ডিকমঃ  নিখিল ভাৰত বিদ্যুৎ কৰ্মচাৰী মহাসংঘৰ আাহ্বানত, ৰাজহুৱা খণ্ডৰ শক্তি বিতৰণ কোম্পানী সমূহ ব্যক্তিগত কৰণ কৰাৰ  প্ৰতিবাদ জনাই অধ্য়ক্ষ লৈ এক স্মাৰক পত্ৰ প্ৰেৰন কৰাৰ লগতে আৰু কৰ্মচাৰীৰ সকলৰ সমস্যা সমাধানৰ দাবীত এক ধৰ্না কাৰ্যসূচী ৰূপায়ন কৰা দেখা যায় ।  ডিব্ৰুগড় বৈদ্যুতিক সংমণ্ডলত পূৱা ১০বজাৰ পৰা ১২ বজালৈ হোৱা ধৰ্ণা কাৰ্যসূচীত  উপস্থিত থাকে  এ.উ.পি.ই ইঞ্জিনিয়াৰ এছচিএচনৰ কাৰ্যকাৰী সভাপতি ৰঞ্জন দত্ত , এ.এচ.পি.উ.ইউ কেন্দীয় কাৰ্যকাৰী সভাপতি শ্ৰী লীলা চাংমাই, শাখা সভাপতি শ্ৰী থানুৰাম ফুঁকন, সম্পাদক শ্ৰী বিপ্লৱ গোহাঁই, চাপ্লাই ইউনিতৰ সম্পাদক শ্ৰীবিপুল কোঁৱৰ লগতে কেইবা গৰাকিও গন্য-মান্য ব্যক্তি উপস্থিত থাকে।

নগাঁও : মুখ্যমন্ত্ৰী সৰ্বানন্দ সোণোৱাল নেতৃত্বাধীন মিত্ৰজোঁটৰ চৰকাৰে নিৰ্বাচনৰ সময়ত দিয়া প্ৰতিশ্ৰুতি অনুসৰি কাম কৰি আহিছে। ৰাজ্যখনৰ সকলো জাতি-জনগোষ্ঠীৰ সমউন্নয়ন আৰু সম বিকাশৰ বাবে কাম কৰি আহিছে। যাৰ বাবে ৰাজ্যখনত এতিয়া সকলো ক্ষেত্ৰতে দ্ৰুত উন্নয়ন হৈছে।আজি নগাঁৱৰ খগেন মহন্ত প্ৰেক্ষাগৃহত ভূমিহীন খিলঞ্জীয়া লোকক ভূমি পট্টা প্ৰদান কৰাৰ বাবে নগাঁও জিলা প্ৰশাসনে আয়োজন কৰা এক অনুষ্ঠানত অংশ লৈ এই মন্তব্য কৰে ৰাজ্যৰ জল সম্পদ বিভাগৰ মন্ত্ৰী কেশৱ মহন্তই । নগাঁও জিলা উপায়ুক্ত কবিথা পদ্মনাভনৰ সভাপতিত্বত অনুষ্ঠিত সভাত মুখ্য অতিথি হিচাপে অংশগ্ৰহণ কৰি মহন্তই কয়- আজি অসম চৰকাৰে লক্ষাধিক লোকক ভূমি পট্টা প্ৰদান কৰিছে। ইয়াৰ জৰিয়তে চৰকাৰে ভূমিহীন খিলঞ্জীয়া লোক সকলৰ সুৰক্ষাৰ ব্যৱস্থা কৰিছে। আহি থকা দিনত আমাৰ চৰকাৰে নতুনকৈ লক্ষাধিক ভূমিহীন খিলঞ্জীয়াক ভূমি পট্টা দিয়াৰ ব্যৱস্থা কৰিব। অসমৰ ভূমিহীন ভুমিপুত্ৰ সকলক অগ্ৰাধিকাৰ ভিত্তিত ভূমি পট্টা দিয়া হ’ব। জাতি মাটি ভেটিৰ সুৰক্ষা প্ৰদান কৰাৰ প্ৰতিশ্ৰুতি আমি ৰক্ষা কৰিবলৈ চেষ্টা অব্যাহত ৰাখিছো। কথাৰে নহয় কামেৰে আমি এই প্ৰতিশ্ৰুতি ৰক্ষা কৰিম। ভাষন প্ৰসংগত তেওঁ ৰাজ্য চৰকাৰৰ চাৰে চাৰি বছৰীয়া উন্নয়নমূলক কামৰ এক খতিয়ন দাঙি ধৰে। সভাত অংশগ্ৰহণ কৰি নগাঁও সদৰ সমষ্টি বিধায়ক ৰূপক শৰ্মাই কয় বৰ্তমানৰ চৰকাৰখনৰ দিনত ৰাজ্যখনত দ্ৰুত উন্নয়ন হৈছে। তেওঁ চৰকাৰৰ উন্নয়নমূলক কাম-কাজত ৰাইজৰ সহযোগীতা কামনা কৰে। সভাত ৰহা সমষ্টি বিধায়ক ডিম্বেছৰ দাস, অতিৰিক্ত উপায়ুক্ত জয়ন্ত কুমাৰ বৰা , লাচিত দাস আৰু জিলাখনৰ ৭টা ৰাজহ চক্ৰৰ চক্ৰ বিষয়া উপস্থিত থাকে। জিলাখনৰ ১১৬৭ গৰাকী ভূমিহীন খিলঞ্জীয়া লোকক আজি ভূমি পট্টা প্ৰদান কৰা হয়। আজি আনুষ্ঠানিক ভাৱে ৫০ জন লোকক এই পট্টা প্ৰদান কৰা হয়। ইপিনে সভাৰ অন্তত সাংবাদিকে কলং সম্পৰ্কে সোধা এক প্ৰশ্নৰ উত্তৰত মন্ত্ৰী মহন্তই কয় কলঙে নগঞা সভ্যতাক সমৃদ্ধ কৰি আহিছে। এই সভ্যতা হৈছে কলংপৰীয়া সভ্যতা । কিন্তু কলং এতিয়া স্তব্ধ । এই কলং নৈক নিয়ন্ত্ৰিত ৰূপত বোৱাই ৰখাৰ বাবে পদক্ষেপ গ্ৰহণ কৰা হৈছে। অহা বৰ্ষত নগাঁৱৰ ৰাইজে কলং নৈক নিয়ন্ত্ৰিত ৰূপত বৈ থকা দেখা পাৱ। সাংবাদিকে সোধা আন এক প্ৰশ্নৰ উত্তৰত মহন্তই কয়- মহাপুৰুষ শ্ৰীমন্ত শংকৰদেৱৰ পবিত্ৰ জন্মভূমি বটদ্ৰবাৰ বেদখলিকৃত ভূমি বে-দখল মুক্ত কৰা হৈছে। বটদ্ৰৱাক লৈ চৰকাৰে এক আঁচনি গ্ৰহণ কৰিছে। ইয়াৰ জৰিয়তে বটদ্ৰৱাৰ সংৰক্ষণ আৰু উন্নয়নৰ পদক্ষেপ গ্ৰহণ কৰা হৈছে। শ্ৰীমন্ত শংকৰদেৱ সংঘই গুৰুজনাৰ নামত স্থাপন কৰা বিশ্ববিদ্যালয়ৰ বাবে পূৰ্বৰ মাটি খিনি উপৰিও নতুনকৈ ৩০০ বিঘা মাটি আমাৰ চৰকাৰে আবন্তন দিছে । বিশ্ববিদ্যালয়খনৰ উন্নয়নৰ বাবে চৰকাৰে সকলো সুবিধা প্ৰদান কৰিব।

গুৱাহাটী : পূৱ গুৱাহাটী সমষ্টিৰ অন্তৰ্গত ইছলামপুৰত দেওবাৰে অনুষ্ঠিত হোৱা বিজেপিৰ এক সাংগঠনিক সভাত বিভিন্ন স্তৰৰ প্ৰায় শতাধিক ব্যক্তিয়ে বিজেপিত যোগদান কৰে ৷ পূৱ গুৱাহাটী মণ্ডল বিজেপিয়ে আয়োজন কৰা সভাখনত স্হানীয় বিধায়ক তথা গুৱাহাটী উন্নয়ন মন্ত্ৰী সিদ্ধাৰ্থ ভট্টাচাৰ্য উপস্থিত থাকে ৷ মন্ত্ৰীগৰাকীৰ উপস্থিতিত বৃহত্তৰ ইছলামপুৰৰ প্ৰায় শতাধিক ব্যক্তিয়ে আনুষ্ঠানিকভাবে বিজেপি দলত যোগদান কৰে ৷ বিজেপি নেতৃত্বাধীন ৰাজ্য চৰকাৰৰ উন্নয়ন মুলক কাম-কাজক লৈ যথেষ্ট সন্তুষ্টি লাভ কৰাৰ লগতে স্হানীয় বিধায়ক সিদ্ধাৰ্থ ভট্টাচাৰ্যই বিগত সময়চোৱাত ইছলামপুৰ অঞ্চলত যথেষ্ট উন্নয়নমূলক কাম কৰাৰ বাবেই বিজেপিক প্ৰতি তেওঁলোকে আকৃষ্ট হৈ যোগদান কৰাৰ কথা উল্লেখ কৰে ৷ এই ক্ষেত্ৰত মন্ত্ৰী সিদ্ধাৰ্থ ভট্টাচাৰ্যই নিজ সমষ্টিৰ ইছলামপুৰত এনেদৰে বিজেপি দলত যোগদান কৰাৰ বাবেই প্ৰতিগৰাকী ব্যক্তিলৈ আন্তৰিক শুভেচ্ছা জ্ঞাপন কৰে ৷ লগতে তেওঁ যোগদান কৰা প্ৰতিগৰাকী বিজেপি সদস্যক আগন্তুক দিনত নিষ্ঠা সহকাৰে দলৰ হৈ কাম কৰি যাবলৈ আহ্বান জনায় ৷ ইছলামপুৰ অঞ্চলৰ সমস্যাসমূহ সমাধানৰ ক্ষেত্ৰত তেওঁ প্ৰচেষ্টা অব্যাহত ৰাখিব বুলি উল্লেখ কৰে৷ উল্লেখ্য যে পূৱ গুৱাহাটী মণ্ডল বিজেপি আয়োজন কৰা সভাখনত মণ্ডল সমিতিৰ বিষয়ববীয়াৰ লগতে বুথ সভাপতিসহ ভালেসংখ্যক সদস্য উপস্থিত থাকে।

গেলেকী : ২০২১ বৰ্ষৰ বিধান সভা নিৰ্বাচন আগত লৈ অসমৰ প্ৰতিটো ৰাজনৈতিক দলে নিৰ্বাচনী কুচকাৱাজ আৰম্ভ কৰিছে। সমান্তৰালভাৱে আজি ১০৩নং আমগুৰি বিধানসভা সমষ্টিটো অসম গণ পৰিষদ দলে এক বিশাল সমদলেৰে নিৰ্বাচনী ৰণডঙ্কা বজায়। ৰাজনৈতিক দলটোৰ দলীয় কৰ্মীসকলে সমষ্টিটোৰ বিধায়ক প্ৰদীপ হাজৰিকাক আমগুৰিৰ পৰা বৃহৎ মটৰ চাইকেল ৰেলীৰে আদৰি আনি নামতি চাৰিআলিত উস্ম আদৰণি জনায়। বিধায়কগৰাকীক দলীয় কৰ্মীসকলে পুনৰ নামতি চাৰিআলি হাইস্কুল খেলপথাৰ প্ৰাঙ্গণত অনুষ্ঠিত হোৱা নিৰ্বাচনী সভাখনলৈ পদব্ৰজে প্ৰায় ৫০০ মিটাৰ লৈ আনে। অগপ দলৰ বৰুৱা পুখুৰী আঞ্চলিক সমিতিৰ সভাপতি মুক্তি চুতিয়াৰ সভাপতিত্বত অনুষ্ঠিত হোৱা মুকলি সভাখনত প্ৰৱীণ অগপ নেতা বিপুল বৰকটকী, যুৱনেতা সুদৰ্শন হাজৰিকা, ইমদাদ হুছেইন, প্ৰভাত হাজৰিকা, ম’ৰাবজাৰ জিলা পৰিষদৰ সদস্য সুমিত্ৰ তামুলীকে প্ৰমুখ্যে বহু নেতা কৰ্মী উপস্থিত থাকে। এই সভাতে বৰুৱা পুখুৰী পঞ্চায়তৰ অন্তৰ্গত ১৭৬টাকৈ পৰিয়ালে কংগ্ৰেছ দল ত্যাগ কৰি অগপ দলৰ নীতি আদৰ্শৰ প্ৰতি আকৃষ্ট হৈ অগপত যোগদান কৰে। যোগদান কৰা প্ৰতিটো পৰিয়ালৰ জ্যেষ্ঠ ব্যক্তিক একোখনকৈ ফুলাম গামোচাৰে সম্বৰ্ধনা জনোৱা হয়। উক্ত সভাত বিধায়ক প্ৰদীপ হাজৰিকাই আমগুৰিত অগপৰ ভেটি অধিক শক্তিশালী বুলি মন্তব্য কৰাৰ লগতে সমষ্টিটোত কৰা উন্নয়নৰ কৰ্মৰাজীকে মূল শক্তি হিচাপে লৈ নিৰ্বাচনী যুঁজত প্ৰতিদ্বন্দিতা আগবঢ়োৱাৰ হুংকাৰ দিয়ে। আনহাতে ২০২১ৰ ৰণত এই সমষ্টিত নিশ্চিত বিজয়ৰ যাত্ৰাত বীৰ যোদ্ধা হিচাবে অংশীদাৰ হ’বলৈ অহা প্ৰতিগৰাকী নৱাগত সদস্যকে দললৈ উষ্ম আদৰণি জনায়।

নগাঁও, ৪ অক্টোবৰ : অসম চৰকাৰৰ নগৰ আন্ত:গাঠনি উন্নয়ন পূঁজিৰ ২০১৯-২০ বৰ্ষৰ অধীনত দুই কোটি টকা ব্যয় সাপেক্ষে নগাঁও চহৰৰ তিনিখন শ্মশান ক্ৰমে আমোলাপট্টি, হয়বৰগাঁও আৰু মধুপুৰ শ্মশানৰ আন্ত:গাঠনি উন্নয়নৰ কামৰ আজি আধাৰশিলা স্থাপন কৰে নগাঁও সদৰ সমষ্টিৰ বিধায়ক ৰূপক শৰ্মাই। আজি পুৱা নগাঁও চহৰৰ আমোলাপট্টি শ্মশানৰ আন্ত: গাঠনি উন্নয়নৰ কামৰ আধাৰশিলা স্থাপন কৰি বিধায়ক ৰূপক শৰ্মাই হিন্দু ধৰ্মাৱলম্বী লোকৰ জীৱনৰ অন্তিম যাত্রাৰ স্থলী শ্মশানকেইখনৰ পৰিবেশ আৰু প্ৰয়োজনীয় সা-সুবিধাসমূহ সঠিক ৰূপত নিৰ্মাণৰ ওপৰত গুৰুত্ব আৰোপ কৰি শ্মশান কেইখন আটকধুনীয়াকৈ ৰাখিবৰ বাবে সকলোৰে সহযোগিতা কামনা কৰে । আনহাতে বিগত চাৰে চাৰিটা বছৰত নগাঁও চহৰত সম্পন্ন হোৱা বিভিন্ন উন্নয়ন মূলক কাম কাজৰ বিষয়ে উল্লেখ কৰি বিধায়ক শৰ্মাই চহৰখনৰ আনন্দৰাম ঢেকিয়াল ফুকন সেতুৰ পৰা আইন মহাবিদ্যালয়ৰ দলঙলৈকে কলঙৰ কাষে কাষে এখন পদ সেতু নির্মাণৰ কাম শীঘ্ৰে আৰম্ভ হব বুলিও জানিবলৈ দিয়ে । ইপিনে সকলো যাবতীয় প্ৰস্তুতি সম্পূৰ্ণ হৈ উঠা ২৩ কোটি টকা ব্যয় সাপেক্ষে নিৰ্মাণ হবলগা নগাঁও চহৰৰ মৰিকলং বিলৰ চাৰিও কাষৰ সৌন্দর্যবৰ্ধনৰ কাম শীঘ্ৰে আৰম্ভ হব বুলিও বিধায়ক গৰাকীয়ে সভাত জানিবলৈ দিয়ে । আনহাতে আগন্তুক তিনিমাহৰ ভিতৰত নগাঁও সদৰ সমষ্টিৰ বাকী থকা সকলো বাট পথৰ নিৰ্মান কাৰ্য সম্পূৰ্ণ হৈ উঠিব বুলিও বিধায়ক গৰাকীয়ে সভাত ঘোষণা কৰে । নগাঁও চহৰৰ উন্নয়ন মূলক কাম কাজত ৰাইজৰ সহযোগিতাক বিধায়ক গৰাকীয়ে শলাগ লয়। আমোলাপট্টি শ্মশান সমিতিৰ সভাপতি সীমান্ত বৰাৰ সভাপতিত্ব অনুষ্ঠিত আধাৰশিলা স্থাপন অনুষ্ঠানত গড়কাপ্তানী বিভাগৰ নগাঁও গৃহ সংমণ্ডলৰ কাৰ্যবাহী অভিযন্তা প্ৰভাত শইকীয়া, সহকাৰী কাৰ্যবাহী অভিযন্তা মিনাৰা হুছেইন, কনিষ্ঠ অভিযন্তা পল্লৱজ্যোতি মহন্তৰ লগতে স্হানীয় কেইবাগৰাকী বিশিষ্ট ব্যক্তিয়ে অংশগ্ৰহণ কৰে । উল্লেখ্য আমোলাপট্টি শ্মশানৰ আন্ত গাঁথনি উন্নয়নৰ বাবে ৫৬ লাখ টকা ধার্য কৰা হয়।

নলবাৰী : অসমৰ পৰিস্থিতি উত্তপ্ত হ’বলৈ গৈ আছে। কাস্মীৰৰ পণ্ডিত সকলৰ দৰে অসমৰ পৰা হিন্দু সকলে পলাব লগীয়া হব । আজি নলবাৰী জিলা প্ৰেছ ক্লাৱত সংবাদ মাধ্যমৰ আগত এইদৰে প্ৰতিক্ৰিয়া ব্যক্ত কৰে হিন্দুত্ব বাদৰ প্ৰবক্তা সত্যৰঞ্জন বৰাই। উল্লেখযোগ্য যে আজি নলবাৰী বাক্সা জিলাৰ সীমান্ত গড়ভিতৰত সত্যৰঞ্জন বৰাৰ আগমনক লৈ এক উত্তেজনাৰ সৃষ্টি হৈছিল । সত্যৰঞ্জন বৰাক বাধা প্ৰদান কৰি অবশেষত আৰক্ষী লৈ শিলা বৰ্ষণ কৰিছিল প্ৰতিবাদ কাৰীয়ে। আৰক্ষীয়ে পৰিস্থিতি নিয়ন্ত্ৰণ কৰিবলৈ লাঠি চালনা কৰাৰ লগতে শূণ্যলৈ গুলিচালনা কৰিব লগীয়া হৈছিল । আৰু ঘটনাৰ প্ৰতিক্ৰিয়া ব্যক্ত কৰি সত্যৰঞ্জন বৰাই কয় যে অসমত এতিয়া এজন হিন্দুই মন্দিৰলৈও যাব নোৱাৰা হ’ল। এতিয়া এজন হিন্দুৰ উপাসনা স্থলিলৈ যোৱাতো এজন হিন্দুক অসমত বাধা প্ৰদান কৰিব পৰা হল বুলিও তেওঁ প্ৰতিক্ৰিয়া ব্যক্ত কৰে। তেওঁ লগতে কয় যে তেওঁক যিমানেই বাধা নিদিয়ক তেওঁ তেওঁৰ কাম কৰি যাবই। আনহাতে মছজিদত মাইক ব্যৱহাৰ কৰা সম্পৰ্কে প্ৰতিক্ৰিয়া ব্যক্ত কৰি কয় যে মাইক বন্ধ কৰা সম্পৰ্কে ন্যায়ালয়ৰ নিৰ্দেশ আছে। আমি সহনশীল হৈ থকা বাবেহে এতিয়াও মছজিদত মাইক ব্যৱহাৰ কৰিব পাৰিছে।