আজি বিশ্ব সাধুকথা দিৱসৰ দিনাই সাম্প্ৰতিক সময়ত অসমৰ সাহিত্য জগতত সাহিত্য অভিযন্তা হিচাপে আত্মপ্ৰকাশ কৰা তথা কৰ্ম সূত্রে নতুন দিল্লীৰ নিৱাসী চুমিন্দ্ৰ চৌধুৰীৰ গল্প আৰু উপন্যাস সংকলন ‘এজন সাহিত্য অভিযন্তাৰ আত্ম কথা’ ৰাজধানী দিল্লীস্থিত শ্ৰীমন্ত শঙ্কৰদেৱ ভৱনত উন্মোচিত কৰা হয় । ২০২১ চনৰ আগষ্ট মাহত প্ৰকাশ পোৱা বিহংগম দৃষ্টিত মিজোৰাম শীৰ্ষক ঊপন্যাসখনৰ লগতে গ্ৰন্থ খনৰ ইংৰাজী অনুবাদ ন্ঘাহ-লহ -দৌৰ ৰ সফলতাৰ পাছত চুমিন্দ্ৰ চৌধুৰীয়ে অসম তথা মিজোৰামৰ পাঠক সমাজৰ মাজত লেখক ৰূপে সমাদৰ লাভ কৰিবলৈ সক্ষম হৈছিল । লেখক চৌধুৰীদেৱে এই কঠিন সময়খিনিত সাহিত্যক এক অভিযান্ত্ৰিক বিষয় হিচাপে লৈ কৰোণা মহামাৰীৰ সময়ত বিভিন্ন গল্প আৰু প্ৰবন্ধৰ জৰিয়তে সমাজৰ লোকসকলৰ মাজত যোগাত্মক আবেগৰ সৃষ্টিৰে পাঠকৰ হৃদয়ত স্থান দখল কৰিছিল । কৰোণা মহামাৰীৰ বাবে দেশজুৰি হোৱা তলা বন্ধ সময়তে এবছৰৰ ভিতৰত চুমিন্দ্ৰ চৌধুৰীয়ে লিখি যুগুতাইছিল তিনিখন উপন্যাসৰ লগতে চল্লিশ টা ভিন্নসুৰী গল্প আৰু ত্রিশ টা বিভিন্ন বিষয়ৰ আধাৰত মনোগ্ৰাহী প্ৰবন্ধ ।
চৌধুৰী দেৱৰ স্বৰচিত এই গল্প আৰু প্ৰবন্ধ সমূহৰ আধাৰতে ৰাজ্যৰ আগশাৰীৰ ভাষা প্ৰকাশনৰ স্বত্বাধিকাৰ তথা প্ৰথিত যশা লেখক মাননীয় মুকুট শৰ্মা ডাঙৰীয়াই গল্প আৰু প্ৰবন্ধ ৰে এজন সাহিত্য অভিযন্তাৰ আত্ম কথা নামৰ সংকলন খন প্ৰকাশ কৰি উলিয়াইছে। আজি এই গ্ৰন্থখনৰ উন্মোচিত অনুষ্ঠানত দিল্লী আৰক্ষীৰ বিশিষ্ট আয়ুক্ত শ্ৰীযুত ৰবিন হিবু ডাঙৰীয়াই লগতে জাপানীজ কৰ্পোৰেট গুৰু বিজয় মিচিহিটো বাত্রা বিশ্ব বৰেণ্য ছবি শিল্পী কৰ্ণেল জীতেন্দ্ৰনাথ হাজৰিকা , এপলো হাস্পাতালৰ শৈল চিকিৎসক ডাঃ সুশীল কুমাৰ জৈন সাহিত্যিক জয়ন্তী মালা বৰপূজাৰী, হিৰণ্য দাস, উলুপী কাকতি, দিব্য দত্ত, হীৰেণ দত্ত, শৰ্মিষ্ঠা বৰ্মন, আচাৰ্য্য তন্ময় শইকীয়াৰ লগতে আৰু যঠেষ্ট সংখ্যক গন্য মান্য লোকে উপস্থিত থাকি সভাৰ সৌষ্ঠব বঢ়োৱাৰ লগতে চৌধুৰী দেৱৰ দৰ্শন সাহিত্য অভিযন্তাই অসমীয়া সাহিত্যৰ জগতত এক নৱজাগৰণৰ সূচনা আনিব পাৰিব বুলি আশা ব্যক্ত কৰিছে । সভাত উপস্থিত সকলো আমন্ত্ৰিত অতিথিয়ে এজন সাহিত্য অভিযন্তাৰ আত্ম কথা সংকলনখনে সমাজৰ সকলো শ্ৰেণীৰ পাঠকৰ মন জয় কৰিবই বুলিও আশাবাদী।
