সদৌ অসম সোণোৱাল কছাৰী ছাত্ৰ সন্থা,টিৰাপ আঞ্চলিক সমিতিয়ে অতি দুখেৰে জনাব বিচাৰো যে ১৯৯৯ চনত অসম চৰকাৰে বান বিধস্ত আৰু ভূমিহীন প্ৰায় ৬০ টা পৰিয়ালক মাৰ্ঘেৰিটা ৰাজহ চক্ৰৰ অন্তৰ্গত টিৰাপ মৌজাৰ নামফাই এন, চি অঞ্চলত এবিঘাকৈ ভূমিত পুনৰ সংস্থাপন দি নামফাই অৰুনোদয় সোণোৱাল গাওঁ নামেৰে এখন গাওঁ স্থাপন কৰিছিল। সংস্থাপিত পৰিয়াল কেইটাই এবিঘা ভূমিত খেতি বাতি কৰি পোহপাল দিয়াটো অসম্ভৱ বুলি আপত্তি কৰাত সেই সময়ৰ মাৰ্ঘেৰিটা ৰাজহ চক্ৰ বিষয়াই কাষতে থকা অসম-অৰুণাচল সীমান্ত নামচিক আৰু মৰা খাৰচাং নৈয়ে সৃষ্টি কৰা এটা সৰু দ্বীপত (বৰ্তমান তাপু বুলি জনাজাত) প্ৰায় ৩০০ বিঘা ভূমিত খেতি বাতি কৰি জীৱিকা নিৰ্বাহ কৰিবলৈ মৌখিক ভাৱে অনুমোদন জনায়। উক্ত ভূমিত বনৰীয়া হাতীৰ উপদ্ৰৱ, বানপানী সমস্যা আৰু সময়ে সময়ে অৰুণাচল প্ৰদেশ চৰকাৰে নং তাপু নামেৰে উক্ত দ্বীপটো নিজৰ বুলি দাবী জনাই খেতিয়ক ৰাইজক মাটি এৰি দিবলৈ জাননী জাৰি কৰি আহিছে। তাৰ মাজতো আমাৰ খেতিয়ক ৰাইজে দ্বীপটোত খেতি বাতি কৰি পৰিয়ালৰ সৈতে সকলো বাধা বিঘিনি নেউচি জীৱন নিৰ্বাহ কৰি আহিছে। কিন্তু দুৰ্ভাগ্যজনক ভাৱে সেই একে স্থানতে চৰকাৰ আৰু জিলা প্ৰশাসনে লাইকা-দধিয়া বাসীক পুনঃসংস্থাপন দিবলৈ ব্যৱস্থা গ্ৰহণ কৰিছে। যদি চৰকাৰ তথা জিলা প্ৰশাসনে সেই স্থানত অৰ্থাৎ তাপু নামৰ দ্বীপটোত লাইকা বাসীক বলপূৰ্বক ভাৱে সংস্থাপন দিয়ে তেন্তে সেই স্থানত খেতি বাতি কৰি জীৱন নিৰ্বাহ কৰি থকা আমাৰ সোণোৱাল কছাৰী পৰিয়াল কেইটাই কৃষি ভূমিৰ অভাৱত পৰিব আৰু জীৱিকাৰ পথ বিচাৰি চৰকাৰৰ ওচৰত প্ৰতিবাদ সাব্যস্ত কৰিবলৈ বাধ্য হব।গতিকে যোৱা ২১ ফেব্ৰুৱাৰী ২০২১ তাৰিখে তিনিচুকীয়া জিলা উপায়ুক্ত কাৰ্য্যালয়ৰ আৱৰ্ত্ত ভৱনৰ সভাকক্ষত সেই সময়ৰ জিলা উপায়ুক্ত শ্ৰীযুত দিগন্ত শইকীয়া, ডিগবৈ বন সংমণ্ডল বিষয়া টি, চি, ৰঞ্জিত ৰাম আৰু অতিৰিক্ত আৰক্ষী অধীক্ষক ৰিপুঞ্জয় কাকতিৰ উপস্থিতিত গাঁৱৰ ৰাইজ আৰু আমাৰ উপস্থিতিত যি সীমা নিৰ্ধাৰণ কৰিছিল, দ্বীপটোৰ উক্ত সীমাৰ বাহিৰত লাইকা বাসীক পুনৰ সংস্থাপন দিয়ক নতুবা দ্বীপটোত পুনৰ সংস্থাপন নিদি অন্য স্থানত সংস্থাপিত কৰি নামফাই অৰুনোদয় সোণোৱাল গাঁৱৰ ৰাইজক পূৰ্বৰ দৰে খেতি বাতি কৰি জীৱন নিৰ্বাহ কৰি যাবলৈ সুবিধা প্ৰদান কৰাৰ লগতে উক্ত দ্বীপটোত খেতিয়ক ৰাইজক মাটিৰ পট্টা প্ৰদান কৰি ৰাজহ গাওঁ হিচাপে স্বীকৃতি দিবলৈ দাবী জনালো। ইয়াৰোপৰি উক্ত দ্বীপটোক অৰুণাচল প্ৰদেশ চৰকাৰে নিজৰ বুলি দাবী কৰি অহাৰ পৰিপ্ৰেক্ষিতত অতি সোনকালে অসম চৰকাৰে অৰুণাচল প্ৰদেশ চৰকাৰৰ লগত আলোচনা কৰি আন্তঃৰাজ্যিক সীমা নিৰ্ধাৰণ কৰি দ্বীপটো সুৰক্ষিত কৰাৰ বাবে দাবী জনালো। লগতে পূৰ্বৰে পৰা টিৰাপ মৌজাৰ বনগাঁও সমূহত বসবাস কৰি অহা সোণোৱাল কছাৰী গাওঁ সমূহক ৰাজহ গাওঁ হিচাপে স্বীকৃতি দি মাটিৰ পট্টা প্ৰদান কৰিবলৈ দাবী জনালো।উক্ত সংবাদ মেলৰ যোগেদি টিৰাপ মৌজাত চলি থকা অবৈধ বন ধ্বংস বন্ধ কৰাৰো দাবী জনাইছে সংগঠনটোৱে।

পৰ্যটকৰ বাবে সু-খবৰ। অহা নৱেম্বৰ মাহৰ শেষৰ ফালে পৰ্যটকৰ বাবে মুকলি হব জামুগুৰিহাটৰ পানপুৰ বনাঞ্চল। ব্ৰহ্মপুত্ৰৰ উত্তৰ পাৰৰ কাজিৰঙা ৰাষ্ট্ৰীয় উদ্যানৰ ষষ্ঠ সংযোজনৰ অন্তৰ্গত পানপুৰ বনাঞ্চল পৰ্যটকৰ বাবে মুকলি হোৱাৰ পাছতেই বনাঞ্চলখনত থকা হাতী,গড়,বনৰীয়া গাহৰি,বিভিন্ন প্ৰকাৰৰ হৰিণাৰ লগতে শীতৰ আগমনৰ লগে লগে সাত সাগৰ তেৰ নদীৰ সিপাৰৰ পৰা উৰি আহি আশ্ৰয় লোৱা পৰিভ্ৰমী চৰাই জলকেলি উপভোগ কৰাৰ সুযোগ লাভ কৰিব পৰ্যটকে। পানপুৰ বনাঞ্চলত বাঘৰ সংখ্যা বৃদ্ধি হোৱাটো পৰ্যটকসকলৰ বাবে অতিকৈ সু-খৱৰ হিচাপে বিবেচিত হৈছে। উল্লেখ্য যে বিগত বৰ্ষৰ নবেম্বৰত কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰে বিধায়ক পদ্ম হাজৰিকাৰ উপস্থিতিত পানপুৰ বঞ্চাল পৰ্যটকৰ বাবে মুকলি কৰি দিছিল।

দক্ষিণ কামৰূপৰ দখলা ক’লনীত মহাবাহু ব্ৰহ্মপুত্ৰৰ পাৰত ২৯ অক্টোবৰৰ বিয়লি প্ৰায় ছয় কিলো ওজনৰ এটা দুষ্প্ৰাপ্য প্ৰজাতিৰ কাছ উদ্ধাৰ হয়। স্থানীয় লোকে কাছটো উদ্ধাৰ কৰি লোহাৰঘাট বনাঞ্চলিক কাৰ্যালয়ত খবৰ দিয়ে। পিছত বনাঞ্চলিক বিষয়া চেমিম আখতাৰে তৎপৰতাত নিশাই বনকৰ্মীৰ জৰিয়তে কাছটো উদ্ধাৰ কৰি সংৰক্ষণৰ বাবে লৈ গৈ কুলশী নৈৰ পিতনিত এৰি দিয়ে। কিন্তু অতি পৰিতাপৰ বিষয় এয়ে যে যি সময়ত কাছ এতিয়া দুৰ্লভ হৈ পৰিছে সেই সময়তেই উক্ত দখলা ক’লনী অঞ্চলটোত ফুৰিবলৈ যোৱা বিভিন্ন লোকে প্ৰতি দিনেই, বিশেষকৈ নিশাৰ ভাগত নৈৰ পাৰলৈ উঠি অহা অৱস্থাত একাধিক কাছ মনে মনে ধৰি লৈ গৈ আছে বুলি একাংশ সচেতন লোকে মন্তব্য কৰিছে। কি কাৰণত উক্ত অঞ্চলটোত কাছ এই সময়ছোৱাত পাৰলৈ উঠি আহে সেয়াহে চিন্তনীয় বিষয়। বন বিভাগ আৰু স্থানীয় লোক সজাগ হলেহে উক্ত অঞ্চলটোত পাৰলৈ উঠি অহা কাছ সংৰক্ষণ হ’ব। অন্যথা দুষ্ট লোকে খাদ্য হিচাপে ভক্ষণ কৰিব। ইয়াৰ পূৰ্বে কেইজনমান লোকে উক্ত স্থানত দুষ্পাপ্য প্ৰজাতিৰ কাছ পোৱা বুলি জানিবপৰা গৈছে।