নলবাৰী জিলাৰ কৈঠালকুছিত আজি সদৌ অসম কবি সম্মিলনৰ উদ্যোগত কৈঠালকুছি শাখা কবি সম্মিলন গঠনৰ লগতে কবিতা পাঠৰ অনুষ্ঠানৰ আয়োজন কৰা হয়। অনুষ্ঠানটিৰ পূৰ্বে অসমবাসীৰ হিয়াৰ আমঠু,গণশিল্পী, যুৱ-প্ৰজন্মৰ হাৰ্টথ্ৰৱ খ্যাত সদ্যপ্ৰয়াত জুবিন গাৰ্গলৈ গভীৰ শ্ৰদ্ধাঞ্জলি জনোৱা হয়।গামাৰিমূৰীস্থিত উত্তৰ ধৰ্মপুৰ উচ্চতৰ মাধ্যমিক বিদ্যালয়ত আবেলি ২ বজাত অনুষ্ঠিত হোৱা অনুষ্ঠানটিত সভাপতিত্ব কৰে স্থানীয় আদৰ্শ কৃষক তথা কবি মধু ডেকা, সদৌ অসম কবি সন্মিলনৰ কেন্দ্ৰীয় সাংগঠনিক সম্পাদক তথা বিশিষ্ট কবি মৃণাল কুমাৰ বৰা, সদৌ অসম কবি সন্মিলনৰ ৰাজ্যিক পৰিষদৰ সদস্য শোভন কুমাৰ মেধি, ৰাজ্যিক উপ সমিতিৰ যুৱ শাখাৰ সমন্বয়ক পঞ্চমী চৰকাৰ, সদৌ অসম কবি সন্মিলনৰ অন্তৰ্ভুক্ত বৰক্ষেত্ৰী কবি সন্মিলনৰ সম্পাদক তথা যুৱ- প্ৰজন্মৰ কবি-লিখক-শিক্ষক পিংকু মণি ৰায় চৌধুৰী, বৰক্ষেত্ৰী কবি সন্মিলনৰ সহকাৰী সম্পাদক ধনজিৎ বৈশ্যৰ উপস্থিতিত কৈঠালকুছি শাখা কবি সন্মিলনখন গঠন কৰা হয়।

উক্ত শাখা কবি সন্মিলনখনৰ সভাপতি হিচাপে কবি তথা আদৰ্শ কৃষক মধু ডেকা, উপ-সভাপতিদ্বয় ক্ৰমে প্ৰদীপ শৰ্মা আৰু নৃপেন বৰ্মণ, সম্পাদক হংস বৰ্মণ, সহকাৰী সম্পাদকদ্বয় চন্দন বেজবৰুৱা, শংকৰজ্যোতি বৰ্মণ, কোষাধ্যক্ষ অখিল বৈশ্য, প্ৰচাৰ সম্পাদক তন্ময় শৰ্মা, সাংগঠনিক সম্পাদক ৰবীন চন্দ্ৰ বেজবৰুৱা, পত্ৰিকা সম্পাদক প্ৰণীতা ঠাকুৰীয়া বেজবৰুৱা, কাৰ্যনিৰ্বাহক সদস্য ধ্ৰুৱজ্যোতি শৰ্মা, মনোজ শৰ্মাক নিৰ্বাচিত কৰা হয়। উক্ত অনুষ্ঠানটিত ভালেকেইজন কবিয়ে স্ব-ৰচিত কবিতা পাঠেৰে অনুষ্ঠানটো জীপাল কৰি তোলাৰ উপৰিও প্ৰয়াত শিল্পী জুবিন গাৰ্গলৈ মায়াবিনী গীত গাই সমূহীয়া শ্ৰদ্ধাঞ্জলি জনায়। পৰৱৰ্তী পৰ্যায়ত কৈঠালকুছিৰ গণ্য মান্য ব্যক্তিসকলৰ দিহা পৰামৰ্শক শিৰোগত কৰি কৈঠালকুছি কবি সন্মিলনখনক বিস্তাৰিত ৰূপ প্ৰদান কৰা হ’ব বুলি জনাইছে সদৌ অসম কবি সন্মিলনৰ কেন্দ্ৰীয় সাংগঠনিক সম্পাদক মৃণাল কুমাৰ বৰাই।

অভিনেতা সুশান্ত সিং ৰাজপুতৰ ভগ্নী শ্বেতা সিং কীৰ্তিয়ে ভাতৃৰ মৃত্যু সন্দৰ্ভত উত্থাপন কৰিছে এক নতুন দাবী। শেহতীয়া এক সাক্ষাৎকাৰত শ্বেতা সিঙে প্ৰকাশ কৰিছে যে দুগৰাকী মনোবিজ্ঞানী, এগৰাকী মাৰ্কিন যুক্তৰাষ্ট্ৰৰ আৰু আনগৰাকী মুম্বাইৰ, তেওঁলোকে কৈছে যে সুশান্তক দুগৰাকী ব্যক্তিয়ে হত্যা কৰিছে।

উল্লেখযোগ্য যে, ২০২০ বৰ্ষত জুন মাহত সুশান্ত সিং ৰাজপুতৰ মৃত্যুৱে সমগ্ৰ দেশতে শোকৰ ছাঁ পেলাইছিল, যাৰ ফলত সংবাদ মাধ্যম জোকাৰি গৈছিল আৰু মুম্বাই আৰক্ষী, বলবৎকাৰী সঞ্চালকালয় (ED), মাদক দ্ৰব্য নিয়ন্ত্ৰণ সংস্থা (NCB) আৰু কেন্দ্ৰীয় তদন্তকাৰী সংস্থা (CBI)ৰ দ্বাৰা একাধিক তদন্তৰ সৃষ্টি হৈছিল। যদিও সকলো সংস্থাই এই সিদ্ধান্তত উপনীত হৈছে যে ইয়াৰ সৈতে কোনো দুৰ্নীতি নাছিল, তথাপিও শেহতীয়া বক্তব্যৰ পৰা অনুমান কৰিব পাৰি যে চৰকাৰী তদন্তত তেওঁ এতিয়াও পতিয়ন যোৱা নাই।

শ্বেতাই কয় যে ভাতৃৰ মৃত্যুৰ কিছু সময়ৰ পিছতে এজন আমেৰিকান মনোবিজ্ঞানীয়ে পৰিয়ালৰ এগৰাকী চিনাকি ব্যক্তিৰ জৰিয়তে তেওঁৰ সৈতে যোগাযোগ কৰিছিল। অভিজ্ঞতাৰ বিষয়ে বৰ্ণনা কৰি শ্বেতাই কয়, “মোৰ সৈতে যোগাযোগ কৰা এজন ব্যক্তি আছিল আমেৰিকান মনোবিজ্ঞানী। আমেৰিকাত মোৰ ভাতৃসদৃশ এগৰাকী বন্ধু আছে। যেতিয়া তেওঁ এই কাণ্ডৰ বিষয়ে জানিব পাৰিলে, তেতিয়া তেওঁ কয়, “মোৰ এগৰাকী গডমাদাৰ আছে যিয়ে গভীৰ ধ্যান-সাধনাত সোমাব পাৰে। মই তেওঁৰ লগত কথা পাতিম।” মহিলাগৰাকীক ফোন কৰিলে, তেওঁ জনা নাছিল মই কোন বা মোৰ ভাইটি কোন, তাই কৈছিল, ‘সুশান্তক হত্যা কৰা হৈছে।”

শ্বেতাই কয় যে মুম্বাইৰ আন এজন মনোবিজ্ঞানীয়েও একে কথাই কৈছিল। ‘মুম্বাইৰ পৰা আন এজন মনোবিজ্ঞানী মোৰ ওচৰলৈ আহিল।’ ময়ো তেওঁৰ বিষয়ে একো নাজানিছিলো। ঠিক একেখিনি কথাই ক’লে। দুয়োজনে একেটা কথা কেনেকৈ ক’ব পাৰে? দুয়োজনে ক’লে যে দুজন মানুহে আহি সুশান্তক হত্যা কৰিছিল।’

যদিও চিবিআইৰ চৰকাৰী ক্লজাৰ ৰিপ’ৰ্টত উল্লেখ আছে যে ৰিয়া চক্ৰৱৰ্তী বা আন কোনোবাই অবৈধভাৱে সুশান্তৰ চৰম সিদ্ধান্তৰ ক্ষেত্ৰত আটক, ভাবুকি বা সহযোগিতা কৰা বুলি কোনো প্ৰমাণ পোৱা নাই! তথাপিও সংস্থাটোৱে ৰিয়াই তেওঁৰ ধন আত্মসাৎ কৰাৰ কোনো ইংগিত পোৱা নাছিল, তাৰ পৰিৱৰ্তে সুশান্তই তেওঁৰ পৰিয়ালক বিবেচনা কৰা বুলি উল্লেখ কৰিছে।

অসমৰ ক্ৰীড়া সাংবাদিকতাৰ বাটকটীয়া, ক্ৰীড়া সংগঠক, ক্ৰীড়া মহীৰূহ পুলিন দাসৰ ১০৭ সংখ্যক জন্ম জয়ন্তী আৰু স্মাৰক বক্তৃতানুষ্ঠান আজি গুৱাহাটীস্থিত ইণ্ডিয়া ক্লাৱৰ প্ৰেক্ষাগৃহতে বিয়লি ৩-৩০ বজাত অনুষ্ঠিত হয়৷ পুলিন দাস স্মৃতিৰক্ষা সমিতিয়ে আয়োজন কৰা এই অনুষ্ঠানৰ আৰম্ভণিতে ক্ৰীড়া মহীৰূহগৰাকীৰ প্ৰতিচ্ছবিৰ সন্মুখত বন্তি প্ৰজ্বলন কৰে প্ৰাক্তন আন্তঃৰাষ্ট্ৰীয় বেডমিণ্টন খেলুৱৈ মাধুৰ্য্য বৰুৱা, ক্ৰীড়া সংগঠক প্ৰদীপ চলিহা, বিশিষ্ট সমাজসেৱী অজয় দত্তৰ লগতে অনুষ্ঠানত উপস্থিত থকা বিশিষ্ট ব্যক্তিসকলে ৷ ইয়াৰ পিছতে পুলিন দাস স্মৃতিৰক্ষা সমিতিৰ সম্পাদক তথা পুলিন দাসৰ সুপুত্ৰ কল্যাণ কুমাৰ দাসে আদৰণি ভাষণ আগবঢ়ায়৷ তেওঁ আদৰণি ভাষণত ক্ৰীড়া মহীৰূহগৰাকীৰ কৰ্মৰাজি নতুন প্ৰজন্মৰ মাজলৈ আগবঢ়াই নিবলৈ সকলোকে আহ্বান জনায়৷ ইয়াৰ পিছতে বিশিষ্ট সমাজসেৱক, প্ৰাক্তন ৰাজনীতিক অজয় দত্ত আৰু প্ৰাক্তন আন্তঃৰাষ্ট্ৰীয় শ্বাটলাৰ তথা অইল ইণ্ডিয়াৰ জেনেৰেল মেনেজাৰ মাধুৰ্য্য বৰুৱাক স্মৃতি ৰক্ষা সমিতিৰ ফালৰ পৰা সম্বৰ্দ্ধনা জনোৱা হয়৷ অনুষ্ঠানত ভাষণ দি অজয় দত্তই কয় যে পুলিন দাস আছিল এগৰাকী কিংবদন্তি পুৰুষ৷ পুলিন দাসক এশ শতাংশই ক্ৰীড়া ব্যক্তিত্ব বুলি অভিহিত কৰি তেওঁ কয় যে এইগৰাকী ব্যক্তিয়ে কেৱল সমাজক দিবৰ বাবেই জন্মগ্ৰহণ কৰিছিল৷ অসমত সাংবাদিকতাৰ ধাৰণা ধূসৰ হৈ থকাৰ সময়তে ক্ৰীড়া সাংবাদিক হিচাপে নিজকে প্ৰতিষ্ঠিত কৰি থৈ যোৱা পুলিন দাস সকলোৰে বাবে গৌৰৱৰ বিষয় বুলি কয়৷ স্মৃতি ৰক্ষা সমিতিৰ সভাপতি নয়ন প্ৰসাদে আঁত ধৰা এই অনুষ্ঠানত আন্তঃৰাষ্ট্ৰীয় বেডমিন্টন খেলুৱৈ মাধুৰ্য্য বৰুৱাই সন্মানীয় অতিথিৰূপে অংশগ্ৰহণ কৰে৷ প্ৰথমগৰাকী ক্ৰীড়াবিদৰূপে অইল ইণ্ডিয়া লিমিটেডৰ শীৰ্ষ পদত অধিষ্ঠিত হোৱা মাধুৰ্য্য বৰুৱাই “অসমৰ বিশেষ উদ্ধৃতিৰে আমাৰ দেশৰ ক্ৰীড়া ব্যৱস্থাৰ বিকাশত কৰ্প’ৰেট প্ৰতিষ্ঠানসমূহৰ ভূমিকা ” শীৰ্ষক বিষয়ত স্মাকক বক্তৃতা প্ৰদান কৰে৷ বৰুৱাই কয়— “ অসমত কোনো ধৰণৰ আন্তঃগাথনি নথকাৰ সময়তে তেওঁ ৰাধাগোবিন্দ বৰুৱাৰ সৈতে গুৱাহাটীত নেহৰু ষ্টেডিয়াম নিৰ্মাণ কৰি উলিয়াইছিল৷ মই ক্ৰীড়াক্ষেত্ৰৰ পৰা পোনে পোনে অইলৰ ক্ষেত্ৰখনলৈ গৈছো আৰু এতিয়াও মই হাড়ে হিমজুৱে এজন ক্ৰীড়া ব্যক্তিত্ব৷ বৰ্তমান সময়তো ক্ৰীড়া ক্ষেত্ৰৰ অজস্ৰ সমস্যা আছে যদিও সেই সমস্যাবোৰ সমাধান কৰিব নোৱাৰা বিধৰ নহয়৷ অইলৰ দৰে বহুজাতিক সংস্হাসমূহে অন্য বহু বিভাগৰ লগতে ক্ৰীড়া জগতলৈয়ো সহায়ৰ হাত আগবঢ়াই আহিছে৷ উদ্যোগসমূহে দীৰ্ঘকাল ধৰি ক্ৰীড়াবিদৰ নিযুক্তিৰ লগতে বিভিন্ন প্ৰতিযোগিতা অনুষ্ঠিত কৰি আহিছে৷” তেওঁ কয় যে উদ্যোগিক সংস্হাসমূহে প্ৰতি বছৰে কোটি কোটি টকা ক্ৰীড়াৰ উন্নয়নৰ বাবে আগবঢ়াই আহিছে৷ অসমো এইক্ষেত্ৰত ব্যতিক্ৰম নহয় বুলি উল্লেখ কৰি তেওঁ কয় যে ৰাজ্যখনৰ খেলুৱৈয়ে শীৰ্ষ পৰ্যায়ত উন্নত প্ৰদৰ্শন দাঙি ধৰিবলৈ পাঠ্যক্ৰমত ক্ৰীড়া বিষয় অন্তৰ্ভুক্ত কৰাৰ প্ৰয়োজন আছে৷ তেওঁ ৰাজ্যিক অথবা ৰাষ্ট্ৰীয় পৰ্যায়ত প্ৰদৰ্শন দাঙি ধৰিব নোৱাৰা খেলুৱৈসকলৰ কৰ্ম সংস্হানৰ ব্যৱস্থা কৰিবলৈয়ো চৰকাৰক আহ্বান জনায়৷ অনুষ্ঠানত গুৱাহাটী পৌৰ নিগমৰ কাউন্সিলৰ ৰত্না সিঙক সম্বৰ্দ্ধনা জনোৱা হয়৷ বৰুৱাই লগতে কয় যে বিগত প্ৰায় ৩০ বছৰ ধৰি ৰাজনীতিকসকলে ক্ৰীড়া ক্ষেত্ৰত পদাৰ্পণ কৰি আহিছে৷ এইটো এক স্পৰ্শ কাতৰ বিষয় বুলি উল্লেখ কৰি তেওঁ ক্ষমতাৰ অপব্যৱহাৰ নকৰিবলৈ তেওঁলোকক আহ্বান জনায়৷ ক্ষমতাৰ অপব্যৱহাৰ কৰি আহিছে৷ পুলিন ’দাস স্মৃতিৰক্ষা কমিটীৰ হৈ সম্পাদক কল্যাণ কুমাৰ দাসে অনুষ্ঠানত উপস্থিতি থকা ক্ৰীড়া অনুৰাগীসকলক ধন্যবাদ জ্ঞাপন কৰে৷