আজি চ্যুকাফা দিবস l সমগ্ৰ ৰাজ্যৰ লগতে গোলাঘাটতো  আজি নগৰ খনৰ  মাজমজিয়াত অৱস্থিত  চ্যুকাফা ক্ষেত্ৰত চ্যুকাফা দিৱসট  পালন কৰে । চাওলুং চ্যুকাফা দিৱসৰ স্থায়ী আয়োজক সমিতিৰ উদ্যোগত ,অনুষ্ঠিত হোৱা  এই দিৱসটি  পুৱা পতাকা উত্তোলন কৰি চ্যুকাফাৰ  প্ৰতিমূৰ্তিত বন্তি জ্বলাই তথা মাল্যাৰ্পনে কৰে গোলাঘাট জিলা উপায়ুক্ত মৃগেশ নাৰায়ণ বৰুৱাই  । ইয়াৰপিছতে প্ৰতিমূৰ্তিৰ সমীপত চ্যুকাফাৰ স্মৃতিত পূজা-অৰ্চনা অনুষ্ঠিত কৰা হয়। ১২২৮ খৃষ্টাব্দৰ  আজিৰ দিনটোতেই মধ্যযুগীয় বৰ অসমৰ প্ৰথমজন ৰজা চাওলুং চ্যুকাফাই পাটকাই পৰ্বত হৈ অসমত প্ৰৱেশ কৰিছিল।ইয়াৰপিছতে  অসমত আহোম সাম্ৰাজ্য প্ৰতিষ্ঠা কৰি ১২৫৩ খৃষ্টাব্দত চৰাইদেউত অসমৰ প্ৰথমখন ৰাজধানী প্ৰতিষ্ঠা কৰে।প্ৰায় ৬০০ বছৰ শাসন কৰা আহোম ৰাজত্বই এই সুদীৰ্ঘ সময়ছোৱাত বিভিন্ন জাতি-উপজাতিক একত্ৰিত কৰি ৰখাত অভূতপূৰ্ব আগবঢ়াই গৈছে।বৰ অসম গঢ়াত অসম তথা বৃহৎ অসমীয়া জাতি গঢ়াত চ্যুকাফাৰ অৱদান সদায় স্মৰণীয় হৈ থাকিব।

ৰঙিয়াৰ বনগাঁওস্থিত অন্যতম শিক্ষানুষ্ঠান পদুম কুঁৱৰী কলেজিয়েট হাইস্কুলৰ বিজ্ঞান শিক্ষক চৈয়দ খোৰচান আলীক তেখেতৰ শিক্ষকতা জীৱনৰ অন্তিম ক্ষণত বিদ্যালয় খনৰ পৰিয়ালবৰ্গই মঙ্গলবাৰে এখন সভা অনুষ্ঠিত কৰি এখন মানপত্ৰ,গামোচা,জাপি আৰু শৰাই আগবঢ়াই বিদায় সম্বৰ্দ্ধনা জনাই। উল্লেখ্যযে ৰঙিয়া কাছাৰী শৌলমাৰীত জন্মগ্ৰহণ কৰা খোৰচান আলী সৰুৰে পৰাই অতি মেধাসম্পন্ন আছিল যাৰ প্ৰমাণ তেওঁ নিজৰ দ্বায়িত্ব আৰু কৰ্তব্য পালনেৰে দাঙি ধৰিছিল। ১৯৬১চনৰ ১নৱেম্বৰত জন্মগ্ৰহণ কৰা আলী প্ৰাথমিক বিদ্যালয়ৰ বৃত্তি পৰীক্ষাত উত্তীৰ্ণ হোৱাৰ ওপৰিও পৰ্যায়ক্ৰমে নলবাৰী কলেজৰ পৰা ১৯৮১চনত বিজ্ঞানৰ স্নাতক পৰীক্ষাত সুখ্যাতিৰে উত্তীৰ্ণ হৈ বিজুলী নগৰ হাইস্কুলত শিক্ষকতা জীৱনৰ পাতনি মেলে।শিক্ষকতা জীৱনৰ উপৰিও বিভিন্ন অনুষ্ঠান প্ৰতিষ্ঠানৰ লগত জড়িত আলীয়ে কেবা বছৰ পৰীক্ষা পৰিষদৰ সহ:সম্পাদক হিচাবে দায়িত্ব পালন কৰাৰ ওপৰিও একেৰাহে দুটাকৈ কাৰ্য্যকালৰ বাবে মাধ্যমিক শিক্ষক আৰু কৰ্মচাৰীসন্থাৰ যুটীয়া সম্পাদকৰ দৰে গুৰু দ্বায়িত্বও পালন কৰিছিল। বিদ্যালয়খনৰ প্ৰতিগৰাকী শিক্ষক কৰ্মচাৰী চৈয়দ খোৰচান আলীৰ বিদায় মুহুৰ্তত আৱেগিক হৈ পৰা দেখা যায়।

নগাঁও চহৰৰ পাৰ্শ্বৱৰ্তী মধুপুৰত আজি সন্ধিয়া আৰক্ষীয়ে অভিযান চলাই এটা ভাড়াঘৰৰ পৰা জাল নোট সহ এজন লোকক গ্ৰেপ্তাৰ কৰে । আৰক্ষীয়ে পাঁচশ টকীয়া জাল নোটৰ লগতে জাল নোট বনোৱা মেচিন,  কাগজকে ধৰি কেতবোৰ সামগ্ৰীও জব্দ কৰে । জাল নোট ব্যৱসায়ৰে জড়িত আৰক্ষীয়ে গ্ৰেপ্তাৰ কৰা লোকজন হৈছে ফাৰুক হুছেইন (৪৫)। ধৃত লোকজনৰ ঘৰ জাগীৰোড থানাৰ অন্তৰ্গত আলিচিঙাত।ফাৰুকে মধুপুৰৰ চাইজুল আৰু আব্দুল কালাম নামৰ লোক দুজনৰ ঘৰ  ভাড়াত লৈ  জাল নোট প্ৰস্ত্তত কৰি  মানুহক প্ৰৱঞ্চনা কৰি আহিছিল । আনহাতে ভাড়াঘৰৰ দুই গৰাকী সম্প্ৰতি  পলাতক অৱস্থাত থকা বুলি আৰক্ষী সূত্ৰৰ পৰা জানিব পৰা গৈছে । এই জালনোটৰ চক্ৰটোৱে কৌশেলেৰে মানুহক প্ৰৱঞ্চনা  কৰি অহা বুলি আৰক্ষীয়ে জানিবলৈ দিয়ে । আনহাতে নগাঁও জিলাত সক্ৰিয় হৈ থকা জালনোটৰ চক্ৰটোৱে ক্ষুদ্ৰ ক্ষুদ্ৰ গোট তৈয়াৰ কৰি তেজপুৰ আৰু লখিমপুৰ জিলাত জালনোটৰ ব্যৱসায় চলাই অহা বুলি আৰক্ষী সূত্ৰে জানিব পৰা গৈছে ।

বৰপেটা জিলা বিদ্যালয় সমূহৰ পৰিদৰ্শক বিষয়াৰ  কাৰ্যালয়ৰ অন্তৰ্গত ভাতকুছিস্থিত শ্ৰীমন্ত শংকৰ-মাধৱ কনিষ্ঠ মহাবিদ্যালয়ৰ নৱাগত আদৰণি সভা আৰু শৈক্ষিক পৰিৱেশ সম্পৰ্কীয় সভাখন আজি পূৱা ১০ বজাত অতি  অনুষ্টুপীয়াকৈ অনুষ্ঠিত হৈ যায়। উক্ত  শিক্ষানুষ্ঠান খনৰ অধ্যক্ষ ছাদেক আলী আহমেদৰ পৌৰোহিত্যত অনুষ্ঠিত নৱাগত আদৰণি সভা খনৰ উদ্দেশ্য ব্যাখ্যা কৰে অৰ্থনীতি বিভাগৰ প্ৰৱক্তা শিৰাজুল হকে। বিদ্যালয় খনৰ শিক্ষা বিভাগৰ মুৰব্বী প্ৰৱক্তা ৰুমী দাসে ছাত্ৰ-ছাত্ৰীক জীৱনৰ লক্ষ্য, উদ্দেশ্যত উপনীত হ’বলৈ কঠোৰ পৰিশ্ৰমৰ বিকল্প নাই বুলি উপদেশ মূলক বক্তব্য আগবঢ়ায়। একেদৰে ইতিহাস বিভাগৰ মুৰব্বী প্ৰবক্তা সামেজ উদ্দিন আহমেদ, ইংৰাজী বিভাগৰ মুৰব্বী প্ৰবক্তা আব্দুল হক আদিয়ে ছাত্ৰ-ছাত্ৰীক আত্মসংযম ৰক্ষা কৰি নিজৰ কৰ্তব্য পালন কৰি সমাজত এজন সুপ্ৰতিষ্ঠিত ব্যাক্তি হিচাপে নিজকে গঢ়াৰ বাবে কৰণীয় বিভিন্ন দিশৰ ওপৰত আলোকপাত কৰি মূল্যবান ভাষণ আগবঢ়ায়। অনুষ্ঠানটিত উপস্থিত থকা ছাত্ৰ-ছাত্ৰী সকলে গীত- মাত,কবিতা আবৃত্তিৰে অনুষ্ঠানটি জীপাল কৰি তোলে। অনুষ্ঠানৰ শেষত প্ৰীতি চাহমেলৰ আয়োজন কৰা হয় বুলি জানিব পৰা গৈছে।

১ডিচেম্বৰত  কুড়মালি সাহিত্য সভা অসম কেন্দ্ৰীয় সমিতিৰ ২০ তম্ প্ৰতিষ্ঠা দিৱস অসমৰ বিভিন্ন জিলাত দিনজোৰা কাৰ্যসূচীৰে উদযাপন কৰা হয়। অসমৰ আদিবাসী চাহ শ্ৰমিকৰ বৃহৎ সংখ্যক লোকৰ মাজত প্ৰচলিত কুড়মালি ভাষাৰ বিকাশৰ লগতে কুড়মালি ভাষা , সাহিত্য আৰু সংস্কৃতি সুৰক্ষিত কৰিবলৈ ২০০১ চনৰ আজিৰ দিনটোতে গঠন হৈছিল কুড়মালি সাহিত্য সভাখন। এই সাহিত্য সভাই ভাষাটোৰ লোক উৎসৱত পৰিবেশিত লোকগীত, লোকনৃত্য আদি বিভিন্ন অনুষ্ঠান সময়ে সময়ে উদযাপিত কৰি আহিছে।  কুড়মালি  সাহিত্য সভাৰ ১১ খন জিলা সভাই অসমৰ বিভিন্ন ঠাইত দিনজোৰা কাৰ্যসূচীৰে কুড়মালি সাহিত্য সভাৰ ২০ তম্ কেন্দ্ৰীয় প্ৰতিষ্ঠা দিৱস উদযাপন কৰে। সভাত কুড়মালি সাহিত্য সভাৰ কেন্দ্ৰীয় উপদেষ্টা স্বৰ্গীয় ৰাইমোহন কুড়মি, স্বৰ্গীয় সৰুনাথ কুড়মি, স্বৰ্গীয় সুকদেৱ কুড়মি , প্ৰতিষ্ঠাপক সভাপতি স্বৰ্গীয় হৰিপ্ৰসাদ কুড়মি দেৱক স্মৰণ কৰা হয় বুলি কুড়মালি সাহিত্য সভাৰ প্ৰধান সম্পাদক সুৰেশ কুড়মিয়ে জনায়। লগতে তেওঁ কয় কুড়মালি সাহিত্য সভাৰ তিনিচুকীয়া জিলা সভাই লোণপুৰীয়া গাঁৱত,ডিব্ৰুগড় জিলা সভাই চাবুৱা কাঞ্জিখোৱা গাঁৱত, চৰাইদেউ জিলা সভাই উত্তৰ চোমদাৰ গাঁৱত, শিৱসাগৰ জিলা সভাই শিংগিবিল গাঁৱত, যোৰহাট জিলা সভাই চটাই অংগবাড়ী কেন্দ্ৰ প্ৰাঙ্গনত, গোলাঘাট জিলা সভাই খুমটাই চাহ বাগিচাত, পূৱ কাৰ্বি আংলং জিলা সভাই শিলনীজান গাঁৱত, নগাঁও জিলা সভাই চিমনাবস্তি গাঁৱত, শোণিতপুৰ জিলা সভাই বাহুমাৰী প্ৰেক্ষাগৃহত, বিশ্বনাথ জিলা সভাই দিৰিংপথাৰ গাঁৱত আৰু ওদালগুৰি জিলা সভাই  ওৰাঙৰ চমুৱা গাঁৱত কেন্দ্ৰীয় প্ৰতিষ্ঠা দিৱস উদযাপন কৰা হয় বুলি সংগঠটোৰ বিষয়ববীয়া সুৰেশ কুড়মিয়ে এক প্ৰেছ বিবৃতি যোগে জনাইছে ৷

নাজিৰা  নগৰৰ দিখৌ নৈৰ বালিঘাট দলঙৰ সমীপত অৱস্থিত নাজিৰা নগৰৰ ঐতিহাসিক শ্মশান খনৰ সাম্প্ৰতিক দুৰাৱস্থাই মৃতকৰ আত্মীয় সকলক সদায়ে দুৰ্ভোগ ভোগাই আহিছে । এই দুৰ্ভোগৰ গুৰিতে হ’ল শ্মশান খনিৰ প্ৰতি গা-কৰি উঠা সামাজিক দায়ৱদ্ধতাৰ অভাৱ । অসম তথা বিশ্ব ইতিহাসৰ বহু সোণালী ব্যক্তিত্বক জীৱনৰ শেহ বেলাত নাজিৰাতে সমাধিস্থ কৰি যোৱাৰ উদাহৰণ নাজিৰাতো বিদ্যমান । সেই সমূহ ব্যক্তিত্বৰ জীৱনৰ পৰৱৰ্ত্তী আশ্ৰয় স্থল নাজিৰা বুলি বাস্তৱতে সত্য হ’লেও আজিৰ প্ৰজন্মৰ নাজিৰাই গৰিমা জীয়াই ৰাখিব পৰা নাই । আনহাতে আত্মীয়ৰ মৃতদেহ কান্ধত লৈ নাজিৰা নগৰ শ্মশানত উপস্থিত হোৱা লোক সকলে অৱহেলিত হৈ ৰোৱা খোদ নগৰীয় শ্মশান খনৰ উন্নয়নৰ হকে বহু পৰিকল্পনাৰে চৰ্চ্চা ৰাখিলেও পৰৱৰ্ত্তী সময়ত সকলো নিৰৱ হৈ পৰে । বহু সময়ত কোনো কোনো বদান্য লোকে পানীৰ মটৰ, পকী আসন আদি  নিৰ্মাণ কৰি দিলেও তত্বাৱধানৰ অভাৱত এই সকলোৱেই অব্যৱস্থাত পৰিণত হৈছে । ঘাইকৈ এক স্থায়ী বিদ্যুৎ সংযোগ ব্যৱস্থা নোহোৱাৰ বাবে নিশা চৌহদ অন্ধকাৰময় হোৱাৰ পৰিস্থিতি হয় । ১৯৭০ চনৰপৰা শ্মশান খনৰ সৈতে জড়িত থাকি আজিও ৰাইজৰ এই মৌলিক সম্পদটিৰ বিকাশৰ বাবে ঘৰ সংসাৰ এৰি তত্ত্বাৱধায়ক ৰূপে আত্ম নিয়োগ কৰি অহা ৬৬ বছৰীয়া গোপাল বিশ্বকৰ্মাই পৌৰ প্ৰশাসন আৰু ৰাইজ লগ লাগি পৱিত্ৰ শ্মশান খনি কৰ্তৃপক্ষই আধুনিক ৰূপত গঢ়ি তুলিব লাগে বুলি মত প্ৰকাশ কৰি আহিছে । আনহাতে পূৰ্বে শ্মশানখনি পৰিচালনাৰ হেতু একোখনিকৈ পৰিচালনা সমিতি থাকিলেও শেহতীয়াকৈ পৰিচালনা সমিতি শূণ্য হৈ পৰিছে । শ্মশানৰ উন্নয়নৰ বিষয়ে নাজিৰা মহকুমা প্ৰশাসনে পূৰ্বৰ আৰু বৰ্ত্তমানৰ দুয়োজন মহকুমাধিপতিয়েই নজৰত ল’লেও এখনি পৰিচালনা সমিতি নথকাৰ ঘটনাই শ্মশান খনত কোনো উন্নয়নৰ লেখ সংযোগ ঘটা নাই । আত্মীয়ৰ অন্তিম সৎকাৰ কৰিবলৈ আহি নাজিৰা নগৰ শ্মশানত উপস্থিত হোৱা দূৰণিৰ লোকে ইতিহাস প্ৰসিদ্ধ তথা চাহ আৰু অ’ এন জি চিৰ সামাজিক বিকাশে স্পৰ্শ কৰি থকা তথা অ’এন জি চিৰ সদৰ কাৰ্য্যালয়ৰ কাষতে থকা নগৰ শ্মশান খনৰ উৱলি যোৱা অৱস্থা দেখি সিয়ৰি উঠে । নাই কোনো  গেছ সংযোগ,  বিদ্যুৎ সংযোগ বা প্ৰয়োজনীয় পানীৰ  প্ৰৱাহ ।   পৰিস্থিতি দেখি গুৱাহাটীৰ এজন বদান্য ব্যক্তিয়ে লক্ষ্যাধিক টকাৰে শ্মশানৰ জিৰণি গৃহটিৰ নিৰ্মাণ কৰে । সেয়াও বৰ্ত্তমান অনাদৃত আৰু অৱহেলিত । পৌৰসভাৰ তৰফৰপৰা নিৰ্মাণ কৰা এটি স্নানাগাৰ নামত  নিৰ্মাণ হৈ উঠিল যদিও নাই পানী যোগান, নাই বিজুলি বাতি । সেয়াও এক অচল ব্যৱস্থাৰ সাক্ষী হৈ ৰ’ল । আনহাতে বাহনি বাৰীৰ মাজেৰে যোৱা এটি বিদ্যুৎ যোগানৰ লাইনৰ পৰা যি সংযোগে ক্ষীণ পোহৰ দি হ’লেও গধূলিৰ পৰা এটা লাইট জ্বলি ৰৈছিল সেয়াও যোৱা প্ৰায় সপ্তাহকাল ধৰি বিকল । ৰাইজৰ সম্পদ সুৰক্ষা দি দিনে – নিশাই শ্মশান চৌহদত কাল কটোৱা গোপাল বিশ্বকৰ্মাই   এই প্ৰতিবেদকক কয় যে ” টু চাৰ্ভ টু মেন ইজ চাৰ্ভিচ টু গড” । দেশৰ এজন মহান মনিষীৰ বক্তব্যই দি যোৱা সাহসেৰে তেওঁ শ্মশানৰ ৰখীয়া হৈ ৰৈছে । ইয়াৰ বাবে তেওঁ কোনো বেতন বা প্ৰতিদান লোৱা  নাই । তেওঁ কৰযোৰে নাজিৰা বাসীক মৃতকৰ শেহ স্থান ডোখৰ  পৱিত্ৰ পাৰ্কৰ দৰে ৰূপত গঢ়ি তুলি নাজিৰাৰ  প্ৰতিজন মৃতকৰ গৌৰৱক জীয়াই ৰাখিবলৈ আহ্বান জনাইছে । জিলা চৰাইদেউৰ নাজিৰাৰ গাতে লগা ঐতিহাসিক মৈদাম স্থলী আহোম যুগৰ মৃতকলৈ শ্ৰদ্ধা জনোৱা প্ৰথা আৰু গৌৰৱক সোঁৱৰাই থাকে । নাজিৰাৰ অ’এন জি চি চৌহদত দিখৌ নৈৰ পাৰৰ “বৃটিছ গ্ৰেভ য়াৰ্ড” বৰেণ্য ইতিহাসবিদ ” A Grammar of Assamese Language” (১৮৩৯) ৰ প্ৰণেতা উইলিয়াম ৰবীনচন সহ ৬২ জনৰ সমাধি হিচাপে প্ৰতিষ্ঠা কৰি গৈছে । আজিৰ কৰ্তৃপক্ষ সমূহৰ অমনোযোগিতাতহে এনে এখন “গ্ৰেভ য়াৰ্ড” পৰ্য্যটনী মানলৈ উন্নীত হোৱা নাই । সি যিকি নহওঁক অতীতৰ গৌৰৱ গাথাই পৱিত্ৰ শ্মশান থলী অথবা সমাধি থলীক প্ৰদৰ্শন কৰা মৰ্য্য্যদাৰ দৰে ৰাজহুৱা নগৰ শ্মশান খনক এক আধুনিক শ্মশানলৈ উন্নীত কৰিব নোৱাৰি নে ? 

মৰিগাঁও জিলাৰ পবিতৰা হাট পেক্ষাগৃহত  কালি অসম ৰাজ্যিক গ্ৰামীণ জীৱিকা অভিযান মৰিগাঁও কাৰ্যালয়ৰ দ্বাৰা আত্মসহায়ক গোটক ঋণ প্ৰদান মেলা অনুস্থিত হয় | ৩১৮ টা আত্মসহায়ক গোটলৈ ৯ কোটি ২২ লাখ টকা  প্ৰদান কৰাৰ লগতে ৫ গৰাকী বেংক সখীক প্ৰশংসা পত্ৰ প্ৰদান কৰা হয় | অনুষ্ঠানৰ বন্তি প্ৰজ্বলন কৰে জিলা উপায়ুক্ত প্ৰকাশ ৰঞ্জন ঘৰফলীয়াই | ভাষণ প্ৰসংগত উপায়ুক্ত গৰাকীয়ে কয় যে আত্মসহায়ক গোটৰ সদস্যা সকলে ঋণ লোৱাৰ আগতে যিটো লাভজনক ব্যৱসায় বা কৰ্ম সেইটো নিৰ্বাচিত কৰি লব লাগে | সভাত জিলা পৰিষদৰ সভানেত্ৰী ইছমে আৰা বেগম, মূখ্য কাৰ্যবাহী বিষয়া ক্ষিতিশ পেগু, RSETI ৰ সঞ্চালক কনক বৰ্মন, DPM মুছাৰফ হুছেইন চৌধুৰী, বিভিন্ন বেংকৰ বিষয়া, অসম ৰাজ্যিক গ্ৰামীণ জীৱিকা অভিযান মৰিগাঁৱৰ বিষয়া আৰু কৰ্মচাৰী আৰু আত্মসহায়ক গোটৰ সদস্যা সকল উপস্থিত থাকে |