যিটো সময়ত কৰোনা মহামাৰীয়ে বিশ্বব্যাপী ত্ৰাসৰ সৃষ্টি কৰি আহিছে, সেই সময়তেই চিৰাঙৰ বাসুগাঁওস্থিত “হেল্পিং হেন্ডছ ৱেলফেয়াৰ ছোসাইটি ” নামৰ স্বেচ্ছাসেৱী সংস্থাটোৱে অবিৰত ভাৱে বিভিন্ন কৰ্মৰ যোগেদি কভিড যোদ্ধা ৰূপে সেৱা আগবঢ়াইআহিছে । উল্লেখযোগ্য যে যোৱা বছৰ কভিড সংক্ৰমণ আৰম্ভ হোৱাৰ পৰাই একাধিক স্থানত সজাগতা সভা অনুষ্ঠিত কৰাৰ লগতে বিনামুলীয়া মাস্ক, সেনিটাইজাৰ বিতৰণ আদি কাৰ্যই সকলোকে আকৰ্ষণ কৰিছে । ইয়াৰ উপৰিও কভিডৰ দ্বিতীয় সংক্ৰমণৰ সময়ত বাসুগাঁও পৌৰসভাৰ উদ্যোগত সংগঠিত কভিড কেয়াৰ কমিটি খনত সংস্থাটোৰ প্ৰতি গৰাকী সদস্যই অন্তৰ্ভুক্তিকৰণৰ যোগেদি বাসুগাওঁৰ ১৮ৰ পৰা ৪৪ আৰু ৪৫ৰ উৰ্দ্ধৰ ভেকসিনেচন প্ৰক্ৰিয়াটো অতি সুকলমে চলাই লোৱাত আগভাগ লোৱাৰ উপৰিও জনগণৰ মাজত সজাগতা কৰি অহা পৰিলক্ষিত হৈছে।সাম্প্ৰতিক পৰিস্থিতিৰ ওপৰত লক্ষ্য ৰাখি ভাৰতীয় ষ্টেট বেংকৰ বাসুগাঁও শাখাৰ সহযোগত অক্সিজেন সেৱা আৰম্ভ কৰি অক্সিজেন চিলিন্ডাৰ সমূহ ৰোগীৰ বাবে অবিৰতভাৱে বিনামূলীয়াকৈ আগবঢ়াই আহিছে সংস্থাটোৱে।

অকল ইয়াতেই সীমিত নাথাকি কিছুদিন পূৰ্বে চৰকাৰী ভাৱে প্ৰকাশিত নিৰ্দেশনা মতে চিৰাং জিলাৰ অতিৰিক্ত উপায়ুক্ত আৰু চক্ৰ বিষয়াৰ অনুমতি আৰু সহযোগ মৰ্মে চিৰাং জিলাৰ চিদলী চক্ৰৰ অন্তৰ্গত সমূহ কণ্টেইনমেন্ট জোন লৈ নিৰ্ধাৰিত অত্যাৱশ্যকীয় খাদ্য সামগ্ৰী সমূহ অতি নিয়াৰিকৈ যোগান ধৰা কাৰ্যই সংস্থাটোক ৰাইজৰ দৃষ্টিত শলাগৰ পাত্ৰ হিচাপে পৰিগণিত কৰিছে ।বিগত দুটা বছৰত সমাজৰ বিভিন্ন সহায়মূলক কাৰ্যসূচী,যেনে চৰকাৰী কভিড বিধি অনুযায়ী দূৰ্গা পূজাৰ বিসৰ্জন,স্বচ্ছভাৰত অভিযান, হাইস্কুল শিক্ষান্ত পৰীক্ষাত অৱতীৰ্ণ হবলগীয়া দৰিদ্ৰ শিক্ষাৰ্থীসকলক বিনামূলীয়াকৈ প্ৰয়োজনীয় কিতাপ যোগান ধৰা, দৰিদ্ৰ আৰ্তজনলৈ অন্য-বস্ত্ৰ প্ৰদান, বাসুগাওঁ মেধি পাৰাক আদৰ্শ পথ হিচাপে গঢ়ি তোলা আদি কাৰ্যৰ যোগেদি সংস্থাটোয়ে যে এক অনন্য আদৰ্শৰ পথ বুটলি চিৰাং জিলা প্ৰশাসনৰ ফালৰ পৰা যোৱা ২৬ জানুৱাৰী, গণৰাজ্য দিৱসত জিলাখনৰ শ্ৰেষ্ঠ সেচ্ছাসেৱী সংস্থা হিচাপে স্বীকৃতি লাভ কৰিব সক্ষম হৈছে ।

শিল্পীৰ জীৱন তেনেই সাধাৰণ । অসমত বৰ্তমানেও কেৱল  শিল্পৰ চৰ্চা কৰি এক স্বচ্ছল জীৱন যাপন কৰাৰ পৰিবেশ গঢ়ি উঠা নাই  । তেনে সময়তে কৰ’নাৰ আগমণ শিল্পী সমাজৰ  বাবে ভূতৰ ওপৰত দানহ পৰাৰ দৰে এক অনাকাংক্ষিত ঘটনা ।যিহেতু  বিভিন্ন সময়ত অসমত শিল্পী জীৱনৰ চৰম সত্যৰ ছবিখন  সংবাদৰ শিৰোনামা হৈ আহিছে। জীৱনক মেৰিয়াই ৰখা এই সাংস্কৃতিক চৰ্চাৰ প্ৰতি থকা অগাধ ভালপোৱা বা সমাজৰ প্ৰতি থকা দায়িত্ববোধৰ বাবেই এইসকল শিল্পীয়ে জীৱন উৰ্চগা কৰে বিভিন্ন সাংস্কৃতিক কৰ্মৰ যোগেদি  ।  কৰ’না কালৰ  এই বিপদৰ সময়ত কি কৰিছে এই  শিল্পী ,কলা-কুশলীসৱে ? পেটে -ভাতে দুবেলা -দুমুঠি খাই শিল্প চৰ্চাৰে  সমাজ সুন্দৰ কৰাৰ সপোন দেখা তথা শিল্প চৰ্চাৰে জীৱনৰ বাট বিচাৰি লোৱা শিল্পী সমাজলৈ আহিছে অতিকৈ  আৰ্থিক সংকট । দিন-হাজিৰা কৰিবলৈও কুন্ঠাবোধ কৰা নাই এইসকল সাংস্কৃতিক কৰ্মীয়ে।  কৰ’নাৰ প্ৰথমটো ঢৌতেই বিধ্বস্ত অতিকৈ স্বাভিমানী কিছু শিল্পীয়ে  চৰকৰী ঘৰৰ পৰাও আজিপৰ্যন্ত লাভ কৰা নাই কোনো আৰ্থিক সহায়। চৰম আৰ্থিক সমস্যাৰে জৰ্জৰিত অসমৰ লগতে  গোলাঘাটৰ বহু সাংস্কৃতিক কৰ্মী ।  তেনে এজন সাংস্কৃতিক কৰ্মী, সত্ৰীয়া সংস্কৃতিৰ সাধক জিতেন কাকতি।  আৰ্থিক সংকটৰে যুজঁ দি অৱশেষত নিজকে এজন ব্যৱসায়ীৰ ৰূপত প্ৰতিষ্ঠা কৰি সংসাৰৰ বোজা বহন কৰিছে এইজন সত্ৰীয়া সংস্কৃতিৰ সাধকে।শিল্পচৰ্চা বাদ দি এতিয়া  গোলাঘাটৰ জোনাকী নগৰৰ পদপথত আৰম্ভ কৰিছে এখনি শাক-পাচলিৰ দোকান। কিছু দিন পূৰ্বে শিল্পীজনৰ এই জীৱন যাত্ৰাক প্ৰত্যক্ষ কৰে গোলাঘাটৰ সাংবাদিক  সমাজে। আৰু লগে লগে  বহুকেইটা বাতৰিও পৰিবেশন হ’য় শিল্পী জনৰ ওপৰত। তেনে বাতৰিৰ প্ৰভাৱত আজি কিছু আৰ্থিক সহায়েৰে সকাহ দিয়াৰ উদ্দেশ্যে আগবাঢ়ি আহিল এটা বে-চৰকাৰী স্বেচ্ছাসেৱী সংস্থা। “সাৰথি” এই স্বেচ্ছাসেৱী সংস্থা টোৱে ইতিমধ্যে মানৱ সমাজলৈ অহা চৰম সংকটৰ সময়ত অসহায় জনক এখনি সহায়ৰ হাত আগবঢ়াই আহিছে। যেনেদৰে আজি শিল্পী জিতেন কাকতিৰ ওচৰত থিয় হৈ সত্ৰীয়া নৃত্যৰ বিশাৰদ জনলৈ আগবঢ়াই বিশ হাজাৰ টকা।যিহেতু  গোলাঘাটৰ বিভিন্ন অঞ্চলত সত্ৰীয়া নৃত্যৰ প্ৰশিক্ষণ দিয়া কাকতি আজি পদপথৰ ব্যৱসায়ী । লকডাউন, কাৰ্ফিউ আদিৰ দৰে নিষেধাজ্ঞাই একেবাৰে অচল কৰি পেলোৱা বহু শিল্পীৰ মাজৰ  এজন।অৱশেষত পৰিস্থিতিয়ে   শিক্ষকতাৰ দৰে পৱিত্ৰ বৃত্তি ত্যাগ কৰিবলৈ বাধ্য কৰালে  জীতেন কাকতিক । দিশহাৰা হৈ পৰা কাকতিক  বেচৰকাৰী স্বেচ্ছাসেৱী সংগঠন “সাৰথি”য়ে আজি  বিশ হাজাৰ টকাৰ এক সাহাৰ্য্য  প্ৰদান কৰি যি মহৎ কাম কৰিলে , সেইয়া নিশ্চয়কৈ প্ৰশংসনীয় ।  সাৰথিৰ এই পদক্ষেক শলাগ লৈছে সচেতন মহলে।

নলবাৰী জিলাৰ সদৰ উপ আৰক্ষী অধীক্ষক জিকিৰাণী মহন্তৰ নেতৃত্বত মুকালমুৱা আৰক্ষীয়ে কালি সন্ধিয়া মুকালমুৱাত অভিযান চলাই দুই ড্ৰাগছ সৰবৰাহকাৰীক আটক কৰি নিষিদ্ধ ড্ৰাগছ জব্দ কৰিবলৈ সক্ষম হয় ৷ এক নিৰ্ভৰযোগ্য সূত্ৰৰ খবৰৰ ভিত্তিত নলবাৰী-কামৰূপ জিলাৰ সীমান্তৰ মুকালমুৱাৰ কুৰিহাত মুকালমুৱা আৰক্ষীয়ে নিয়মীয়া তালাচী চলাই থকাৰ পৰাই ড্ৰাগছ সৰবৰাহকাৰী ইছলামউদ্দিন আলী ওৰফে ছাদ্দামক আটক কৰে ৷ ধৃত সৰবৰাহকাৰীটোক আৰক্ষীয়ে আটক কৰি মাৰাথান জেৰা চলোৱাৰ অন্তত ইছলামউদ্দিনে গোপনে মজুত কৰি ৰখা হিৰোইনৰ সন্ধানত লোহাৰকাঠাত অভিযান চলাই এগৰাকী মহিলাক আটক কৰি তেওঁৰ পৰা ১৬ টা হিৰোইন ভৰ্তি টেমা উদ্ধাৰ কৰে ৷ ধৃত সৰবৰাহকাৰীটোৰ স্বীকাৰোক্তিত লোহাৰকাঠা গাঁৱৰ ৰবিজান বিবি নামৰ মহিলা গৰাকীৰ বাসগৃহত আৰক্ষীয়ে অভিযান চলাই বিক্ৰীৰ বাবে মজুত কৰি ৰখা হিৰোইনখিনি জব্দ কৰি মহিলা গৰাকীকো আটক কৰে ৷ উল্লেখ্য যে ধৃত ইছলামউদ্দিন আলী ওৰফে ছাদ্দামে মহিলা গৰাকীৰ সহযোগত দীৰ্ঘদিন ধৰি ড্ৰাগছৰ ব্যৱসায় চলাই অহাৰ অভিযোগ স্থানীয় ৰাইজৰ ৷ মহিলা গৰাকীৰ বাসগৃহত নিষিদ্ধ ড্ৰাগছ মজুত কৰি মহিলা গৰাকীৰ সহযোগত ধৃত ইছলামউদ্দিনে ব্যৱসায় চলাই অহাৰ খবৰ লাভ কৰিছিল সদৰ ডিএছপি জিকিৰাণী মহন্তই ৷ ধৃত দুই সৰবৰাহকাৰীৰ বিৰুদ্ধে মুকালমুৱা থানাত গোচৰ ৰুজু কৰি দুয়োকে আজি নলবাৰী আদালতত হাজিৰ কৰোৱাত মহামান্য আদালতে দুয়োকে জে’ল হাজোতলৈ প্ৰেৰণ কৰিছে ৷ আৰক্ষী সূত্ৰৰ পৰা জানিব পৰামতে মুকালমুৱাৰ শনিৰোডৰ নিৱাসী ধৃত ইছলামউদ্দিন ওৰফে ছাদ্দাম অঞ্চলটোত ড্ৰাগছ সৰবৰাহৰ মূল অভিযুক্ত ৷ লোহাৰকাঠাৰ দৰিদ্ৰ মহিলা গৰাকীক ড্ৰাগছ সৰবৰাহকাৰী ইছলামউদ্দিনে ধনৰ প্ৰলোভন দেখুৱাই মহিলাৰ গৰাকীৰ বাসগৃহত ড্ৰাগছ মজুত কৰি ড্ৰাগছৰ ব্যৱসায় চলাই আহিছিল বুলি জানিব পৰা গৈছে  ৷