নাজিৰা ,প্ৰতিবেদক :-  শিৱসাগৰ জিলাৰ নাজিৰা মহকুমাৰ শিমলুগুৰি নগৰৰ প্ৰভাতীপুৰৰ নিবাসী, অৱসৰপ্ৰাপ্ত শিক্ষয়িত্ৰী, শিশু সাহিত্যিক – কবি ফুল চাংমাই গগৈলৈ আগবঢ়োৱা হয় সমাজসেৱিকা কুশলতা শইকীয়া সোঁৱৰণী ২০২১ বৰ্ষৰ “দিখৌ পাৰৰ সাহিত্য বঁটা”। শিৱসাগৰ জিলা সাহিত্য সভাৰ অন্তৰ্গত শিমলুগুৰি শাখা সাহিত্য সভাই চলিত বৰ্ষৰ পৰা আৰম্ভ কৰা এই বঁটা প্ৰতিবছৰে বৃহত্তৰ শিমলুগুৰি অঞ্চলৰ সমাজ, সাহিত্য আৰু সাংস্কৃতিক ক্ষেত্ৰলৈ  উল্লেখযোগ্য অৱদান  আগবঢ়োৱা লোকৰ ভিতৰত প্ৰথমবাৰৰ বাবে বঁটা প্ৰাপক ফুল চাংমাই গগৈক এক গাম্ভীৰ্যপূৰ্ণ অনুষ্ঠানত এই বটা প্ৰদান কৰা হয়৷শিমলুগুৰি শাখা সাহিত্য সভাৰ উদ্যোগত শিমলুগুৰি আছুৰ শ্বহীদ ভৱনত ১৪ নৱেম্বৰত শিশু দিৱস উদযাপনৰ লগতে দিখৌপাৰৰ সাহিত্য বঁটা প্ৰদানৰ লগত সংগতি ৰাখি অনুস্থিত এক অনুষ্ঠানত নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সব্যসাচী কাশ্যপ  বিশিষ্ট অতিথি হিচাপে উপস্থিত থকাৰ লগতে অৱসৰপ্ৰাপ্ত  অধ্যাপক তথা শিৱসাগৰ জিলা সাহিত্য সভাৰ প্ৰাক্তন সভাপতি – বিশিষ্ট সাংবাদিক দুৰ্লভ বুঢ়াগোহাঁই,জিলা সাহিত্য সভাৰ উপ সভাপতি ড° প্ৰশান্ত চুতীয়া,সম্পাদক সন্তোষ দত্ত ,শিৱসাগৰ জিলা ছাত্ৰ সন্থাৰ সভাপতি মানৱ হাজৰিকাৰ লগতে ভালেকেইজন গণ্য মান্য ব্যক্তি,লেখক কবি সাহিত্যিক উপস্থিত থাকে৷ কবি,শিক্ষয়িত্ৰী তথা শিমলুগুৰি শাখা সাহিত্য সভাৰ সভানেত্ৰী কৃষ্ণা শইকীয়া আৰু সংবাদকৰ্মী জয়ন্ত বৰুৱাই আঁত ধৰা অনুষ্ঠানত কেইবাগৰাকী শিল্পী , কবিয়ে গীত পৰিবেশন  আৰু কবিতা পাঠেৰে অনুষ্ঠানটি জীপাল কৰি তোলে৷উল্লেখ্য যে দিখৌপাৰৰ বঁটা লাভ কৰা দলবাগান উচ্চতৰ মাধ্যমিক বিদ্যালয়ৰ অৱসৰপ্ৰাপ্ত শিক্ষয়িত্ৰী ফুল চাংমাইয়ে  শিশুসকলৰ উপযোগীকৈ কেইবাখনো শিশু গ্ৰন্থ প্ৰকাশ কৰে। “ইৰাণৰ সাধু শুনো আহা, ইণ্ডোনেছিয়াৰ সাধু, নেপালৰ সাধু, থাইলেণ্ডৰ সাধু, চাওতালীৰ সাধু, ইয়ো এক গল্প (দেশ বিদেশৰ জনশ্ৰুতিমূলক গল্প), শিৱসাগৰ জিলাৰ আহোম যুগৰ স্হাপত্য, অসম ইতিহাসৰ ত্যাগী পুৰুষসকল আৰু উত্তৰ পূৰ্বাঞ্চলৰ ঐতিহাসিক ৰমণীসকল” আদিকে ধৰি কুৰিখনৰো অধিক শিশু গ্ৰন্থ ৰচনা কৰা ফুল চাংমাই গগৈয়ে অঞ্চলটোৰ বিভিন্ন সামাজিক অনুষ্ঠান প্ৰতিষ্ঠানৰ সৈতে বৰ্তমানেও ওতঃপ্ৰোত ভাৱে জড়িত হৈ আছে।  ১৪ নৱেম্বৰৰ শিশু দিৱসৰ দিনাই শিমলুগুৰি আঞ্চলিক ছাত্ৰ সন্থাৰ কাৰ্যালয় ‘শ্বহীদ ভৱন’ ত আয়োজিত এক অনুষ্ঠানত  এখন প্ৰশষ্টি প্ৰত্ৰ, এটা স্মাৰক, চেলেং চাদৰ, গামোছা আৰু গ্ৰন্থৰ টোপোলাৰে এই বঁটা প্ৰদান কৰা হয়।৷

 হাৱাজান, প্ৰতিবেদক: কৰ্মক্ষেত্ৰত বিভিন্ন ধৰণে জড়িত থকা গহপুৰৰ বিভিন্ন প্ৰান্তৰ বহু কেইগৰাকী লোকৰে গঠিত ‘অনামী সামাজিক গ্ৰুপ’ উদ্যোগত ককিলা চাৰি আলিত কালি অভিনন্দন অনুষ্ঠানৰ আয়োজন কৰা হয়। উল্লেখ্য সমাজৰ বিভিন্ন ক্ষেত্ৰত বিশেষ ভাবে জড়িত লোকক অভিনন্দন জ্ঞাপনেৰে কিছু উৎসাহ প্ৰদান কৰাৰ মহৎ উদ্দেশ্য আগত লৈ শিক্ষক, স্বাস্থ্যকৰ্মী, কৰ্মচাৰী, সাহিত্য-সাংস্কৃতিক কৰ্মী, সমাজকৰ্মী, মানৱ অধিকাৰ কৰ্মী, সাংবাদিক, ব্যৱসায়ী আদিৰে গঠিত ‘অনামী সামাজিক গ্ৰুপে’ ইতিমধ্যে গহপুৰৰ বিভিন্ন প্ৰান্তৰ বহু সংখ্যক বিশিষ্ট ব্যক্তিক অভিনন্দন জ্ঞাপনেৰে উৎসাহিত কৰাৰ প্ৰচেষ্টা চলাই আহিছে। ১৯৪২ চনৰ স্বাধীনতা আন্দোলনৰ গহপুৰৰ শ্বহীদ কনকলতা বৰুৱা, মুকুন্দ কাকতিৰ লগতে অন্য ২৬গৰাকী মুক্তিযুঁজাৰু মুঠ ২৮ গৰাকী স্বাধীনতা সংগ্ৰামীৰ নাম সন্নিবিষ্টৰে দেশপ্ৰেমমুলক গীত লিখি ইণ্ডিয়া বুক অব ৰেকৰ্ডচ পৰা স্বীকৃতি লাভ কৰিবলৈ সক্ষম হোৱা ‘অনামী সামাজিক গ্ৰুপ’ৰ অন্যতম সদস্য, গহপুৰৰ এগৰাকী স্থানীয় সংবাদদাতা, নৱ গীতিকাৰ ৰমেন বৰাৰ  গোটটোৰ সদস্যসকলে আনুষ্ঠানিক ভাবে অভিনন্দন জ্ঞাপন কৰে। অনামী সামাজিক গ্ৰুপৰ সদস্যসকলে কালি বিয়লি ককিলা চাৰিআলিস্থিত ৰমেন বৰাৰ বাসগৃহত উপস্থিত হৈ এখন ফুলাম গামোচা, এখন গ্ৰন্থৰ লগতে এখন অভিনন্দন পত্ৰৰে শুভেচ্ছা জ্ঞাপন কৰে। উক্ত অভিনন্দন অনুষ্ঠানটোত ‘অনামী সামাজিক গ্ৰুপৰ জ্যেষ্ঠ সদস্য ক্ৰমে হেম সোলেঙী প্ৰাথমিক বিদ্যালয়ৰ অৱসৰ প্ৰাপ্ত প্ৰধান শিক্ষক বিমল ভূঞা, গহপুৰ ছোৱালী হাইস্কুলৰ প্ৰধান শিক্ষক জগদীশ শৰ্মা, বিলতীয়া উপ স্বাস্থ্য কেন্দ্ৰৰ ফাৰ্মাচিষ্ট মৃদুল শৰ্মা বৰদলৈ, গহপুৰ চাহ বাগিচা প্ৰাথমিক বিদ্যালয়ৰ প্ৰধান শিক্ষক জীতেন মহানন্দ, গহপুৰ পৌৰসভাৰ গাণনিক ৰাজীৱ শইকীয়া, গহপুৰ বড়ো হাইস্কুলৰ সহকাৰী শিক্ষক নন্দ শৰ্মা, লেখিকা মঞ্জু বৰা হাজৰিকা, জ্যেষ্ঠ সাংবাদিক মৃদুল কুমাৰ বৰা, দ্বীপ কুমাৰ শৰ্মা, নিতুল বৰা, যুৱ সমাজকৰ্মী বিপুল গাংগুলী, মানৱ অধিকাৰ সংগ্ৰাম সমিতিৰ কেন্দ্ৰীয় সচীৱ ৰিতুল বৰুৱা, যুৱ ব্যৱসায়ী শোভন শৰ্মা(মইনা) উপস্থিত থাকে। জ্যেষ্ঠ সদস্য বিমল ভূঞাৰ সভাপতিত্ব কৰা আৰু ৰিতুল বৰুৱই আঁত ধৰা অভিনন্দন অনুষ্ঠানটোত ৰমেন বৰাৰ পিতৃ ভাৰতীয় বায়ু সেনাৰ অৱসৰ প্ৰাপ্ত সৈনিক তথা অৱসৰ প্ৰাপ্ত বিষয় শিক্ষক ডম্বৰু বৰা, পত্নী ৰুমী বৰা, ভগ্নী দীপালি বৰা বৰুৱাৰ লগতে কেইবা গৰাকী স্থানীয় লোক উপস্থিত থাকে।