মৰিগাঁও জিলাৰ লাহৰীঘাট মহাবিদ্যালয়ত ২০২২ বৰ্ষৰ বাবে নিৰ্বাচিত হোৱা ছাত্র একতা সভাৰ শপত গ্রহণ অনুষ্ঠানটি সুকলমে সম্পন্ন হয়। ৩ ফেব্ৰুৱাৰীত ছাত্র একতা সভাৰ সদস্য পদৰ বাবে মনোনয়ন পত্র দাখিল কৰিছিল, আৰু সেই মৰ্মে ১০ ফেব্ৰুৱাৰীত মহাবিদ্যালয়ৰ নিৰ্বাচন কতৃপক্ষই বিভিন্ন পদত বিজয়ী হোৱা প্ৰাৰ্থী সকলৰ নাম আনুষ্ঠানিক ভাবে ঘোষণা কৰে। ২০২২ বৰ্ষৰ ছাত্র একতা সভাৰ বিভিন্ন পদত বিজয়ী হোৱা সদস্য সকল ক্ৰমে উপ সভাপতি বাহাৰুল ইছলাম, সাধাৰণ সম্পাদক মুক্তাৰ হুছেইন, সহকাৰী সাধাৰণ সম্পাদক পাৰবেজ মোশাৰফ, সাংস্কৃতিক সম্পাদক ফৰিদুল ইছলাম, ক্ৰীড়া সম্পাদক জাহাৰুল ইছলাম, আলোচনী সম্পাদক ৰিয়াজুল আহমেদ, ছাত্র জিৰণি কোঠাৰ সম্পাদক ৰাশিদুল ইছলাম, আৰু ছাত্রী জিৰণি কোঠাৰ  সম্পাদিকা ইয়াচমিন ছুলতানা।

তাৰে লগত সংগতি ৰাখি আজি দিনৰ ১১ বজাত মহাবিদ্যালয় শ্ৰেণী কক্ষত  নিৰ্বাচিত হোৱা সদস্য সকলক শপত গ্ৰহণ  গ্রহণ কৰোৱা হয়। শপত গ্রহণ অনুষ্ঠানটি সঞ্চালনা কৰে মহাবিদ্যালয়ৰ ভাৰপ্ৰাপ্ত অধ্যক্ষ তথা ছাত্র একতা সভাৰ সভাপতি ছফিৰ উদ্দিন আহমেদে। সভাৰ উদ্দেশ্য বাখ্যা ও আদৰণি পৰ্বৰ আঁত ধৰে প্ৰবক্তা আবুল ফজলে। শপত গ্রহণ কৰোৱাই নব নিৰ্বাচিত ছাত্র একতা সভাৰ সদস্য সকলক একোখনকৈ ফুলাম গামোচা প্ৰদান কৰাৰ লগতে সকলোকে বিজয়ী পত্ৰ দিয়া হয়। উল্লেখ্য যে মনোনয়ন পত্র দাখিল কৰা ছাত্র ছাত্রী সকলৰ মাজত সকলো পদৰ বাবে কোনো বিৰোধী প্ৰতিদ্বন্দিতা নকৰাত বিনা প্রতিদ্বন্দ্বিতাই বিজয়ী বুলি মহাবিদ্যালয়ৰ নিৰ্বাচন কতৃপক্ষই আনুষ্ঠানিকভাবে ভাবে ঘোষণা কৰে। শপত গ্রহণ অনুষ্ঠানত মহান প্ৰবক্তা গোটৰ লগতে ছাত্র ছাত্রী সকল উপস্থিত আছিল। 

“আছে গৰু নাবাই হাল হোৱাতকৈ নোহোৱাই ভাল”এই আপ্ত বাক্যশাৰী যেন প্ৰতিফলিত হৈছে জয়ন্তীপুৰ ৰাজ্যিক পশু চিকিৎসালয় খনৰ ক্ষেত্ৰত । বুঢ়া পঞ্চায়তৰ  জয়ন্তীপুৰত ১৯৯৮ চনতে স্থাপন কৰা  ৰাজ্যিক পশু চিকিৎসালয় খনত নাই পশু চিকিৎসক, নাই কোনো সা-সুবিধা, নাই কোনো পৰিবেশ।আনকি ফলকতে আৱদ্ধ এই খন ৰাজ্যিক চিকিৎসালয় হিচাপে ।কামকাজ কিন্তু পশু চিকিৎসা উপ কেন্দ্ৰ হিচাপে চলি আছে প্ৰতিষ্ঠাৰ পৰা ।  নতুনকৈ চিকিৎসালয় এটা  ভৱনটো নিৰ্মাণ কৰিছে কিন্তু সন্মুখত থকা পুৰণি জৰাজীৰ্ণ ঘৰতোৰে সৈতে এক শ্মশান সদৃশ পৰিবেশে বিৰাজ কৰি আছে চিকিৎসালয় খনৰ চৌহদত ।

তাৰোপৰি এজন চতুৰ্থ শ্ৰেণীৰ কৰ্মচাৰী আৰু এজন ভি পি এফৰ দ্বাৰা পৰিচালিত হৈ আছে এই চিকিৎসালয় খন। নিয়োজিত কৰ্মচাৰীৰ অনিয়মীয়া উপস্থিতিৰ বাবে চিকিৎসালয় খনলৈ অহা  পশু পালক সকলে উপদেশ লবলৈ আহে যদিও ঘৰলৈ উভতি যাবলগীয়াত  পৰে। ইপিনে চিকিৎসালয় খনত উন্নত গো প্ৰজনন ৰ ক্ষেত্ৰত এই অঞ্চলৰ ৰাইজ বঞ্চিত হব লগাত পৰিছে উপযুক্ত পৰিৱেশ নথকাত। প্ৰকৃতাৰ্থত গৰু, ছাগলী,হাহ, কুকুৰা, গাহৰি আদিৰ উপাৰ্জনৰ ওপৰতে নিৰ্ভৰশীল এই অঞ্চলৰ কৃষক ৰাইজে উপকৃত হ’ব পৰাকৈ কোনো সা-সুবিধা নথকাত বিমোৰত পৰিছে। স্হানীয় ৰাইজে শীঘ্ৰে জয়ন্তীপুৰ ৰাজ্যিক পশু চিকিৎসালয় খনত আন্তঃগাথঁনি সুদৃঢ় কৰি পশু চিকিৎসক নিযুক্তিৰ দাবী জনাইছে ।

কৃষি বিশ্ববিদ্যালয় আৰু খানাপাৰা কেন্দ্ৰীয় ৰেচম বৰ্ডৰ উদ্যোগত আৰু হালধা স্বচ্ছ আৰু আদৰ্শ গাঁও নিৰ্মাণ অভিযানৰ সহযোগত আজি হালধাত এটি এদিনীয়া ৰেছম প্ৰশিক্ষণ কৰ্মশালা অনুষ্ঠিত হৈ যায়। কৰ্মশালাখন উদ্বোধন কৰে ছিপাঝাৰ বিদ্যুৎ সংমণ্ডলৰ কাৰ্যবাহী অভিযন্তা চিব্বিক আহমেদে। হালধা বৰনদী প্ৰগতি সংঘৰ সভাগৃহত আৰম্ভ হোৱা সভাত উন্নত প্ৰযুক্তি ব্যৱহাৰ কৰি কিদৰে মুগা, এৰি আৰু পাটসুতা কাটিব পাৰি ইয়াৰ প্ৰশিক্ষণ দিয়া হয়। বৃক্ষ ৰোপণৰে আৰম্ভণি কৰা খানাপাৰা কেন্দ্ৰীয় ৰেছম বোৰ্ডৰ মুৰব্বী তথা জ্যেষ্ঠ বিজ্ঞানী ড: জয়ন্ত ঘোসে ৰেছম বোৰ্ডৰ কাৰ্যাৱলী সম্পৰ্কে আলোকপাত কৰে। স্থানীয় শিক্ষক তথা বিজ্ঞান কৰ্মী হিৰণ্য কুমাৰ নাথে আঁত ধৰা সভাখনত প্ৰতিনিধি সকলৰ সৈতে  অন্তৰংগ আলাপত ভাগ লৈ জ্যেষ্ঠ বিজ্ঞানী জনে উপস্থিত অংশগ্ৰহণকাৰী সকলৰ সৈতে মত বিনিময় কৰি পলুপালিকা সকলক উদ্বুদ্ধ কৰে।

লগতে তেওঁ কেন্দ্ৰীয় ৰেছম বোৰ্ডৰ কাৰ্যাৱলী সম্পৰ্কে সভাক অবগত কৰে। আৰম্ভণিতে আদৰণি ভাষণ আগবঢ়ায় স্বচ্ছ আৰু আদৰ্শ গাওঁ নিৰ্মাণ অভিযানৰ সৰ্বাধিনায়ক ভাস্কৰ জ্যোতি নাথে। সভাৰ উদ্দেশ্য ব্যাখ্যা কৰে চি এছ বি , খানাপাৰাৰ সমন্বয়ক মুনীন্দ্ৰ দাসে। মুগা, এৰি, পাট পলু কটাৰ ব্যবহাৰিকতা সম্পৰ্কে কাৰিকৰী বিশেষজ্ঞা দিপালী ৰাভাই। মেছিন কিদৰে সহজ লভ্য ভাৱে পাব পাৰি সেই বিষয়ে বিস্তৃত ভাৱে বিবৰি কয় আন এগৰাকী বিভাগৰ বিষয়া তথা বৈজ্ঞানিক ড: ৰাজীৱ মুঞ্চীয়ে । দিপালী ৰাভাৰ সহযোগত প্ৰশিক্ষণ স্থলীতে ব্যৱহাৰিকভাৱে মেচিন ব্যৱহাৰৰ প্ৰশিক্ষণ প্ৰদান কৰে। সভাত গাওঁ প্ৰধান ৰমেশ চৌধুৰী , স্থানীয় সংঘৰ সভাপতি মদন চন্দ্ৰ নাথ প্ৰমুখ্যে কেইবা গৰাকী লোক উপস্থিত আছিল। সামৰণিত শলাগৰ শৰাই আগঢ়াই স্থানীয় অভিজ্ঞ পলু পালক ৰেৱন চৌধুৰীয়ে।

ফুলপানী বৰুৱা গাওঁ পঞ্চায়ত কাৰ্যালয়ত শিৱসাগৰ নাজিৰাস্থিত কৃষি বিজ্ঞান কেন্দ্ৰৰ দ্বাৰা “বিশ্ব মাহজাতীয় শস্য দিৱস” (World Pulses Day) ১০ ফেব্ৰুৱাৰীত সফলতাৰে  উদযাপন কৰা হয়। এই অনুষ্ঠানটিত কৃষি বিজ্ঞান কেন্দ্ৰটোৰ মুৰব্বী তথা জেষ্ঠ্য বিজ্ঞানী ড০ প্ৰদীপ সন্দিকৈ দেৱকে প্ৰমুখ্যে  কেন্দ্ৰটো আৰু পঞ্চায়তখন উভয়ৰে বিষয়াসকলৰ লগতে গ্ৰাম্য কৃষি কৰ্ম অভিজ্ঞতা আঁচনিৰ অন্তৰ্গত শিৱসাগৰত থকা অসম কৃষি বিশ্ববিদ্যালয়ৰ চতুৰ্থ বৰ্ষৰ ছাত্ৰ-ছাত্ৰীসকল আৰু অঞ্চলটোৰ কেইবাজনো কৃষক উপস্থিত থাকে। কৃষি বিজ্ঞান কেন্দ্ৰৰ কৃষি অৰ্থনীতি বিভাগৰ বিশেষজ্ঞা ড০ তৃঞ্চালী শইকীয়াই সভাৰ উদ্দেশ্য ব্যাখ্যাৰ জৰিয়তে অনুষ্ঠানটিৰ শুভাৰম্ভ কৰে।

অনুষ্ঠানটিত ড০ প্ৰদীপ সন্দিকৈদেৱে মাহজাতীয় শস্য দিৱসৰ তাৎপৰ্য ওপৰত বিষদভাৱে অৱগত কৰে। তাৰ পাছতে কৃষি বিজ্ঞান কেন্দ্ৰটোৰ ভূমি-বিজ্ঞান বিভাগৰ বিশেষজ্ঞা ড০ অৰুন্ধতী বৰদলৈয়ে মাটিৰ গুণাগুণ উন্নীতকৰণত মাহজাতীয় শস্যৰ ভূমিকা সম্পৰ্কে কৃষকসকলৰ লগতে ছাত্ৰ-ছাত্ৰীসকলক অৱগত কৰে । অনুষ্ঠানটিত কৃষি বিজ্ঞান কেন্দ্ৰৰ শস্য বিজ্ঞান বিভাগৰ বিশেষজ্ঞা ড০ প্ৰিয়ংকা দত্তৰ লগতে উপস্থিত কৃষকসকলৰ মাজৰ কেইজনমানেও এই দিৱসৰ ওপৰত বক্তৃতা প্ৰদান কৰে।বক্তৃতাৰ মুল বিষয়বস্তু আছিল আমাৰ দৈনন্দিন জীৱনৰ পুষ্টি পুৰণ আৰু মাটিৰ উৰ্ব্বৰতা বৃদ্ধিত মাহজাতীয় শস্যৰ ভূমিকা তথা গাঁও অঞ্চলত এনে কৃষিৰ দ্বাৰা হ’ব পৰা লাভালাভৰ সম্ভাৱনা। এনেধৰনৰ অনুষ্ঠানৰ জৰিয়তে কৃষকসকল যথেষ্ট উপকৃত হ’ব বুলি স্থানীয় ৰাইজে মতামত প্ৰকাশ কৰে।

ওদালগুৰি জিলা মাজবাটৰ মুৰকাটিৰ শান্তি ধামত ১০ফেব্ৰুৱাৰীত দিনজোৰা কাৰ্য্যসূচীৰে  মাজবাট বজৰং দলৰ উদ্যোগত মাজবাট বাসী  ৰাইজৰ সহযোগত বজৰং দলৰ কাৰ্যালয়ৰ কাষত বজৰং বলিৰ মুৰ্তি স্থাপন কৰা হয়। কাৰ্যসূচীত মাজবাট অঞ্চলৰ বিভিন্ন গাওঁৰ পৰা অহা প্রায় দেড়শৰো অধিক বজৰং কৰ্মী ও ৰাইজ উপস্থিত  মুৰ্তি স্থাপন কৰা হয়।

এই কাৰ্যসূচীত ভাষন ৰাখে মাজবাট প্রখন্ড বজৰং দলৰ উপদেষ্টা তথা অৱসৰ প্রাপ্ত শিক্ষক পুৰ্নৰাম ডেকা, অৱসৰ প্রাপ্ত শিক্ষক ধীৰেন্দ্র ৰাভায়ে। মুৰ্তি স্থাপন কৰা কাৰ্যসূচীত উপস্থিত  থাকে মন্ডল বিজেপিৰ সভাপতি জীৱন ডেকা, সমাজ সেৱক সন্তোছ পাটৱাৰী, আৰ  এচ এচৰ মাজবাট প্রখন্ডৰ সভাপতি বিৰেন নাৰ্জাৰী, মাজবাট প্রখন্ড বজৰং দলৰ প্ৰাক্তন সংযোজক ৰিংকু দৈমাৰী, সমাজ সেৱক পৰিমল  পোদ্দাৰ আদি।

সদ্য প্ৰয়াত তিনিচুকীয়াৰ বৃহত্তৰ লাইপুলি অঞ্চলৰ ডিমৰুগুৰি গাঁৱৰ কৃতী প্ৰধান শিক্ষক, সাহিত্যিক ,কবি , সমাজকৰ্মী,ধৰ্মপ্ৰান ব্যক্তি তৰুণ ৰাজখোৱাৰৰ এআন স্মৃতিচাৰণ সভা তেখেতৰ কৰ্মস্থলী শিক্ষানুষ্ঠান ইন্দিৰা গান্ধী উচ্চ মাধ্যমিক বিদ্যালয়ত ৯ ফেব্ৰুৱাৰীত সম্পন্ন হৈ যায়। বিদ্যালয়ৰ প্ৰধান শিক্ষক মুকুন্দ মহন্তই আঁতধৰা আৰু উদ্দেশ্য ব্যাখ্যা কৰা উক্ত স্মৃতিচাৰণ সভাখনিত সভাপতিত্ব কৰে শিক্ষক দুৰ্গা নাথ উজিৰে। স্মৃতিচাৰণ সভাত প্ৰয়াত কৃতী প্ৰধান শিক্ষক গৰাকীৰ প্ৰতিচ্ছবিত এগছি বন্তি প্ৰজ্বলন কৰে দেবেন্দ্ৰ সিঙে আৰু মাল্যাৰ্পন কৰে প্ৰয়াত তৰণ ৰাজখোৱাৰ বৰপুত্ৰ সীমান্ত ৰাজখোৱাই।

সভাত বক্তব্য আগবঢ়োৱা প্ৰতিগৰাকী বক্তাই ৰাজখোৱাদেৱৰ কৰ্মজীৱনৰ ওপৰত বিস্তৃত আলোকপাত কৰে। স্মৃতিচাৰণ সভাত শিক্ষক বুলেশ্বৰ চেতিয়া, বৰগুৰি উচ্চ মাধ্যমিক বিদ্যালয়ৰ শিক্ষক অমৃত ৰাজখোৱা, মুলেন চেতিয়া, যাদৱ ৰাজখোৱা,মিলন গোহাঁই , সমাজকৰ্মী প্ৰাঞ্জল নেওগ, কৃষ্ণমণি গগৈ , শিক্ষক সামন্ত্য বৰা , হৰিশ দাস , শিক্ষয়িত্ৰী ক্ৰমে মনোৰমা গোহাঁই, ফৰিদা বেগম, মানসী বৰুৱা আৰু ববিতা ৰাজখোৱাই।গতিকে সদাশয় ব্যক্তি ,লেখক, অনুষ্ঠান -প্ৰতিষ্ঠানৰ  তৰফৰ পৰা লেখনিসমূহ ১০ ফেব্ৰুৱাৰীৰ ভিতৰত পোৱাকৈ কামিনী কুমাৰ গোঁহাই ,স্মৃতিগ্ৰন্থ সম্পাদক  বা ৯৯৫৪৪১৮৪৩৯ ফোন নম্বৰৰ ওৱাটচ এপ যোগেদি  প্ৰেৰণ কৰিবলৈ পৰিয়ালবৰ্গৰ হৈ প্ৰয়াতৰ ভাতৃ অমৃত ৰাজখোৱাই আহ্বান জনাইছে । 

শ্ৰীমন্তশঙ্কৰদেৱ ইউনিভাৰ্চিটী অৱ হেল্থ চাইন্সে অনুষ্ঠিত কৰা (২০১৭–২০২১)বৰ্ষৰ বি.এচ. চি. নাৰ্চিং চুড়ান্ত পৰীক্ষাৰ ঘোষিত ফলাফলত মিৰ্জাস্থিত নেমকেয়াৰ শৈক্ষিক প্ৰতিষ্ঠানৰ অন্তৰ্গত কলেজ অৱ নাৰ্চিং নেমকেয়াৰ ফাউণ্ডেচনৰ প্ৰথম বৰ্ষত অৱৰ্তীণ হোৱা পাঁচ গৰাকী শিক্ষাৰ্থীৰ পাঁচোগৰাকী শিক্ষাৰ্থীয়ে অসমৰ মুঠ ৪৭২গৰাকী শিক্ষাৰ্থীৰ ভিতৰতে স্থান দখল কৰি শৈক্ষিক প্ৰতিষ্ঠানখনলৈ গৌৰৱ কঢ়িয়াই আনিবলৈ সক্ষম হয়।

অসমৰ ভিতৰতে স্থান দখল কৰি শিক্ষানুষ্ঠানখনলৈ গৌৰৱ আজুৰি অনা কীৰ্তিমান শিক্ষাৰ্থীসকল হ’ল ক্ৰমে – (শ্ৰীমতী ৰিকিমনি দাস ৪নং স্থান ),(শ্ৰীমতী উৰ্মিলা চেট্ৰী ১৬নং স্থান ),(শ্ৰীমতী দিশা বৰা ২৯নং স্থান ),( শ্ৰীমতী হিঁয়া পাঠক ৩৪নং স্থান ) আৰু(শ্ৰীমতী হিমাশ্ৰী দাস ৫১নং স্থান ) ।