Breaking

কোৰোনা সংকটৰ সময়ত মহম্মদ ছামিৰ মহনুভৱতা : প্ৰতিদিনে ১০ হেজাৰ লোকৰ মাজত খাদ্য সামগ্ৰী বিতৰণ

0 23

নতুন দিল্লী

বিশ্ব মহামাৰী ক’ৰোনা ভাইৰাছৰ সংক্ৰমণ ভাৰততো প্ৰতিদিনে বৃদ্ধি পাবলৈ ধৰিছে। এই সংকটৰ সময়ত প্ৰতিদিনে ৮-১০ হেজাৰ লোকক খাদ্য সামগ্ৰী যোগান ধৰি মহানুভৱতাৰ পৰিচয় দিছে ভাৰতীয় ক্ৰিকেট দলৰ পেচাৰ মহম্মদ ছামিয়ে৷ ক’ৰোনাৰ সংক্ৰমণ বাধা দিয়াৰ লক্ষ্যৰে বিগত ২৪ মাৰ্চৰ পৰা দেশজুৰি চলি আছে লকডাউন৷ এই সময়ছোৱাত উপাৰ্জনৰ পথ সম্পূৰ্ণৰূপে বন্ধ হৈ পৰাত গভীৰ সংকটত পৰিছে শ্ৰমিকসকল৷ বিপদৰ সময়ত এই শ্ৰমিকসকলৰ কাষত থিয় হৈছে ছামি৷ গৃহ জিলা আমৰোহাত ছামিয়ে স্থানীয় প্ৰশাসনৰ সহায়ত শ্ৰমিক সকলক যোগান ধৰিছে পুষ্টিকৰ খাদ্য৷ দিল্লী-লক্ষ্ণৌ ৰাষ্ট্ৰীয় ঘাইপথত তেওঁ নিজেই বিহাৰ আৰু উত্তৰ প্ৰদেশৰ ঘৰমুৱা শ্ৰমিকসকলক জিলা প্ৰশাসনৰ সহায়ত ফলমূল, পানী আৰু আন খাদ্য সামগ্ৰী বিতৰণ কৰিছে। প্ৰতিদিনে তেওঁ ৮ৰ পৰা ১০ হেজাৰ শ্ৰমিকক সম্পূৰ্ণ নিজা খৰচৰে যোগান ধৰিছে খাদ্য৷ তদুপৰি শ্ৰমিকসকলক সুকলমে ঘৰলৈ পঠিয়াবলৈ চেষ্টা কৰিছে ছামিয়ে৷ ৰমজানৰ পৱিত্ৰ মাহত সকলোকে সামৰ্থ্য অনুযায়ী সহায়ৰ হা আগবঢ়াবলৈ আহ্বান জনাইছে টীম ইণ্ডিয়াৰ মুখ্য পেচাৰজনে৷ ইপিনে মানৱতাৰ নিদৰ্শন দেখুৱাই ছামি হৈ পৰিছে প্ৰশংসাৰ পাত্ৰ৷ বিভিন্ন মহলত চৰ্চিত হৈছে সোঁহতীয়া জ্যেষ্ঠ পেচাৰজন৷