বিশ্ব ঐতিহ্য ক্ষেত্ৰ মানাহ ৰাষ্ট্ৰীয় উদ্যানত পুণৰ চোৰাং চিকাৰীৰ দপদপনি পৰিলক্ষিত হৈছে ।ৰাষ্ট্ৰীয় উদ্যানখনৰ বাঁ‌হবাৰী বনাঞ্চলৰ অধিনৰ কাহিতামা বীটৰ অন্তৰ্গত কাঠপুৰাৰ পৰা মানাহৰ বাঁহবাৰী ৰেঞ্জৰ সহকাৰী বন বিষয়া অলকেশ দাসৰ নেতৃত্বত বনকৰ্মীৰ এটা দলে গোপন খবৰৰ ভিত্তিত চোৰাং চিকাৰীক আটক কৰিবলৈ সক্ষম হয় ৷ আটকাধীন চোৰাং চিকাৰীটো লাবদাংগুৰীৰ নিৰন নাথ বুলি জানিবলৈ দিছে বন বিভাগে ৷ চোৰাং চিকাৰীটোৰ জিম্মাৰ পৰা বনকৰ্মীৰ দলটোৱে এটা কাছ, মাছ মৰা জালসহ বহু আপত্তিজনক সামগ্ৰী উদ্ধাৰ কৰিবলৈ সক্ষম হয় ৷ ঘটনা সন্দৰ্ভত মানাহৰ বাঁহবাৰী ৰেঞ্জৰ বনবিষয়া বাবুল ব্ৰহ্মই জানিব দিয়ামতে এক গোপন খবৰৰ ভিত্তিত নিশাৰ ভাগত মানাহৰ কাহিতামা বীটৰ কাঠপুৰা নামৰ ঠাই এডোখৰত চোৰাং চিকাৰী প্ৰবেশ কৰা বুলি এক খবৰ আহিছিল আৰু সেই খবৰৰ ভিত্তিতেই বনকৰ্মীৰ দলটোৱে এটা জীৱিত কাছসহ হাতেলোটে আটক কৰিবলৈ সক্ষম হয় এটা চোৰাং চিকাৰীক৷নিৰন নাথ নামৰ ধৃত চোৰাং চিকাৰীটোৰ ঘৰ বাক্সাৰ লাৱদাংগুৰি আৰক্ষী চকীৰ অন্তৰ্গত লাৱদাংগুৰি গাঁৱত ৷

বনবিষয়া গৰাকীয়ে সদৰি কৰামতে ধৃত চোৰাং চিকাৰীটো পূৰ্বৰেপৰা এইবোৰ কাণ্ডত জড়িত আছিল৷২০০৮ চনত তেওঁ এবাৰ বনবিভাগৰ ওচৰত আত্মসমৰ্পণো কৰিছিল৷কিন্তু তাৰ পিছত পুনৰাই চোৰাং চিকাৰৰ সতে জড়িত হৈ পৰিছিল নিৰন নাথে৷এবাৰ আত্মসমৰ্পণ কৰি পুনৰাই এই বৃত্তিত জড়িত হৈ মানাহৰ ক্ষতি কৰিব লোৱাটো কাৰ্যটো আমাৰ বনবিভাগৰ মতে অক্ষমণীয় অপৰাধ৷ যদি তেওঁ পৰিয়াল চলোৱাত কিবা অসুবিধাৰ সমুখীন হৈছিল সেই বিষয়ে বনবিভাগক অৱগত কৰিলেও নিশ্চয় কিবা নহয় কিবা সহায় লাভ কৰিলেহেঁতেন৷ধৃত নিৰন নাথে স্বীকাৰোক্তি দিয়ানুসৰি তেওঁৰ লগত আৰু চাৰিজন লোক জড়িত আছে আৰু সেয়া তদন্তৰ পিছতহে পোহৰলৈ আহিব৷উল্লেখ্য যে আজি ধৃত নাথক মুছলপুৰ আদালতত হাজিৰ কৰাই পুনৰ নিজৰ জিম্মাত ল’ব বনবিভাগে ৷ উল্লেখ্য যে , কেইবাবছৰ পূৰ্বে চোৰাং চিকাৰীৰ ৰম্যভূমিত পৰিণত হোৱা মানাহ ৰাষ্ট্ৰীয় উদ্যানত লাহে লাহে হ্ৰাস পাব ধৰিছিল অপৰাধমূলক ঘটনাৰ । কিন্তু পুণৰ ৰাষ্ট্ৰীয় উদ্যানখনৰ পৰা চোৰাং চিকাৰীক আটক কৰা বিষয়টোৱে স্তম্ভিত কৰি তুলিছে প্ৰকৃতিপ্ৰেমীসকলৰ লগতে প্ৰকৃতিপ্ৰেমী সংগঠনসমূহক।

স্থায়ী শান্তি লাভৰ জৰিয়তেহে মানুহে বাস্তৱিক শান্তি লাভ কৰাটো সম্ভৱ এই মন্তব্য প্ৰজাপিতা ব্ৰহ্মকুমাৰী ঈশ্বৰীয় বিদ্যালয় মৰিগাঁও সেৱা কেন্দ্রৰ সঞ্চালিকা মনিকা বেহেনৰ। প্ৰজাপিতা ব্ৰহ্মকুমাৰী ঈশ্বৰীয় বিদ্যালয় মৰিগাঁও সেৱা কেন্দ্রৰ স্বাধীনতাৰ অমৃত মহোৎসৱৰ শুভ উদ্বোধনী অনুষ্ঠানত ভাষণ প্ৰদান কৰি সঞ্চালিকা গৰাকীয়ে প্ৰজাপিতা ব্ৰহ্মকুমাৰী ঈশ্বৰীয় বিদ্যালয়ৰ লক্ষ্য আৰু উদ্দেশ্য সন্দৰ্ভত এক বিস্তৃত ব্যাখ্যা আগবঢ়াই। ইফালে তিৱা স্বায়ত্ত পৰিষদৰ মুখ্য কাৰ্যবাহী সদস্য জীৱন চন্দ্ৰ কোঁৱৰে বন্তি প্ৰজ্বলনৰে কাৰ্যসূচী শুভৰাম্ভ কৰি মুখ্য অতিথিৰ ভাষণত তেওঁ কয় সমাজ সংস্কাৰৰ মূল মন্ত্ৰই হৈছে আধ্যাত্মিকতাবাদ।সুস্থ সবল এখন সমাজ গঠনত কৰাত সংস্কাৰে গুৰুত্ব পূৰ্ণ ভূমিকা গ্ৰহণ কৰে বুলি মন্তব্য কৰি প্ৰজাপিতা ব্ৰহ্মকুমাৰী ঈশ্বৰীয় বিদ্যালয়ে মৰিগাঁও সমাজ জীৱনৰ বাবে কৰি অহা কামবোৰৰো প্ৰশংসা কৰে তিৱা স্বায়ত্ত পৰিষদৰ মুখ্য কাৰ্যবাহী সদস্য জনে।

মৰিগাঁও পৌৰসভাৰ পৌৰপতি যোগেশ তামুলী,মৰিগাঁও জিলা সাংবাদিক সংস্থাৰ সম্পাদক জিতুমনি নাথ,মেডিয়া ক্লাৱৰ সভাপতি ৰাতুল ডেকাই বক্তব্য আগবঢ়োৱা সভাখনত মৰিগাঁও পৌৰসভাৰ উপ-পৌৰপতি পিংকুমনি দাস,মৰিগাঁও গাঁওৰক্ষী বাহিনী উপ-পৰামৰ্শদাতা বিষ্ণু ভাগৱতী,প্ৰজাপিতা ব্ৰহ্মকুমাৰী ঈশ্বৰীয় বিদ্যালয় নগাঁও -মৰিগাঁও -হোজাই সংমণ্ডলৰ সঞ্চালিকা সৰিতা বেহেন,সেৱক হেমেন বৰদলৈ,মৰিগাওঁ পৌৰসভাৰ প্ৰাক্তন পৌৰপতি অৰ্চনা বৰদলৈকে প্ৰমুখ্য কৰি মৰিগাঁও পৌৰসভাৰ ৱাৰ্ড সদস্যা সকলে অংশ গ্ৰহণ কৰে।সভাত সেৱা কেন্দ্রটোৰ লগত জড়িত শতাধিক সেৱক সেৱিকা উপস্থিত থাকে।

নিশা অহা এজাক ধুমুহাই মৰিগাঁও জিলাৰ  দক্ষিণ-পশ্চিম অঞ্চলত নিশা প্ৰচণ্ড ধুমুহাই ব্যাপক তাণ্ডব চলায়। প্ৰৱল ধুমুহাই জাগী, ভকতগাঁও,এজাৰবাৰী, বৰদল, পদুমনি, ঋগড়কটাবড়ী, মিকিৰবৰি, পদুম পুখুৰী,মেৰুৱাগাঁও, কৰৈবাৰী জাগী জ্যোতিনগৰ অঞ্চলত বহু ঘৰ দুৱাৰ ক্ষতি সাধন কৰা লগতে গছবাগৰি পথ ব্যৱস্থা,বিদ্যুত যোগান ব্যৱস্থা ব্যাহত হয়। ধুমুহাৰ ফলত মৰিগাঁও জাগীৰোড পথৰ জাগীভকতগাঁও কপিলী দলঙৰ সমীপত গছবাগৰি পথ ব্যৱস্থা ব্যাহত হোৱাই উক্ত ব্যস্ত পথেৰে অহা যানবাহন সমূহ দুই আঢ়ৈ ঘন্টা ধৰি আবদ্ধ হৈ পৰাত অবৰ্ননীয় পৰিস্থিতিৰ সৃষ্টি হয়। অৱশ্যে মৰিগাঁও জিলাৰ অতিৰিক্ত উপায়ুক্ত গৰ্গমোহন দাসৰ উপৰিও জাগীৰোড থানাৰ আৰক্ষী উপস্থিত হৈ স্থানীয় ৰাইজৰ সহযোগত গছকাটি পথ  মোকোলোৱাৰ  পিছত নিশা ১১-৩০ মান বজাত পথটো মুকলি কৰিবলৈ সক্ষম হয়।

আনহাতে কালি নিশা আকস্মিকভাৱে অহা প্ৰচণ্ড ধুমুহাত মৰিগাঁও জিলাৰ দক্ষিণ পশ্চিমাঞ্চলৰ বিভিন্ন গাঁৱৰ ৰাইজৰ ব্যাপক ক্ষতিৰ সন্মূখীন হৈছে। আনহাতে আজি  তিৱা স্বায়ত্ত পৰিষদৰ কাৰ্য্যবাহী সদস্য  খগেন চন্দ্ৰ বৰদলৈ আৰু  মৰিগাঁও ৰাজহ চক্ৰ বিষয়া হৃদয় কুমাৰ দাস উক্ত ধুমুহাত বিধ্বস্ত হোৱা অঞ্চলসমূহ পৰিদৰ্শন কৰা লগতে ধুমুহাত ক্ষতিগ্ৰস্ত ৰাইজৰ ক্ষয়-ক্ষতিৰ বুজ লয়। অঞ্চলটোৰ সচেতন মহলে মৰিগাঁও জিলা প্ৰশাসনক ক্ষতিগ্ৰস্ত হোৱা দুখীয়া পৰিয়ালসমূহক উপযুক্ত ক্ষতিপূৰন প্ৰদান কৰি তাৎক্ষণিকভাবে সকাহ দিবলৈ আহ্বান জনাইছে।