ভূৰাগাঁও ,প্ৰতিবেদক ;-  মৰিগাঁও জিলাৰ লাহৰীঘাট সমষ্টিৰ টেঙাগুৰি স্হিত শিয়ালমাৰী ৰাজ্যিক চিকিৎসালয়ত  নগাঁও লোক সভা সমষ্টিৰ সাংসদ প্ৰদ্যুৎ বৰদলৈয়ে সাংসদ পূজিৰ ধনেৰে এম্বুলেন্স সেৱা মুকলি কৰে। এম্বুলেন্স সেৱা মুকলি অনুষ্ঠানটি সঞ্চালনা কৰে লাহৰীঘাট সমষ্টিৰ বিধায়ক ডাঃ আচিফ মহম্মদ নাজাৰে। অনুষ্ঠানটিত চিকিৎসক ও  স্বাস্থ্য কৰ্মী সকলৰ লগতে  জিলা কংগ্রেছৰ সভাপতি বীৰ কুমাৰ কোঁৱৰ, ব্লক সভাপতি ইব্রাহীম আলী, হস্পিটেলৰ ভুমিদাতা অৱসৰপ্ৰাপ্ত শিক্ষক আবুল হাছান,  অসম প্ৰদেশ বি জে পি সংখ্যালঘু মৰ্চাৰ প্ৰাক্তন  উপ সভাপতি জাবেদ আলী আহমেদ,কুশতলি মন্ডল বি জে পিৰ সম্পাদিকা তচলিমা বেগমৰ  উপৰিও  কেবা শতাধিক স্হানীয় ৰাইজ উপস্থিত আছিল। অৱশ্যে   মূল  অনুষ্ঠানৰ আগতে বিধায়ক গৰাকীয়ে নবনির্মিত টেঙাগুৰি বজাৰ গৃহৰ উদ্বোধন কৰে।  শেহতীয়াকৈ ৰাজ্যৰ ৫ গৰাকী কৈ কিশোৰীয়ে আলফাত যোগদান সন্দৰ্ভত নগাঁও লোক সভা সমষ্টিৰ সাংসদৰ প্ৰতিক্ৰিয়া।  ইপিনে চৰ-চাপৰিত প্ৰশাসনে চলোৱা উচ্ছেদ সন্দৰ্ভতো প্ৰতিক্ৰিয়া ব্যক্ত কৰে সাংসদ জনে।  উল্লেখ্য যে এই এম্বুলেন্স সেৱাই টেঙাগুৰি অঞ্চলৰ এক আপুৰুগীয়া সমস্যাৰ সমাধান  হোৱাত  স্হানীয় ৰাইজে  স্বস্তি প্ৰকাশ কৰে। 

ভূৰাগাঁও ,প্ৰতিবেদক :- ভাৰত তথা অসমৰ খেলুৱৈ সকলে সমগ্ৰ বিশ্বতে নিজৰ নাম উজ্জ্বল কৰা সময়ছোৱাত মৰিগাঁও WUSHU Association ৰ প্ৰশংসনীয় পদক্ষেপ গ্ৰহণ কৰা পৰিলক্ষিত হয় |  মৰিগাঁও কাৰাটে খেলুৱৈ সকলৰ প্ৰতিভা বিশ্ব দৰবাৰলৈ প্ৰেৰণ কৰা স্বাৰ্থত মৰিগাৱত দুদিনীয়াকৈ মৰিগাঁও জিলা য়ুছো এছছিয়েচনে মৰিগাঁও স্কুল খেল পথাৰত আয়োজন কৰা জিলা ভিত্তিত য়ুছো প্ৰতিযোগিতাৰ সুফল সমাপ্তি ঘটে । এই প্ৰতিযোগিতাত মৰিগাঁও জিলাৰ কেইবাটাও দলে যোগদান কৰিছিল আৰু সোন, ৰুপ আৰু ব্ৰঞ্জৰ পদক অৰ্জন কৰিবলৈ সক্ষম হয় । সদৌ শেষত দুদিনীয়া কাৰ্যসূচীৰে অনুষ্ঠিত কৰা খেল খনত য়ুছো সন্থাৰ সভাপতি বিমলজোতি বৰদলৈয়ে মন্তব্য কৰে যে মৰিগাঁও পৰা নতুন নতুন খেলুৱৈ ৰাজ্যিক বা ৰাষ্ট্ৰীয় পৰ্য্যায়ৰ বাবে উলিয়াই নিব কাৰণে এই প্ৰতিযোগিতা আয়োজন কৰা হৈছিল ।

কাকজান,প্ৰতিবেদক : সদৌ অসম সাহিত্য সংস্কৃতি মূলক অনুষ্ঠান “সাহিত্য সংস্কৃতিৰ বৃহত্তৰ মঞ্চ,অসম “য়ে টীয়কৰ  যুগসম্ভৱা কবি ববী দত্তলৈ আগবঢ়াইছে “কাব্য স্বৰ্ণ বঁটা”। সাহিত্য আৰু কাব্য জগতলৈ আগবঢ়োৱা বহুমূলীয়া বৰঙণিৰ বাবে তেখেতলৈ এই সন্মানীয় বঁটা আগবঢ়োৱা হয়। ২৮ নৱেম্বৰ ২০২১ তাৰিখে “অসম সাহিত্য সভা ভৱনৰ ,জয়ন্ত বৰুৱা সভাকক্ষ”ত “সাহিত্য সংস্কৃতি বৃহত্তৰ মঞ্চ,অসম’ৰ বাৰ্ষিক অধিবেশনত এই বঁটা প্ৰদান কৰা হ’ব বুলি জানিব পৰা গৈছে।ববী দত্ত বৰ্তমান সময়ৰ অসমৰ এগৰাকী প্ৰতিষ্ঠিত কবি। ববী দত্তই বৰ্তমান লৈকে বহু কেইখন কাব্য গ্ৰন্থ প্ৰকাশ কৰি উলিয়াইছে। এই কাব্য গ্ৰন্থ সমূহৰ ভিতৰত শীতৰ হিমাদ্রি পুৱা,মাটিত পৃথিৱীৰে মিঠা,ববী দত্তৰ লিমাৰিক,প্ৰণয়ৰ নূপুৰ ৰাগিনী,এটা মৌন প্ৰাৰ্থনা :ঈশ্বৰৰ কথা, হেঁপাহৰ ভৰুণ পৃথিৱী,মৰ-চেওঁৰা,আৰু দ্বী ভাষিক কাব্য গ্ৰন্থ(অসমীয়া আৰু ইংৰাজী ভাষাত) “‘Love:The Melodies of Anklet”কাব্য গ্ৰন্থই বিপুল জনপ্ৰিয়তা লাভ কৰিছে। আন্তঃৰাষ্ট্ৰীয় পৰ্যায়ত নিজকে কবি হিচাপে প্ৰতিষ্ঠা লাভ কৰাবলৈ সক্ষম হোৱা ববী দত্তই নেপাল কাঠমাণ্ডুত অনুষ্ঠিত  “আন্তঃৰাষ্ট্ৰীয় কবি সন্মিলন”তো অংশ গ্ৰহণ কৰিছিল,বিশেষ ভাবে নিমন্ত্ৰণ লাভ কৰি। উল্লেখযোগ্য যে ববী দত্তৰ আৰু তিনিখন কাব্য গ্ৰন্থ অহা জানুৱাৰী মাহত উন্মোচনৰ বাবে সাজু হৈছে ।এই সমূহৰ মাজৰে “আই-পিতাই” কাব্যগ্ৰন্থ খন চাৰিটা ভাষাত  (অসমীয়া,ইংৰাজী,হিন্দী,আৰু বাংলা)প্ৰকাশৰ পথত।বনাই উচ্চতৰ মাধ্যমিক বিদ্যালয়ৰ বিষয় শিক্ষয়িত্ৰী ববী দত্ত তামুলিছিগা উচ্চ মাধ্যমিক বিদ্যালয়ৰ অৱসৰ প্ৰাপ্ত প্ৰধান শিক্ষক শ্ৰী লীলা কান্ত দত্ত আৰু ৰিনা দত্তৰ জ্যেষ্ঠ কন্যা।

পশ্চিম নলবাৰী,প্ৰতিবেদক :“মানুহে প্ৰকৃতিৰ লগত সহাৱস্থান কৰি সমাজ গঢ় দিয়ে । আকাশ ,নদী ,পথাৰ ,গছ , চৰাই-চিৰিকটি ,জীৱ-জন্তু আদিৰ  সহাৱস্থানত মানুহে সভ্যতা-সংস্কৃতিৰ জন্ম দিয়ে ।মানৱ সমাজত ধৰ্ম ,ভাষা ,জাতিৰ মাজতো সহাৱস্থান গঢ়ি উঠে ”।      এই মন্তব্য অধ্যাপক ড: অৱনী কুমাৰ ভাগৱতীৰ । পশ্চিম নলবাৰীৰ অন্যতম সমাজ-সাংস্কৃতিক অনুষ্ঠান সাহপুৰ ৰাজঘাটস্হ ধৰ্মপুৰ জ্ঞানদায়িনী নাট্যসমাজৰ শিশু দিৱসৰ অনুষ্ঠান এটিত আজি তেখেতে বক্তব্য আগবঢ়ায় । নাট্যসমাজৰ সভাপতি দীপক কুমাৰ শৰ্মাৰ সভাপতিত্বত অনুষ্ঠিত এই সভাত অংকিতা তালুকদাৰ নামৰ সপ্তম শ্ৰেণীৰ ছাত্ৰী এগৰাকীৰ দ্বাৰা ৰচিত ‘ পণ্ডিত প্ৰৱৰ ভৱদেৱ ভাগৱতী ‘ শীৰ্ষক পুস্তিকা এখন ড: ভাগৱতীয়ে উন্মোচন কৰে । সভাত পশ্চিম নলবাৰী প্ৰেছ ক্লাৱৰ সভাপতি গণেশ বৰ্মনেও শিশু সকলক সাহিত্য ৰচনাৰ ক্ষেত্ৰত উৎসাহ যোগায় । আজি শিশুদিৱসৰ লগত সংগতি ৰাখি অনুষ্ঠানটিৰ উদ্যোগত শিশুৰ মাজত চিত্ৰাংকন প্ৰতিযোগিতাৰো আয়োজন কৰা হৈছিল ।অনুষ্ঠানৰ আঁত ধৰে বিপুল বৰ্মনে ।# চামতাত শিশু দিৱস উদযাপন :- চামতাৰ পশ্চিম নলবাৰী প্ৰেছ ক্লাৱৰ মঞ্চ সূৰ্য ধৰনী বৰ্মন সোৱৰণী প্ৰেক্ষাগৃহত সৃষ্টি ডেন্স এণ্ড ড্ৰামা ফাউণ্ডেচনে আজি শিশুৰ মাজত চিত্ৰাংকণ , খেল ধেমালী প্ৰতিযোগিতাৰে শিশু দিৱস উদযাপন কৰে ৷ এই অনুষ্ঠানত পশ্চিম নলবাৰী প্ৰেছ ক্লাৱৰ কাৰ্যকৰী সভাপতি ৰাজেন বৈশ্য অতিথি হিচাবে উপস্হিত থাকি শিশু দিৱসৰ তাৎপৰ্য ব্যাখ্যা কৰি শিশু সকলক ভাল মানুহ হবলৈ উৎসাহিত কৰে

ওদালগুৰি, প্ৰতিবেদক: অসমৰ আদিবাসী জনগোষ্ঠীৰ অন্তভূক্ত মুণ্ডা, উৰাং, কল, ভিল, কয়া, চাওৰা, চৱৰ, কুৰ্মি, খাড়িয়া আাদি জনগোষ্ঠীসমূহক চাহ জনগোষ্ঠী ৰূপ দিব বিচৰা কাৰ্য্যক সদৌ অসম আদিবাসী ছাত্ৰ সন্থা ‘আছা’ৰ  সভাপতি ষ্টিফেন লাক্ৰা আৰু সাধাৰণ সম্পাদক দেবেন উৰাঙে তীব্ৰ বিৰোধিতা কৰিছে আৰু ই অতিকৈ দুৰ্ভাগ্যজনক বুলি অভিহিত কৰিছে ৷ সদৌ অসম আদিবাসী ছাত্ৰ সন্থা ‘আছা’ৰ  সভাপতি ষ্টিফেন লাক্ৰা আৰু সাধাৰণ সম্পাদক দেবেন উৰাঙে এটা প্ৰেছ বিজ্ঞপ্তিযোগে জানিবলৈ দিয়া অনুসৰি ৰেজিষ্টাৰ জেনেৰেল অৱ ইণ্ডিয়াত উৰাওঁ, মুণ্ডা, চাওঁতাল, খাড়ীয়া, ভূমিজ আদি বিভিন্ন জনগোষ্ঠী জনজাতি হিচাপে পৰিগণিত হৈ আহিছে । অসমত তেওঁলোক অনুসূচীত নহ’ব পাৰে কিন্তু জনগোষ্ঠীসকলক জনজাতি সজোৱাটো ভুল। যিহেতু অসমত এওঁলোক অবিচি তালিকাভুক্ত, তেনেক্ষেত্ৰত তেওঁলোকৰ চাৰ্টিফিকেটত উপৰিঞ্চি চাহ জনগোষ্ঠী বুলি সংযোজিত কৰিব বিচৰাটো দূৰ্ভাগ্যজনক। যিহেতু একে জনগোষ্ঠীয় সংগঠন হিচাপে আছা, আকছু, এছুক নিমন্ত্রণ নজনোৱাকৈ এনে কাৰ্য্যৰ জৰিয়তে বৃহৎ জনগোষ্ঠীটোক শাসকৰ স্বাৰ্থত বহুদ্ধা বিভক্ত কৰিব বিচৰা কাৰ্য্যক ‘আছা’ই কেতিয়াও সমৰ্থন কৰিব নোৱাৰে। অসমত আমাৰ লোকসকল ইতিমধ্যেই সৰ্বাধিক শোষিত, বঞ্চিত হৈ আহিছে। গতিকে  জাতিগত প্ৰমাণ পত্ৰৰ কথা উল্লেখিত হৈছে, তেনেক্ষেত্ৰত খৰখেদা কৰি আৰু এক ঐতিহাসিক ভুল কৰাতকৈ বিজ্ঞজনৰ মতামত লৈ ধীৰে সুস্থিৰে এক গ্ৰহণযোগ্য সহমতত উপনীত হোৱাটো উচিত হ’ব বুলি উনুকিয়াই নেতাদ্বয়ে কয় একেটা জনজাতি বা জনগোষ্ঠীৰ মাজত কেইবাটাও সুকীয়া সমাজ থাকিব পাৰে। তাৰ বাবে আমি ৰেজিষ্টাৰ জেনেৰেল অৱ ইণ্ডিয়াৰ নিচিনা সংস্থাৰ তথ্য পাতি লৈ আগবঢ়াটো উচিত। অন্যথা আছাকে ধৰি বিভিন্ন জনগোষ্ঠীয় সংগঠনে দীৰ্ঘ দিন ধৰি কৰি অহা অনুসূচীকৰণৰ দাবীক স্বজাতীয় সংগঠনেই মষিমুৰ কৰাহে হ’ব। যিহেতু গোটেই বিষয়বস্তুটো জাতিগত প্ৰমাণ পত্ৰৰ লগত জড়িত, তেনেক্ষেত্ৰত কেৱল কেইটামান নিজকে অসমভিত্তিক বুলি কোৱা অথচ কেৱল কেইখনমান জিলাত উপস্থিতি ৰখা সংগঠনে কিদৰে এই কাম কৰিব পাৰে। ১৯৭৫ চনৰ ২৭ নবেম্বৰ তাৰিখৰ অন্যান্য পিছপৰা শ্ৰেণীৰ TAD/BC/268/795/37 ৰ অধিসূচনাত উল্লেখিত ৯০ টা জাতি/জনজাতি (Caste) ৰ মাজত বহু জনগোষ্ঠী (Tribes) আছে, যাৰ জনগোষ্ঠীবিলাকে আজিও নিজ নিজ স্বকীয় পৰিচয় (ভাষিক, গতৰ (Totemic),  সাংস্কৃতিক) বজাই ৰাখিছে। তেনেক্ষেত্ৰত কি দৰে সকলোকে একে শ্ৰেণীত অন্তর্ভুক্ত কৰিব পাৰি। যিহেতু Cast certificate OBC ব’ৰ্ডৰ কাম তেনে ক্ষেত্ৰত আমি এই দায়িত্ব বেলেগ এটা সংগঠনক প্ৰদান কৰি কি স্বচ্ছতা আনিব পাৰিম সেইটোৱেও এটা চিন্তনীয় বিষয় ৷এনে জাতি-জনগোষ্ঠীৰ বহু লোক বাগিছাৰ বাহিৰত বসবাস কৰি আছে, অসমৰ ইমূৰৰ পৰা সিমূৰলৈ সিঁচৰিত হৈ আছে। গতিকে ৰুদ্ধদ্বাৰ বৈঠকত মাত্ৰ কেইজনমান ব্যক্তি বা সংগঠনে কৰা এনে কাৰ্য মুঠেই সমৰ্থন যোগ্য নহয়। ন্যস্ত স্বাৰ্থ জনিত এনে কুচক্ৰান্তৰ পৰা আতৰি আহি গঠনমূলক ভাবে সকলো স্বজাতীয় লোকৰ অধিকাৰ আৰু  উন্নয়নৰ বাবে সকলোকে একেলগে একে মঞ্চৰ পৰা কাম কৰিবলৈ সদৌ অসম আদিবাসী ছাত্র সন্থা আছাই আহ্বান জনাইছো। অন্যথাই আছাই তেওঁলোকৰ বিৰুদ্ধে গণতান্ত্রিক আন্দোলন গঢ়ি তোলাৰ লগতে আইনী প্রক্রিয়াৰ সহায় ল’বলৈ বাধ্য হ’ব বুলি আছাৰ কেন্দ্ৰীয় সমিতিয়ে সকিয়াই দিয়ে ৷