মফচলীয় সংবাদ কৰ্মী সকলক লৈ গঠিত হোৱা আসাম প্ৰেছ ক’ৰেছপণ্ডেন্টছ ইউনিয়ন চমুকৈ আপকুৰ নৱ নিৰ্বাচিত উপ সভাপতি মুকুল বৰা আৰু সাংগাঠনিক সম্পাদক ৰূস্তম গগৈক আজি সাপেখাতী প্ৰেছ ক্লাৱে সম্বৰ্ধনা জ্ঞাপন কৰে ।সাপেখাতী প্ৰেছ ক্লাৱত অনুষ্ঠিত হোৱা সম্বৰ্ধনা অনুষ্ঠান টোৰ সভাপতিত্ব কৰে ক্লাৱৰ সভাপতি কেশৱ গগৈয়ে । সাপেখাতী প্ৰেছ ক্লাৱৰ সম্পাদক ৰাজীৱ কলিতাই উদ্দেশ্যে বাখ্যা আগবঢ়োৱা পাছতেই দুয়োগৰাকী সম্বৰ্ধীত ব্যক্তিক চেলেং চাদৰ আৰু ফুলাম গামোচাৰে সম্বৰ্ধনা জনাই ।ইয়াৰ পাছতে উক্ত অনুষ্ঠানতে চাঁওতাল ছাত্ৰ সন্থা , টাই আহোম যুৱ পৰিষদ  আৰু অসম জাতীয়তাবাদী যুৱ ছাত্ৰ পৰিষদৰ সদস্য সকলে দুয়োজন সম্বৰ্ধিত ব্যক্তিক একোখনকৈ ফুলাম গামোচাৰে সম্বৰ্ধনা জনাই ।  উল্লেখযোগ্য যে ৰাজ্য খনৰ মফচলীয় সংবাদকৰ্মী সকলক লৈ গঠিত হোৱা আসাম প্ৰেছ ক’ৰেছপণ্ডেন্টছ ইউনিয়ন (আপকু )ৰ দ্বাদশ দ্বি বাৰ্ষিক অধিৱেশন খনি যোৱা ২৬ আৰু ২৭ ডিচেম্বৰ তাৰিখে চৰাইদেউ জিলাৰ সোণাৰি ৰাজহুৱা প্ৰেক্ষাগৃহত অনুষ্ঠিত হৈ যায় । উক্ত অধিৱেশনতে  দৰং জিলাৰ আব্দুল খালেকক সভাপতি আৰু শিৱসাগৰ জিলাৰ শৰৎ শেনচোৱাক সম্পাদক প্ৰধান ৰূপে লৈ এখন শক্তিশালী নৱ নিৰ্বাচিত কেন্দ্ৰীয় সমিতি গঠন কৰা হয় ।  আজি সাপেখাতী প্ৰেছ ক্লাৱত অনুষ্ঠিত সম্বৰ্ধনা অনুষ্ঠানৰ পৰাই সাপেখাতী প্ৰেছ ক্লাৱে নৱ নিৰ্বাচিত সমিতিলৈ শুভেচ্ছা জ্ঞাপন কৰে ।

টীয়ক:- যোৰহাট জিলাৰ  চেলেংহাট নামচেচুৰ বাসিন্দা, বিশিষ্ট সমাজ কৰ্মী, শৰীৰ চৰ্চাবিদ তথা নিচা মুক্তি অভিযানৰ লগত জড়িত তুষাৰ পালক সাহিত্য সমাজ সাংস্কৃতিক সেৱা মঞ্চই  অসম গৌৰৱ  বঁটা প্ৰদান কৰিছে।। ৰাজ্যখনৰ বিভিন্ন ক্ষেত্ৰত অৱদান আগবঢ়োৱা বিশেষ ব্যক্তি সকলক এই বঁটা প্ৰদান কৰা হয়। অনুষ্ঠানটোৱে  সমাজকৰ্মী তুষাৰ পাললৈ জীৱন জোৰা সমাজপ্ৰাণ খিতাপ প্ৰদান কৰে। গুৱাহাটীৰ দিছপুৰস্থিত পি ডব্লিউ ডি অডিটেৰিয়ামত অনুষ্ঠিত বঁটা প্ৰদান অনুষ্ঠানত সমাজ কৰ্মী তুষাৰ পালে বঁটা গ্ৰহণ কৰে অসমৰ শ্ৰম মন্ত্ৰী সঞ্জয় কৃষানৰ হাতৰ পৰা। আনহাতে এই বটা লাভ কৰি সমাজ সেৱাৰ প্ৰতি অধিক দায়বদ্ধতাৰে কাম কৰি যাৱলৈ উৎসাহ আৰু অনুপ্ৰেৰণা পোৱা বুলি ব্যক্ত কৰে তুষাৰ পালে।উল্লেখ্য যে, তুষাৰ পাল এগৰাকী ৰাষ্ট্ৰীয় পুৰস্কাৰ প্ৰাপ্ত শৰীৰ চৰ্চাবিদ। আনহাতে মাদক দ্ৰব্য, ড্ৰাগছ, অন্ধবিশ্বাস আৰু কৰ’নাৰ বিৰুদ্ধে ৰাইজৰ মাজত সচেতনতা আনিবলৈ কোনো চৰকাৰী সহায় অবিহনে বিভিন্ন পদক্ষেপ গ্ৰহণ কৰি অহা লগতে  কেইবাখনো ছুটি ছবি নিৰ্মান কৰা লগতে নিজৰ পকেটৰ ধন খৰচ কৰি বিভিন্ন অঞ্চলত সজাগতা সভা আৰু লিফলেট আদি বিতৰন  আহিছে। ইয়াৰো পৰি বহু অসহায় দৰিদ্ৰ লোক আৰু ছাত্ৰ-ছাত্ৰীক সহায়ৰ হাত আগবঢ়াই আহিছে তুষাৰ পালে। ইতিমধ্যে তুষাৰ পালে ৰাষ্ট্ৰীয় পৰ্যায়ৰ কেইবাটাও সন্মান বুটলিবলৈ সক্ষম হৈছে।এই গৰাকী মানৱ দৰদী সমাজকৰ্মী তুষাৰ পাললৈ অসম গৌৰৱ সন্মান বঁটা আগবঢ়োৱাত চেলেংহাট বাসীয়ে আনন্দ প্ৰকাশ কৰা লগতে বিভিন্ন অনুষ্ঠান প্ৰতিষ্ঠান আৰু ব্যক্তিয়ে অভিনন্দন জ্ঞাপন কৰিছে। 

বৰপেটা জিলাৰ চেঙা সমষ্টিৰ অন্তৰ্গত পাঠিমাৰী-খোলাবান্ধা চৰাঞ্চলত সোমবাৰে হেলিকপ্টাৰ যোগে আহি সংখ্যালঘু জনগনৰ সৰ্বাংগীণ উন্নয়ণৰ লগতে যেন নিৰ্বাচনৰ আগতীয়া বতৰা দি গল লাউচৰ আম্বানী খ্যাত হাবিব মহম্মদ চৌধুৰীয়ে। দৰিদ্ৰতাৰে সংগ্ৰাম কৰি কেনেকৈ হোজাইৰ পৰা গৈ লাউচৰ এগৰাকী আগশাৰীৰ উদ্যোগপতি হল তাৰ বৰ্ণনা দিয়াৰ লগতে কৌশলপূৰ্ণ ভাৱে ৰাজনীতিৰ বহু কথাই উল্লেখ কৰিলে হাবিব মহম্মদ চৌধুৰীয়ে। এম ডি এছ ডব্লিউ আৰু জে এফ ফাউণ্ডেচনৰ জৰিয়তে সংখ্যালঘু লোকক শৈক্ষিক ক্ষেত্ৰত আগুৱাই নিয়াৰ সংকল্পৰে ৰাইজৰ কাম কৰাৰ প্ৰতিশ্ৰুতি প্ৰদান কৰে চৌধুৰীয়ে। স্বাধীনতাৰ ৭৫ বছৰ পিছতো সংখ্যালঘু মুছলমান লোক সকল আৰ্থ-সানাজিক, শৈক্ষিক দিশত তেনেই পিছ পৰি থকাত আক্ষেপ প্ৰকাশ কৰি ইয়াৰ উত্তৰণ নঘটিলে মুছলমান সকলৰ পৰিত্ৰাণ নাই বুলিও উল্লেখ কৰে। বিগত দিন সমুহত মুছলমান লোক সকলক ভয় ভাবুকি দি একাংশ লোকে ৰাজনৈতিক মুনাফা আদায় কৰি অহা বুলিও তাৎপৰ্যপূৰ্ণ মন্তৱ্য প্ৰকাশ কৰে চৌধুৰীয়ে। ৰাজনীতিৰ নামত একাংশ আলিম-উলেমাই মুছলমান লোকক প্ৰতাৰণা কৰাৰ বাবেও দীৰ্ঘদিনে তেওঁলোকৰ সমস্যা আজিও সমস্যা হৈয়েই থাকিল। চৰাঞ্চলৰ আধাতে স্কুল এৰা এক হাজাৰ ল’ৰা ছোৱালীক বিনামূলীয়াকৈ স্কিল ডেভলপমেন্টৰ জৰিয়তে প্ৰশিক্ষণ দিব বুলি ৰাজহুৱা সভা খনত  ঘোষণা কৰে হাবিব মহম্মদে। শেষতীয়াকৈ প্ৰস্তুত হোৱা ৰাষ্ট্ৰীয় নাগৰিকপঞ্জীৰ ওপৰত নিজৰ প্ৰতিক্ৰিয়া প্ৰকাশ কৰি চৌধুৰীয়ে কয়, ৭০ বছৰে শুদ্ধ এন আৰ চি নোপোৱাটো আমাৰ বাবে দুৰ্ভাগ্যজনক। ইপিনে লাউচৰ প্ৰখ্যাত উদ্যোগপতি হাবিব মহম্মদ চৌধুৰীৰ এনে সভাৰ আঁৰত ৰাজনৈতিক স্বাৰ্থ সন্নিবিষ্ট থকাৰ অভিযোগ কৰিছে একাংশ লোকে। ২১ ৰ বিধান সভা নিৰ্বাচনত ধৰ্মীয় সংখ্যালঘূ লোকৰ ভোট বিভাজন ঘটোৱাই এনে সভাৰ মূল উদ্দেশ্য বুলিও কব খোজে এচামে। সি যিকিনহওঁক বৰপেটাৰ খোলাবান্ধাচৰত হাবিব মহম্মদৰ চৌধুৰীৰ হেলিকপ্টাৰ চফৰে বহু কথাৰ ইংগীত দি থৈ গল।সভাত আমন্ত্ৰিত অতিথি হিচাবে উপস্থিত থাকে অৱসৰপ্ৰাপ্ত প্ৰধান শিক্ষক আলফাজ উদ্দিন আহমেদ,পাঠীমাৰী খোলাবান্ধা জনপ্ৰিয় বজাৰ পৰিচালনা সমিতিৰ সভাপতি মোজাম্মেল হক, অৱসৰপ্ৰাপ্ত শিক্ষক আ:মান্নান এছাহক আলী, সাংবাদিক মেদিনী গগৈ প্ৰমূখ্যে কেইবাগৰাকী বিশিষ্ট ব্যক্তিয়ে উপস্থিত থাকে । সভাত কেইবা সহস্ৰাধিক লোকে অংশ গ্ৰহণ কৰে।

বকো ২৯ ডিচেম্বৰ:: ৰাজ্যৰ গ্ৰামাঞ্চলত সক্ৰিয় হৈ উঠা নাৰীদেহ ব্যৱসায়ী আৰু নাৰী সৰবৰাহী চক্ৰ উৎখাত কৰাৰ দাবীত আজি হঠাতেই উত্তাল হৈ পৰিল গৰৈমাৰী অঞ্চল৷ উল্লেখ্য, অঞ্চলটোত সঘনাই নাৰীজনিত অপৰাধমূলক ঘটনা সংঘটিত হৈ আহিছে যদিও স্থানীয় প্ৰশাসন কিম্বা আৰক্ষীয়ে কোনোধৰণৰ ব্যৱস্থা গ্ৰহণ নকৰাৰ প্ৰতিবাদত প্ৰায় শতাধিক পুৰুষ-মহিলা আৰু স্কুলীয়া ছাত্ৰ-ছাত্ৰীয়ে উত্তাল প্ৰতিবাদেৰে গৰৈমাৰীৰ আকাশ-বতাহ কঁপাই তোলে৷ প্ৰতিবাদকাৰী সকলে অসম আৰক্ষী হায় হায়, নাৰী সুৰক্ষা নিশ্চিত কৰক, অপৰাধীক গ্ৰেপ্তাৰ কৰক আদি শ্ল’গানেৰে বৃহৎ সমদল উলিয়াই প্ৰথমতে গৰৈমাৰী আৰক্ষী চকী ঘেৰাও কৰে৷ পিচত প্ৰতিবাদকাৰী সকলে সদলবলে গৰৈমাৰী চক্ৰ বিষয়াৰ কাৰ্যালয়ত উপস্থিত হৈ চক্ৰ বিষয়াক এখন স্মাৰকপত্ৰ প্ৰদান কৰে৷ উল্লেখ্য যে, চলিত ডিচেম্বৰ মাহতে ছয়গাঁৱৰ কাণহাৰা গাঁৱৰ দুগৰাকী কিশোৰী কন্যাক একে গাঁৱৰে ৰবিউল হুছেইন নামৰ লম্পট যুৱক এজনে বিয়াৰ প্ৰলোভনেৰে পলুৱাই নি বহিঃৰাজ্যৰ ৰাজস্থানত বিক্ৰী কৰে৷ ঘটনা সন্দৰ্ভত পৰিয়ালৰ লোকে পৃথকে পৃথকে গৰৈমাৰী আৰক্ষী চকীত এজাহাৰ দাখিল কৰাৰ পিচতো আৰক্ষীয়ে কোনো ব্যৱস্থা গ্ৰহণ কৰা নাই৷ যাৰ বাবে প্ৰতিবাদকল্পে আজি গৰৈমাৰী আৰক্ষী চকী আৰু চক্ৰ বিষয়াৰ কাৰ্যালয় ঘেৰাও কৰি ৰাইজে উত্তাল প্ৰতিবাদ সাব্যস্ত কৰে৷