নগাঁও সদৰ সমষ্টিৰ পাখিমৰীয়া উন্নয়ন খণ্ডৰ অন্তৰ্গত প্ৰধানমন্ত্ৰী আৱাস যোজনা(গ্ৰামীণ) অধীনৰ ২০২১-২২ বৰ্ষৰ অনুসুচিত জাতি আৰু জনজাতিৰ  হিতাধিকাৰী সকলক আজি গৃহ আবন্টনৰ পত্ৰ প্ৰদান কৰা হয়।দেওধৰ গাঁও পঞ্চায়তৰ কাৰ্যালয়ত অনুষ্ঠিত হোৱা গৃহ আবন্টন পত্ৰ প্ৰদানৰ কাৰ্যসূচীত হিতাধিকাৰী সকলক গৃহ আবন্টন পত্ৰ প্ৰদান কৰি  আজিৰ গৃহ আবন্টন পত্ৰ প্ৰদান কৰে বিধায়ক ৰূপক শৰ্মাই।গৃহ আবন্টন পত্ৰ বিতৰণৰ কাৰ্যসূচীত  জিলা পৰিষদৰ কাৰ্যবাহী বিষয়া অৰূপ শৰ্মা, কাৰ্যবাহী অভিযন্তা প্ৰণৱ নাথ,পাখিমৰীয়া উন্নয়ন খণ্ডৰ খণ্ড উন্নয়ন বিষয়া দিনেশ পেগু, পাখিমৰীয়া আঞ্চলিক পঞ্চায়তৰ সভাপতি  ৰিয়াজুল হ’ক প্ৰমুখ্যে বিভিন্ন পঞ্চায়তৰ প্ৰতিনিধি সকল,দলীয় কাৰ্যকতা, হিতাধিকাৰী সকল আৰু স্থানীয় উপস্থিত থাকে।গৃহ আবন্টন পত্ৰ প্ৰদান কৰি বিধায়ক ৰূপক শৰ্মাই কয় যছ ভাৰতৰ মাননীয় প্ৰধানমন্ত্ৰী নৰেন্দ্ৰ মোডীয়ে আৰ্থিক ভাবে দুৰ্বল শ্ৰেণীৰ লোক সকলৰ বাবে “প্ৰধানমন্ত্ৰী আবাস যোজনা আঁচনি”খন ৰূপায়ণ কৰিছে।আশাকৰো মাননীয় প্ৰধানমন্ত্ৰী ডাঙৰীয়াৰ এই আঁচনিৰ জৰিয়তে  পাখিমৰীয়া গাঁও পঞ্চায়তৰ হিতাধিকাৰী সকল যথেষ্ঠ উপকৃত হব পাৰিব।

লগতে বিধায়ক গৰাকীয়ে কয় যে প্ৰত্যেকৰে এখন নিজাকৈ ঘৰ নিৰ্মান কৰা সপোন থাকে যদিও বহুতৰে আৰ্থিক অসুবিধাৰ এই সপোন পূৰণ হোৱাত ব্যৰ্থ হয়।তেনে লোকসকলৰ সপোন পূৰণ কৰা উদ্দেশ্যেৰে  প্ৰধানমন্ত্ৰী নৰেন্দ্ৰ মোডীয়ে আৰ্থিক ভাবে দুৰ্বল শ্ৰেণীৰ লোক সকলৰ বাবে “প্ৰধানমন্ত্ৰী আবাস যোজনা আঁচনি”খন ৰূপায়ণ কৰিছে। প্ৰধানমন্ত্ৰী গৰাকীৰ এই আঁচনিৰ জৰিয়তে ইতিমধ্যে গ্ৰামাঞ্চলৰ লগতে চহৰাঞ্চলৰো আৰ্থিক ভাবে পিছপৰা লোক সকল উপকৃত হৈছে।ইয়াৰোপৰি বিধায়ক ৰূপক শৰ্মাই আজি নগাঁও সদৰ সমষ্টিৰ অন্তৰ্গত দেওধৰ গাঁও পঞ্চায়তত পঞ্চদশ বিত্তীয় আয়োগৰ অধীনত মৌখাতি লোকনিৰ্মান বিভাগৰ পথৰ পৰা ৰাকেশ বৰাৰ ঘৰ পৰ্যন্ত নিৰ্মান হবলগীয়া চি চি ব্লকৰ পথটোৰ আজি শুভ উদ্ধোধন কৰে ।পথটোৰ শুভ উদ্ধোধনী কাৰ্যসূচীত দেওধৰ গাঁও পঞ্চায়তৰ সভাপতি মৃদুল ফুকনৰ লগতে পঞ্চায়তৰ বিভিন্ন বিষয় ববীয়া আৰু স্থানীয় ৰাইজ উপস্থিত থাকে।লগতে বিধায়ক গৰাকীয়ে আজি  ৰণথলি ৰজাভেটি সমাজ সেৱা পুথিভঁৰালৰ সৌজন্যত ৰণথলিত অনুষ্ঠিত হোৱা ৪৬সংখ্যক ৰঙালী বিহুৰ অনুষ্ঠানত  উপস্থিত থাকি অসম চৰকাৰৰ আছুতীয়া পূঁজিৰ জৰিয়তে নিৰ্মান হোৱা বিহুতলীৰ মঞ্চ ৰাইজৰ বাবে মুকলি কৰে।

বঙাইগাঁও জিলাত ফ’ৰলেনযুক্ত পথ নির্মাণৰ ক্ষেত্ৰত এটাৰ পিছত এটাকৈ অনিয়মৰ তথ্য উন্মােচিত হৈছে । উল্লেখ্য যে হাপাচাৰাৰ পৰা যােগীঘােপাৰ মাল্টি মডেল লজিষ্টিক হাবলৈ নির্মীয়মাণ ফ’ৰলেন যুক্ত পথটোৰ টুলুঙীয়া-যােগীঘােপা অংশ নিৰ্মাণৰ দায়িত্ব লাভ কৰে আৰ পি চি আৰু আৰ এছ বি আই নামৰ দুটা নির্মাণকাৰী সংস্থাই । সংস্থা দুটাই পথ নিৰ্মাণৰ বাবে প্রয়ােজনীয় শিলৰ বাবে নির্মীয়মাণ পথৰ কাষত উত্তৰ শালমাৰা পঞ্চায়তৰ চৌটাকীত দুটাকৈ ক্ৰেচাৰ মেচিন বহুৱায়। ইফালে, ক্ৰেচাৰ মেচিন স্থাপনৰ বাবে সংশ্লিষ্ট পঞ্চায়তৰ অনুমতি তথা আপত্তিবিহীন প্রমাণ-পত্র বাঞ্ছনীয়। ইয়াৰ ভিত্তিতে বন বিভাগে ক্ৰেচাৰ চলােৱাৰ বাবে পঞ্জীয়ন তথা অনুজ্ঞাপত্র দিয়ে। অভিযােগ মতে, ডেৰ বছৰ পূর্বে স্থাপন কৰা ক্ৰেচাৰ মেচিন দুটাৰ বাবে পঞ্চায়তৰ ফালৰ পৰা এন অ’ চি দিয়া হােৱা নাছিল।

পিছত বিগত বৰ্ষত এন অ’ চি প্রদান কৰে যদিও এইক্ষেত্ৰত পঞ্চায়ত সভানেত্ৰীয়ে এন অ’ চি সন্দৰ্ভত অজ্ঞতা প্রকাশ কৰাত ৰহস্যৰ সৃষ্টি হৈছে। পঞ্চায়ত সভানেত্রীয়ে সাংবাদিকৰ আগত অভিযােগ কৰা মতে, নির্মাণকাৰী সংস্থাৰ ফালৰ পৰা বহুবাৰ এন অ’ চি দিয়াৰ বাবে সভানেত্রীক লগ ধৰিছিল যদিও প্রতি বাৰেই জনস্বাস্থ্য তথা পাৰিপাৰ্শ্বিকতাৰ প্রতি লক্ষ্য ৰাখি এন অচি দিয়াৰ পৰা বিৰত থাকে। এনে কোনাে নথিতে স্বাক্ষৰ নকৰা বুলিও সাংবাদিকক জানিবলৈ দিয়ে। তৎসত্ত্বেও এন অ’ চি লাভ কৰা বুলি জানিব পাৰি আশ্চর্যবােধ কৰে। বঙাইগাঁও আই উপত্যকা বন সংমণ্ডলে এন অ’ চি নােহােৱাকৈ ক্ৰেচাৰ মেচিন চলাবলৈ কিয় অনুমতি দিলে সেয়া ৰহস্যৰ বিষয় হৈ পৰিছে। এইক্ষেত্ৰত বন বিভাগৰ সৈতে গােপন বুজাবুজি আছে নেকি বুলিও সন্দেহৰ প্রশ্ন উত্থাপন কৰিছে।

ভাৰতীয় অডিত এন্ড‌ একাউন্টৈত জেনেৰেলৰ উদ্যোগত গুৱাহাটীৰ বেলতলাস্থিত অডিত এন্ড একাউন্টছ ( প্ৰধান মহাগানণিক ) কাৰ্যালয় প্ৰাংগণত নিশা সামৰণি পৰা তেওঁলোকৰ দুদিনীয়া বিভাগীয় উত্তৰ পূৱ মণ্ডল কেৰম প্ৰতিযোগিতাৰ মহিলাৰ একক শাখাত নগাঁৱৰ জীৱৰী তাজমিনা ছুলতানাই চেম্পিয়ন খিতাপ অৰ্জন কৰি অসমলৈ গৌৰৱ কঢ়িয়াই আনিছে। ঘৰুৱা অসমৰ উপৰি বিভাগটোৰ মণিপুৰ, মেঘালয় আৰু ত্ৰিপুৰাৰ খেলুৱৈয়ে অংশগ্ৰহণ কৰা প্ৰতিযোগিতাখনৰ ফাইনেল খেলত তাজমিনাই মেঘালয়ৰ ওৱামৰি স্বোৱেৰক ২৪-১২, ২২-১২ আৰু ২৪-১৭ শ্বেটত পৰাস্ত কৰে।

ইয়াৰ আগতে ছেমিফাইনেলত মেঘালয়ৰে মেৰীক ২৫-১০, ১৭-১৬ শ্বেটত পৰাস্ত কৰি ফাইনেল খেলাৰ যোগ্যতা অৰ্জন কৰিছিল। খেলৰ অন্তত তেওঁক ট্ৰফী সহ মানপত্ৰ প্ৰদান কৰে একাউন্টছৰ মহাগানণিক গুলজাৰী লালে। তেওঁৰ এই উৎসাহজনক খবৰত নগাঁৱৰ ক্ৰীড়া মহলতো আনন্দৰ জোঁৱাৰ উঠিছে।

ঢেকীয়াজুলি সমষ্টিৰ বিধায়ক তথা অসম চৰকাৰৰ নগৰ উন্নয়ন আৰু জলসিঞ্চন বিভাগৰ মন্ত্ৰী অশোক সিংহলে আজি  মাজৰৌমাৰীত শিশু উদ্যান আৰু শৰীৰ চৰ্চা কেন্দ্ৰৰ শুভ উদ্বোধন কৰে। স্থানীয় ৰাইজৰ বিপুল উৎসাহৰ মাজত শিশু উদ্যান আৰু শৰীৰ চৰ্চা কেন্দ্ৰটি আনুষ্ঠানিক ভাৱে উদ্বোধন কৰি তেওঁ ৰাইজৰ বাবে উচৰ্গা কৰে৷ৰাইজে ঢোল- তাল বজাই , বিহু নৃত্য, ঝুমুইৰ নৃত্য, কোচ ৰাজবংশী নৃত্যৰে মন্ত্ৰীগৰাকীক আদৰি অনাৰ পিছত আয়তি সকলৰ উৰুলি ধ্বনিৰ মাজতে আৰু প্ৰথমতে আটক ধুনীয়াকৈ নিৰ্মাণ কৰা শিশু উদ্যান খন উদ্বোধন কৰে। সেই উপলক্ষে মাজৰৌমাৰী পঞ্চায়তৰ সভাগৃহত  আয়োজন কৰা  সভাখনত বিধায়ক তথা মন্ত্ৰী অশোক সিংহলে তেওঁৰ ভাষণ প্ৰসংগত এই শিশু উদ্যান আৰু শৰীৰ চৰ্চা কেন্দ্ৰটিয়ে শিশু,যৱুক-যুৱতীৰ মাজত ক্ৰীড়াৰ পৰিবেশ ৰচনা কৰিব বুলি আশা প্ৰকাশ কৰে৷এই শিশু উদ্যান আৰু শৰীৰ চৰ্চা কেন্দ্ৰটি নিজৰ সম্পত্তি বুলি ভাবি ইয়াৰ পৰিচালনাৰ সঠিক দায়িত্ব লব লাগে বুলিও তেওঁ ৰাইজক আহ্বান জনায়৷

ঢেকীয়াজুলি সমষ্টিৰ ১৮ খন পঞ্চায়তত একোখনকৈ এনে শিশু উদ্যান আৰু শৰীৰ চৰ্চা কেন্দ্ৰ নিৰ্মাণ হোৱাৰ পিছত মুকলি কৰা হৈছে বুলি উল্লেখ কৰি মন্ত্ৰী অশোক সিংহলে আৰু কয় যে,এই শিশু উদ্যান আৰু শৰীৰ চৰ্চা কেন্দ্ৰ সমূহে শিশু তথা উঠি অহা প্ৰজন্মক উপকৃত কৰিব৷উদ্বোধনী সভাখনত  তেজপুৰ জিলা পৰিষদৰ মূখ্য কাৰ্যবাহী বিষয়া কৰবী শইকিয়া কৰণ, ঢেকীয়াজুলি খন্ড উন্নয়ন বিষয়া চন্দ্ৰ জ্যোতি পেগু, শোণিতপুৰ জিলা বি জে পিৰ সভাপতি বাতাচ ওৰাং,ঢেকীয়াজুলি আঞ্চলিক পঞ্চায়তৰ সভাপতি শিৱচৰণ চাহু, অমিয়পুৰ জিলা পৰিষদৰ সদস্য চানিকা গুডিয়া,পানবাৰী জিলা পৰিষদৰ সদস্য ধনু তপ্ন,ঢেকীয়াজুলি পশ্চিম মণ্ডল বি জে পিৰ সভাপতি প্ৰকাশ তাঁতীকে আদি কৰি বহুতো দলীয় নেতা কৰ্মীৰ লগতে অঞ্চলটোৰ ভালে সংখ্যক বিশিষ্ট ব্যক্তি উপস্থিত আছিল।

ঢেকীয়াজুলি পশ্চিম মণ্ডল বি জে পিৰ সাধাৰণ সম্পাদক ৰবীন্দ্ৰ বৰাই আঁতধৰে৷উল্লেখযোগ্য যে সভাৰ পূৰ্বে মাজৰৌমাৰী উচ্চ মাধ্যমিক বিদ্যালয়ত নিৰ্মাণ হ’ব লগীয়া গ্ৰীণ গেলাৰী নিৰ্মাণৰ আধাৰশিলা স্থাপন কৰে বিধায়ক তথা মন্ত্ৰী অশোক সিংহলে৷বিদ্যালয় খনৰ প্ৰধান শিক্ষক প্ৰণৱ বৈশ্যৰ নেতৃত্বত শিক্ষক-শিক্ষয়িত্ৰী আৰু ছাত্ৰ-ছাত্ৰী সকলে বিদ্যালয়ৰ পদুলীৰ পৰা ব্যাপক উৎসাহৰ মাজেৰে আদৰি নিয়ে মন্ত্ৰী অশোক সিংহলক৷আদাৰশিলা স্থাপনৰ পাছতে তেওঁ বিদ্যালয় খনৰ ছাত্ৰ-ছাত্ৰী সকলৰ সৈতে মতবিনিময় কৰে৷একেদৰে স্থানীয় মাজৰৌমাৰী শংকৰদেৱ শিশু নিকেতনৰ ছাত্ৰ-ছাত্ৰীৰ সৈতেও মত বিনিময় কৰে ঢেকীয়াজুলি সমষ্টিৰ বিধায়ক তথা মন্ত্ৰী অশোক সিংহলে৷