নাজিৰাৰ সমাজ জীৱনত শিক্ষা আৰু সমাজৰ ভিন্ন দিশ সামৰি উত্তৰণৰ পদক্ষেপক সক্ৰিয় ৰূপত উৎসাহ যোগাই অহা তথা জীৱনৰ ৮৯ সংখ্যক বৰ্ষত ভৰি দিয়া অৱসৰপ্ৰাপ্ত অধ্যাপক, বিশিষ্ট কথাশিল্পী, লেখক ঘন হাজৰিকাই জন্মদিন উপলক্ষে দুই শতাধিক লোকৰ উপস্থিতিত জন্মদিনৰ ওলগ আৰু অভিনন্দন গ্ৰহণ কৰে। ১৯৩৫ চনৰ ১ মে’ত জন্ম গ্ৰহণ কৰি ১৯৬৩ চনত গুৱাহাটী বিশ্ববিদ্যালয়ৰপৰা স্নাতকোত্তৰ ডিগ্ৰী আহৰণ কৰাৰ পৰৱৰ্ত্তী সময়ত শিৱসাগৰ কলেজৰ তদানীন্তন অধ্যক্ষ পৰাগধৰ চলিহাৰ আমন্ত্ৰণত ২৩৫ টকাৰ মাহিলী দৰমহাৰে শিক্ষাতত্ব বিভাগৰ অধ্যাপকৰ সেৱাত যোগদান কৰাৰ মধুৰ সোঁৱৰণীয়ে আজিও আহ্লাদিত কৰি ৰাখিছে অধ্যাপক ঘন হাজৰিকাক।
পৰহি ৯০ সংখ্যক বৰ্ষত পদাৰ্পণলৈ গতি কৰাৰ সময়ত শিক্ষাবিদজনৰ নাজিৰাৰ আমোলাপট্টিত অৱস্থিত বাসগৃহলৈ দুপৰীয়াৰেপৰা আৰম্ভ হয় জনস্ৰোঁত। জন্মদিনৰ কেক নিজহাতে কাটি সহধৰ্মিনী শকুন্তলা হাজৰিকাৰ সৈতে ৰাইজৰ বিপুল আদৰণিক দুহাতে মৰম আৰু শুভাশীষ হিচাপে গ্ৰহণ কৰি শিক্ষাবিদজনে কৈ গ’ল “মোৰ জীৱনৰ বাবে আজি এয়া এক মহৎ প্ৰাপ্তি । ছাত্ৰ-ছাত্ৰীৰ মনৰ মাজত সোমাই একালত শিক্ষকতাৰ সেৱা কৰি যোৱাৰ সুযোগে ব্যাখ্যাতীতভাৱে একাংশ ছাত্ৰ-ছাত্ৰীৰ পৰৱৰ্ত্তী জীৱনতো সেই শিক্ষাদানৰ চাপ ধৰি ৰাখিবলৈ সক্ষম হোৱাই বিপুল আনন্দ প্ৰদান কৰিছে।” মুঠ পঞ্চাশ বছৰৰ শিক্ষকতাৰ সেৱাত নাজিৰা উচ্চতৰ মাধ্যমিক বহুমুখী বিদ্যালয় আৰু বৰতলা উচ্চতৰ মাধ্যমিক বিদ্যালয়তো প্ৰথম পৰ্য্যায়ত শিক্ষক হিচাপে পাঠদান কৰি সম্পূৰ্ণ ত্ৰিশ বছৰকাল শিৱসাগৰ কলেজতেই অধ্যাপনাই জীৱনত অনুপম অভিজ্ঞতা আৰু জ্ঞান আহৰণ কৰাত পৰিৱেশ সৃষ্টি কৰি যোৱা বুলি কয় । অনেক প্ৰাক্তন ছাত্ৰ-ছাত্ৰীৰ মনৰ মাজত শিক্ষক সকল সেউজ বৃক্ষ স্বৰূপ হৈ জিলিকি থকা বুলি উল্লেখিত দিশটোলৈ আঙুলিয়াই দিয়াত শিক্ষাবিদজনে কয় “শিৱসাগৰ কলেজৰ সেই সময়ৰ যশস্বী অধ্যক্ষ পৰাগধৰ চলিহাৰপৰা বিস্তৃত আৰু নতুনত্বৰ দিশ লাভ কৰা হৈছিল । আজি শিক্ষা বিভাগেও অসমত বিশ্বমানৰ শৈক্ষিক প্ৰতিষ্ঠান গঢ় দিবলৈ অগ্ৰসৰ হোৱাটো গৌৰৱৰ কথা । অৱশ্যে এই ক্ষেত্ৰত শিক্ষাত ৰাজনীতিৰ প্ৰৱেশ ঘটা অনুচিত । তেনেদৰে সময়ে দাবী কৰা অনুসৰি শিক্ষাৰ পাঠ সলনি হ’লেও শিক্ষাৰ মূল আধাৰ সলনি হ’ ব নেৱাৰে ।” সততে স্বচ্ছ হাঁহিৰে উজ্জ্বল মুখৰ শিক্ষাবিদ ঘন হাজৰিকাৰ জন্মদিনৰ কাৰ্য্যসূচীৰ আনুষ্ঠানিক আয়োজন কৰা ৰেৱতী কপহুৱা অপূৰ্ব সমাজে প্ৰস্ত্তত কৰি তোলা সভাত সভাপতিত্ব কৰে শিক্ষাবিদ দিলীপ কুমাৰ ফুকনে । সম্পাদক দেৱজিৎ গগৈয়ে উদ্দেশ্য ব্যাখ্যা কৰাৰ লগতে ৰঞ্জিৎ ফুকনে কাৰ্য্যসূচীৰ আঁত ধৰে । গামোচা, শুভেচ্ছা পত্ৰ, ফুলৰ থোপা, অংকন-চিত্ৰ, ফলৰ টোপোলা আদিৰে সন্মান যাচি সমলয় ই-আলোচনী, নাজিৰা নাট্য সমিতি, পূজা সমিতি, গণ সাহিত্য সংস্কৃতি আৰু অধ্যয়ন মঞ্চ, জ্যেষ্ঠ নাগৰিক সন্মিলনৰ লগতে জ্যেষ্ঠ মহিলা সন্মিলন, শান্তি সাহিত্য মন্দিৰ, ৰেৱতী কপহুৱা শাখা সাহিত্য সভা, , এম চি ক্লাৱ, দীপ জাতীয় বিদ্যালয়, অংকুৰণ সংগীত বিদ্যালয়, শংকৰদেৱ বিদ্যা নিকেতন, স্বৰাজ একাডেমী, সপ্তসুৰ সংগীত আৰু শিল্পকলা বিদ্যালয়, জ্যোতি বিষ্ঞু কলাংগন অসম, বহ্নিমান, ড° বীৰেন্দ্ৰকুমাৰ ভট্টাচাৰ্য্য জন্ম শত-বাৰ্ষিকী উদযাপন সমিতি, নাজিৰা জিলা ক্ৰীড়া সন্থা, সংবাদ সাহিত্য সাংস্কৃতিক মঞ্চ, নাজিৰা সংগীত শিল্পী সমাজ, নাজিৰা জিলা সাংবাদিক সংস্থাকে ধৰি সমাজ আৰু সংস্কৃতিৰ সৈতে জড়িত ব্যক্তি সকলে জন্মদিনৰ সম্বৰ্ধনা জনায় আৰু দীৰ্ঘায়ু কামনা কৰে ।
শিৱসাগৰ জিলা সাহিত্য সভাৰ প্ৰাক্তন সভাপতি যোগ গগৈ, কবি উমেশ গগৈ, বিজয় চন্দ্ৰ বৰা, ড’ অজয়লাল বৰুৱা, ড’ জীৱন কলিতা, অধ্যাপক প্ৰভাত বৰঠাকুৰ, বিমান বৰুৱা, অসমী গগৈ বৰুৱা, আলি হাইদৰ, পৰাগমণি ৰায়বৰুৱা, আব্দুল ৰহমান, জাকিৰুল হুছেইন, গোপাল বৰুৱা, অৰুণ কোঁৱৰ, অঞ্জনা বৰগোহাঁই, হৰেন চন্দ্ৰ নাথ, ধীৰেণ ফুকন আদি ব্যক্তি সকলৰ উপস্থিতিয়ে কাৰ্য্যসূচীৰ সৌষ্ঠৱ বঢ়াই তোলে । ইফালে কবি অজিত খাটনীয়াৰৰ কবিতা পাঠ, কস্ত্তৰী বাইলুং, কাশ্যপী সন্দিকৈ, চিন্থিয়া গগৈ, কল্যাণী ৰাইদঙীয়া, ৰিচিতা বৰুৱা, প্ৰতীক্ষা দত্ত, বাস্তৱিকা গগৈ, আদি শিশু সকলৰ গীত মাত আৰু নৃত্য পৰিৱেশন হয় । সংগীত শিল্পী দিলিপ দাস, প্ৰভাত কোঁৱৰ, উপেন ৰাইদঙীয়া, নিত্যা সন্দিকৈ, ধীৰেণ ফুকন, সংগীতা দাস, বুবুল গগৈ, অনিন্দিতা বৰুৱা, ৰুমী গগৈৰ সংগীতানুষ্ঠানে ৰাইজক আপ্লুত কৰে। পৰিয়াল বৰ্গৰ হৈ ড’ স্বপ্নীল হাজৰিকা, নিলোৎপল হাজৰিকা, পূৰবী পাঠক হাজৰিকা আৰু বিদিশা হাজৰিকাই উপস্থিত ৰাইজ সকললৈ আন্তৰিক কৃতজ্ঞতা জনায় ।
