তিনিচুকীয়া : আজি তিনিচুকীয়াৰ থানা চাৰিআলিত নিখিল ভাৰত ছাত্ৰ সন্থা(আইছা) আৰু চিপিআই(এম-এল)এ দেশত সঘনে হ’বলৈ ধৰা ধৰ্ষণ হত্যাকাণ্ডৰ বিৰুদ্ধে প্ৰতিবাদ সাব্যস্ত কৰে। উত্তৰ প্ৰদেশৰ হাথ্ৰাচত দলিত মহিলা মণিষা বাল্মিকীৰ গণ ধৰ্ষণ আৰু হত্যা আৰু এই ঘটনাৰ চাঞ্চল্য মাৰ নৌযাওঁতেই উক্ত ৰাজ্যৰে বলৰামপুৰত আন এগৰাকী দলিত সম্প্ৰদায়ৰ কলেজীয়া ছাত্ৰীৰ দলবদ্ধ বলাৎকাৰৰ পিছত গুৰিয়াই গুৰিয়াই কঁকাল আৰু ভৰি ভাঙি নৃশংসভাৱে হত্যা কৰা কৰা হয়। তাৰ ২৪ ঘণ্টাৰ ভিতৰত যোৱা ৩০ ছেপ্তেম্বৰত ৰাজ্যখনৰ আজমগড় জিলাত এজনী ৮ বছৰীয়া, বুলণ্ড চহৰত আৰু এগৰাকী কন্যাশিশু আৰু বাগপটত এগৰাকী ১৭ বছৰীয়া ছোৱালীক দলবদ্ধ বলাৎকাৰ কৰা হয়। তাৰ প্ৰতিবাদত বিক্ষোভ প্ৰদৰ্শন কৰি মনুবাদী অৰ্থাৎ ব্ৰাহ্মণ্যবাদ তথা পুৰুষতান্ত্ৰিকতাবাদী দৰ্শনত বিশ্বাসী তথাকথিত নিম্নবৰ্গৰ অব্ৰাহ্মণ হিন্দু, মুছলমান হত্যাকাৰী তথা সমাজবিৰোধী, ধৰ্ষণকাৰী, নৰপিশাচ আৰু মাফিয়াহঁতৰ গুৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ পদত্যাগ দাবী কৰি থানা চাৰিআলিৰ পৰা তিনিকোণীয়া লৈকে শোভাযাত্ৰা সম্পন্ন কৰা হয় বুলি চিপিআই(এম-এল)ৰ অন্যতম কেন্দ্ৰীয় সদস্য সুভাষ সেনে জানিবলৈ দিছে। উক্ত ঘটনাৰ তদন্তৰ লগত যুক্ত সাংবাদিক তনুশ্ৰী পাণ্ডে আৰু প্ৰতিমা মিশ্ৰৰ অসীম সাহসিকতাৰো ভূয়সী প্ৰসংশা কৰা হয়। তদুপৰি ৰাজস্থানৰ আজমীৰত এগৰাকী দলিত মহিলাৰ দলবদ্ধ বলাৎকাৰী আৰু সদ্যহতে অসমৰ কাৰবি আংলঙৰ ডকমকাৰ লাংহিনত ডাইনী সজাই এগাৰীক মহিলাক হত্যা আৰু হত্যাকাণ্ডৰ প্ৰতিবাদকাৰী এগৰাকী শিক্ষকৰ আৰু কৰিমগঞ্জৰ শিৱানী নমঃশূদ্ৰৰ হত্যাকাৰীক কঠোৰতম শাস্তি বিহাৰ দাবী জনোৱা হয় বুলিও বিবৃতিটোত উল্লেখ কৰা হৈছে। বিবৃতিটোত আৰু কোৱা হৈছে যে মনুবাদী অৰ্থাৎ পিতৃতান্ত্ৰিক বিচাৰধাৰা ধৰ্মবিশ্বাস নিৰ্বিশেষে এক মধ্যযুগীয় পিছপৰা অতি বৰ্বৰ সামন্তবাদী চিন্তাধাৰা হোৱাৰ বাবেই পাকিস্তানৰ মুছলিম মনুবাদী প্ৰধানমন্ত্ৰী ইমৰাণ খানেও তেওঁৰ দেশৰ টিভি চেনেলসমূহক পাকিস্তানত হৈ থকা ধৰ্ষণৰ বাতৰি প্ৰচাৰৰ পৰা বিৰত থাকিবলৈ নিৰ্দেশ দিছে। তদুপৰি ‘আইছা’য়ো অসম আৰক্ষীৰ এছআই পৰীক্ষাৰ প্ৰশ্নপত্ৰ ফাদিল কাণ্ডৰ বাবে যৌথ বিক্ষোভ প্ৰদৰ্শন কৰে আৰু নিষ্ঠাবান সৎ ছাত্ৰ-ছাত্ৰীৰ ভৱিষ্যতক দালাল চক্ৰৰ হাতত তুলি দি লাখ লাখ টকাৰ সদাগিৰি কৰাৰ সুযোগ কৰি দিয়াৰ বাবে অসমৰ অন্ধকাৰ ভৱিষ্যতৰ নায়ক মুখ্যমন্ত্ৰী সৰ্বানন্দ সোণোৱালৰ পদত্যাগ দাবী কৰা হয় বুলি বিবৃতিটোত উল্লেখ কৰা হৈছে। আজিৰ কাৰ্যসূচীৰ নেতৃত্ব দিয়া সকলৰ ভিতৰত আছিল ব্ৰীজ প্ৰধান, চব্বিৰ আহমেদ, হীৰা মাহালি, মাধুৰী মাহালি, বীণা মাঝি, সুভাষ সেন, শিখা দাস আৰু আইছা’ৰ লুপামুদ্ৰা তামুলী, বিশাল কল, সুৰজ মাহালী, প্ৰিয়াংকা এক্কা আদি ৷

দৈনন্দিন বাৰ্তা ডেস্ক : ৰাজ্যৰ স্বাস্থ্য বিভাগে কভিড-১৯ সংক্ৰমণ ৰোধৰ বাবেই সামজিক দূৰত্ব বজাই ৰখাৰ লগতে মুখত মাস্ক পৰিধান কৰিবলৈ বাৰম্বাৰ অনুৰোধ জনোৱাৰ পিছতো এচাম অসচেতন নাগৰিকে কোনো ধৰণৰ গুৰুত্ব প্ৰদান কৰা দেখিবলৈ পোৱা নাই ৷ আজি গুৱাহাটী মহানগৰীৰ লাচিত নগৰস্হিত আধাৰ কেন্দ্ৰত কোনো কভিড প্ৰটোকল নামানি সামজিক দূৰত্বৰ প্ৰতি অকণো গুৰুত্ব প্ৰদান নকৰি এনেদৰে লানি নিচিঙা ভিৰ দেখিবলৈ পোৱা গ’ল ৷ পুৱতি নিশাৰ পৰা ৰাজ্যৰ ছয়গাঁও, বকো, গোৱালপাৰা, মিৰ্জা, ৰহা, দিছপুৰ, জাগীৰোডকে ধৰি অন্যান্য স্হানৰ পৰা আধাৰ কাৰ্ড এখন পোৱাৰ আশাত লাচিত নগৰ আধাৰ কেন্দ্ৰৰ ভীৰ কৰা পৰিলক্ষিত হৈছে ৷ তৎস্বত্বেও কামৰূপ মহানগৰ জিলা প্ৰশাসন-আৰক্ষীৰ কোনো ব্যক্তি উপস্থিতি দেখিবলৈ পোৱা নাই৷ আধাৰ কেন্দ্ৰটোৰ গেটৰ ভিতৰত পৰা এগৰাকী কৰ্মচাৰীয়ে প্ৰতি গৰাকীয়ে ব্যক্তিৰ কাগজ-পত্ৰ সংগ্ৰহ কৰে ৷ সেই সময়চোৱাত সকলোৱে নিজৰ কাগজ জমা দিয়াৰ বাবেই হেতা ওপৰা লগায় ৷ যাৰ বাবে কভিড প্ৰটোকল বুলিবলৈ একো নাথাকে ৷ তেনেস্থলত মহানগৰ আৰক্ষী-প্ৰশাসনে কোনো ধৰণৰ প্ৰদান নকাৰাৰ গুৰুতৰ অভিযোগ উথ্থাপন হৈছে ৷ এই ক্ষেত্ৰত এচাম স্হানীয় সচেতন নাগৰিকে কয় যে ৰাজ্য চৰকাৰে এফালে সামজিক দূৰত্ব বজাই ৰাখিবলৈ ঢাক-ঢোল বজাই আছে ৷ আনফালে আধাৰ কাৰ্ড পোৱাৰ আশাত সকলো স্বাস্থ্য বিভাগৰ নীতি নিয়ম জলাঞ্জলি দিছে সেয়া প্ৰশাসনে দেখিবলৈ পোৱা নাই নে ? না দেখিও চকুমুদা কুলিৰ ভাও জুৰিছে ৷ চৰকাৰৰ কোনো ধৰণৰ পলিচি নাই ৷ সেয়ে প্ৰতিখন জিলাত উপযুক্ত পৰিমানে আধাৰ কেন্দ্ৰ স্হাপন কৰিব পৰা নাই ৷ সেইবাবেই আজি কৰোনা মহামাৰীৰ সময়তো এনেকুৱা পৰিস্থিতিৰ সৃষ্টি হৈছে বুলি একাংশ সচেতন নাগৰিকে ক্ষোভ উজাৰে ৷ শীঘ্ৰেই ৰাজ্যৰ প্ৰতিখন জিলাত উপযুক্তভাৱে আধাৰ কেন্দ্ৰ স্হাপন কৰিবলৈ একাংশ উপস্থিত ৰাইজে চৰকাৰৰ প্ৰতি আহ্বান জনায় ৷

তামুলপুৰ : কলিতা জনগোষ্ঠীক জনজাতিকৰণ নকৰাৰ প্ৰতিবাদত অহা ১০ অক্টোবৰত পুৱা ৫ বজাৰ পৰা আবেলি ৫ বজালৈ ১২ ঘণ্টীয়া অসম বন্ধৰ আহ্বান জনাইছে কলিতা জনগোষ্ঠী যৌথ সংগ্ৰাম সমিতিয়ে। কলিতা জনগোষ্ঠী যৌথ সংগ্ৰাম সমিতিৰ সভাপতি প্ৰমোদ কলিতা আৰু সম্পাদক প্ৰদীপ ডেকাই আজি এক প্ৰেছ বিবৃতিৰ জৰিয়তে জনোৱা মতে ব্ৰহ্মপুত্ৰ উপত্যকাত বসবাস কৰা কলিতা জনগোষ্ঠীৰ জনসংখ্যা প্ৰায় ৭৫ লাখ। এই জনগোষ্ঠীটোৱে বিগত চাৰিটা দশক ধৰি জনগোষ্ঠীটোৰ দুখ-দুৰ্গতি আৰু বিভিন্ন সমস্যাৰ কথা অসমৰ প্ৰতিখন চৰকাৰকে অৱগত কৰি আহিছে। কিন্ত আজিলৈকে কোনো এখন চৰকাৰে অসমৰ বৃহত্তম খিলঞ্জীয়া জনগোষ্ঠীটোৰ সমস্যাৰাজিক অনুধাৱন নকৰিলে। ফলত জনগোষ্ঠীটোৰ সমস্যাবোৰ সমস্যা হৈয়ে ৰ’ল। যদিহে অসম চৰকাৰে অহা ডিচেম্বৰ মাহৰ ভিতৰত কলিতা জনগোষ্ঠীৰ জনজাতিকৰণ প্ৰক্ৰিয়া আৰম্ভ নকৰে তেতিয়াহ’লে আগন্তক দিনত গণতান্ত্ৰিক আন্দোলন চলাই যোৱাৰ লগতে আগন্তুক অসম বিধান সভা নিৰ্বাচন বৰ্জন কৰাৰ সিন্ধান্ত গ্ৰহণ কৰিবলৈ জনগোষ্ঠীটো বাধ্য হ’ব বুলি প্ৰেছ বিবৃতিটোৰ জৰিয়তে জানিবলৈ দিয়ে। ইপিনে অহা ১০ অক্টোবৰৰ ১২ ঘণ্টীয়া অসম বন্ধ সফল ৰূপায়ন কৰাৰ বাবে সৰ্বস্তৰৰ ৰাইজক আহ্বান জনাইছে কলিতা জনগোষ্ঠী যৌথ সংগ্ৰাম সমিতিয়ে।