সদ্য সমাপ্ত হোৱা টি-২০ বিশ্বকাপত টিম ইণ্ডিয়াৰ অপমানজনক প্ৰদৰ্শনৰ পৰিপ্ৰেক্ষিতত ভাৰতীয় ক্ৰিকেট ব’ৰ্ডে ৫জন ৰাষ্ট্ৰীয় নিৰ্বাচকক বৰ্খাস্ত কৰিছে। ছেমি ফাইনেলত ইংলেণ্ডৰ হাতত ১০ উইকেটত পৰাস্ত হৈ ৰোহিত শৰ্মা নেতৃত্বাধীন দলটোৱে মুঠ ১৬৯ ৰান ৰক্ষা কৰাত ব্যৰ্থ হয়।ইংলেণ্ডে এটা উইকেট হেৰুৱাই ৪ অভাৰ বাকী থকা অৱস্থাত লক্ষ্যত উপনীত হয়। এয়া আছিল টিম ইণ্ডিয়াৰ অন্যতম অপমানজনক পৰাজয়।
সেয়ে ভাৰতীয় ক্ৰিকেট নিয়ন্ত্ৰণ ব’ৰ্ড (বিচিচিআই) ক্ষোভিত হৈ পৰে। প্ৰাক্তন ক্ৰিকেটাৰ চেতন শৰ্মাৰ অধ্যক্ষতাত চাৰিজনীয়া জ্যেষ্ঠ ৰাষ্ট্ৰীয় বাছনি সমিতিখন ভংগ হৈছে। অষ্ট্ৰেলিয়াত অনুষ্ঠিত হোৱা টি-২০ বিশ্বকাপ প্ৰতিযোগিতাৰ ফাইনেলত প্ৰৱেশ কৰিব নোৱাৰাৰ পৰিপ্ৰেক্ষিতত বিচিচিআইয়ে সংশোধনী ব্যৱস্থা গ্ৰহণ কৰিছে। ২০২১ চনৰ টি-২০ টুৰ্ণামেণ্টৰ পৰা নক আউট পৰ্যায়ৰ পৰা আঁতৰি আহিছিল টিম ইণ্ডিয়াই।
উত্তৰ মণ্ডলৰ পৰা চেতন, কেন্দ্ৰীয় মণ্ডলৰ পৰা হৰবিন্দৰ সিং, দক্ষিণ মণ্ডলৰ পৰা সুনীল যোশী আৰু পূব মণ্ডলৰ পৰা দেৱাশীষ মহন্তক বহিষ্কাৰ কৰা হয়। ইয়াৰে কিছুমানক ২০২০ আৰু ২০২১ চনত নিযুক্তি দিয়া হৈছিল।জ্যেষ্ঠ ৰাষ্ট্ৰীয় নিৰ্বাচকসকলে সাধাৰণতে চাৰি বছৰ কাৰ্যনিৰ্বাহ কৰে। মন কৰিবলগীয়া যে এবে কুৰুভিলাৰ কাৰ্যকাল শেষ হোৱাৰ পিছত বাছনি সমিতিত পশ্চিম মণ্ডলৰ কোনো প্ৰতিনিধিত্ব নাছিল।
শুকুৰবাৰে বিচিচিআইৰ বাৰ্ষিক সাধাৰণ সভা (এজিএম)ৰ পিছত চেতন শৰ্মাক বৰ্খাস্ত কৰা বুলি প্ৰকাশ কৰে পিটিআইয়ে। বিচিচিআইয়ে জ্যেষ্ঠ দল নিৰ্বাচনৰ বাবে নতুন নিৰ্বাচক নিৰ্বাচনৰ বাবে আবেদন আহ্বান কৰিছে। ইচ্ছুক নিৰ্বাচকসকলে চলিত মাহৰ ২৮ তাৰিখৰ পূৰ্বে আবেদন কৰিব লাগিব।