সমগ্ৰ দেশৰ লগতে অসমতো দৈনিক বাঢ়িছে অত্যাৱশ্যকীয় ইন্ধন আৰু ৰন্ধন গেছৰ দাম। পেট্ৰ’ল-ডিজেলৰ দামে শতকৰ ঘৰ অতিক্ৰম কৰিছে। এই দাম বৃদ্ধিৰ হাৰ দৈনিক ঊৰ্ধ্বগামী হৈয়েই আছে। ইয়াৰ মাজতে আহিছে আৰু এক দুঃখবৰ। এতিয়া টোলকৰ বৃদ্ধিৰো সিদ্ধান্ত গ্ৰহণ কৰা হৈছে। ৩১ মাৰ্চৰ মাজনিশাৰ পৰাই বৰ্ধিত হাৰত টোল কৰ আদায় দিব লাগিব ৰাজ্যৰ জনগণে। ১ এপ্ৰিলৰ পৰা ৰাষ্ট্রীয় ঘাইপথৰ টোল গে’টৰ কৰ বৃদ্ধি সিদ্ধান্ত গ্ৰহণ কৰা হৈছে। নতুন নিৰিখ অনুসৰি বাণিজ্যিক বাহনৰ টোল অতিৰিক্ত ৬৫ টকালৈ বৃদ্ধি কৰা হ’ব। ৰাষ্ট্রীয় ঘাইপথ প্ৰাধিকৰণৰ এই সিদ্ধান্ত এতিয়া ৰাজ্যৰ জনগণৰ এটা বোজা হৈ পৰাৰ আশংকাৰ সৃষ্টি হৈছে। কেৱল ব্যৱসায়িক বাহনৰ ক্ষেত্ৰতে নহয়, ব্যক্তিগত বাহনেও বৰ্ধিত হাৰত আদায় দিব লাগিব টোলকৰ। ব্যক্তিগত বাহনৰ টোলকৰ অতিৰিক্ত ১০ টকালৈকে বাঢ়িব নতুন নিয়ম অনুসৰি। এবাৰ টোল পাৰ হোৱাৰ বিনিময়ত ভৰিব লাগিব এই অতিৰিক্ত কৰ। ৩১ মাৰ্চৰ মাজনিশাৰ পৰা বলৱৎ হ’ব এই নতুন নিৰিখ। বাণিজ্যিক বাহন এখনে এবাৰ টোল পাৰ হ’লে ১৪০ টকাৰ সলনি ২১৫ টকা পৰ্যন্ত অতিৰিক্ত টোল ভৰিব লাগিব। বাছ আৰু ট্ৰাক এখনে ২৯৫ টকাৰ সলনি ৪৪৫ টকা অতিৰিক্ত টোল দিব লাগিব।
প্ৰাধিকৰণে জাৰি কৰা জাননী অনুসৰি ব্যক্তিগত বাহন এখনে এবাৰ যাত্ৰা কৰিল ১১৫টকা কৰ দিব লাগিব। ওভতনি যাত্ৰাত কৰৰ পৰিমান হ’ব ১৭৫টকা। মাহেকীয় পাছ উলিয়ালে দিব লাগিব ৩৮৬৫ টকা। এলচিভি বাহনৰ ক্ষেত্ৰত কৰৰ হাৰ হ’ব—এবাৰত ১৮৫ টকা, ওভতনি ২৮০ টকা আৰু মাহেকীয়া নিৰিখত ৬২৪৫ টকা। আনহাতে বাছ আৰু ট্ৰাকে এবাৰত ৩৯৫ টকা, ওভতনি যাত্ৰাত ৫৯০টকা আৰু মাহিলী হিচাপত ১৩০৮৫টকা কৰ আদায় দিব লাগিব। অসমৰ বিভিন্ন স্থানত থকা টোলগেটসমূহ অনুসৰি বিভিন্ন নিৰিখসমূহ হৈছে এনেধৰণৰ। অসমত থকা বিভিন্ন টোলগেটসমূহৰ ভিতৰত আছে বৰপেটা জিলাৰ গলিয়া, কামৰূপ জিলাৰ মদনপুৰ, কামৰূপ মহানগৰ জিলাৰ সোণাপুৰৰ নাজিৰাখাট, নগাঁও জিলাৰ ৰহা, হোজাই জিলাৰ ডবকাৰ মিকিৰআটী আৰু ডিমা হাছাও জিলাৰ মান্দেৰদিছা টোলগেট। এই টোল গেটবোৰত কৰৰ নতুন নিৰিখ হ’ব তলত দিয়া ধৰণৰ, ভবানীপু সমীপৰ গলিয়া টোলগে’টত সৰু গাড়ীৰ এূবাৰৰ মাচুল ৪৫টকা, লঘু বাণিজ্যিক বাহনৰ এবাৰত ৭০ টকা, বাছ অথবা ট্ৰাকৰ মাচুল ১৫০টকা, দহ চকাযুক্ত বাণিজ্যিত বাহনৰ মাচুল ১৬৫টকা, ডাম্পাৰ, নিৰ্মাণকাৰ্যত জড়িত গধুৰ বাহনৰ মাচুল ২৩৫টকা আৰু ৭ টাতকৈ অধিক এক্সেল থকা গধুৰ যান-বাহনৰ মাচুল ২৮৫টকা নিৰ্ধাৰণ কৰা হৈছে। মদনপুৰ টোলগেটত সৰু বাহনৰ বৰ্তমানৰ মাচুল ১১০টকাৰ ঠাইত ১২৫টকা, লঘু বাণিজ্যিক বাহনৰ মাচুল এতিয়াৰ ১৮০ টকাৰ ঠাইত ২০০টকা, ট্ৰাক বা বাছৰ মাচুল এতিয়াৰ ৩৮০ টকাৰ ঠাইত ৪২০টকা, দহ চকাযুক্ত বাণিজ্যিক বাহনৰ মাচুল বৰ্তমানৰ ৪১৫ টকাৰ সলনি ৪৫৫টকা, ডাম্পাৰসহ গধুৰ যান-বাহনৰ মাচুল বৰ্তমানৰ ৫৯৫ টকাৰ সলনি ৬৫৫টকা আৰু অতি গধুৰ বাহনৰ মাচুল ৭২৫টকাৰ সলনি ৮০০টকা নিৰ্ধাৰণ কৰা হৈছে।
একেদৰে সোণাপুৰৰ টোলগেটৰ মাচুল বৃদ্ধি কৰা হৈছে এনেধৰণে সৰু বাহনৰ মাচুল বৰ্তমানৰ ১১৫টকাৰ পৰা ১৩০ টকা, লঘু বাণিজ্যিক বাহনৰ মাচুল ১৮৫ টকাৰ সলনি ২০৫টকা, ট্ৰাক অথবা বাছৰ মাচুল বৰ্তমানৰ ৩৯৫ টকাৰ সলনি ৪৩০টকা, দহ চকাযুক্ত বাণিজ্যিক বাহনৰ মাচুল ৪৩০টকাৰ পৰা ৪৭০টকা, ডাম্পাৰসহ আন গধুৰ গাড়ীৰ মাচুল বৰ্তমানৰ ৬১৫ টকাৰ পৰিৱৰ্তে ৬৮০ টকা, আন অতি গধুৰ বাহনৰ মাচুল বৰ্তমানৰ ৭৫০ টকাৰ পৰিৱৰ্তে ৮২৫ টকা কৰা হৈছে। একেদৰে ৰহাৰ টোলগে’টৰ নতুন নিৰিখ হৈছে এনেধৰণৰ লধু বাহনৰ নিৰিখ ১১০টকা, লঘু বাণিজ্যিক বা৭হনৰ নিৰিখ ১৭৫টকা, ট্ৰাক-বাছৰ মাচুল ৩৭০টকা, দহ চকাৰ গাড়ীৰ মাচুল ৪০৫ টকা, ডাম্পাৰ আদি গধুৰ বাহনৰ মাচুল ৫৮০ টকা, আৰু অতি গধুৰ বাহনৰ মাচুল ৭০৫ টকালৈ বৃদ্ধি কৰা হৈছে। একেদৰে ডবকা আৰু মান্দেৰদিছা টোলগেটৰ কৰো ১৫শতাংশ বৃদ্ধি কৰা হৈছে।এই ব্যৱস্থা বলৱত হোৱাৰ লগে লগে তাৰ কুপ্ৰভাৱ যে সকলোফালে পৰিব সেয়া নিশ্চিত। কৰৰ বোজা বৃদ্ধিৰ লগে লগে ব্যৱসায়িক বাহন বিশেষকৈ বাছ-ট্ৰাকৰ ভাৰা বৃদ্ধি হোৱাৰো আশংকা আছে। যাৰ কুফল অন্যান্য ক্ষেত্ৰতো পৰিব পাৰে। এনে পৰিস্থিতিত সাধাৰণ মানুহৰ জীৱন ধাৰণ অধিক জটিল হৈ পৰাটো অৱধাৰিত বুলিব পাৰি।
