ৰঙালী বিহুৰ ৰঙ-আনন্দৰ মাজতে গহপুৰৰ হেলেম আৰক্ষী চকীৰ অন্তৰ্গত টকৌবাৰীৰ এটা গ্ৰাম্য পথত সংঘটিত হোৱা এক শোকাবহ পথ দুৰ্ঘটনাত এটা বিহুৰ দলৰ পাঁচগৰাকীকৈ বিহুৱা- বিহুৱতীয়ে কৰুণ মৃত্যুক  সাৱটিব লগা হোৱা  ঘটনাৰে জড়িত তথা পলাতক চালক অভিজিত গগৈয়ে আজি  শিৱসাগৰ জিলাৰ আমগুৰি থানাত আত্মসমৰ্পণ কৰে। উল্লেখ্য যে সংশ্লিষ্ট বিহুৰ দলটো কঢ়িয়াই নিয়া বলেৰ’ পিক আপ খনৰ চালক অভিজিত গগৈৰ  বিৰুদ্ধে  অত্যাধিক  সুৰাপান কৰি গাড়ী চলোৱাৰ অভিযোগ উত্থাপিত হোৱাৰ পিছতে তেওঁ ঘটনীস্থলীৰ পৰা পলায়ন কৰিছিল।

উক্ত অভিশপ্ত গাড়ীখনৰ চালক অভিজিৎ গগৈয়ে  আজি  বিয়লি  আমগুৰি আৰক্ষী থানাত আত্মসমৰ্পন কৰে। জানিব পৰা মতে অভিজিৎ গগৈৰ ঘৰ শিৱসাগৰ জিলাৰ আমগুৰি আৰক্ষী থানাৰ অন্তৰ্গত আমগুৰি নগৰত ।উল্লেখযোগ্য  যে  বিগত ১১ বছৰ ধৰি অভিজিতে হেলেমত  ব্যৱসায় কৰি আছিল বুলি জানিব পৰা গৈছে।  ইতিমধ্যে গাড়ীচালক অভিজিৎ গগৈক গহপুৰ সদৰ আৰক্ষীয়ে নিজৰ জিম্মাত লৈছে।

ধবুৰীৰ পাছতে ১৮২০ চনত স্হাপিত  উত্তৰ-পূৰ্বাঞ্চলৰ  দ্বিতীয়টো প্ৰচীন গুৰুদ্বাৰ ৰহাৰ চাপৰমুখৰ গুৰুদ্বাৰা মাতাজীত ৪ এপ্ৰিলৰ পৰা চলি থকা শিখ নৱম গুৰু টেগ বাহাদুৰৰ ৪০১ সংখ্যক জন্মোৎসৱৰ  আজি সামৰণি পৰে। প্ৰকাশ উৎসৱ হিচাপে লৈ পালন কৰি অহা ১৫ দিনীয়া এই উৎসৱৰ প্ৰত্যেক দিনাই গুৰু গ্ৰন্থচাহিব পাঠৰ লগতে ধৰ্মালোচনী সভা অনুষ্ঠিত হয়। প্ৰকাশ উৎসৱৰ লগত সংগতি ৰাখি দেওবাৰে উলিওৱা হয় এক বৰ্ণিল সাংস্কৃতিক শোভাযাত্ৰা।  আজি অনুষ্ঠিত হোৱা  সামৰণি অনুষ্ঠানত কেইবাজনো বিশিষ্ট ব্যক্তিক সম্বৰ্দ্ধনা জনোৱা হয়। সামৰণি অনুষ্ঠানত কেইবাগৰাকীও শিল্পীয়ে ভজন পৰিবেশন কৰে। সামৰণি অনুষ্ঠানত ৰহাৰ বিধায়ক শশীকান্ত দাসেো উপস্থিত থাকে।

উল্লেখ্য যে গুৰু টেগ বাহাদুৰৰ ৪০১ সংখ্যক জন্মোৎসৱৰৰ এই প্ৰকাশ উৎসৱত ৰাজ্যৰ লগতে পঞ্জাৱ, দিল্লী, উত্তৰ প্ৰদেশ, বিহাৰ আদিৰ পৰাও বহু ধৰ্মীয় নেতাই অংশগ্ৰহণ কৰেহি।৪ এপ্ৰিলত আশা -দীৱাৰ কীৰ্তনেৰে আৰম্ভ হোৱা অনুষ্ঠানত “গুৰু গ্ৰন্থ চাহিবৰ “অবিৰত পাঠ কৰাৰ পাছত যোৱা কালি দুপৰীয়া ‘গুৰু -কা – লঙ্গৰ’ ধৰ্মীয় শোভাযাত্ৰা ,ধৰ্মীয় সভাৰ পাছত আজি পুৱা “গুৰু-গ্ৰন্থ – চাহিবৰ ” ১৩ তম্ আৰু ১৪ তম্ অখণ্ড পাঠৰ সমাপ্তি হয় । দুপৰীয়া অনুষ্ঠিত হয় ধৰ্মীয় সভা । আমন্ত্ৰিত জ্ঞানী- জেঠাদাৰৰ দ্বাৰা ” চৱদ- কীৰ্তন” আৰু ধৰ্মীয় চৰ্চাৰ অনুষ্ঠানত সভাপতিত্ব কৰে সাংবাদিক তথা আদৰণী সমিতিৰ সভাপতি ৰাজবীৰ সিংহই ।বিয়লি বন্তি প্ৰজ্বলনেৰে অনুষ্ঠানৰ সামৰণি হয় ।

নিশা ধুবুৰীৰ ওপৰেদি  ঘন্টাত ৬০ কিমি বেগত বৈ যোৱা প্ৰচণ্ড ধুমুহা, বৰষুণত জিলাখনত ব্যাপক ক্ষয়ক্ষতিৰ সৃষ্টি কৰিছে। ধুবুৰী চহৰৰ ৩ নং ওয়ার্ড বালুৰচৰ ত  কামনা পাটোৱাৰ ঘৰত  ধুমূহাত প্ৰকাণ্ড গছ এটা বাসগৃহ ৰ ওপৰত বাগৰি পৰাত উক্ত গৃহৰ পৰিৱালৰ সদস্য সকল কথামপি ৰক্ষা পৰে যদি ঘৰখনৰ বিস্তৰ  ক্ষতিসাধন হয়। । ইপিনে ধুবুৰী জিলা দুৰ্যোগ প্ৰশমন বিভাগৰ বিষয়া মোফাজ্জল চৰকাৰ জনায়, যোৱা নিশা ফকিৰগঞ্জত ঘাট পাৰত বান্ধি থকা অবস্থাত ১১খন নাও প্ৰচণ্ড ধুমুহ বৰষুণত পানীত ডুব যায়, পিচত এচ ডি আৰ এফ বাহিনীৰ দল ৭ খন নাও উদ্ধাৰ কৰিবলৈ সক্ষম হয়। 

আনহাতে ধুমূহাত জিলা খনৰ বিভিন্ন  অঞ্চল ত মুঠ ২৫৪ টা ঘৰ ধুমূহাত ধবংস হৈছে। ২৭ খন গাওৰ ৪ হেজাৰ ৩১১ জন লোক ধুমূহা, বৰষুণত ক্ষতিগ্রস্ত হৈছে। বিশেষ কৈ গোলকগঞ্জ ৰাজহ চক্ৰৰ অন্তৰ্গত বিভিন্ন অঞ্চল ত বহু হেক্টৰ কৃষিজাত সামগ্রী ক্ষয়ক্ষতি হৈছে। যদিহ কোন ঠাইৰ পৰা কোন লোকৰ আহত , মৃত্যু ৰ বাতৰি পোৱা যোৱা নাই। 

নামনি অসমৰ বিভিন্ন জিলাত এতিয়া সক্ৰিয় হৈ পৰিছে জেহাদী সংগঠন আল কায়দাৰ শ্লীপাৰ চেল ৷ একেদৰে খোপনি পুতিছে জেহাদী সংগঠনে ৷ বৰপেটাৰ পিচত এইবাৰ বঙাইগাঁৱত ধৰা পৰিছে আল কায়দাৰ নেটৱৰ্ক ৷ ত্ৰিপুৰাত গ্ৰেপ্তাৰ কৰা তিনি আনচাৰুল্লাহ বাংলা টিম( এবিটি)ৰ সদস্যৰ স্বীকাৰোক্তিত এই বিস্ফোৰক তথ্য পোহৰলৈ আহিছে ৷ বাংলাদেশৰ নিষিদ্ধ সংগঠন আনচাৰুল্লাহ বাংলা টিমৰ আল কায়দাৰে আছে সম্পৰ্ক আৰু আল কায়দীৰ হৈ কাম কৰি আহিছে সংগঠনটোৱে ৷ এই তিনি সদস্যই কিছুদিন পূৰ্বে  বঙাইগাঁও জিলাত বাহৰ পাতি থাকি জিলাখনত নিজৰ সাংগঠনিক ভেটি মজবুত কৰি তোলাৰ বাবে অতি গোপনে কাম কাজ চলাই গৈছিল ৷ কিন্তু শেহতীয়াভাৱে বঙাইগাঁও আৰক্ষীয়ে ত্ৰিপুৰাত স্থানীয় আৰক্ষীৰ সহযোগত কৰায়ত্ত কৰা এই তিনি সদস্যক আজি পুৱতি নিশা বঙাইগাঁওলৈ আনিছে ৷ এই সন্দৰ্ভত বঙাইগাঁও জিলাৰ আৰক্ষী অধীক্ষক স্বপ্ননীল ডেকাই সংবাদ মাধ্যক জানিবলৈ দিয়া মতে যোৱা ৮ এপ্ৰিলত ত্ৰিপুৰাৰ চিপাহীজলাৰ পৰা বঙাইগাঁও আৰক্ষীয়ে ত্ৰিপুৰা আৰক্ষীৰ সহযোগত এই তিনি জেহাদীক কৰায়ত্ত কৰিছিল ৷  যোগীঘোপা থানাত ৰুজু হোৱা ৫৬ / ২২ নং গোচৰৰ ভিত্তিত আৰক্ষীয়ে এই সদস্য তিনিজনক বঙাইগাঁওলৈ আনি জেৰা আৰম্ভ কৰিছে ৷ আব্দুল কাছেম, ইমৰাণ হুছেইন আৰু হামিদ আলী নামৰ  তিনিওজন ব্যক্তি বাংলাদেশৰ জেহাদী সংগঠন আনচাৰুল্লাহ বাংলা টিম ( এবিটি) ৰ সদস্য ৷

ত্ৰিপুৰাত গ্ৰেপ্তাৰ কৰা এই তিনি সদস্য যাত্ৰাপুৰ আৰক্ষীৰ জিম্মাত আছিল যদিও দেওবাৰে বঙাইগাঁও আৰক্ষীৰ জিম্মাত দিয়ে ৷ বঙাইগাঁৱৰ পৰা  যোৱা আৰক্ষীৰ দলে ৰে’লযোগে আজি পুৱতি নিশা জেহাদী তিনিজনক  বঙাইগাঁওলৈ আনে ৷ ইতিমধ্যে এই সংগঠনৰ সদস্যক বৰপেটা আৰক্ষীয়ে কিছুদিন পূৰ্বে গ্ৰেপ্তাৰ কৰিছিল আৰু গ্ৰেপ্তাৰ হোৱা সদস্যৰ তথ্যৰ ভিত্তিতে বঙাইগাঁও আৰক্ষীয়ে ত্ৰিপুৰাৰ পৰা এই তিনি জেহাদীক গ্ৰেপ্তাৰ কৰিবলৈ সক্ষম হয় বুলি কয় ৷ আৰক্ষী অধীক্ষকগৰাকীয়ে লগতে সংবাদ মাধ্যমৰ আগত প্ৰকাশ কৰা মতে এই তিনি জেহাদী সংগঠনৰ সদস্যই যোৱা বৰ্ষৰ ডিচেম্বৰ আৰু জানুৱাৰী মাহত বঙাইগাঁও জিলাৰ অন্তৰ্গত যোগীঘোপা, কাবাইটাৰী আৰু অভয়াপুৰী আদি অঞ্চলত বাহৰ পাতি থাকি জেহাদী কাৰ্যকলাপ চলাই গৈছিল ৷ সংগঠনটোৰ ভেটি মজবুত কৰাৰ বাবে গঢ়ি তুলিছিল শ্লীপাৰ চেল ৷ এই শ্লীপাৰ চেলৰ জৰিয়তে সংগঠনটোৱে নামনি অসমৰ লগতে ৰাজ্যখনৰ বিভিন্ন জিলাত জেহাদী কাৰ্যকলাপ চলাই আহিছিল ৷ এই সদস্যকেইজনৰ সংগী ইতিমধ্যে ভূপালতো গ্ৰেপ্তাৰ হৈছে ৷ এই সদস্যসকল মূলত শ্লীপাৰ চেল গঠনৰ বাবেই আহে বুলিও কয় আৰক্ষী অধীক্ষকগৰাকীয়ে ৷ আনকি জেহাদী সংগঠনটোৱে কূটাঘাতমূলক কাৰ্যকলাপ সংঘটিত কৰিবলৈ বিভিন্ন ব্লু-প্ৰিণ্ট সাজু কৰিছিল বুলি সন্দেহ কৰিছে জিলা আৰক্ষী অধীক্ষক স্বপ্ননীল ডেকাই ৷ আৰক্ষীয়ে এই সদস্যকেইজনে কোনোবাৰ সৈতে থকা লিংকৰ আধাৰতে আহি জিলাখনত বাহৰ পাতিছিল বুলি সন্দেহ প্ৰকাশ কৰি সেইসকলৰ তথ্য আহৰণৰ বাবে উঠি পৰি লাগিছে ৷ লগতে সদস্য কেইজনক জেৰা কৰাৰ পিচতহে অধিক তথ্য জনাবলৈ সক্ষম হ’ব বুলিও প্ৰকাশ কৰিছে ৷

ইপিনে ধৃত তিনিওকে আজি বঙাইগাঁও আৰক্ষীয়ে আদালতত হাজিৰ কৰোৱাত আদালতে ৬ দিনৰ বাবে আৰক্ষীৰ জিন্মালৈ প্ৰেৰণ কৰে ৷ জেহাদী তিনিজনক বঙাইগাঁও জিলাৰ উপ আৰক্ষী অধীক্ষক মণিকান্ত চমুৱাৰ নেতৃত্বত যোৱা আৰক্ষীৰ এটা দলে ৰে’লযোগে বঙাইগাঁওলৈ আনে ৷ বঙাইগাঁও আৰক্ষীয়ে বৰ্তমান তিনি জেহাদী সদস্যক জেৰা অব্যাহত ৰাখিছে ৷ উল্লেখ্য যে জেহাদী সংগঠনে এতিয়া ৰাজ্যখনৰ বিভিন্ন জিলাৰ সংখ্যালঘু অধ্যুষিত অঞ্চলত নিজৰ কাৰ্যকলাপ বিস্তাৰ কৰাৰ বাবে উঠি পৰি লাগিছে ৷ এনে অৱস্থাত সংখ্যালঘু অঞ্চলৰ লোকসকল সচেতন নহলে এনে সংগঠনৰ জালত পৰি নিজে নিজৰ বিপদ চপাই যে আনিব লাগিব সেয়া নিশ্চিত ৷