প্ৰৱৰ্তন সঞ্চালকালয়ে শনিবাৰে কৈছিল যে চীনা ব্যক্তিসকলৰ দ্বাৰা “নিয়ন্ত্ৰিত” তাৎক্ষণিক এপ-আধাৰিত ঋণত অনিয়মৰ অভিযোগত বাংগালুৰুৰ ৰেজৰপে, পেটিএম আৰু কেছফ্ৰীৰ দৰে অনলাইন পেমেণ্ট গেটৱেৰ ছয়টা চৌহদত অভিযান চলায়। শুকুৰবাৰৰ পৰা  আৰম্ভ হোৱা তালাচী এতিয়াও চলি আছে। ইডিয়ে  আজি  কয় যে অভিযানৰ সময়ত “এই চীনা ব্যক্তি নিয়ন্ত্ৰিত প্ৰতিষ্ঠানসমূহৰ ব্যৱসায়িক পৰিচয় পত্ৰ আৰু বেংক একাউণ্ট”ত ৰখা ১৭ কোটি টকা জব্দ কৰা হয়। ৰেজৰপে আৰু কেছফ্ৰীয়ে ইডিৰ তালাচীৰ প্ৰসংগত কয় যে তেওঁলোকে ইডিৰ সৈতে সহযোগিতা কৰি আছে। আনহাতে পেটিএমে  এই বিষয়ত মন্তব্য কৰিবলৈ অস্বীকাৰ কৰিছে। কেছফ্ৰী পেমেণ্টে কৈছে যে তেওঁলোকৰ অপাৰেচন আৰু অন-বোৰ্ডিং প্ৰক্ৰিয়াবোৰে পিএমএলএ আৰু কেৱাইচি নিৰ্দেশনা মতে কৰা হৈছে, আৰু আমি অব্যাহত ৰখা হব।কোম্পানী কেইটাৰ বিৰুদ্ধে মানি লণ্ডাৰিং প্ৰতিৰোধ আইনৰ (পিএমএলএ) অপৰাধী ধাৰাৰ অধীনত তদন্ত কৰা হৈছে বুলি জানিব পৰা গৈছে। অভিযোগ অনুসৰি  কোম্পানীবোৰে  ফোনত এই এপবোৰ ডাউনলোড কৰাৰ সময়ত ঋণ লওঁতাৰ সকলো ব্যক্তিগত তথ্য আহৰণ কৰিছিল। অলপতে গ্ৰাহকৰ  সুৰক্ষাৰ কথা  চিন্তা কৰি গুগলে ভাৰতত ইয়াৰ প্লে ষ্টোৰৰ পৰা এতিয়ালৈকে প্ৰায় ২০০০ টা ব্যক্তিগত ঋণ এপ আঁতৰাই দিছে। গুগলে প্ৰকাশ কৰা মতে  ২০০০ এপেৰ ভিতৰত  ঋণ দিয়া এপৰ সংখ্যা আধাতকৈও বেছি। বছৰটোৰ আৰম্ভণিৰ পৰা  এনে এপ আঁতৰ কৰাৰ কথা গুগলে চিন্তা কৰি আছিল। ভুৱা এপবোৰৰ জৰিয়তে দুষ্ট চক্ৰই মানুহক ঋণ প্ৰদানৰ নামত প্ৰতাৰণা কৰি অহাৰ অভিযোগতে তেনে এপসমূহ বন্ধ কৰি দিয়া হৈছে বুলি গুগলে প্ৰকাশ কৰিছে । ভাৰতীয় ৰিজাৰ্ভ বেঙ্কে ঋণ লওঁতাসকলক ব্লেকমেইল আৰু প্ৰতাৰণা কৰাৰ  অভিযোগ পোৱাৰ পিছতে অনিয়ন্ত্ৰিত ঋণ প্ৰদানৰ কাৰ্যকলাপ নিষিদ্ধ কৰাৰ বাবে এক নিৰ্দেশনা দিছিল। ইয়াৰ পিছতে  গুগলে ভাৰতত ঋণ দিয়া এপবোৰৰ সৰহ সংখ্যকেই বন্ধ কৰাৰ বিষয়ত মনোনিৱেশ কৰে।গুগল এছিয়াৰ জ্যেষ্ঠ সঞ্চালক আৰু ন্যাস আৰু সুৰক্ষাৰ মুৰব্বী চৈকত মিত্ৰই কয় যে এনে এপবোৰে ভাৰতীয় ব্যৱহাৰকাৰীসকলৰ বাবে বিপদাশংকাৰ সৃষ্টি কৰিছে, সেয়েহে কোম্পানীটোৱে  সেইবোৰ আঁতৰাবলৈ সিদ্ধান্ত লৈছিল। মিত্ৰই লগতে প্ৰকাশ কৰে যে যেতিয়া এপবোৰ গুগল প্লে ষ্টোৰত আপলোড কৰা হয়, সেইবোৰ পুনৰীক্ষণ কৰা হয়, কিন্তু ঋণ এপৰ ক্ষেত্ৰত বহুতো অপৰাধমূলক কাৰ্যকলাপৰ  তথ্য পোৱা গৈছিল।  কিছুমান ব্যক্তিগত ঋণ এপৰ দ্বাৰা ঋণ গ্ৰহণ কৰি বহু লোক প্ৰতাৰিত হোৱা বুলিও তেওঁ কয়। মিত্ৰই লগতে কয়  যে ভাৰতত বৰ্তমান চৰকাৰৰ দ্বাৰা অনুমোদিত এপৰ অভাৱ আছে। ক্ষতিহীন যেন লগা ঋণ এপবোৰেও ব্যৱহাৰকাৰীসকলৰ বাবে বিপদাশংকা সৃষ্টি কৰিব পাৰে।

আইএমএফৰ অনুমান অনুসৰি ভাৰতে ব্ৰিটেইনক অতিক্ৰম কৰি বিশ্বৰ পঞ্চম সৰ্ববৃহৎ অৰ্থনীতি হিচাপে পৰিগণিত হব পাৰে। এতিয়া কেৱল আমেৰিকা যুক্তৰাজ্য, চীন, জাপান আৰু জাৰ্মানীৰ পিছত ভাৰত আছে। এক দশক আগতে, ভাৰত বৃহৎ অৰ্থনীতিৰ ভিতৰত ১১ তম স্থানত আছিল আৰু ব্ৰিট্ৰেইন পঞ্চম স্থানত আছিল। এপ্ৰিল-জুন তিনিমাহত অভিলেখ সম্প্ৰসাৰণৰ সৈতে ভাৰতীয় অৰ্থনীতিয়ে এতিয়া ব্ৰিটেইনক অতিক্ৰম কৰিছে, । ব্ৰিটেইন এতিয়া ষষ্ঠ স্থানলৈ পিছুৱাই গৈছে। ব্লুমবাৰ্গে আই.এম.এফৰ. ডাটাবেচ ব্যৱহাৰ কৰি গণনা কৰি ভাৰতৰ স্থিতিৰ বিষয়ে প্ৰতিবেদন প্ৰকাশ কৰিছে। , তিনিমাহত ভাৰতীয় অৰ্থনীতিৰ জিডিপি আছিল ৮৫৪.৭ বিলিয়ন। ব্ৰিটেইনৰ আছিল ৮১৬ বিলিয়ন ডলাৰ। সেই ফালৰ পৰা ভাৰতে পঞ্চম স্থানত আৰোহণ কৰিব পাৰে বুলি কোৱা হৈছে।

ইপিনে ভাৰতৰ অথনৈতিক বিকাশ সন্দভত বহু প্ৰতিষ্ঠানে প্ৰতিবেদন প্ৰকাশ কৰিছে। ভাৰতৰ অৰ্থনীতিয়ে এতিয়া বিশ্বৰ বহু আগশাৰীৰ দেশৰ সৈতে ফেৰ মাৰিব পৰা হৈছে। এই গতিত আগুৱাই গৈ থাকিলে ২০৪৭ চনৰ ভিতৰত ভাৰত উচ্চ আয়ৰ দেশত পৰিণত হ’ব।প্ৰধানমন্ত্ৰীৰ অৰ্থনৈতিক পৰামৰ্শদাতা পৰিষদৰ অধ্যক্ষ বিবেক দেৱৰয়ে আজি এই সম্ভাৱনাৰ কথা ব্যক্ত কৰে। তেওঁ কয় যে অহা ২৫ বছৰত গড় বাৰ্ষিক বৃদ্ধি ৭-৭.৫ শতাংশ হ’লে ২০৪৭ চনৰ ভিতৰত ভাৰতীয় অৰ্থনীতিৰ আকাৰ ২০ হাজাৰ বিলিয়ন ডলাৰ (২০ ট্ৰিলিয়ন ডলাৰ) পৰ্যন্ত হ’ব। প্ৰধানমন্ত্ৰীৰ অৰ্থনৈতিক পৰামৰ্শদাতা পৰিষদৰ অধ্যক্ষ বিবেক দেৱৰয়ে ‘ড্ৰাফট কম্পিটিটিভনেছ ১০০ ফৰ ইণ্ডিয়া’ শীৰ্ষক অৰ্থনৈতিক খচৰা মুকলি কৰি কয় যে, যদিহে আগন্তুক ২৫ বছৰত দেশখন গড়ে ৭-৭.৫ শতাংশ অৰ্থনৈতিক বিকাশৰ হাৰত আগবাঢ়ে তেন্তে দেশৰ জনমূৰি বাৰ্ষিক আয় ১০ হাজাৰ মাৰ্কিন ডলাৰৰ অধিক হ’ব । তেওঁ কয় যে, ২০৪৭ চনৰ ভিতৰত ভাৰত উচ্চ মানৱ উন্নয়ন শ্ৰেণীৰ দেশসমূহত ভিতৰত অন্তৰ্ভুক্ত হ’ব ।তেওঁ লগতে কয় যে, বৰ্তমান সময়ত ভাৰত হৈছে বিশ্বৰ ষষ্ঠ বৃহত্তম অৰ্থনীতি যাৰ মুঠ ঘৰুৱা উৎপাদন ২,৭০০ বিলিয়ন মাৰ্কিন ডলাৰ । বৰ্তমান দেশখন উন্নয়নশীল দেশৰ শ্ৰেণীত অন্তৰ্ভূক্ত কৰা হৈছে । ২০৪৭ চনৰ ভিতৰত ভাৰতক এখন উন্নয়নশীল দেশ হিচাপে গঢ়ি তোলাৰ এক অভিলাষী লক্ষ্য নিৰ্ধাৰণ কৰিছে প্ৰধানমন্ত্ৰী নৰেন্দ্ৰ মোদীয়ে ।ইণ্ডিয়া ১০০ৰ বাবে প্ৰতিযোগিতামূলক ৰোডমেপ অধ্যাপক মাইকেল ই. পোৰ্টাৰৰ বিকশিত আৰ্হিৰ ওপৰত আধাৰিত।

মধ্যপ্ৰদেশৰ গৃহ মন্ত্ৰী নৰোত্তম মিশ্ৰই(Narottam Mishra) কোৱা এষাৰ কথাই  বিতৰ্কৰ সৃষ্টি কৰিছে।  মন্ত্ৰী মিশ্ৰই কয় যে শ্বাবানা আজমী, জাভেদ আখটাৰ আৰু নাছিৰুদ্দিন শ্বাহ হৈছে টুকডে-টুকডে দলৰ শ্লিপাৰ চেল। বিলকিছ বানো ধৰ্ষণ গোচৰৰ ১১ জন দোষীৰ মুক্তিৰ খবৰৰ পোৱাৰ পিছতে  অভিনেত্ৰী  শ্বাবানা আজমী(Shabana Azmi) টিভিৰ এটা সাক্ষাৎকাৰৰ সময়ত ভাগি পৰিছিল। এই কথাৰ আলম লৈয়েই  মধ্যপ্ৰদেশৰ গৃহ মন্ত্ৰী নৰোত্তম মিশ্ৰই এই মন্তব্য কৰে। তেওঁ কয় ” কথাটো  হৈছে… শ্বাবানা আজমী, জাভেদ আখটাৰ আৰু নাছিৰুদ্দিন শ্বাহ হৈছে টুকডে টুকডে দলৰ শ্লিপাৰ চেল। তেওঁলোকে ৰাজস্থানত কানহাইয়া লালৰ শিৰচ্ছেদৰ প্ৰসংগত একো কোৱা নাছিল। ঝাৰখণ্ডত, আমাৰ ছোৱালীক জুই লগোৱা হৈছে। কিন্তু সেই বিষয়তো তেওঁলোকে কিবা কৈছিল নেকি? কেৱল যেতিয়া বিজেপি শাসিত ৰাজ্যসমূহত কিবা ঘটে, তেওঁলোকে বিবৃতি জাৰি কৰে,”। মন্ত্ৰীগৰাকীয়ে লগতে  যে যেতিয়া বিজেপি শাসিত ৰাজ্যসমূহত কিবা এটা ঘটে তেতিয়াই নাছিৰুদ্দিন শ্বাহে এই দেশত থাকিবলৈ ভয় কৰে। ইমানৰ পিছতো তেওঁলোকে কেনেকৈ ধৰ্মনিৰপেক্ষ বুলি দাবী কৰিব পাৰে বুলি মিশ্ৰই প্ৰশ্ন কৰে।  ১৫ আগষ্টত টিভিৰ এটা   সাক্ষাৎকাৰত বিলকিছ বানো  দলবদ্ধ ধৰ্ষণৰ দোষীৰ মুক্তিৰ বিষয়ে কোৱাৰ সময়ত অভিনেত্ৰী শ্বাবানা আজমী ভাগি পৰিছিল আৰু কৈছিল যে এনে ঘটনাৰ প্ৰতিক্ৰিয়া প্ৰকাশ কৰিবলৈ  তেওঁৰ ওচৰত কোনো শব্দ নাই।  ইফালে, ১৫ আগষ্টত বিলকিছ ধৰ্ষণৰ দোষীৰ মুক্তি পোৱাত দেশজুৰি ক্ষোভৰ সৃষ্টি হৈছিল।   বিষয়টো  আনকি উচ্চতম ন্যায়ালয়ৰো মজিয়া পাইছিল।