মুখ্যমন্ত্ৰী ড০ হিমন্ত বিশ্ব শৰ্মালৈ ” প্ৰেৰণাশ্ৰী ” সন্মান — দৰঙী কলাকৃষ্টি উন্নয়ন সংঘৰ । অসমৰ জনপ্ৰিয় আৰু গতিশীল মুখ্যমন্ত্ৰী ড০ হিমন্ত বিশ্ব শৰ্মালৈ দৰঙী কলাকৃষ্টি উন্নয়ন সংঘই সন্মানজনক ভাৱে আগবঢ়াইছে ” প্ৰেৰণাশ্ৰী ” উপাধি । আজি দৰঙী কলাকৃষ্টি উন্নয়ন সংঘৰ ছিপাঝাৰস্থিত কাৰ্যালয়ত এখন সংবাদ মেল সম্বোধন কৰি মুখ্যমন্ত্ৰীলৈ আগবঢ়োৱা দৰঙীয়াৰ সন্মান আনুষ্ঠানিকভাৱে ঘোষনা কৰে সংঘৰ সভাপতি কুলেন্দ্ৰ নাথ ডেকা আৰু সাধাৰণ সম্পাদক নৱ কুমাৰ শইকীয়াই ।

সংস্কৃতিপ্ৰীতি মনোভাৱৰ মুখ্যমন্ত্ৰী গৰাকীয়ে পিছপৰা জিলাখনৰ গৰুখুঁটি বহুমুখী কৃষি প্ৰকল্প একক প্ৰচেষ্টাৰে ৰূপায়ন কৰি বৃহত্তৰ অঞ্চল তথা সমগ্ৰ জিলাখনক বিশ্বৰ মানচিত্ৰত পৰিচয় কৰাই দি কৰ্ম সংস্কৃতি গঢ়ি তোলাৰ ক্ষেত্ৰত মুখ্যমন্ত্ৰী ড০ হিমন্ত বিশ্ব শৰ্মা অবিভক্ত জিলাবাসীৰ বাবে সাহস আৰু প্ৰেৰণাৰ প্ৰতীক স্বৰূপ হৈ পৰা বাবেই দৰঙী কলাকৃষ্টি উন্নয়ন সংঘই মুখ্যমন্ত্ৰীলৈ আগবঢ়াই ” প্ৰেৰণাশ্ৰী ” সন্মান ।

মুখ্যমন্ত্ৰীৰ সৈতে লোক সংস্কৃতি গৱেষক . বিশিষ্ট পণ্ডিত ড০ নবীন চন্দ্ৰ শৰ্মালৈয়ো দৰঙী কলাকৃষ্টি উন্নয়ন সংঘই আগবঢ়াই ” দৰং গৌৰৱ ” সন্মান । যোৱা ২০ আগষ্টত অনুষ্ঠিত সংঘৰ বৰ্দ্ধিত কাৰ্যনিৰ্বাহক সভাই উৎফুল্লিত হৈ গ্ৰহন কৰা দৰঙীয়াৰ এই সন্মান ৩০ অক্টোবৰত দৰঙী লোককৃষ্টি প্ৰদৰ্শনৰ মাজেৰে মুখ্যমন্ত্ৰীক ৰাজহুৱাভাৱে প্ৰদান কৰিব বুলি সংবাদ মেলত প্ৰকাশ কৰে দৰঙী কলাকৃষ্টি উন্নয়ন সংঘৰ সভাপতি কুলেন্দ্ৰ নাথ ডেকা আৰু সাধাৰণ সম্পাদক নৱ কুমাৰ শইকীয়াই ।

আজিৰ সংবাদ মেলত সভাপতি কুলেন্দ্ৰ নাথ ডেকা , সাধাৰণ সম্পাদক নৱ কুমাৰ শইকীয়াৰ লগতে উপদেষ্টা ক্ৰমে ৰাষ্ট্ৰীয় পুৰস্কাৰপ্ৰাপ্ত অৱসৰী অধ্যক্ষ ৰজনীকান্ত নাথ . সাহিত্যিক পেঞ্চনাৰ পৃথুৰাম বৰুৱা , শিল্পী পেঞ্চনাৰ গুৰু ৰাজেন্দ্ৰ নাথ ওজা , লোকশিল্পী গুৰু ৰত্নকান্ত ডেকা উপস্থিত থাকে ।

হাজোৰ মনিকুট উচ্চ মাধ্যমিক বিদ্যালয়ত কৃতি ছাত্ৰ ছাত্ৰীক প্ৰেৰনা যোগোৱাৰ উদ্দেশ্যে এখনি অভিনন্দন আৰু ৺ কালী দাস কলিতা ,৺ গোপীবালা কলিতা সোঁৱৰনী বটা প্ৰদান অনুষ্ঠান সম্পণ্ণ ।

কামৰূপ জিলাৰ হাজো ৰাজহ চক্ৰৰ অন্তৰ্গত মনিকুট উচ্চ মাধ্যমিক বিদ্যালয়ত আজি হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ন কৃতি ছাত্ৰ ছাত্ৰীক প্ৰেৰনা যোগোৱাৰ উদ্দেশ্যে এখনি অভিনন্দন বটা প্ৰদান অনুষ্ঠান সম্পণ্ণ কৰা হ’য়।

উক্ত অনুষ্ঠানত হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ন ৫ গৰাকী কৃতি ছাত্ৰ ছাত্ৰীক ৺কালী দাস কলিতা আৰু ৺ গোপীবালা কলিতা সোঁৱৰনী বটা প্ৰদান কৰা হ’য়। বটা প্ৰদান কৰে বিশিষ্ট সমাজ সেৱক,চিকিৎসক ডা° হৰেন কলিতাই।

সভাৰ সভাপতিত্ব কৰে নৃপেন ভাগৱতীয়ে ।সভাত প্ৰথম,দ্বিতীয় বিভাগত উত্তীৰ্ন কৃত্ৰি শিক্ষাৰ্থী সকলকো বিদ্যালয়ৰ তৰফৰ পৰা অভিনন্দন জনোৱা হ’য়।সভাত বিদ্যালয়ৰ শিক্ষক শিক্ষয়ত্ৰী,ছাত্ৰ ছাত্ৰী আৰু একাংশ স্থানীয় ৰাইজ উপস্থিত থাকে।

অৰুণাচল প্ৰদেশৰ মন্ত্ৰী মামা নাটুঙৰ নেতৃত্বত অহা প্ৰতিনিধি দলেৰে মন্ত্ৰী পীযুষ হাজৰীকাৰ নেতৃত্বত অসমৰ প্ৰতিনিধি দলৰ বৈঠক: সমিলমিলেৰে সীমা সমস্যা সমাধানৰ পোষকতা । অহা ২ চেপ্তেম্বৰত সীমা অঞ্চল ভ্ৰমণ কৰিব অসম-অৰুণাচলৰ প্ৰতিনিধি দলে ।

অসম চৰকাৰৰ জলসম্পদ, তথ্য আৰু জনসংযোগ আদি বিভাগৰ মন্ত্ৰী পীযুষ হাজৰীকাই আজি শোণিতপুৰ জিলাৰ বালিপাৰাত অসম অৰুণাচল প্ৰদেশৰ সীমা সমস্যা সমাধানৰ বাবে গঠন কৰা হোৱা আঞ্চলিক সমিতিৰ বৈঠকত অংশগ্ৰহণ কৰে । অসম দলক নেতৃত্ব দিয়া মন্ত্ৰী হাজৰীকাই অৰুণাচল প্ৰদেশ চৰকাৰৰ পৰিৱেশ, বন, জলসম্পদ, ক্ৰীড়া আদি বিভাগৰ মন্ত্ৰী মামা নাটুঙৰ নেতৃত্বত অহা দলটিৰ সৈতে বৈঠকত অংশ লৈ অসমৰ বিশ্বনাথ আৰু শোণিতপুৰ জিলাৰ সৈতে থকা অৰুণাচল প্ৰদেশৰ পাকে কিচাং জিলাৰ সীমা সমস্যাৰ ওপৰত আলোচনা কৰে ।

আলোচনাকালত মন্ত্ৰী পীযুষ হাজৰীকাই কয় যে অহা ২ আৰু ৩ চেপ্তেম্বৰত দুয়োখন ৰাজ্যৰ দল দুটাই বিবাদমান অঞ্চল কেইটা পৰিভ্ৰমণ কৰি ক্ষেত্ৰ অধ্যয়নৰ পাছত এটা প্ৰতিবেদন প্ৰস্তুত কৰিব । সীমা সমস্যাৰ স্থায়ী সমাধানৰ অবিহনে সীমা অঞ্চলত বসবাস কৰি থকা লোকসকলৰ সামগ্ৰিক উন্নয়ন সম্ভৱপৰ নহয় বুলি উল্লেখ কৰি মন্ত্ৰী হাজৰীকাই কয় যে ভাৰতৰ মাননীয় প্ৰধানমন্ত্ৰী আৰু গৃহ মন্ত্ৰীৰ প্ৰত্যক্ষ পৰ্যবেক্ষণত আৰু অসমৰ মুখ্যমন্ত্ৰী ড° হিমন্ত বিশ্ব শৰ্মাৰ আন্তৰিক প্ৰয়াসৰ ফলত ৰাজ্য দুখনৰ মাজত থকা সীমা সমস্যাই সমাধানৰ মুখ দেখিবলৈ গৈ আছে । আনহাতে সীমা অঞ্চল কেইটা ভ্ৰমণ কৰি স্থানীয় বাসিন্দাসকলৰ সম্পূৰ্ণ মতামত লৈহে প্ৰতিবেদন প্ৰস্তুত কৰাৰ ওপৰত মন্ত্ৰীগৰাকীয়ে জোৰ দিয়ে ।

আলোচনাত অৰুণাচল প্ৰদেশৰ মন্ত্ৰী মামা নাটুঙে শান্তিপূৰ্ণ মাধ্যমেৰে সীমা সমস্যা সমাধানৰ উদ্যোগ লোৱাৰ বাবে দুয়োখন ৰাজ্যৰে মুখ্যমন্ত্ৰী দুগৰাকীক ধন্যবাদ জনোৱাৰ লগতে অসমক জ্যেষ্ঠ ভাতৃৰ দায়িত্ব গ্ৰহণ কৰি অঞ্চলটোক আগোৱাই নিয়াৰ ক্ষেত্ৰত সবল ভূমিকা ল’বলৈ আহ্বান জনায় ।

পাছত সাংবাদিকৰে হোৱা কথা বতৰাত মন্ত্ৰী পীযুষ হাজৰীকাই কয় যে অসমক অৰুণাচলৰ মন্ত্ৰীগৰাকীয়ে জ্যেষ্ঠ ভাতৃৰ সন্মান দিয়াত তেঁও যথেষ্ট গৌৰৱ অনুভৱ কৰিছে আৰু ৰাজ্য দুখনৰ মাজত দীঘলীয়া সময় ধৰি থকা সীমা সমস্যা শীঘ্ৰে সমাধান হ’ব বুলি তেঁও বিশ্বাস কৰে । নামচাইত আলোচনাকালত ইতিমধ্যেই বহুকেইটা বিবদমান অঞ্চলৰ সমাধান হৈ গৈছে বুলি উল্লেখ কৰি মন্ত্ৰীগৰাকীয়ে কয় যে অহা ২ আৰু ৩ চেপ্তেম্বৰত তেঁও অৰুণাচলৰ মন্ত্ৰীগৰাকী আৰু আন প্ৰতিনিধিসকলৰ সৈতে সীমা অঞ্চল ভ্ৰমণ কৰি স্থানীয় ব্যক্তিসকলৰ মতামত গ্ৰহণ কৰিব । তেঁওলোকৰ মতামত লৈহে সমিতিৰ প্ৰতিবেদন প্ৰস্তুত কৰা হ’ব বুলি মন্ত্ৰীগৰাকীয়ে উল্লেখ কৰে ।

উল্লেখযোগ্য যে অসমৰ বিশ্বনাথ জিলা আৰু অৰুণাচল প্ৰদেশৰ পাকে কিচাং জিলাৰ সীমান্তৱৰ্তী দিকালমুখ, বালিচ’, দিপিক আৰু পাচ’ এই চাৰিখন গাঁৱত বৰ্তমানে সীমা সংক্ৰান্তীয় সমস্যা আছে । শেহতীয়াকৈ অসম আৰু অৰুণাচল প্ৰদেশ চৰকাৰৰ মাজত সীমা সমস্যা সমাধানৰ বাবে অৰুণাচলৰ নামচাইত এখন চুক্তি স্বাক্ষৰিত হৈছিল । এই চুক্তিৰ আধাৰত ৰাজ্য দুখনৰ মাজৰ সীমা সমস্যা সমাধানৰ বাবে কেইবাখনো আঞ্চলিক সমিতি গঠন কৰি দিয়া হৈছিল । অহা ১৫ চেপ্তেম্বৰৰ ভিতৰত এই সমিতিসমূহে দুইখন ৰাজ্যৰ মুখ্যমন্ত্ৰীক প্ৰতিবেদন দাখিল কৰিব ।

আজিৰ বৈঠকত অসমৰ প্ৰতিনিধি দলত মন্ত্ৰী হাজৰীকাৰ লগতে সাংসদ পল্লৱ লোচন দাস, বিধায়কত্ৰয় প্ৰমোদ বৰঠাকুৰ, গণেশ লিম্বু আৰু কৃষ্ণ কমল তাঁতী, অসম চৰকাৰৰ জ্যেষ্ঠ সচিব আকাশদ্বীপ, শোণিতপুৰ-বিশ্বনাথৰ উপায়ুক্ত আৰু আৰক্ষী অধীক্ষকসকল থকাৰ বিপৰীতে অৰুণাচল প্ৰদেশৰ প্ৰতিনিধি দলত মন্ত্ৰী মামা নাটুঙৰ লগতে বিধায়ক বিয়ুৰাম ৱাগে, চৰকাৰৰ উচ্চ পদস্ত বিষয়া আৰু পাকে কিচাং জিলাৰ উপায়ুক্ত তথা আৰক্ষী অধীক্ষক উপস্থিত আছিল