ৰাজ্যিক বিজেপি প্ৰতিনিধি দলে পৰিদৰ্শন কৰিলে বিধায়ক পদ্মৰ ‘কণ্যকা’

জামুগুৰিহাট

সমগ্ৰ বিশ্ব এতিয়া ক’ৰোনাৰ ত্রাসত কম্পমান। স্থবিৰ হৈ পৰিছে বিশ্বৰ প্ৰতিখন দেশৰে স্বাভাৱিক গতি।সামাজিক আৰু শাৰীৰিক ব্যৱধান ৰক্ষা কৰি নিজৰ লগতে মানৱজাতিক মৃত্যু মুখৰ পৰা ৰক্ষা কৰাৰ বাহিৰে আৰু এতিয়া কোনো গত্যান্তৰ নাই। বিশ্বৰ লগতে দেশৰ এই জটিল সন্ধিক্ষণত প্ৰধানমন্ত্ৰী নৰেন্দ্ৰ মোডীয়েও থলুৱা ব্যয় বস্তুৰ লগতে উৎপাদিত সামগ্ৰীৰ ক্ষেত্ৰত সকলোকে অগ্ৰাধিকাৰ দিবলৈ আহ্বান জনাইছে। দেশ তথা জাতিৰ এই সংকটপূৰ্ণ সময়ত চতিয়া সমষ্টিৰ জামুগুৰিহাটৰ জীয়াভৰলী নদীৰ দাঁতিচৰত বিধায়ক পদ্ম হাজৰিকাৰ একক প্ৰচেষ্টাত গঢ় লৈ উঠা ‘কণ্যকা’ কৃষি পামৰ কথা চৰ্চালৈ আহিছে৷ প্ৰায় দুহাজাৰৰো অধিক কৃষি ভূমিক সামৰি গঢ়ি তোলা ‘কণ্যকা ‘ কৃষি পামত থলুৱাভাৱে উৎপাদিত কৃষিজাত সামগ্ৰীৰ লগতে মাছ, মাংসই ৰাজ্যৰ বজাৰ দখল কৰাৰ সময়তে এই বিশাল কৃষি পামখন প্ৰত্যক্ষ কৰি ইয়াক আদৰ্শ হিচাপে লৈ ৰাজ্যৰ অন্য প্ৰান্তটো এইদৰে কৃষি পাম গঢ়ি তুলি থলুৱা সামগ্ৰী উৎপাদনৰ লগতে নিবনুৱা যুৱক যুৱতীক কৰ্ম সংস্থাপন বাট কিদৰে মোকলাই দিব পাৰি তাৰ কৌশল আয়ত্ব কৰিবলৈ ৰাজ্য চৰকাৰৰ মন্ত্ৰী  বিধায়কৰ সোঁত বলিছে এতিয়া জামুগুৰিহাটৰ ‘কণ্যকা ‘কৃষি পামলৈ৷ এক সপ্তম পূৰ্বে কৃষি মন্ত্ৰী অতুল বৰাৰ লগতে যোগান মন্ত্ৰী ফণী ভূষণ চৌধৰীয়ে’ কণ্যকা ‘ পৰিদৰ্শন কৰি যোৱাৰ পাছত কালি বিয়লিৰ ভাগত বিশাল কৃষি পামখনত উপস্থিত হয়হি ৰাজ্যিক  বিজেপিৰ এটা উচ্চস্তৰীয় দল।ৰাজ্যিক বিজেপিৰ সাংগঠনিক সম্পাদক ফণী শৰ্মাৰ নেতৃত্বত অহা দলটোৱে দুঘন্টাৰো অধিক সময় ধৰি ‘কণ্যকা ‘ পৰিদৰ্শন কৰি ইয়াত উৎপাদিত শাকপাচলি খেতি দেখি অভিভূত হৈ পৰাৰ লগতে বিধায়ক পদ্ম হাজৰিকাৰ  প্ৰশংসাত পঞ্চমুখ হৈ পৰে৷ ৰাজ্যিক বিজেপিৰ সাংগঠনিক সম্পাদক ফণী শৰ্মাৰ লগতে ৰাজ্যিক বিজেপিৰ সাধাৰণ সম্পাদক পুলক গোঁহাই, সম্পাদক অমিয় ভূঞা আৰু দীপ্লু ৰঞ্জন বৰাই চতিয়াৰ বিধায়ক গৰাকীৰ ঐকান্তিক প্ৰচেষ্টাত জীয়াভৰলীৰ পাৰত গঢ় লৈ উঠা ‘কণ্যকা ‘ কৃষি পামৰ সেন্দুৰিয়া গতি প্ৰশংসা কৰাৰ লগতে ‘কণ্যকা ‘ৰ আদৰ্শ সকলোৱে গ্ৰহণ কৰিলে আমি নিজেই আত্মসংস্হাপনৰ বাট মুকলি কৰি ল’বলৈ সক্ষম হ’ম বুলি মন্তব্য কৰে৷ উল্লেখ্য যে জামুগুৰিহাটৰ পশ্চিম প্ৰান্তত জীয়াভৰলী নদীৰ পাৰত গঢ়ি উঠা ‘কণ্যকা’ৰ কৃষিজাত সামগ্ৰীয়ে উত্তৰ অসমৰ লগতে গুৱাহাটীকে ধৰি বিভিন্ন স্থানত এক সুকীয়া বজাৰ দখল কৰিবলৈ সক্ষম হৈছে।