দৈনন্দিন বাৰ্তা ডেস্ক : প্ৰধানমন্ত্ৰী নৰেন্দ্ৰ মোডীয়ে ১৫ আগষ্টত ৭৪ তম স্বাধীনতা দিৱস উপলক্ষে ঐতিহাসিক লালকিল্লাৰ পৰা দেশবাসীক উদ্দেশ্যি ভাষণ আগবঢ়াব৷ স্বাধীনতা দিৱসৰ ভাষণত প্ৰধানমন্ত্ৰীয়ে ‘এক ৰাষ্ট্ৰ এক স্বাস্থ্য কাৰ্ড’ৰ বিষয়ে গুৰুত্বপূৰ্ণ ঘোষণা কৰাৰ আশা আছে৷ দেশৰ প্ৰতিজন নাগৰিকৰ স্বাস্থ্য ৰেকৰ্ড ডিজিটেল ফৰ্মেটত ৰখাৰ ব্যৱস্থা কৰা হৈছে৷ ‘এক ৰাষ্ট্ৰ এক স্বাস্থ্য কাৰ্ড’ আঁচনিত এজন ব্যক্তিৰ চিকিৎসা ইতিহাস ৰেকৰ্ড, সেই ব্যক্তিৰ যি সকলো চিকিৎসা আৰু পৰীক্ষা কৰা হৈছিল সেইবোৰ এই কাৰ্ডত ডিজিটেল সংৰক্ষণ কৰা হ’ব৷ চিকিৎসালয়, ক্লিনিক আৰু চিকিৎসক সকলো কেন্দ্ৰীয় ছাৰ্ভাৰৰ সৈতে সংযুক্ত হ’ব৷ ‘এক ৰাষ্ট্ৰ এক স্বাস্থ্য কাৰ্ড’ প্ৰকল্পটো বাচি লোৱাত সম্পূৰ্ণৰূপে চিকিৎসালয় আৰু নাগৰিকৰ ওপৰত নিৰ্ভৰ কৰিব৷ এই কাৰ্ড বাচি লোৱা প্ৰতিজন নাগৰিকক এটা অনন্য আইডি দিয়া হ’ব৷ তাৰ জৰিয়তে সেই ছিষ্টেম লগ ইন কৰিবলৈ সক্ষম হ’ব৷ এই প্ৰকল্প পৰ্যায়ক্ৰমে কাৰ্যকৰী কৰা হ’ব৷ পৰিকল্পনাৰ প্ৰথম পৰ্যায়ত ৫০০ কোটি টকাৰ বাজেট ধাৰ্য কৰা হৈছে৷

দৈনন্দিন বাৰ্তা ডেস্ক : দেশৰ ৭৪ তম স্বাধীনতা দিৱসৰ প্ৰাকক্ষণত শুকুৰবাৰে ৰাষ্ট্ৰৰ উদ্দেশ্যি ৰাষ্ট্ৰপতি ৰামনাথ কোবিন্দই ভাষণ আগবঢ়ায়৷ ভাষণৰ আৰম্ভণিতে বিদেশী শক্তিৰ সৈতে যুদ্ধ কৰি স্বাধীনতা কাঢ়ি অনা সংগ্ৰামীসকলৰ প্ৰতি তেওঁ শ্ৰদ্ধা জনায়৷ আনহাতে নাম উল্লেখ নকৰি চীনৰ ‘সম্প্ৰসাৰণ নীতি’ক লৈ কঠোৰ ভাষাৰে ৰাষ্ট্ৰপতিয়ে সমালোচনা কৰে৷ লগতে গালৱানৰ শ্বহীদ ভাৰতীয় সৈনিকসকলৰ প্ৰতি সন্মান জনায়৷ ক’ৰোনা মহামাৰীৰ প্ৰসংগত উল্লেখ কৰি ৰাষ্ট্ৰপতিয়ে কয়, এইবাৰ স্বাধীনতা দিৱস উদযাপনত কোনো জাকজমকতা হোৱা নাই৷ এই মহামাৰীৰ লগত মোকাবিলাত কেন্দ্ৰই সঠিক দিশত পদক্ষেপ গ্ৰহণ কৰিছে৷ ৰাজ্য চৰকাৰ আৰু জনসাধাৰণৰ সহযোগিতাত পৰিস্থিতি মোকাবিলা কৰা হৈছে৷ এই মহামাৰীৰ সময়ত আমাৰ দৰিদ্ৰসকলৰ বাবে চৰকাৰে গুৰুত্ব আৰোপ কৰি বহু পদক্ষেপ লৈছে৷ বিনামূল্যে প্ৰতি মাহে ৮০ কোটি মানুহক ৰেচন দিছে৷ ইয়াৰ বাবে এক দেশ এক ৰেচন কাৰ্ড প্ৰকল্প আৰম্ভ কৰা হৈছে৷ আনহাতে ৰাষ্ট্ৰপতিয়ে ক’ৰোনা যোদ্ধাসকলক ধন্যবাদ জনায়৷ ৰাষ্ট্ৰপতিয়ে কয়, চিকিৎসক, নাৰ্চ তথা আন স্বাস্থ্য কৰ্মীয়ে নিজক সীমা পাৰ কৰি সেৱা কৰিছে৷ দুৰ্ভাগ্যৰ বিষয়, তেওঁলোকৰ বহুকেইজন এই ৰোগত পৰি মৃত্যু হৈছে৷ ইয়াৰ লগতে ঘূৰ্ণিবতাহ আমফানক লৈ ৰাষ্ট্ৰপতিয়ে কয়, পশ্চিম বংগ আৰু ওড়িশ্যাত আমফামে বিস্তৰ ক্ষতি কৰিলে৷ উত্তৰ-পূব ভাৰতত বান পৰিস্থিতি ভয়াৱহ৷ এনে সংকট কালত আমি সকলো একেলগ হৈ কাম কৰিব লাগিব৷ মহামাৰীৰ সময়ত ভাৰতে বিশ্বৰ আন প্ৰভাৱিত দেশবোৰৰ সৈতে আছে আৰু এই কথা উল্লেখ কৰি ৰাষ্ট্ৰপতিয়ে কয়, ক’ৰোনা মোকাবিলাত আমি বহু দেশৰ কাষত থিয় হৈছো৷ আন্তৰ্জাতিক মঞ্চত ভাৰত থাকিব আৰু নিজৰ পৰিচয় বৰ্তাই ৰাখিব৷ আমি কেৱল নিজৰ কথা ভবা নাই৷ আমি সকলোৰে কাষত থিয় হৈ আছো৷

দৈনন্দিন বাৰ্তা ডেস্ক : দেশৰ অকংগ্ৰেছী প্ৰধানমন্ত্ৰী হিচাপে নৰেন্দ্ৰ মোডীয়ে বৃহস্পতিবাৰে সৰ্বাধিক দিন দেশ শাসন কৰা শাসকৰূপে স্থান লাভ কৰিছে ৷ ইয়াৰ পূৰ্বে অকংগ্ৰেছী প্ৰধানমন্ত্ৰী হিচাপে দীৰ্ঘ দিন দায়িত্বত আছিল অটল বিহাৰী বাজপেয়ী ৷ বাজপায়ীয়ে দেশত ২২৬৮ দিন শাসন কৰাৰ সুবিধা পাইছিল ৷ সম্প্ৰতি দেশত সৰ্বাধিক দিন প্ৰধানমন্ত্ৰী হিচাপে জৱাহৰলাল নেহৰু, ইন্দিৰা গান্ধী আৰু ড° মনমোহন সিঙৰ পাচত নৰেন্দ্ৰ মোডী ৷ উল্লেখ্য দিশৰ ১৪ তম প্ৰধানমন্ত্ৰী হিচাপে ২০১৪ চনৰ ২৬ মে’ত নৰেন্দ্ৰ মোডীয়ে শপত গ্ৰহণ কৰিছিল ৷ তেওঁ দ্বিতীয়বাৰ পুনৰ প্ৰধানমন্ত্ৰী হিচাপে শপত লয় ২০১৯ চনৰ ৩০ মে’ত ৷ উল্লেখ্য যে দেশত সৰ্বাধিক দিন প্ৰধানমন্ত্ৰী হিচাপে আছিল জৱাহৰলাল নেহৰুৱে ৷ নেহৰুৱে ১৭ বছৰ দেশত প্ৰধানমন্ত্ৰী হিচাপে কাৰ্যনিৰ্বাহ কৰিছিল ৷ আনহাতে নেহৰুৰ কন্যা ইন্দিৰা গান্ধীয়ে ১১ বছৰ চলোৱাৰ পাচত প্ৰায় পাঁচ বছৰ কাৰ্যনিৰ্বাহ কৰিছিল ৷ ড° মনমোহন সিঙে পাঁচ বছৰীয়া দুটা কাৰ্যকাল একেৰাহে চলাইছিল ৷ আনহাতে নৰেন্দ্ৰ মোডী হ’ল চতুৰ্থজন প্ৰধানমন্ত্ৰী যি এক দীঘলীয়া সময় কাৰ্যনিৰ্বাহ কৰিছে ৷

দৈনন্দিন বাৰ্তা ডেস্ক : কোৱাৰেণ্টাইনৰ পৰা মুক্তি পোৱা প্ৰত্যাগমন কৰা ভ্ৰমণকাৰীৰ ক’ৰোনা ভাইৰাছ সংক্ৰমণ হোৱাৰ কাৰণে ভূটানত ৰাষ্ট্ৰজুৰি লকডাউন ঘোষণা কৰিছে৷ দেশখনত থকা প্ৰায় ৭ লাখ ৫০ হাজাৰ লোকক ঘৰতে থকাৰ নিৰ্দেশ জাৰি কৰিছে চৰকাৰে৷ লগতে সকলো শিক্ষানুষ্ঠান, কাৰ্যালয় আৰু বাণিজ্যিক প্ৰতিষ্ঠান বন্ধ ঘোষণা কৰিছে৷ চৰকাৰৰ এক বিবৃতিত প্ৰকাশ যে এই লকডাউন পাঁচৰ পৰা ২১ দিনৰ বাবে বাহাল থাকিব৷ উল্লেখ্য যে ২৭ বছৰীয়া ভূটানীজ মহিলা এগৰাকী কুৱেটৰ পৰা ঘুৰি অহাৰ পাচত পৰীক্ষাত নিগেটিভ পোৱা গৈছিল যদিও কোৱাৰেণ্টাইন কৰা হৈছিল৷ কিন্তু কোৱাৰেণ্টাইনৰ পৰা মুক্ত কৰাৰ পাচত মহিলাগৰাকীক পৰীক্ষা কৰাত সোমবাৰে পজিটিভ ফলাফল পায়৷ বিশ্বাস কৰা মতে মহিলাগৰাকীয়ে ভূটানত ফুৰিছিল৷ উল্লেখ্য যে দেশখনৰ পৰ্যটন বিভাগে মাৰ্চ মাহৰ পাচৰে পৰা দেশখনৰ সীমান্ত বিদেশী পৰ্যটকৰ বাবে বন্ধ কৰিছিল৷ ক’ভিড-১৯ত আক্ৰান্ত এজন আমেৰিকান পৰ্যটকক চিকিৎসালয়ত ভৰ্ত্তি কৰাৰ পাচত এই সিদ্ধান্ত লোৱা হৈছিল৷ ভূটানত আক্ৰান্ত ১১৩ জন ভ্ৰমণকাৰীক কোৱাৰেণ্টাইন কৰা হৈছিল৷

দৈনন্দিন বাৰ্তা ডেস্ক : লক্ষ্য স্বচ্ছতা ৷ দিশৰ সৎ কৰদাতাক সন্মান জনোৱাৰ উদ্দেশ্যে বৃহৎ ঘোষণা কৰিছে প্ৰধানমন্ত্ৰী নৰেন্দ্ৰ মোডীয়ে৷ দেশজুৰি আৰম্ভ হ’ল ‘ট্রান্সপাৰেণ্ট টেক্সেচন, অনাৰিং দ্য অনেষ্ট’৷ অৰ্থাৎ ‘স্বচ্ছ কৰ ব্যৱস্থা, সততাৰ সম্মান’ প্রকল্প। চৰকাৰে লক্ষ্য কৰিছে, দেশৰ কৰ ব্যৱস্থাটোত স্বচ্ছতা আনি সৎ কৰদাতাই যাতে উপযুক্ত সন্মান পায় আৰু তেওঁলোক কোনো জটিলতাৰ মাজত নপৰে তাক নিশ্চিত কৰা৷ স্বাধীনতা দিৱসৰ আগেয়ে এই নতুন কৰ ব্যৱস্থা সূচনা কৰে প্ৰধানমন্ত্ৰীয়ে৷ বিত্ত মন্ত্ৰালয়ৰ দাবী, এয়া আয়কৰ আৰু ক’ৰপ’ৰ্ট কৰৰ সংস্কাৰৰ দিশত বৃহৎ পদক্ষেপ৷ আনহাতে কেন্দ্ৰৰ দাবী নতুন এই আয়কৰ ৰিটাৰ্ণ আৰু কৰ সমস্যা সমাধানত ‘ফেচলেছ’ ব্যৱস্থা অধিক শক্তিশালী হ’ব৷ নিজৰ কৰ আদানপ্ৰদানত হিচাপ ৰখাত অধিক সহজ হৈ পৰিব সৎ কৰদাতাৰ৷ এই প্ৰকল্প সূচনা মঞ্চত প্ৰধানমন্ত্ৰীয়ে কয়, দেশৰ সৎ কৰদাতাই ৰাষ্ট্ৰ নিৰ্মাণত বৃহৎ ভূমিকা লয়৷ দেশত সৎ কৰদাতাৰ জীৱন সহজ হ’লেই উন্নয়ন সম্ভৱ, দেশৰ বিকাশ সম্ভৱ৷ প্ৰধানমন্ত্ৰীয়ে লগতে দাবী কৰে যে বহু দিনৰ পৰা কৰ ব্যৱস্থাত সংস্কাৰৰ প্ৰয়োজন৷ কিন্তু আগতে সেয়া হোৱা নাছিল৷ বাধ্য হৈ বা চাপত পৰি লোৱা সিদ্ধান্তক সংস্কাৰ বুলি চেষ্টা চলোৱা হৈছিল৷ প্ৰধানমন্ত্ৰী নৰেন্দ্ৰ মোডীয়ে কয়, কৰ ব্যৱস্থা আমাৰ লক্ষ্য হোৱা উচিত দ্ব্যর্থহীন, কষ্টহীন আৰু ফেচলেছ৷ যোৱা ছবছৰে কৰ ব্যৱস্থাত এটা আমূল পৰিৱৰ্তন দেখিছে ভাৰতে৷ আমাৰ জটিলতা কমিছে আৰু স্বচ্ছতা বাঢ়িছে৷ আমাৰ কৰদাতাই বিশ্বাস অৰ্জন কৰিব পাৰিছে৷