সংস্কৃতিৰ বৰঘৰ কলিয়াবৰত এতিয়া খোল-তালৰ মধুৰ ধ্বনিৰ মাজত – “আহা-আহা সখীসৱ বৃন্দাৱনে যাওঁ…” গীতেৰে শৰতৰ পূৰ্ণিমাত কলিয়াবৰীয়া ৰাইজৰ শ্ৰীশ্ৰীকৃষ্ণৰ ৰাসলীলা উদ্‌যাপন।শৰৎ কালৰ পূৰ্ণিমা তিথিত আয়োজন কৰা ৰাসলীলা ছ-অৰা এখন সত্ৰৰে পৰিৱেষ্টিত কলিয়াবৰৰ অন‍্যতম মুখ্য ধৰ্মীয় উৎসৱ। মূলত: আধ্যাত্মিক তত্ত্বসমৃদ্ধ ৰাসলীলা অসমৰ বিভিন্ন প্ৰান্তত উদযাপন কৰা হয় যদিও কলিয়াবৰত শ্ৰীমন্তশঙ্কৰদেৱ বিৰচিত অঙ্কীয়া নাট ‘কেলি-গোপাল’ অতীজৰে পৰা সত্ৰীয়া পৰম্পৰাৰে পালন কৰি অহা হৈছে। এই পৰম্পৰাগত ৰাস উৎসৱ পালনে এক সুকীয়া বৈশিষ্ট্য বহন কৰিছে। ভক্তিৰসৰ মধুৰ সমন্বয়েই ৰাসলীলা। শৰতকালৰ জ্যোৎস্না প্লাৱিত ৰাতিত, গোপীসকলক প্ৰেমৰসত আপ্লুত কৰি শ্ৰীকৃষ্ণই যি লীলাৰে বৃন্দাবন উৎফুল্ল কৰি তুলিছিল সেই প্ৰেমলীলাই ৰাস মহোৎসৱৰ প্ৰতিপাদ্য বিষয়। শ্ৰীকৃষ্ণৰ চৈতন্য প্ৰেমৰ জীৱাত্মা-পৰমাত্মাৰ মিলনৰ স্বৰূপ গুৰুজনাৰ ‘কেলিগোপাল’ নাটৰ আধাৰত পৰিৱশন হোৱা কলিয়াবৰৰ মাধতাৰিৰ ৰাসত বিভোৰ হ’ল স্বাস্থ্য মন্ত্ৰী কেশৱ মহন্ত। কল্পনাৰ ঐশ্চৰ্যময় সমাবেশ ঘটা ‘কেলিগোপাল’ নাটকৰে ‘শৰৎকালৰ বিতোপন চন্দ্ৰাৱলী নিশা কলিয়াবৰৰ আকাশ-বতাহ মুখৰিত হ’ল শ্ৰীকৃষ্ণ প্ৰেমৰ শ্বাশ্বত মধুৰ স্বৰেৰে। কলঙৰ পাৰত অনুষ্ঠিত শ্ৰীকৃষ্ণ-ৰাধাৰ ৰাসলীলাই দ্বিতীয় বৃন্দাবনলৈ পৰিগণিত কৰিলে কলিয়াবৰৰ মাধতাৰি গাঁও। সমন্বিত যুৱতীৰ্থ কলিয়াবৰৰ মাধতাৰি শাখাই আয়োজন কৰা কেলি গোপাল নাটৰ ৰাস মহোৎসৱত অগনন দৰ্শকৰ উপস্থিতিয়ে গুৰুজনাৰ সৃষ্টিৰাজিক পুনৰ জিলিকাই তুলিলে। মন্ত্ৰীত্বৰ কৰ্ম ব্যস্ততাৰ মাজতে শ্ৰীকৃষ্ণৰ চৈতন্য প্ৰেমৰ ৰাসলীলা উপভোগ কৰিলে স্বাস্থ্য মন্ত্ৰী কেশৱ মহন্তই। ‘আহা আহা সখী সৱ বৃন্দাবনে যাওঁ’ শ্ৰতিমধুৰ ছন্দোময় গীতৰ অনুৰণনে দ্বিতীয় বৃন্দাবনলৈ পৰিগণিত কৰিলে কলিয়াবৰৰ মাধতাৰি গাঁও।

অসমৰ বন আৰু পৰ্যটন ক্ষেত্ৰত ক্ষেত্ৰভিত্তিক অধ্যয়নৰ বাবে কলিয়াবৰলৈ কেৰেলা¸ অন্ধপ্ৰদেশ অৰু উত্তৰপ্ৰদেশৰ পৰা আহিল কেন্দ্ৰীয় ৰাজ্যিক বন সেৱা একাডেমিৰ পৰ্যবেক্ষকৰ দল। মূলত উত্তৰ-পূৰ্বাঞ্চলৰ বন আৰু পৰ্যটনক্ষেত্ৰসমূহৰ ক্ষেত্ৰভিত্তিক অধ্যয়নৰ লগতে ইয়াৰ প্ৰচাৰ আৰু প্ৰসাৰত গুৰুত্ব প্ৰদানৰ বাবেই কলিয়াবৰৰ নতুন দংগাৰ চৌৰান এহেম আৰু কাজিৰঙা ৰাষ্ট্ৰীয় উদ্যান তথা কলিয়াবৰ মহকুমাৰ অন্তৰ্গত বুঢ়াপাহাৰ বনাঞ্চল পৰ্যবেক্ষণ কৰে বহিঃৰাজ্যৰ পৰা অহা কেন্দ্ৰীয় ৰাজ্যিক বন সেৱা একাডেমিৰ পৰ্যবেক্ষকৰ দলটিয়ে। এসময়ত চোৰাংচিকাৰীৰ ৰেষ্টকেম্প হিচাবে খ্যাত নতুন দংগা গাঁৱক বৰ্তমান পৰ্যটনক্ষেত্ৰ হিচাবে চিনাকি দিবলৈ সক্ষম হৈছে কাৰ্বি খাদ্য সম্ভাৰ লৈ অতিথিক আপ্যায়ণ কৰা চৌৰাণ এহেমে। এই নতুন ডাঙ্গা গাঁও আৰু চৌৰাণ এহেমৰ ওপৰত বিশেষভাৱে অধ্যয়ণ তথা পৰ্যবেক্ষণ কৰিবলৈ চৌৰাণ এহেমত উপস্থিত হয় বহিঃৰাজ্যৰ পৰা অহা কেন্দ্ৰীয় ৰাজ্যিক বন সেৱা একাডেমিৰ পৰ্যবেক্ষকৰ দল। কাজিৰঙা ৰাষ্ট্ৰীয় উদ্যানৰ সঞ্চালক পি.শিৱ কুমাৰৰ নেতৃত্বত বুঢ়াপাহাৰ বনাঞ্চল আৰু নতুন ডাঙ্গা পৰ্যবেক্ষণ কৰি ক্ষেত্ৰভিত্তিক অধ্যয়ণ কৰে দলটোৱে। চৌৰান এহেমত কাৰ্বি জনগোষ্ঠীয় খাদ্য গ্ৰহণ কৰি আপ্লুত হৈ পৰে টীমটো।পৰ্যটন ক্ষেত্ৰত পৰ্যটকৰ বাবে ট্ৰেকিঙৰ জৰিয়তে পৰ্যটন ক্ষেত্ৰত অন্য এক মাত্ৰা প্ৰদান কৰিব পাৰে বুলি আশা ব্যক্ত কৰে বহিঃৰাজ্যৰ পৰা অহা কেন্দ্ৰীয় ৰাজ্যিক বন সেৱা একাডেমিৰ পৰ্যবেক্ষকৰ দলটোৱে। উল্লেখযোগ্য যে¸ ২০১৯ বৰ্ষত ইংলেণ্ডৰ প্ৰাক্তন ক্ৰিকেটাৰ কেভিন পিটাৰছন আহি নতুন ডাঙ্গাৰ চৌৰান এহেমত কাৰ্বি জনগোষ্ঠীয় খাদ্যৰ সোৱাদ লৈ যায়।

অসমীয়া গঞা সমাজত আঘোণৰ আছে এক সুকীয়া মাহাত‍্ব‍্য। আঘোণৰ পথাৰৰ পৰা এইয়া সোণগুটি চপোৱাৰ সময়। কিন্তু কলিয়াবৰৰ আঘোণৰ পথাৰত দেখিবলৈ পোৱা গৈছে এক বিপৰীত ছবি। আঘোণৰ পথাৰত ধানৰ ৰূপ দেখি মূৰে-কপালে দিছে চহা কৃষক ৰাইজে। কলিয়াবৰৰ বালিবাটৰ ঔদ্যোগিক অঞ্চলটোত থকা শিল ভঙা উদ্যোগ (ক্ৰেচাৰ)¸ চাউলৰ, প্লাষ্টিক, ইলেক্ট্ৰিকেল প’ল আদি উদ্যোগৰ পৰা নিৰ্গত হোৱা ধূলি-ধোঁৱা, পানী, অনান‍্য আৱৰ্জনাই সৃষ্টি কৰা প্ৰদূষণে কাষৰীয়া ধাননিৰ বিঘাই-বিঘাই নষ্ট কৰিছে ধান। কলিয়াবৰৰ বালিবাটৰ কৃষকৰ ৫০ বিঘাতকৈও অধিক কৃষিভূমিৰ ধান এতিয়া উদ্যোগসমূহৰ পৰা ওলোৱা দূষিত আৱৰ্জনা আৰু ধূলি-বালিৰে পুতি পেলাইছে। যাৰ ফলত বিঘাই-বিঘাই ধান নষ্ট হৈছে। তদুপৰি¸ বালিবাটৰ ৰাস্তাৰে যোৱা শতাধিক ডাম্পাৰে সমগ্ৰ অঞ্চলটোত সৃষ্টি কৰিছে ধূলিময় পৰিৱেশ। ধাননি পথাৰ নষ্ট হোৱা ইও যেন এক অন্য কাৰণ হৈ পৰিছে। ৰাজ‍্যৰ প্ৰদূষণ নিয়ন্ত্ৰণ বিভাগ এটা থকাৰ পাছতো প্ৰদূষণ নিয়ন্ত্ৰণৰ ব‍্যৱস্থা নোলোৱাকৈয়ে দীৰ্ঘদিন উৎপাদন কাৰ্য‍্য চলাই থকা উদ‍্যোগকেইটাৰ বিৰুদ্ধে স্থানীয় ৰাইজৰ অভিযোগৰ প্ৰতি কাণষাৰ নাই কোনো পক্ষৰ। আনহাতে, কৃষক ৰাইজৰ ক্ষতি হোৱা বহু উদ‍্যোগে স্থানীয় বৰভগীয়া পঞ্চায়তৰ পৰা লাভ কৰা ‘আপত্তি বিহীন প্ৰমাণ পত্ৰ’ৰ ক্ষেত্ৰতো কি ভিত্তিত এনে প্ৰমাণ পত্ৰ দিয়া হয়, সেই লৈও প্ৰশ্ন উত্থাপিত হৈছে। অৱশেষত¸ আঘোণৰ সোণগুটি চপাব নোৱাৰি মূৰে-কঁপালে হাত দিছে কৃষক ৰাইজে। ক্ষোভত ভাঙি পৰিছে চহা কৃষক। ধাননি পথাৰ জ্বলাই দিয়াৰ সিদ্ধান্ত লৈছে দুৰ্ভগীয়া কৃষক ৰাইজে।

 নগাঁও জিলাৰ চামগুৰি নিবাসী  সমাজসেৱক, কবি সাহিত্যিক অতুল কুমাৰ নাথে  ‘কাব্যশ্ৰী’ বঁটা’ ; ‘অসম বঙ্গ মৈত্ৰী বঁটা ‘ৰ লগতে  ‘অসম সাহিত্যজ্যোতি’ বঁটা লাভ কৰি চামগুৰিলৈ গৌৰৱ কঢ়িয়াই আনিবলৈ সক্ষম হৈছে ৷ ছাত্ৰ অৱস্থাৰ পৰা কবিতা , গল্প প্ৰবন্ধ লিখিবলৈ আৰম্ভ কৰা অতুল কুমাৰ নাথে বৰ্তমানও সাহিত্য চৰ্চা অব্যাহত ৰাখিছে ৷ অঞ্চলৰ বিভিন্ন অনুষ্ঠান প্ৰতিষ্ঠানৰ লগত জড়িত থকা অতুল কুমাৰ নাথে ভক্তিৰ মাৰ্গ ( প্ৰবন্ধ), মন দাপোণ ( কবিতা সংকলন ), হোমেন দাদা তুমি ক’ত ( স্মৰণিকা ) , অভিষাৰিকা শেৱালি ( কবিতা সংকলন ), ইতিহাসৰ আঁৰত ( ইতিহাসৰ সংকলন গ্ৰন্থ ) আৰু তুমি অনন্যা নামৰ গ্ৰন্থ সম্পাদনা কৰি অসমীয়া সাহিত্যৰ ভঁৰাল  চহকী কৰিবলৈ চেষ্টা অব্যাহত ৰাখিছে।   নাথে সমন্বয় কাব্য সংস্কৃতিৰ পথাৰ গ্ৰুপ, ইতিহাসৰ আঁৰত গ্ৰুপ আৰু সঁফুৰা নামৰ তিনি টা ফেচবুক গ্ৰুপৰ লগত জড়িত হৈ সাহিত্য চৰ্চা অব্যাহত ৰাখিছে ৷  ১৯৭৫ চনত অতুল কুমাৰ নাথে ৰুণ- জোন নামৰ এটা গৃহ পুথিভঁৰাল স্থাপন কৰিছিল লগতে পৰৱৰ্তী সময়ত বহু মূল্যবান গ্ৰন্থ চামগুৰিৰ পূৰ্ণিমা শইকীয়া হাইস্কুলত দান কৰিছিল ৷ পুৰণিগুদাম শতদল শাখা সাহিত্য সভাৰ জড়িয়তে  অসম সাহিত্য সভাৰ আজীৱন সদস্য গ্ৰহণ কৰা অতুল কুমাৰ নাথ অসম বহুভাষিক কবি সন্মিলনৰ কেন্দ্ৰীয় উপ সভাপতি, অসম বহুভাষিক কবি সন্মিলনৰ চামগুৰি শাখাৰ সভাপতি লগতে চামগুৰি পূৰ্ণিমা শইকীয়া হাইস্কুলৰ পৰিচালনা আৰু উন্নয়ন কমিটিৰ সভাপতি ৰূপে বৰ্তমানে দায়িত্ব পালন কৰি আহিছে ৷এই গৰাকী সমাজসেৱক তথা কবি সাহিত্যিকক বৰপেটা ৰোডৰ সাহিত্য সভা ভৱনত ১৩ নৱেম্বৰত অনুষ্ঠিত  বঁটা বিতৰণী সভাত বিশাখাপট্টনম পৰা অসমৰ কৃষ্টি এৱাৰ্ডচৰ যোগেদি ‘কাব্যশ্ৰী’ বঁটা, অসম বংগ মৈত্ৰীৰ ফালৰ পৰা ‘মৈত্ৰী বঁটা’ আৰু কৃষ্টি এৱাৰ্ডচৰ তৰফৰ পৰা ‘অসম সাহিত্যজ্যোতি’ বঁটা প্ৰদান কৰা হয় বুলি সাহিত্যিক নাথে সাংবাদিকক জানিব দিয়ে ৷ এই বঁটা লাভ কৰি উৎফুল্লিত হোৱা অতুল কুমাৰ নাথে  সাহিত্য সৃষ্টি অব্যাহত ৰখাৰ লগতে পুনৰ আন এখন গ্ৰন্থ প্ৰকাশৰ প্ৰস্তুতি চলাই আছে বুলিও প্ৰকাশ কৰে ।

বৃহস্পতিবাৰে দুপৰীয়া ফিল’বাৰী-পেঙেৰী পথত দুষ্কৃতিকাৰীৰ হাতত আক্ৰমণৰ সন্মুখীন হয় ‘গণ বাৰ্তা’ কাকতৰ ফিল’বাৰীৰ সংবাদদাতা তথা গোৰ্খা ছাত্ৰ সন্থাৰ ফিল’বাৰী আঞ্চলিক সমিতিৰ সভাপতি ঘণশ্যাম ছেত্ৰী ওৰফে বিকি। ঘটনাৰ বিৱৰণি মতে তেওঁ কালি দুপৰীয়া বিজুলীবনত হোৱা এখন সভাত অংশগ্ৰহণ কৰি তৰাণি সংৰক্ষিত বনাঞ্চলৰ মাজেৰে ফিল’বাৰী-পেঙেৰী পথেৰে বাইকেৰে গৈ থাকোতে বনাঞ্চলৰ প্ৰায় মাজবাটত আকস্মিকভাৱে আৱিৰ্ভাৱ হোৱা দুজনীয়া এটা দুৰ্বৃত্তৰ দলে টাঙোনেৰে বিকিৰ পিঠিত প্ৰহাৰ কৰে ৷ মুখত কাপোৰ বান্ধি অহা যুৱকদ্বয়ে বিকিৰ স্প্লেণ্ডাৰ বাইকখনৰো ক্ষতিসাধন কৰে ৷ অৱশ্যে সাংবাদিক তথা ছাত্ৰনেতাজনে চিঞৰ-বাখৰ কৰাত যুৱকদ্বয় হাবিৰ মাজত অন্তৰ্ধান হৈ পৰে। পাছত ঘটনাস্থলীৰ কিছু নিলগত ড্ৰাগছ খোৱা কাগজৰ টুকুৰা, লাইটাৰ ইত্যাদি উদ্ধাৰ হোৱালৈ চাই উক্ত কাণ্ডৰে কোনো ড্ৰাগছ আসক্ত যুৱক জড়িত থকাৰ সন্দেহ কৰা হৈছে ৷ ঘটনাস্থলীত আৰক্ষী  উপস্থিত হৈ তদন্ত আৰম্ভ কৰিছে যদিও বৰ্তমানলৈকে কোনো লোককে আটক কৰাৰ তথ্য নাই ৷ উল্লেখ্য যে সাংবাদিক গৰাকীয়ে ধাৰাবাহিকভাৱে ফিল’বাৰী অঞ্চলত অবাধ গতিত অব্যাহত থকা ড্ৰাগছকে ধৰি বিভিন্ন প্ৰকাৰৰ নিচাজাতীয় দ্ৰব্যৰ বিৰুদ্ধে বা-বাতৰি পৰিৱেশন কৰি আহিছিল। তাতেই ক্ষুণ্ণ হৈ ড্ৰাগছৰে জড়িত ব্যক্তিয়েই সাংবাদিকগৰাকীক প্ৰাণে মৰাৰ চেষ্টা চলাইছিল বুলি সচেতন মহলে সন্দেহ ব্যক্ত কৰিছে। উল্লেখযোগ্য যে তৰাণী সংৰক্ষিত বনাঞ্চলৰ ডিব্ৰুজান নিকটৱৰ্তী উক্ত এলেকাত বিগত কিছুদিনৰ পৰা ধাৰাবাহিকভাৱে ডকাইতি কাণ্ড সংঘটিত হৈ থকাত চিন্তিত হৈ পৰিছে সৰ্বসাধাৰণ ৰাইজ। ঘটনা সন্দৰ্ভত কালি ভুক্তভোগী সাংবাদিকগৰাকীয়ে পেঙেৰী থানাত এজাহাৰ দাখিল কৰিছে আৰু আজি ‘আপকু’ৰ তিনিচুকীয়া জিলা সমিতিয়েও দোষী ব্যক্তিক চিনাক্ত কৰি কঠোৰ শাস্তি বিহাৰ দাবীত পেঙেৰী থানাত এজাহাৰ দাখিল কৰিছে । আৰক্ষীয়ে ঘটনাৰ সন্দৰ্ভত ভাৰতীয় দণ্ড বিধি আইনৰ ৪২৭/৩৪১/৩২৫/৩৪ নং ধাৰাৰ অধীনত পেঙেৰী থানাত ৫৪/২০২১ নং গোচৰ পঞ্জীয়ন কৰিছে ।

নিউজ ডেস্কঃ ২০২২ চনৰ ফেব্ৰুৱাৰী মাহৰ ৪, ৫ আৰু ৬ তাৰিখে নাহৰকটীয়া ৰাঙলী পথাৰৰ বাগ্মীবৰ নীলমনি ফুকন সমন্বয় ক্ষেত্রত অনুষ্ঠিত হব শ্ৰীমন্ত শংকৰদেৱ সংঘৰ ৯১ সংখ্যক বাৰ্ষিক অধিৱেশন। এই অধিৱেশন খনত আহিবলগীয়া লাখ লাখ ভকত বৈষ্ণবক সদৌ অসম ছাত্র সন্থাৰ তৰফৰ পৰা কিদৰে আপ্যায়ন কৰা হব সেই সন্দৰ্ভত আলোচনা কৰিবলৈ নাহৰকটীয়া ৰাঙলী পথাৰত উপস্থিত হয় আছুৰ সাধাৰণ সম্পাদক শংকৰজ্যোতি বৰুৱা।আছুৰ সম্পাদক গৰাকীয়ে অধিৱেশনস্থলী পৰিদৰ্শন কৰি আদৰণি সমিতিৰ বিভিন্ন বিষয়ববীয়াৰ লগত সাক্ষাৎ কৰি মত পোষণ কৰে যে উত্তৰ-পূৱৰ সৰ্ববৃহৎ জাতীয় অনুষ্ঠান শ্ৰীমন্ত শংকৰদেৱ সংঘৰ ৯১ সংখ্যক বাৰ্ষিক অধিৱেশন খন সফল কৰাৰ বাবে সদৌ অসম ছাত্র সন্থা বদ্ধ পৰিকৰ আৰু প্ৰতিজ্ঞাৱদ্ধ। আধ্যাত্মিকতাৰ এনে এক মহান অনুষ্ঠানত সেৱা আগবঢ়াবলৈ ছাত্র সন্থাৰ প্ৰতিজন সদস্যই প্ৰস্তুত বুলি মন্তব্য আগবঢ়ায় আছুৰ সম্পাদক শংকৰজ্যোতি বৰুৱাই।

অসম ৰিয়েল ষ্টেট ইনফ্ৰাষ্টাকচাৰ ডেভলপাৰ্চ এছচিয়েচন চমুকৈ ‘এৰিডা’ৰ প্ৰতিষ্ঠাপক সভাপতি পি কে শৰ্মা পুনৰ সভাপতি হিচাপে নিৰ্বাচিত হৈছে। এৰিডাৰ সাধাৰণ সভাত পি কে শৰ্মাক পুনৰ পাঁচ বছৰৰ বাবে সভাপতি হিচাপে নিৰ্বাচিত কৰা হয়। পুনৰ এৰিডাৰ সভাপতি হিচাপে দায়িত্বভাৰ গ্ৰহণ কৰি পি কে শৰ্মাই কয়-‘ বৰ্ত্তমান সময়ত নিৰ্মাণ খণ্ডটোৱে ব্যাপক প্ৰত্যাহ্বানৰ সন্মুখীন হৈ আহিছে। ক’ভিড পৰিস্থিতিৰ লগতে শ্ৰমিকৰ অভাৱ, বজাৰৰ হতাশাজনক অৱস্থা, নিৰ্মাণ সামগ্ৰীৰ অভাৱনীয় মূল্যবৃদ্ধি আদিকে ধৰি বিভিন্ন কাৰণত নিৰ্মাণ কাৰ্য তথা প্ৰকল্পসমূহৰ বিলম্বই নিৰ্মাণ খণ্ডটোক বেয়াকৈ প্ৰভাৱিত কৰিছে।’ নিৰ্মাণ খণ্ডটোৱে সন্মুখীন হৈ অহা এই প্ৰত্যাহ্বানৰ মাজতে মুখ্যমন্ত্রী হিমন্ত বিশ্ব শৰ্মা নেতৃত্বাধীন চৰকাৰখনে খণ্ডটোৰ উত্তৰণৰ বাবে গ্ৰহণ কৰা পদক্ষেপৰ শৰ্মাই শলাগ লয়। বিশেষকৈ প্ৰশাসনীয় তথা বিভাগীয় বিভিন্ন কামৰ ক্ষেত্রত কৰা সংস্কাৰ তথা সৰলীকৰণৰ বাবে শৰ্মাই চৰকাৰখনৰ ধন্যবাদ জ্ঞাপন কৰে। অৱশ্যে শৰ্মাই আক্ষেপ প্ৰকাশ কৰি কয় যে এতিয়াও একাংশ স্বাৰ্থপৰায়ণ লোকৰ বাবে দুৰ্ভাগ্যবশত চৰকাৰৰ সেই সুবিধাসমূহ বাস্তৱত কাৰ্যকৰী হোৱা নাই। এইক্ষেত্রত এৰিডাৰ ফালৰ পৰা চৰকাৰৰ প্ৰতি প্ৰয়োজনীয় প্ৰতিক্ৰিয়া প্ৰকাশ কৰা হ’ব বুলি শৰ্মাই জানিবলৈ দিয়ে। মূল্যবৃদ্ধিৰ প্ৰসংগত শৰ্মাই কয়-‘ নিৰ্মাণ কাৰ্যৰ সকলো সামগ্ৰীৰ অভাৱনীয় মূল্যবৃদ্ধি হোৱাৰ ফলত নিৰ্মাণ ব্যয় ৪০ শতাংশ পৰ্যন্ত বৃদ্ধি হৈছে। এনে এক পৰিস্থিতিত প্ৰম’টাৰসকলে প্ৰতি বৰ্গফুটত ৩৫০ টকাৰ পৰা ৪০০ টকালৈ বৃদ্ধি কৰাৰ বাহিৰে আন কোনো উপাই নাই।’ শৰ্মাই লগতে কয় যে ৰিয়েল ইষ্টেট খণ্ডই ৰাজহ বৃদ্ধিৰ লগতে দেশৰ অৰ্থনীতিত এক বৃহৎ অৱদান আগবঢ়োৱাটো চৰকাৰে স্বীকাৰ কৰিছে।

আজি গুৱাহাটী প্ৰেছ ক্লাবত দিনৰ ১১ বজাত কবি,সুলেখিকা তথা অসম মাধ্যমিক শিক্ষা পৰিষদ(ছেৱাৰ)দায়িত্বশীল কৰ্মচাৰী পুতুলী ঠাকুৰীয়া মেধিৰ দ্বিতীয় কবিতা সংকলন “বৰ্হমথুৰি” উন্মোচন কৰা হয়।পৰাগজ্যোতি প্ৰকাশনে প্ৰকাশ কৰি উলিওৱা কবিতা পুথিখন উন্মোচন কৰে সুকণ্ঠী গায়িকা ডক্টৰ অনিমা চৌধুৰী বাইদেউৱে।ডক্টৰ অনিমা চৌধুৰী বাইদেউৱে “বৰ্হমথুৰি” কবিতা সংকলনখনে অসমৰ সাহিত্যৰ জগতত এক নতুন দিগন্তৰ সূচনা কৰিব বুলি মতপোষণ কৰে।গ্ৰন্থ উন্মোচনী সভাখনত বিশিষ্ট অতিথি হিচাপে উপস্থিত থকা বিশিষ্ট সাহিত্যিক ভৱানীপ্ৰসাদ অধিকাৰী,ডক্টৰ বীৰেন্দ্ৰ কুমাৰ ভট্টাচাৰ্য, ,দিলস লক্ষ্মীন্দ্ৰ সিংহ, ৰত্নেশ্বৰ বসুমতাৰীয়ে কবিতাপুথিখনৰ উপৰিও সামাজিক সাংস্কৃতিক দিশৰ ওপৰতো মতপোষণ কৰে।অনুষ্ঠানটোৰ আৰম্ভনীতে মলিনী দেৱী ৰাভাই এটি সুন্দৰ বৰগীত পৰিবেশন কৰে আৰু অনুষ্ঠানটোৰ মাজভাগত দীপক দাসে প্ৰয়াত জয়ন্ত হাজৰিকা দেৱৰ এটি সুন্দৰ গীত পৰিবেশন কৰে।