অনুষ্কা শৰ্মাই তেওঁৰ স্বামী তথা জনপ্ৰিয় ক্ৰিকেটাৰ বিৰাট কোহলী জন্মদিনত পূৰ্বতে নেদেখা তেওঁৰ বহু ছবি শ্বেয়াৰ কৰি শুভেচ্ছা জনাইছে। স্বামীৰ বাবে লিখিছে প্ৰণয় বাৰ্তা। বিৰাটৰ ধেমেলীয়া আৰু গুফী ষ্টাইল এই ছবিবোৰত দেখা গৈছে। কেৱল এয়াই নহয়, কন্যা বামিকাৰ এখন ছবিও শ্বেয়াৰ কৰিছে। কন্যা বামিকাক খুৱাই থকা দেখা গৈছে বিৰাটে। অনুষ্কাই নিজৰ পোষ্টটোত নিজৰ মৰম প্ৰকাশ কৰি বিৰাটৰ জন্মদিনৰ শুভেচ্ছা জনাইছে আৰু বিৰাটৰ এই ধেমেলীয়া ৰূপবোৰ দেখুৱাবলৈ চেষ্টা কৰিছে।

অনুষ্কা শৰ্মাই তেওঁৰ পোষ্টত লিখিছে, “আজি তোমাৰ জন্মদিন মোৰ প্ৰেমাস্পদ.. গতিকে স্পষ্টভাৱে এই পোষ্টটোৰ বাবে মই তোমাৰ ভাল ধেমেলীয়া ছবি বাছি লৈছো… প্ৰতিটক ৰূপ আৰু পৰিস্থিতিত তোমাকেই ভাল পাওঁ। ” অনুষ্কাই পোষ্টটোৰ কেপচনত কেইবাটাও ৰেড হাৰ্ট ইমোজিও সন্নিবিষ্ট কৰিছে। অনুষ্কাৰ এই পোষ্টটোক লৈ ক্ৰিকেট আৰু বলীউডৰ চেলিব্ৰিটিসকলে ধেমেলীয়া প্ৰতিক্ৰিয়া প্ৰকাশ কৰিছে।

বিৰাট কোহলীৰো হাস্যপূৰ্ণ প্ৰতিক্ৰিয়া
অনুষ্কা শৰ্মাৰ এই পোষ্টটোত খোদ বিৰাট কোহলীয়েও হাঁহি আৰু ৰঙা হাৰ্টৰ ইমোজিৰে মন্তব্য কৰিছে। ৰঙা হাৰ্ট আৰু হাঁহি থকা ইমোজিৰে মন্তব্য অভিনেত্ৰী ৰাধিকা আপ্তে। ক্ৰিকেটাৰ এ ভি ডি ভিলিয়াৰ্ছে হাঁহিৰ ইমোজিৰে লিখিছে ‘সেই মুখখন’। কমেডিয়ান ডেনিছ ছাইটেও কমেণ্টত লিখিছে ‘হাহাহাহা!’।

বিৰাট কোহলীৰ ধেমেলীয়া ৰূপ
অনুষ্কা শৰ্মাৰ এই ছবিবোৰে সঁচাকৈয়ে বিৰাটৰ এক সম্পূৰ্ণ বেলেগ ৰূপ দেখুৱাইছে। এই ছবিবোৰত দেখা গৈছে বিৰাটৰ সম্পূৰ্ণ বেলেগ ষ্টাইল। ক্ৰিকেট খেলপথাৰৰ পৰা ছ’চিয়েল মিডিয়ালৈকে তেওঁক কেতিয়াও এই শৈলীত দেখা পোৱা নাই। উল্লেখযোগ্য যে, বিৰাট বৰ্তমান অষ্ট্ৰেলিয়াত আছে। তেওঁ টি-২০ ক্ৰিকেট বিশ্বকাপ খেলি আছে। বিশ্বকাপত তেওঁৰ প্ৰদৰ্শন প্ৰশংসনীয়।

বিখ্যাত গায়ক তথা ৰেপাৰ আৰন কাৰ্টাৰৰ ৩৪ বছৰ বয়সত মৃত্যু হৈছে। গায়ক, টিভি ব্যক্তিত্ব তথা বেকষ্ট্ৰীট বয়ছৰ তাৰকা নিক কাৰ্টাৰৰ কনিষ্ঠ ভাতৃ এৰনে কম বয়সতে খ্যাতি লাভ কৰিছিল। ৱেবছাইট টিএমজেডৰ মতে, শনিবাৰে পুৱা কেলিফৰ্ণিয়াৰ লেংকেষ্টাৰত থকা নিজৰ ঘৰৰ বাথটাবত কাৰ্টাৰক মৃত অৱস্থাত উদ্ধাৰ কৰা হয়। তেওঁৰ দলৰ সদস্যসকলে তেওঁৰ মৃত্যু নিশ্চিত কৰিছে। এতিয়ালৈকে মৃত্যুৰ কাৰণ জানিব পৰা হোৱা নাই।
১৯৮৭ চনৰ ৭ ডিচেম্বৰত ফ্ল’ৰিডাৰ টাম্পাত জন্মগ্ৰহণ কৰা আৰন কাৰ্টাৰে ১৯৯৭ চনৰ ভ্ৰমণত বেকষ্ট্ৰীট বয়ছৰ সৈতে গায়ক জীৱন আৰম্ভ কৰে। তেওঁৰ প্ৰথম এলবাম ‘এৰন কাৰ্টাৰ’ মুক্তি পাইছিল মাত্ৰ ৯ বছৰ বয়সতে। ৯০ দশকৰ আৰম্ভণিতে তেওঁৰ চাৰিটা এলবামৰ লাখ লাখ কপি বিক্ৰী হৈছিল। ২০০০ চনত মুক্তি পোৱা এৰনৰ দ্বিতীয়টো এলবাম হাৰুন পাৰ্টি (কম গেট ইট) ট্ৰিপল প্লেটিনাম লাভ কৰে।
অৱশ্যে এটা সময় আহিল যেতিয়া তেওঁ বহু অসুবিধাৰ সন্মুখীন হ’বলগীয়া হ’ল। ড্ৰাগছ ৰখা আৰু অসাৱধানতাৰে গাড়ী চলোৱাৰ বাবেও বিষয়াসকলৰ সৈতে কেইবাবাৰো কাজিয়া হৈছিল।
এই খবৰত আৰনৰ অনুৰাগীসকল যথেষ্ট স্তম্ভিত হৈ পৰিছে। চেলিব্ৰিটিৰ পৰা অনুৰাগীলৈকে ছ’চিয়েল মিডিয়াত শ্ৰদ্ধাঞ্জলি জনাইছে।

অৱশেষত জামিন লাভ কৰিলে দুবাৰকৈ  অলিম্পিক পদক বিজয়ী মল্লযোদ্ধা সুশীল কুমাৰে ৷

২৭ বছৰীয়া মল্লযোদ্ধা সাগৰ ধনখৰৰ হত্যাৰ সন্দৰ্ভত দীৰ্ঘদিন ধৰি কাৰাগাৰত আছিল সুশীল কুমাৰ৷ বৰ্তমান  তেওঁৰ পত্নী অসুস্থ হৈ পৰাৰ বাবে সন্তান দুটাৰ যত্ন ল’বলৈ কোনো নাই। গতিকে সুশীলে অন্তৱৰ্তীকালীন জামিনৰ বাবে আবেদন কৰিছিল। তেওঁ শুক্ৰবাৰে অন্তৱৰ্তীকালীন জামিন আৱেদন মঞ্জুৰ কৰা হয়৷ 
দীঘলীয়া সময় কাৰাগাৰত কটোৱাৰ পিছত অৱশেষত মল্লযোদ্ধা সুশীল কুমাৰক জামিন দিয়া হৈছে। দিল্লীৰ এখন আদালতে শুকুৰবাৰে দুবাৰৰ অলিম্পিক পদক বিজয়ী মল্লযোদ্ধাগৰাকীক অন্তৱৰ্তীকালীন জামিন প্ৰদান কৰে। যদিও তেওঁ অন্তৱৰ্তীকালীন জামিন লাভ কৰে তেওঁ ১ লাখ টকা জমা দিব লগা হৈছিল।
অৱশ্যে আদালতে সাক্ষীসকলৰ ওপৰত নজৰ ৰাখিবলৈ নিৰ্দেশ দিছিল৷ লগতে  দুজন নিৰাপত্তাৰক্ষীয়ে সকলো সময়তে সুশীলৰ ওপৰত নজৰ ৰাখিব বুলি জানিব পৰা গৈছে। এতিয়ালৈকে, আৰক্ষীয়ে গোচৰটোত মুঠ ১৮ জন লোকক গ্ৰেপ্তাৰ কৰিছে। সুশীলৰ বিৰুদ্ধে দুখন অভিযোগপত্ৰ দাখিল কৰা হৈছে।
যোৱা মাহত, দিল্লীৰ এখন আদালতে সুশীল আৰু আন ১৭ জনৰ বিৰুদ্ধে অভিযোগ গঠন কৰিছিল। দিল্লীৰ আদালতে সুশীলৰ বিৰুদ্ধে হত্যা, হত্যাৰ চেষ্টা, দাঙ্গা, বেআইনী সমাবেশ আৰু অপৰাধমূলক ষড়যন্ত্ৰকে ধৰি কেইবাটাও অভিযোগত অভিযোগ গঠন কৰিছে।
২০২১ চনৰ ৪ মে তাৰিখে, সুশীল আৰু তেওঁৰ কিছু সহযোগীয়ে সম্পত্তিৰ বিবাদৰ বাবে কুস্তিৰ প্ৰাক্তন কনিষ্ঠ ৰাষ্ট্ৰীয় চেম্পিয়ন সাগৰক  আক্ৰমণ কৰিছিল। সাগৰ গুৰুতৰভাৱে আহত হৈছিল। পিছত তেওঁৰ মৃত্যু হয়। মৰণোত্তৰ পৰীক্ষাত প্ৰকাশ পাইছিল যে কোনো ভোঁতা বস্তুৰ দ্বাৰা আঘাত প্ৰাপ্ত হোৱাৰ ফলত সাগৰৰ ৰক্তক্ষৰণৰ ফলত মৃত্যু হৈছিল। দিল্লী আৰক্ষীয়ে বিভিন্ন ধাৰাৰ অধীনত সুশীলকে ধৰি ২০ জন লোকৰ বিৰুদ্ধে এজাহাৰ পঞ্জীয়ন কৰিছিল। ইয়াৰ ভিতৰত আছে হত্যা, হত্যাৰ চেষ্টা, ষড়যন্ত্ৰ, অপহৰণৰ অভিযোগ।
২০২১ চনৰ ২৩ মে’ত সুশীলক হত্যাৰ অভিযোগত গ্ৰেপ্তাৰ কৰা হৈছিল। ২ আগষ্টত আৰক্ষীয়ে দাখিল কৰা প্ৰথম অভিযোগপত্ৰত কোৱা হৈছিল যে সুশীলে এটা ষড়যন্ত্ৰত আক্ৰমণ চলাইছিল।২০২১ চনৰ ২ জুনৰ পৰা সুশীল ন্যায়িক জিম্মাত আছিল। সুশীলৰ জামিনৰ আবেদন যোৱা বছৰ বিচাৰ আদালতে নাকচ কৰিছিল। বিচাৰ আদালতে কৈছিল যে প্ৰথমতে, সুশীলক আক্ৰমণৰ ভিডিঅ’ ফুটেজত দেখা গৈছিল। অলিম্পিক কুস্তি পদক বিজয়ীগৰাকীয়ে জামিন বিচাৰিছিল আৰু কৈছিল যে আৰক্ষীয়ে তেওঁৰ বিৰুদ্ধে মিছা গোচৰ ৰুজু কৰিছে। অৱশ্যে, আদালতে আৱেদনটোৰ কোনো সঁহাৰি দিয়া নাছিল।
সুশীলে এই বছৰৰ মাৰ্চ মাহত বন্দীসকলক মল্লযুদ্ধ শিকোৱা আৰম্ভ কৰিছিল। তেওঁ নিজকে সুস্থ ৰাখিবলৈ কাৰাগাৰত মুক্ত হাতৰ অনুশীলন কৰিছিল। কাৰাগাৰ কৰ্তৃপক্ষৰ পৰা অনুমতি পোৱাৰ পিছত, তেওঁ বাকী বন্দীসকলকো শিক্ষা প্ৰদান কৰি আছিল সুশীলে ।

টাটা ছন্সৰ প্ৰাক্তন অধ্যক্ষ চাইৰাছ মিস্ত্ৰী গাড়ী দুৰ্ঘটনাত মৃত্যু হোৱাৰ দুমাহৰ পাছত শনিবাৰে মহাৰাষ্ট্ৰৰ পালঘৰ জিলাৰ আৰক্ষীয়ে ডাঃ অনাহিতা পাণ্ডোলেক ৰেচ ড্ৰাইভিঙৰ অভিযোগত গোচৰ ৰুজু কৰে। আৰক্ষীৰ মতে, মটৰ গাড়ী আইন (এম ভি আইন)ৰ বাহিৰেও আই পি চিৰ ৩০৪ (ক) ২৭৯ আৰু ২৩৭ ধাৰাত গোচৰ ৰুজু কৰা হৈছে। গাফিলতিৰ বাবে কাৰোবাৰ মৃত্যুৰ ক্ষেত্ৰত ধাৰা ৩০৪ (ক) প্ৰযোজ্য।

২৭৯ধাৰা তেতিয়া প্ৰযোজ্য হয় যেতিয়া কোনোবাই অসাৱধানতাৰে পথত বাহন চলায়। যেতিয়া আনৰ জীৱন আৰু ব্যক্তিগত সুৰক্ষা বিপন্ন কৰি মৃত্যু হয় তেতিয়া ৩৩৭ ধাৰা প্ৰযোজ্য। কাছা আৰক্ষী থানাত ৰুজু হৈছে এটা গোচৰ।
২০২২ চনৰ ৪ ছেপ্টেম্বৰত মুম্বাইৰ সংলগ্ন পালঘৰ জিলাৰ মুম্বাই-আহমেদাবাদ ঘাইপথত সংঘটিত হোৱা এক গাড়ী দুৰ্ঘটনাত চাইৰাছ মিস্ত্ৰী আৰু তেওঁৰ সতীৰ্থ বন্ধু জহাংগীৰ পাণ্ডোলে নিহত হয়। দুয়োজনেই মাৰ্চিডিজ গাড়ীখনৰ পাছৰ চিটত বহি থকাৰ সময়তে অনাহিতাই গাড়ীখন চলাই আছিল আৰু তেওঁৰ স্বামী ডাৰিয়াছ পাণ্ডোলেও আগৰ চিটত বহি আছিল।
এই দুৰ্ঘটনাত গুৰুতৰভাৱে আহত হয় পাণ্ডোল দম্পতী। আৰক্ষীয়ে জাৰি কৰা বিবৃতি অনুসৰি তদন্তৰ সময়ত সাক্ষীসকলক সোধা-পোছা কৰা হয় আৰু আঞ্চলিক পৰিবহণ কাৰ্যালয় আৰু পুনেৰ মাৰ্চিডিজ বেঞ্জ ইণ্ডিয়াৰ পৰা প্ৰতিবেদন লোৱাৰ পিছত এই গোচৰ ৰুজু কৰা হৈছে।
আৰক্ষীয়ে নিজৰ বিবৃতিত কয়, ‘ৰিপ’ৰ্ট আৰু তদন্তৰ ভিত্তিত ৰেচ আৰু গাফিলতিৰে গাড়ী চলোৱাৰ বাবেই এই দুৰ্ঘটনা সংঘটিত হোৱা বুলি জানিব পৰা গৈছে। সেয়েহে ডাঃ অনাহিতা পাণ্ডোলেৰ বিৰুদ্ধে গোচৰ ৰুজু কৰা হৈছে।
শুকুৰবাৰে ডাৰিয়াছ পাণ্ডোলে আৰক্ষীক জনাইছিল যে তেওঁৰ পত্নী ডাঃ অনাহিতাই তিনি নম্বৰ লেনত মাৰ্চিডিজ বেঞ্জ গাড়ী চলাই আহিছিল আৰু পালঘৰৰ সূৰ্য্য নদীৰ দলঙৰ ওপৰেৰে পথটো সংকীৰ্ণ হৈ পৰাত গাড়ীখন তিনি নম্বৰ লেনৰ পৰা দ্বিতীয় লেনলৈ লৈ যাব পৰা নাছিল।