৫৬ নং কমলপুৰ সমষ্টিৰ বিহদিয়াত আজি একপ্ৰকাৰ বিধায়ক সত্যব্ৰত কলিতাৰ হৈ নিৰ্বাচনী ৰণশিঙা বজাই অসম গণ পৰিষদৰ সভাপতি অতুল বৰাই ঘোষণা কৰিলে অসমত ভাৰতীয় জনতা পাৰ্টিৰ নেতৃত্বত পুনৰ মিত্ৰজোটৰ চৰকাৰ গঠন হব। অহা এপ্ৰিল মাহত হ’বলগীয়া বিধান সভা নিৰ্বাচনতো মিত্ৰজোটৰ অংশীদাৰ হিচাপে চৰকাৰ গঠনত সহযোগী হিচাপে থাকিব অসম গণ পৰিষদ। কমলপুৰ বিধান পৰিষদৰ উদ্যোগত বিহদিয়া হাইস্কুল খেল পথাৰত অনুষ্ঠিত কৰা অসম গণ পৰিষদৰ জাতীয় ঐক্য সমাৰোহত এই মন্তব্য কৰে দলৰ সভাপতি অসম চৰকাৰৰ কৃষি মন্ত্ৰী অতুল বৰাই।কমলপুৰ বিধান সভা সমষ্টিৰ বিভিন্ন প্ৰান্তৰ পৰা অহা ১০ সহস্ৰাধিক দলীয় কৰ্মীক সম্বোধি সভাপতি অতুল বৰাই কয়,বহুতে আমাক বিজেপিৰ ওচৰত বিক্ৰী যোৱা বুলি সমালোচনা কৰে।হয় যোৱা ২০১৬ৰ নিৰ্বাচনত অসম গণ পৰিষদে ভাৰতীয় জনতা পাৰ্টিৰ সৈতে নিৰ্বাচনী বুজাবুজি অৰ্থাৎ মিত্ৰতা কৰিবলৈ বাধ্য হৈছিলো।কিন্তু মিত্ৰতা মানে আত্ম সমৰ্পন কৰা নুবুজাই।বাস্তৱক স্বীকাৰ কৰি আমি বিজেপিৰ লগত মিত্ৰতা কৰিছো।কাৰণ  মিত্ৰতা নকৰিলে কংগ্ৰেছ আৰু সাম্প্ৰদায়িক শক্তি সমূহে মূৰ দাঙি উঠিব অসমত।সেই কাম আমি কেতিয়াও হবলৈ নিদিওঁ।ভাৰতীয় জনতা পাৰ্টিৰ লগত মিত্ৰতা থাকিলেও আমাৰ ধৰ্ম নিৰপেক্ষ চৰিত্ৰ অটুত থাকিব। মিত্ৰতাত থাকি ৰাজ্যৰ প্ৰতিটো জাতি জনগোষ্ঠীৰ সমমৰ্য্যদা, সম বিকাশ আৰু সম অধিকাৰৰ কাৰণে জোৰ দি যাব অসম গণ পৰিষদে। সেই বাবে আমি চৰকাৰত থাকি ৰাইজৰ কাম কৰি যাম।বৰ্তমানৰ মিত্ৰজোটৰ চৰকাৰ খনক এখন গুড গভৰমেণ্ট আখ্যা দি সভাপতি অতুল বৰাই কব খোজে এই চৰকাৰৰ দিনত গ্ৰাম্য অৰ্থনীতিৰ বুনিয়াদ শক্তিশালী হৈছে ।চৰকাৰৰ সকলো বিভাগতে দুৰ্নীতি মুক্ত পৰিবেশ গঢ়ি উঠিছে ।উন্নয়ন মূলক আচনি সমূহৰ কথা আজি ৰাইজৰ মুখে মুখে প্ৰচলিত হৈছে ।কমলপুৰ সমষ্টিত ৩৫০ কিলোমিটাৰ পথ পকীকৰণ হৈছে মিত্ৰজোটৰ চৰকাৰৰ দিনত ।সত্যব্ৰত কলিতা বিধায়ক হোৱা বাবে সম্ভৱ হৈছে এই কাম ।একাংশ জাতীয়তাবাদী ৰাজনৈতিক নেতা আৰু সাম্প্ৰদায়িক শক্তি সমূহক সকিয়ানি দি কৃষি মন্ত্ৰী অতুল বৰাই কয় যোৱা কেইটামান দিনত আমি য’তে সভা সমিতি কৰিবলৈ গৈছে তাতে দলৰ কৰ্মী সকলক অধিক উদ্যম দেখিছোঁ ।অসম গণ পৰিষদে আগন্তুক দিনত প্ৰগতিশীল মহামন্ত্ৰৰে ৰাইজৰ কাষলৈ ধাৱমান হৈছে ।এই অনিৰুদ্ধ যাত্ৰাক কোনেও ভেটা দিব নোৱাৰে ।যোৱা সময়ত আমি ভুল নকৰা নহয় ।সেই কাৰণে আমি আত্মশুদ্ধি কৰিছোঁ ।আমাৰ দলত নতুন তেজৰ আবিৰ্ভাৱ ঘটিছে ।ছয় বছৰীয়া গণ আন্দোলনৰ ফলত জন্ম গ্ৰহণ কৰা অসম গণ পৰিষদৰে আগন্তুক দিনত নতুন অৰ্থনৈতিক পৰিকল্পনা, নতুন চিন্তাধাৰা আৰু মহাপুৰুষ শ্ৰীমন্ত শংকৰদেৱৰ আদৰ্শৰে আগবাঢ়ি যোৱাৰ সংকল্প গ্ৰহণ কৰিছে ।কমলপুৰ সমষ্টিৰ বিধায়ক সত্যব্ৰত কলিতাই আদৰণি ভাষনেৰে আৰম্ভ কৰা জাতীয় ঐক্য সমাৰোহত আজি দলৰ জ্যেষ্ঠ নেতা বঙাইগাঁও সমষ্টিৰ বিধায়ক যোগান মন্ত্ৰী ফণীভূষন চৌধুৰীক দলৰ তৰফৰ পৰা বিশেষ ভাৱে সম্বৰ্দ্ধনা জনোৱা হয় ।একেৰাহে ৩৫ বছৰ বিধায়ক হৈ অসম গণ পৰিষদ দলৰ সেৱা আগবঢ়াই যোৱা মন্ত্ৰী ফণীভূষন চৌধুৰীয়ে দলৰ এনে কৃতজ্ঞতাৰ কাৰণে ধন্যবাদ জ্ঞাপন কৰি দলীয় কৰ্মী সকলক সম্বোধি কয় অভিনন্দনৰ বাবে মই যোগ্য নহয় ।এই অভিনন্দন বঙাইগাঁও বাসীৰ।জাতীয় ঐক্য সমাৰোহৰ প্ৰসংগত মন্ত্ৰী ফণীভূষন চৌধুৰীয়ে কয় যে ২০১১চনত বিজেপিৰ দখলত আছিল কমলপুৰ ।কিন্তু তাৰ আগৰ পৰা কমলপুৰত অগপৰ ভেটি শক্তিশালী।যাৰ বাবে যোৱা নিৰ্বাচনত বিজেপিয়ে কমলপুৰ সমষ্টি অগপক এৰি দিবলৈ বাধ্য হয় ।২০২১ৰ নিৰ্বাচনতো সত্যব্ৰত কলিতা মিত্ৰজোট হিচাপে অগপৰ প্ৰাৰ্থী হব কমলপুৰত।আজিৰ পৰা সেই শংকা নাই বুলি ঘোষণা কৰে দলৰ জ্যেষ্ঠ নেতা ফণীভূষন চৌধুৰীয়ে।জাতীয় সমাৰোহত উপস্থিত থকা দলৰ আন এজন জ্যেষ্ঠ নেতা জলসম্পদ মন্ত্ৰী কেশৱ মহন্তই কয় অগপ দলে ৰাইজৰ বিশ্বাস আৰু আস্থা পাবলৈ সক্ষম হৈছে ।কংগ্ৰেছ আৰু এ আই ইউ ডি এফক প্ৰতিহত কৰাৰ স্বাৰ্থত বিজেপিৰ সৈতে মিত্ৰতা কৰা হৈছে ।বিশেষকৈ আমাৰ মূল শত্ৰু কংগ্ৰেছ ।কংগ্ৰেছ আৰু সাম্প্ৰদায়িক এ আই ইউ ডি এফ ক্ষমতাত আহিলে অসমীয়া সংখ্যালঘুত পৰিণত হব।আনকি অগপৰ নেতা সকলক ক’লা পতাকা দেখুৱা সকলকো সতৰ্ক কৰি দিয়ে দলৰ কাৰ্যকৰী সভাপতি কেশৱ মহন্তই ।প্ৰায় দেৰ ঘন্টা পলমকৈ দিনৰ ১২,৩০বজাৰ পৰা আৰম্ভ হোৱা কমলপুৰ বিধান পৰিষদৰ জাতীয় ঐক্য সমাৰোহত ৰাজ্য সভাৰ সাংসদ বীৰেন্দ্ৰ প্ৰসাদ বৈশ্য, পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতা, সাধাৰণ সম্পাদক ভূপেন ৰয়,মনোজ শইকীয়াৰ লগতে মহিলা কোষৰ নেত্ৰী তথা বিশিষ্ট কন্ঠশিল্পী কল্পনা পাটোৱাৰীয়ে দলীয় কৰ্মী সকলক অভিনন্দন জনাই দুটি গীত পৰিবেশন কৰি মনোৰঞ্জন দিয়ে।

নগাঁৱত পুণৰ পাঁচ শতাধিক সংখ্যালঘু লোকৰ বিজেপিত যোগদাননগাঁৱত কেইবাটাও উন্নয়ন মূলক আঁচনিৰ শুভাৰম্ভ

বিগত কিছুদিন ধৰি নগাঁও সদৰ সমষ্টিত কংগ্ৰেছকে ধৰি আন দলৰ পৰা বিজেপিত যোগদান পৰ্ব অব্যাহত আছে। বিশেষকৈ বিগত সময়চোৱাত বিধায়ক ৰূপক শৰ্মাই সমষ্টিটোৰ সৰ্বস্তৰৰ লোকৰ সামগ্ৰিক উন্নয়নত আকৃষ্ট হৈ এইদৰে প্ৰতিদিন বিজেপিত যোগদান কৰা লোকৰ সংখ্যা বৃদ্ধি পাবলৈ ধৰিছে। কালিও সমষ্টিটোৰ সংখ্যালঘু অধ্যুষিত হেৰাপট্টি অঞ্চলত সহস্ৰাধিক সংখ্যালঘু লোকে বিজেপিত যোগদান কৰাৰ পিছত আজিও নগাঁও চহৰৰৰ বৰবজাৰ নিম্ন বুনিয়াদী স্কুল প্ৰাংগণত অনুষ্ঠিত এক ৰাজহুৱা সভাত বিধায়ক শৰ্মাৰ উপস্থিতিত পাঁচ শতাধিক কংগ্ৰেছ কৰ্মীয়ে আনুষ্ঠানিক ভাৱে বিজেপি দলত যোগদান কৰে। এই উপলক্ষে বিজেপি নেতা অনুপম বৰকাকতিৰ সভাপতিত্বত অনুষ্ঠিত সভাত বিধায়ক শৰ্মাই কয়, “নগাঁও সদৰ সমষ্টিত বিগত চাৰিটা বছৰে যিমান উন্নয়ন হৈছে, ভাৰত স্বাধীনৰ ৭৫ বছৰ পিছতো এনেধৰণৰ উন্নয়ন হোৱা নাই।” সমষ্টি উন্নয়নৰ এক দীঘলীয়া ক্ষতিয়ান দাঙি ধৰি শৰ্মাই আৰু কয়, নগাঁও সদৰ সমষ্টিৰ বিভিন্ন স্থানত সাতশৰো অধিক ৰাস্তা নিৰ্মাণ হৈছে। সবকা সাত সবকা বিকাশ আৰু বিশ্বাস নীতিৰে বিজেপি নেতৃত্বাধীন চৰকাৰখনে সকলো শ্ৰেণীৰ লোকৰ কাৰণে কাম কৰিছে। সমষ্টি উন্নয়নৰ ক্ষেত্ৰত হিন্দু-মুছলমানৰ কথা চিন্তা কৰা নাই। সম উন্নয়নতহে গুৰুত্ব প্ৰদান কৰা হৈছে। কংগ্ৰেছৰ ১৫ বছৰীয়া শাসন কালত সদৰ সমষ্টিৰ উন্নয়ন কেৱল আধাৰশিলাতহে সীমাবদ্ধ আছিল। কিন্তু এতিয়া আধাৰশিলা নহয়, কামৰ শুভ উদ্ধোধনহে হৈ আছে।” ভাষণ প্ৰসংগত বিধায়ক গৰাকীয়ে এখন সপোনৰ নগাঁও গঢ়াৰ কথা উল্লেখ কৰি কয়, “মৰিকলংখন পৰ্যটনৰ আকৰ্ষণৰ কেন্দ্ৰ বিন্দু হিচাপে গঢ়া, কলং নৈ পুণৰ বোৱাই নিয়া, পানীগাঁও অঞ্চলত মাধৱদেৱ কলাক্ষেত্ৰ নিৰ্মাণ কৰাকে ধৰি কেবাটাও গুৰুত্বপূৰ্ণ আঁচনি ইতিমধ্যে গ্ৰহণ কৰা হৈছে।” উক্ত সভাত বিজেপিৰ জিলা মহিলা মৰ্চাৰ সভানেত্ৰী ৰশ্মি শৰ্মা, ধিঙৰ প্ৰাক্তন বিধায়ক মজিবুৰ ৰহমান, জিলা সংখ্যালঘু মৰ্চাৰ সম্পাদক আনোৱাৰ পাৰভেজ, সদৰ সমষ্টিৰ নিৰ্বাচনী প্ৰভাৰী দিপাংক শৰ্মা বৰুৱাকে ধৰি বহু কেইগৰাকী নেতা উপস্থিত থাকে। ইয়াৰ পুৰ্বে বিধায়ক ৰূপক শৰ্মাই আজি পুৱাৰ ভাগত নগাঁও পৌৰ সভাৰ অন্তৰ্গত চাৰিটাকৈ উন্নয়ন মূলক আঁচনিৰ কামৰ শুভাৰম্ভ কৰে। পৌৰসভাৰ অধীনত নগাঁও চহৰৰ পাইকাৰী শাক-পাচলি বজাৰখনিৰ আজি আন্তঃগাঠনি উন্নয়ন কামৰ শুভাৰম্ভ কৰা হয়। ইয়াৰোপৰি চহৰখনৰ মাৰাৰ পাৰ্কৰ সমীপত নিৰ্মিত পৌৰসভাৰ সামূহিক ভৱনটিৰো আন্তঃগাঠনি উন্নয়ন কামৰ শুভাৰম্ভ কৰা হয়।লগতে ৰাজ্যৰ স্ব-শিতানৰ অগ্ৰাধিকাৰ দাবী অনুমোদিত আঁচনি(SOPD)ৰ অধীনত নগাঁও চহৰৰ দুটাকৈ গুৰুত্বপূৰ্ণ পথৰো শুভ উদ্ধোধন কৰা হয়। আজি শুভাৰম্ভ কৰা পথ দুটি ক্ৰমে চাৰ্চ পথৰ পৰা কে কে দাস পথ আৰু তেলিয়াপট্টি অঞ্চলৰ এটি উপপথ।