অ’এনজিচি, অসম সম্পদৰ মুখ্য কাৰ্যালয়-আৱাসীক এলেকাত প্ৰৱেশ কৰিব নোৱাৰিব স্থানীয় ৰাইজ – সৰৱ প্ৰতিক্ৰিয়া বৃহত্তৰ অসমীয়া যুৱ মঞ্চৰ ।

✍ দিলীপ হাজৰিকা, নাজিৰা

দেশৰ মহাৰত্ন তৈল – গেছ উদ্যোগীক প্ৰতিষ্ঠান তেল আৰু প্ৰাকৃতিক গেছ নিগম, অসম সম্পদৰ নাজিৰাস্থিত মুখ্য॥ কাৰ্যালয় আৰু আৱাসীক এলেকাত প্ৰৱেশ কৰিব নোৱাৰে স্থানীয় জনসাধাৰণ। কৰ’না ভাইৰাছ সংক্ৰমণৰ পৰা নিৰাপদ বা সুৰক্ষিত ৰখাৰ অজুহাত দেখুৱাই নিগমৰ অসম সম্পদ কৰ্তৃপক্ষই ৰহস্য জনক ভাৱে প্ৰতিষ্ঠানটোৰ সামাজিক দায়বদ্ধতা নৈসৰ্গিক বিভাগ অথবা অন্যান্য বিভাগৰ জৰিয়তে স্থানীয় ভাৱে ৰূপায়ণ কৰিবলগীয়া বিভিন্ন আঁচনিৰ আবেদনকাৰী অনুষ্ঠান-প্ৰতিষ্ঠান, সামাজিক তথা জাতীয়-জনগোষ্ঠীয় সংগঠনৰ প্ৰতিনিধি তথা ব্যক্তিক প্ৰৱেশত বাধা আৰোপ কৰা হৈছে । উল্লেখযোগ্য যে, কভিড – ১৯ ৰ ভয়াবহ সংক্ৰমণৰ সময়তো অ’ এন জি চি অসম সম্পদলৈ বহি: ৰাজ্যৰ লগতে বিভিন্ন দেশৰ পৰাও বিষয়া – কৰ্মচাৰী বদলি কৰাই আনি কৌশলগত ভাৱে প্ৰতিষ্ঠানটোত কৰ্তব্যত নিয়োজিত কৰি আহিছে। তেনে ক্ষেত্ৰত স্থানীয় লোকক সামাজিক দায়বদ্ধতা আঁচনিত আবেদন-নিবেদন দাখিল কৰিবলৈও স্থানীয় লোকক প্ৰৱেশ কৰিবলৈ বাধা আৰোপ কৰাৰ লগতে নিগমৰ আৱাসিক এলেকাত থকা স্থানীয় লোকৰ পৰিয়ালৰ আৱাস গৃহলৈও অহা-যোৱা কৰাত বাধা প্ৰদান কৰা হৈছে। ইয়াৰোপৰি অ’এনজিচিৰ নাজিৰাৰ আৱাসিক সকলৰ ঘৰুৱা বন কৰা কামত স্থানীয় প্ৰায় তিনিশতাধিক মহিলা জড়িত হৈ ঘৰ-পৰিয়াল ভৰণ-পোষণ দি আহিছে। এইসকল বনকৰা মহিলাকো আৱাসিক এলেকাত প্ৰৱেশ কৰিবলৈ বাধা প্ৰদান কৰাত উভয়ৰে ব্যাপক সমস্যাৰ সন্মুখীন হোৱা পৰিলক্ষিত হৈছে। নিগমৰ অসম সম্পদ কৰ্তৃপক্ষৰ এনে ৰহস্যজনক কাৰ্যত সৰৱ প্ৰতিক্ৰিয়া প্ৰকাশ কৰিছে বৃহত্তৰ অসমীয়া যুৱ মঞ্চই। সংগঠনটোৰ নাজিৰা আঞ্চলিক সমিতিৰ সভাপতি বিকাশ শৰ্মা আৰু সচিব প্ৰধান জাকিৰ আখটাৰ হুছেইনৰ স্বাক্ষৰেৰে দহ জুনত নাজিৰা মহকুমাৰ মহকুমাধিপতিক বিষয়টোৰ ক্ষেত্ৰত এক সু পদক্ষেপ গ্ৰহণ কৰি সমস্যা সমাধানৰ বাবে আবেদন জনাইছে।