মাধ্যমিক, কুঁৱৰীটোল, জখলাবন্ধা উচ্চতৰ মাধ্যমিক বিদ্যালয়, চুলুং উচ্চ মাধ্যমিক বিদ্যালয়ত এই সম্বৰ্দ্ধনা অনুষ্ঠান অনুস্থিত হয়। কাইলৈ মঙ্গলবাৰে ডনবস্ক মিছা, কুঁৱৰীটোল হাইস্কুল পৰৱৰ্তী সম্বৰ্দ্ধনা অনুষ্ঠান অনুষ্ঠিত হ’ব। যোৱা ২০০৬ চনৰে পৰা বিধায়ক ৰূপে উচ্চ মাধ্যমিক আৰু উচ্চতৰ মাধ্যমিক চুড়ান্ত পৰীক্ষাত কৃতিত্বৰে উত্তীৰ্ণ হোৱা ছাত্ৰ-ছাত্ৰীক অভিন্দন অনুষ্ঠানৰ জৰিয়তে প্ৰেৰণা যোগাই আহিছে বৰ্তমানৰ মন্ত্ৰী কেশৱ মহন্তই। আজি কুঁৱৰীটোল স্থিত শিশু বিদ্যাপীঠ উচ্চ মাধ্যমিক বিদ্যালয়ত হোৱা প্ৰথমখন সম্বৰ্দ্ধনা সভাত মুঠ ৫১ জন ছাত্ৰ-ছাত্ৰীক সম্বৰ্দ্ধনা জনোৱা অনুষ্ঠানত উপস্থিত থাকে কলিয়াবৰৰ সু-সন্তান ভাৰতীয় প্ৰশাসনিক সেৱাৰ অৱসৰপ্ৰাপ্ত বিষয়া (মনোনীত) বিষয়া বীৰেন ফুকন, নগাঁও জিলাৰ অতিৰিক্ত উপায়ুক্ত তথা কলিয়াবৰ মহকুমাৰ ভাৰপ্ৰাপ্ত মহকুমাধিপতি বিতুপন নেওগ, কলিয়াবৰ মহকুমা আৰক্ষী বিষয়া মৃন্ময় দাস, কুঁৱৰীটোল শিশু বিদ্যাপীঠৰ পৰিচালনা সমিতিৰ বিষয়-ববীয়া ৰেক্টৰ তথা শিশু বিদ্যাপীঠ উচ্চ মাধ্যমিক বিদ্যালয়ৰ মুঠ ৫১ গৰাকী ছাত্ৰ-ছাত্ৰী আজিৰ অভিনন্দন অনুষ্ঠানত উপস্থিত থাকে। এই অনুষ্ঠানতে কলিয়াবৰ সমষ্টিৰ হাইস্কুল শিক্ষান্ত পৰীক্ষাত এশ শতাংশ ফলাফল লাভ কৰা মুঠ পাঁচখন বিদ্যালয় ক্ৰমে শিশু বিদ্যাপীঠ উচ্চ মাধ্যমিক বিদ্যালয়, শঙ্কৰদেৱ শিশু নিকেতন, কলিয়াবৰ তিনিআলি, আয়ুস পাব্লিক স্কুল, জখলাবন্ধা, চে’ণ্ট ৰবাৰ্ট্চ হাইস্কুল, জখলাবন্ধা আৰু মধ্য কলিয়াবৰ বালিকা উচ্চ মাধ্যমিক বিদ্যালয়ক বিধায়ক উন্নয়ন পূঁজিৰ পৰা এক লাখকৈ টকা আগবঢ়োৱা হয়। আনহাতে, কুঁৱৰীটোল শিশু বিদ্যাপীঠ উচ্চ মাধ্যমিক বিদ্যালয়ত অনুষ্ঠিত বিদ্যালয়ৰ অভিনন্দন অনুষ্ঠান। ধাৰাবাহিকভাৱে সপ্তদশ বাৰলৈ এশ শতাংশ ফলাফল দেখুওৱা বিদ্যালয়ৰ মুঠ ৭১ গৰাকী ছাত্ৰী-ছাত্ৰীক অভিনন্দন জনোৱা হয়। বিদ্যালয়ৰ তৰফৰ পৰা আগবঢ়োৱা প্ৰয়াত ৰেৱন চন্দ্ৰ নাথ ন্যায়ালয়ৰস বঁটা লাভ কৰে কলিয়াবৰ মহকুমাৰ ভিতৰত সৰ্বোচ্চ নম্বৰৰে উত্তীৰ্ণ হোৱা জখলাবন্ধাৰ চে’ণ্ট ৰবাৰ্টচ হাইস্কুলৰ ৰাজদ্বীপ মহন্তই। সুস্মিতা ভূঞা স্মৃতি ন্যাস বঁটা লাভ কৰে দৰিণা শইকীয়াই। ঐছিক গণিতত এশ শতাংশ নম্বৰ লাভ কৰা বিদ্যালয়ৰে জ্যোতিষ্মান বৰাই নগদ ধনৰ বঁটা লাভ কৰে।