১৯ নৱেম্বৰ শুক্ৰবাৰে গুৱাহাটী উজানবজাৰস্থিত বিষ্ণু-নিৰ্মলা ভৱনত প্ৰদান কৰা হ’ল ২০২১ বৰ্ষৰ প্ৰাগজ্যোতিষ বঁটা। অসমৰ কেইবাগৰাকীও বিশিষ্ট ব্যক্তিলৈ বিভিন্ন শিতানত প্ৰদান কৰা হ’ল এই বঁটা। আচুৰ্য বৰপাত্ৰ আৰু প্ৰিয়ংকা ভৰালীলৈ প্ৰদান কৰা হ’ল প্ৰাগজ্যোতিষ জনপ্ৰিয় কন্ঠশিল্পীৰ সন্মান। সমান্তৰালকৈ ওদালগুৰি জিলাৰ কলাইগাঁৱৰ যুৱক দীপাঙ্কৰ ওজাক প্ৰদান কৰা হ’ল প্ৰাগজ্যোতিষ যুৱ সাহিত্য বঁটা- ২০২১। দীপাঙ্কৰ ওজা মঙলদৈ মহাবিদ্যালয়ৰ পঞ্চম ষান্মাসিকৰ ছাত্ৰ লগতে মঙলদৈ মহাবিদ্যালয় আছু গোটৰ সভাপতি। কলাইগাঁও নিবাসী দীপাঙ্কৰ ওজা ওদালগুৰি জিলা ছাত্ৰ সন্থাৰো এগৰাকী সদস্য লগতে অসমৰ তাৰ্কিক সমাজৰ মাজত জনপ্ৰিয় সদৌ অসম তাৰ্কিক সন্থাৰো এগৰাকী সক্ৰিয় সদস্য। ছাত্ৰ সমাজক সংগঠিত কৰি বিভিন্ন উন্নয়নমূলক সামাজিক কাম-কাজত নিয়োগ কৰাত দীপাঙ্কৰ ওজাই দীৰ্ঘদিন ধৰি পদক্ষেপ লৈ‌ আহিছে। অসম ভিত্তিক কেইবাখনো তৰ্ক প্ৰতিযোগিতাত তেখেতে পুৰষ্কাৰ পাবলৈ সক্ষম হৈছে। কাকতে পত্ৰই ইতিমধ্যে দীপাঙ্কৰ ওজাৰ বহুসংখ্যক লেখা প্ৰকাশ পাইছে। তেখেতৰ এই উত্তৰণক লৈ উৎসাহিত কলাইগাঁওবাসী। আজি বঁটা প্ৰদান অনুষ্ঠানতো তেখেতক সংগ দিয়ে তেখেতৰ কেইবাগৰাকীও ঘনিষ্ঠ বন্ধুৱে।

আজি বৰপেটা জিলাৰ সৰুক্ষেত্ৰী সমষ্টিৰ সৰ্থেবাৰীস্থিত নসত্ৰৰ কৃষ্ণগুৰু সেৱাশ্ৰমৰ প্ৰতিষ্ঠা দিৱস আৰু গুৰুকৃষ্ণ প্ৰেমানন্দ প্ৰভুৰ আৱিৰ্ভাৱ তিথি । প্ৰতি বছৰে ২ আঘোণ তাৰিখে নসত্ৰৰ কৃষ্ণগুৰু সেৱাশ্ৰমত উলহ মালহেৰে উদযাপন কৰে এই বিশেষ দিনটো ।এইবেলিও সেৱাশ্ৰমৰ প্ৰতিষ্ঠা দিৱস তথা গুৰুৰ আবিৰ্ভাৱ তিথি উপলক্ষে অনুষ্ঠিত হয় বৰ্ণাঢ্য কাৰ্যসূচীৰ । কাৰ্যসূচী অনুসৰি পুৱা সম্প্ৰীতি যাত্ৰা উলিওৱা হয়।

এই যাত্ৰাৰে শুভাৰম্ভ কৰা কাৰ্যসূচীৰ বিশাল ৰেলীত সংগ দিয়ে গুৰুকৃষ্ণ প্ৰেমানন্দ প্ৰভু আৰু ভক্তিমাতৃ কুন্তলা পাটোৱাৰী গোস্বামীয়ে । অনুষ্ঠানত উপস্থিত থাকে বিটিচি প্ৰধান প্ৰমোদ বড়োকে ধৰি বিটিচিৰ অধ্যক্ষ কাতিৰাম বড়োৰ লগতে কেইবাজনো বিশিষ্ট ব্যক্তি । প্ৰভুৰ আশীৰ্বাদ ল’বলৈ পুৱাই  সেৱাশ্ৰমত উপস্থিত হয় নেতাজন।উল্লেখ্য যে সেৱাশ্ৰমৰ কীৰ্ত্তন ঘৰত একনাম কীৰ্তন নাম প্ৰসংগৰে বিশেষ দিনটো উদযাপন কৰে ভক্ত গনে ।

আঘোণ মাহৰ পূৰ্ণিমা তিথিৰ দিনা অসমীয়া লোক সংস্কৃতিৰ পৰম্পৰা ৰক্ষা কৰি পালন কৰা হয় মহোহো বা মহ খেদা উৎসৱ ৷ আজি বাক্সা জিলাৰ মুছলপুৰৰ সমীপৱৰ্তী বড়িমুখত কলিতা জনগোষ্ঠী সন্মিলন,অসমে কেন্দ্ৰীয়ভাৱে মহোহো উৎসৱ পালন কৰে ৷ কলিতা জনগোষ্ঠীৰ সন্মিলনৰ মুছলপুৰ জিলা সমিতিৰ সহযোগত আৰু বড়িমুখ আঞ্চলিক সমিতিৰ উদ্যোগত দিনযোৰা কাৰ্যসূচীৰে আয়োজিত এই মহোহো উৎসৱৰ পুৱা বন্তি প্ৰজ্জ্বলনেৰে শুভাৰম্ভ কৰা হয় ৷ ইয়াৰ পিচতে পতাকা উত্তোলন, স্মৃতি তৰ্পণ, তোৰণ উন্মোচন, বৃক্ষ ৰোপণ, চিত্ৰাংকণ আৰু কুইজ প্ৰতিযোগিতাৰ পিচত আবেলি মুকলি সভা অনুষ্ঠিত হয় ৷ হৰেন্দ্ৰ নাথ কলিতাৰ সভাপতিত্বত অনুষ্ঠিত মুকলি সভাত কলিতা জনগোষ্ঠী সন্মিলন, অসমৰ মুখ্য উপদেষ্টা ড° সনেশ্বৰ কলিতা, উপদেষ্টা অৰবিন্দ কলিতা, সভাপতি ৰমণীকান্ত চহৰীয়া, সাধাৰণ সম্পাদক দেৱ কুমাৰ ডেকা, কলিতা উন্নয়ণ পৰিষদৰ অধ্যক্ষ ডাঃ ৰাজেন্দ্ৰ নাথ কলিতা, উপাধ্যক্ষ মিহিৰ তালুকদাৰ, লোক শিল্পী বসন্ত পাটগিৰী, বাক্সা জিলা কেওট জাতীয় পৰিষদৰ সভাপতি কুশল কুমাৰ হালৈ, মুছলপুৰ জিলা সুত্ৰধৰ সন্মিলনৰ সভাপতি তনুৰাম সুত্ৰধৰ, বাক্সা জিলা কোঁচ-ৰাজবংশী সন্মিলনৰ সভাপতি অজিত দাস, শিক্ষাবিদ সুৰেন্দ্ৰ নাথ বাৰ্মাকে ধৰি কেবাগৰাকীও বিশিষ্ট ব্যক্তি উপস্থিত থাকে ৷ মুকলি সভাত ভাষণ প্ৰদান কৰা বক্তাসকলে মহোহো উৎসৱৰ উদ্দেশ্য আৰু তাৎপৰ্য ব্যাখ্যা কৰাৰ লগতে ৰাজ্যখনত বসবাস কৰা কলিতা জনগোষ্ঠীৰ লোক সকলক জনজাতিকৰণৰ দাবী জনায় ৷ লগতে বিটিআৰত বসবাস কৰা কলিতা সকলক সমমৰ্যাদা, সমঅধিকাৰ প্ৰদান কৰিবলৈ বিটিচি কৰ্তৃপক্ষক দাবী জনায় ৷ সন্ধিয়াৰ ভাগত প্ৰতিযোগীসকলৰ মাজত মহোহো প্ৰতিযোগিতা অনুষ্ঠিত হয় ৷

ৰাজ্যত অব্যাহত আছে নিষিদ্ধ কফ চিৰাপ- নিচাযুক্ত দ্ৰব্যৰ অবাধ বেহা । বঙাইগাঁও জিলাৰ বইটামাৰী আৰক্ষীয়ে যোৱা নিশা এক অভিযান চলাই আৰক্ষী চকীটোৰ অন্তৰ্গত নিত্যবজাৰ এলেকাৰ এঘৰ লোকৰ পৰা নিষিদ্ধ কফ ছিৰাপ আৰু নিছাযুক্ত দ্ৰব্য সহ ৬ জন যুৱকক গ্ৰেপ্তাৰ কৰে। তাৰ মাজত ৱেব পৰ্টেল এটাৰ মালিক এজনো থকা বুলি জানিব পৰা গৈছে । উক্ত যুৱক জন ধুবুৰী জিলাৰ চাপৰৰ ছফিকুল ইছলাম । তেওঁ  ৱেব পৰ্টেলৰ স্বত্তাধিকাৰী বুলি স্বীকাৰোক্তি দিছে। সাংবাদিকজনৰ লগত ধৃত আন যুৱক কেইজন হল চাপৰ আৰু নিত্যবজাৰ এলেকাৰ ক্ৰমে সানিদুল ইচলাম,আব্দুল ৰহিম আহমেদ, কৰিমুল ইচলাম আৰু ৰিজু আহমেদ । গোটেইকেইজনক আৰক্ষীয়ে কৰায়ত্ত কৰি বইটামাৰী আৰক্ষী চকীলৈ আনে । তাৰ পিছত ঘটনা সন্দৰ্ভত বইটামাৰী আৰক্ষীয়ে অভয়াপুৰী থানাত এটি গোচৰ ৰুজু কৰি যুৱককেইজনক গ্ৰেপ্তাৰ কৰাৰ লগতে চক্ৰটোৰ লগত জড়িত আন লোকসকলৰ সন্ধান অব্যাহত ৰাখিছে আৰক্ষীয়ে । এই চক্ৰটোৱে দীৰ্ঘদিন ধৰি গোপনে নিচাযুক্ত দ্ৰব্যৰ অবৈধ বেহা চলাই থকাৰ অভিযোগ উত্থাপিত হৈছে । আৰক্ষীয়ে এই চক্ৰটোক কৰায়ত্ত কৰাত স্থানীয় ৰাইজে সন্তোষ প্ৰকাশ কৰিছে ।

আমাৰ ঐতিহ্য, আমাৰ সংস্কৃতি ৰক্ষাৰ দায়িত্ব প্ৰতিজন অসমীয়াৰ। আমি আমাৰ ঐতিহ্য-সংস্কৃতি ৰক্ষা কৰিব নোৱাৰিলে ভৱিষ্যতে জাতিটোৱে অস্তিত্বৰ সংকটত ভুগিব। সেয়েহে প্ৰতিজন খিলঞ্জীয়া লোকেই দায়ৱদ্ধতাৰে নিজৰ ঐতিহ্য-সংস্কৃতিক জীয়াই ৰখাৰ দায়িত্ব গ্ৰহণ কৰক। চৰকাৰে জাতিৰ অস্তিত্ব ৰক্ষাৰ বাবে সদায়েই সাজু আছে। এই মন্তব্য অসম চৰকাৰৰ মন্ত্ৰী যোগেন মহনৰ। চৰাইদেউ মৈদাম প্ৰত্নতাত্বিক স্থানত অনুষ্ঠিত বিশ্ব ঐতিহ্য সপ্তাহৰ উদ্বোধনী অনুষ্ঠানত অংশগ্ৰহণ কৰি এই মন্তব্য কৰে মন্ত্ৰী গৰাকীয়ে। উল্লেখ্য যে অসম প্ৰত্নতত্ব সঞ্চালকালয়ে প্ৰতি বছৰে উদযাপন কৰি অহা বিশ্ব ঐতিহ্য সপ্তাহৰ উদ্বোধনী অনুষ্ঠান এইবাৰ চৰাইদেউ মৈদাম প্ৰত্নতাত্বিক স্থানত চৰাইদেউ জিলা প্ৰশাসনৰ সহযোগত অনুষ্ঠিত কৰে। খিলঞ্জীয়া আৰু জনজাতীয় বিশ্বাস আৰু সংস্কৃতি বিভাগৰ অন্তৰ্গত প্ৰত্নতত্ব সঞ্চালকালয়ৰ উদ্যোগত আজিৰেপৰা ২৫ নৱেম্বৰলৈকে অনুষ্ঠিত হব বিশ্ব ঐতিহ্য সপ্তাহৰ কাৰ্যসূচী।  আজি অনুষ্ঠিত হোৱা উদ্বোধনী অনুষ্ঠানত মুখ্য অতিথি হিচাপে অংশগ্ৰহণ কৰি মন্ত্ৰী যোগেন মহনে আগন্তুক তিনি বছৰৰ ভিতৰত বিশ্ব ঐতিহ্যৰ তালিকাত চৰাইদেউ মৈদাম ক্ষেত্ৰৰ নাম অন্তৰ্ভুক্ত হোৱাৰ সম্ভাৱনা আছে বুলি মন্তব্য কৰে। ইফালে সোণাৰি সমষ্টিৰ বিধায়ক ধৰ্মেশ্বৰ কোঁৱৰেও আগন্তুক তিনিবছৰৰ ভিতৰত চৰাইদেউৰ মৈদাম ক্ষেত্ৰই বিশ্ব ঐতিহ্য ক্ষেত্ৰৰ স্বীকৃতি লাভ কৰাৰ সম্ভাৱনাৰ কথা ব্যক্ত কৰা লগতে এইক্ষেত্ৰত স্থানীয় ৰাইজৰ সহযোগিতা কামনা কৰে। উল্লেখ কৰা প্ৰয়োজন যে ১৯৭২ চনত সংযুক্ত ৰাষ্ট্ৰসংঘৰ অন্তৰ্গত ইউনেস্কোৰ সাধাৰণ সভাই সমগ্র বিশ্বৰ কেইটামান বিশেষ সাংস্কৃতিক ঐতিহ্যৰ স্বাক্ষৰ বহনকাৰী প্ৰাকৃতিক আৰু সাংস্কৃতিক সম্পদৰাজিক বিশ্ব ঐতিহ্য হিচাপে তালিকাভুক্ত কৰি ৰক্ষণাবেক্ষণ দিবলৈ বিশেষ উদ্যোগ গ্ৰহণ কৰে। বিশ্ব ঐতিহ্যৰ তালিকাত ভাৰতবৰ্ষৰ ৩৮ টা সাংস্কৃতিক আৰু প্ৰাকৃতিক ঐতিহ্য ই এতিয়ালৈকে স্থান লাভ কৰিছে। ইয়াৰ ভিতৰত অসমৰ কাজিৰঙা আৰু মানাহ ৰাষ্ট্ৰীয় উদ্যানৰ নামো অন্তৰ্ভুক্ত হৈছে যদিও এতিয়ালৈকে অসমৰ কোনো এটা সাংস্কৃতিক ঐতিহ্যই স্থান লাভ কৰিবলৈ সক্ষম হোৱা নাই । ইয়াৰ পৰিপ্ৰেক্ষিতত নদীদ্বীপ মাজুলীৰ লগতে আহোম ৰাজত্বৰ প্ৰথমটো স্থায়ী ৰাজধানী তথা পৰৱৰ্তী সময়ত সমাধিস্থল হিচাপে পৰিণত হোৱা আহোম ৰাজত্বকালৰ ঐতিহ্য বহনকাৰী চৰাইদেউৰ মৈদাম ক্ষেত্ৰক বিশ্ব ঐতিহ্য ক্ষেত্ৰৰ তালিকাত অন্তৰ্ভুক্ত কৰিবলৈ কৃষাণচান্দ নোৰিয়েলৰ তত্বাৱধানত বিশেষ পদক্ষেপ গ্ৰহণ কৰা হৈছে। অসম চৰকাৰে ইতিমধ্যে বিশ্ব ঐতিহ্যৰ প্ৰাৰম্ভিক তালিকাত অন্তৰ্ভুক্ত হোৱা চৰাইদেউ প্ৰত্নতাত্বিক ক্ষেত্ৰক বিশ্ব ঐতিহ্যৰ মূল তালিকাত অন্তৰ্ভুক্ত কৰিবলৈ আন্তগাঠনি উন্নয়ন, ডচিয়াৰ প্ৰস্তুতকৰণ, সংস্কৰণ ইত্যাদিৰ কাম পূৰ্ণগতিত ৰূপায়ণ কৰি আছে। পৰিকল্পনা অনুসৰি যদিহে সকলো কাম সময়মতে সম্ভৱ হৈ উঠে তেনেহলে আগন্তুক তিনি বছৰৰ ভিতৰত চৰাইদেউৰ মৈদাম ক্ষেত্ৰই বিশ্ব ঐতিহ্যৰ স্বীকৃতি লাভ কৰিবলৈ সক্ষম হব। ইয়াৰ ফলত শিৱসাগৰ আৰু চৰাইদেউৰ আৰ্থসামাজিক তথা সাংস্কৃতিক মানচিত্ৰ সলনি হোৱাৰ লগতে বহু যুৱক-যুৱতীয়ে সংস্থাপন লাভ কৰিব। চৰাইদেউ মৈদাম ক্ষেত্ৰত আজি অনুষ্ঠিত হোৱা বিশ্ব ঐতিহ্য সপ্তাহৰ উদ্বোধনী অনুষ্ঠানত এই কথা জনালে মন্ত্ৰী যোগেন মহন, বিধায়ক ধৰ্মেশ্বৰ কোঁৱৰ, পদ্মশ্ৰী যোগেন্দ্ৰনাথ ফুকন, প্ৰত্নতত্ব সঞ্চালকালয়ৰ সঞ্চালিকা দিপিৰেখা কুলি, অসম উচ্চতৰ মাধ্যমিক শিক্ষা সংসদৰ প্ৰাক্তন অধ্যক্ষ ড° দয়ানন্দ বুঢ়াগোহাঁই।

উল্লেখ্য যে,টাই আহোম ধৰ্মীয় প্ৰাৰ্থনা আই-চিং লাও পৰিৱেশনেৰে  চৰাইদেউ মৈদামক্ষেত্ৰত বিশ্ব ঐতিহ্য সপ্তাহৰ শুভাৰম্ভ হয়। খিলঞ্জীয়া আৰু জনজাতীয় বিশ্বাস আৰু সংস্কৃতি বিভাগ প্ৰত্নতত্ব সঞ্চালকালয়ৰ উদ্যোগত আজি অনুষ্ঠিত উদ্বোধনী অনুষ্ঠানত অসম চৰকাৰৰ মন্ত্ৰী যোগেন মহনৰ মুখ্য অতিথি হিচাপে অংশগ্ৰহণ কৰা লগতে পদ্মশ্ৰী যোগেন্দ্ৰনাথ ফুকন আমন্ত্ৰিত অতিথি হিচাপে উপস্থিত থকা উদ্বোধনী অনুষ্ঠানত চৰাইদেউ জিলাৰ উপায়ুক্ত পল বৰুৱা, সোণাৰিৰ বিধায়ক ধৰ্মেশ্বৰ কোঁৱৰ, শিক্ষাবিদ ড° দয়ানন্দ বুঢ়াগোহাঁই, প্ৰাক্তন মন্ত্ৰী হিৰণ্য কোঁৱৰ, সোণাৰিৰ প্ৰাক্তন বিধায়িকা নৱনীতা সন্দিকৈৰ ওপৰিও বহু কেইগৰাকী বিশিষ্ট অতিথি উপস্থিত থাকে।

ডিগবৈ নগৰৰ অগ্ৰনি উচ্চ শিক্ষানুষ্ঠান ডিগবৈ মহিলা মহাবিদ্যালয়ৰ ২০২১-২২ বৰ্ষৰ ছাত্ৰী একতা সভাৰ সাধাৰণ নিৰ্বাচনৰ যোৱা ১৭ নৱেম্বৰত ঘোষিত ফল অনুসৰি সাধাৰণ সম্পাদিকা পদ সহ মুঠ ১০ গৰাকী আছুৰ সমৰ্থিত প্ৰাৰ্থীয়ে জয়লাভ কৰা বিপৰিতে গোৰ্খা ছাত্ৰ সন্থা সমৰ্থীত প্ৰাৰ্থীয়ে সভানেত্ৰী পদত জয়লাভ কৰিবলৈ সক্ষম হয় ৷ সেই অনুসৰি আগন্তোক ২০২১-২২ বৰ্ষৰ ছাত্ৰী একতা সভাৰ বাবে আছুৰ সমৰ্থনত জয়লাভ কৰে সাধাৰণ সম্পাদিকা পদত মমিতা ৰায়, সহ সাধাৰণ সম্পাদিকা পদত চুমিত্ৰা গগৈ, উপ-সভানেত্ৰী পদত কৰিণা মৰাণ, আলোচনী সম্পাদিকা পদত চবা ৰুকচাৰ খানম, তৰ্ক আৰু সাহিত্য সম্পাদিকা পদত লক্ষীপ্ৰভা ফুকন, সাংস্কৃতিক সম্পাদিকা পদত পাপৰি গগৈ, ছাত্ৰী জিৰণি কোঠা সম্পাদিকা পদত সাগৰি চুতিয়া, লঘু ক্ৰীড়া সম্পাদিকা পদত পল্লৱী গগৈ, গুৰু ক্ৰীড়া সম্পাদিকা পদত জ্ঞানশ্ৰী বৰুৱাই ৷ ইয়াৰ বিপৰতি সভানেত্ৰী দৰে গধুৰ দ্বায়িত্ব পদত জয় লাভ কৰে গোৰ্খা ছাত্ৰ সন্থাৰ সমৰ্থীত পদৰ প্ৰাৰ্থী সঞ্জনা ছেত্ৰীয়ে ৷ সকলো নিৰ্বাচিত প্ৰাৰ্থীলৈ ডিগবৈ আঞ্চলিক ছাত্ৰ সন্থাই আন্তৰিক শুভেচ্ছা জ্ঞাপন কৰিছে ৷ নিৰ্বাচনৰ ফল ঘোষণাৰ পাচতে আছুৰ সমৰ্থনত জয়লাভ কৰা সকলো প্ৰাৰ্থীয়ে ডিগবৈ শ্বহীদ বেদী চৌহদত উপস্থিত হৈ বন্তি প্ৰজ্বলন কৰে আৰু সকলোকে ডিগবৈ আঞ্চলিক ছাত্ৰ সন্থাৰ সাধাৰণ সম্পাদক আব্দুল ৰাজাই ফুলাম গামোচাৰে আদৰণি জনাই ৷ ইফালে সভানেত্ৰী পদত জয়লাভ কৰা সঞ্জনা ছেত্ৰীক ডিগবৈ ভূপেন হাজৰিকা প্ৰতিমূৰ্তিস্থলিত ডিগবৈ গোৰ্খা ছাত্ৰ সন্থাৰ প্ৰতিনিধিৰ তৰফৰ পৰা গামোচা পিন্ধাই সম্ভাষণ জ্ঞাপন কৰে৷ লগতে ডিগবৈ গোৰ্খা ছাত্ৰ সন্থাৰ সভাপতি বিনোদ ছেত্ৰীয়ে শুভেচ্ছা জ্ঞাপন কৰে ৷