নগাঁৱৰ ঐতিহ্যমণ্ডিত বেপ্টিষ্ট গীৰ্জালৈ পাঁচ লাখ টকাৰ অনুদান বিধায়ক ৰূপক শৰ্মাৰ

নগাঁও, ১১ অক্টোবৰ : নগাঁও চহৰৰ মাজমজিয়াত স্থিত ঐতিহ্যমণ্ডিত বেপ্টিষ্ট চাৰ্চৰ সভাগৃহ আৰু আন্ত:গাঠনি উন্নয়নৰ বাবে অসম চৰকাৰৰ আছুতীয়া পুঁজিৰ জৰিয়তে নগাঁও সদৰ সমষ্টিৰ বিধায়ক ৰূপক শৰ্মাই আজি পাঁচ লাখ টকাৰ অনুদান আগবঢ়ায় । গীৰ্জা কৰ্তৃপক্ষক উক্ত ধনৰাশিৰ চেক প্ৰদান কৰি বিধায়ক শৰ্মাই কয় যে সংকট কালত অসমীয়া ভাষাক উদ্ধাৰ কৰোতাসকলৰ অন্যতম মাইলচ ব্ৰনচনৰ প্ৰচেষ্টাত গঢ় লৈ উঠা নগাঁৱৰ ঐতিহ্যমণ্ডিত বেপ্টিষ্ট চাৰ্চৰ এক সুকীয়া পৰিচয় আছে । ঐতিহ্য বহনকাৰী এই গীৰ্জাক লৈ আমি গৌৰৱান্বিত। সকলোৰে আদৰৰ এই বা চাৰ্চক সুন্দৰকৈ ৰখাটো আমাৰ কতৰ্ব্য। সেয়ে বেপ্টিষ্ট চাৰ্চৰ সভাগৃহ আৰু আন্ত:গাঠনি উন্নয়নৰ বাবে অসম চৰকাৰৰ আছুতীয়া পুঁজিৰ জৰিয়তে আজি ৫ লাখ টকাৰ অনুদান আগবঢ়োৱা হয়। ইয়াৰ পূৰ্বেও অসম দৰ্শন আচঁনিৰ অধীনত নগাঁও বেপ্টিষ্ট চাৰ্চলৈ ১০ লাখ টকাৰ অনুদান আগবঢ়োৱা হৈছিল বুলিও বিধায়ক গৰাকীয়ে জানিবলৈ দিয়ে । আনহাতে চৰকাৰৰ পৰা লাভ কৰা এই অনুদানেৰে নগাঁও বেপ্টিষ্ট চাৰ্চ আৰু অধিক আটকধুনীয়া হৈ পৰিব বুলি বিধায়ক শৰ্মাই আশা প্ৰকাশ কৰে ।