ৰাহুল পাল, কৰিমগঞ্জ

কৰিমগঞ্জৰ কালিগঞ্জত সংঘটিত হয় এক মৰ্মান্তিক ঘটনা। ভূমিস্খলনত মাটিৰ তলত সলিল সমাধি ঘটিল ৬ গৰাকী লোকৰ। একেটা পৰিয়ালৰ ৫ গৰাকী সদস্যৰ লগতে আন এটা পৰিৱালৰ এগৰাকী। ঘটনা কৰিমগঞ্জৰ কালিগঞ্জ থানা এলাকাৰ ৰহিমপুৰ গাঁওৰ। যোৱা কেইদিন ধৰি নেৰানেপেৰা বৰষুণৰ ফলত মাটি খহি এই ঘটনা সংঘটিত হয়। মৃত লোকসকল ক্ৰমে আজিৰ উদ্দিন(৫৭), ৰাজিয়া বেগম(৪০) আফতাৰ হুছেইন(১০), আনুৱাৰ উদ্দিন(৭), তাহেৰা বেগম(৫) আৰু জয়নব বিবি(১৪)। মৃতকৰ মাজত তিনিগৰাকি শিশু সহ এগৰাকী মহিলাও আছে। ঘটনাৰ পাছত স্থানীয় ৰাইজে মাটি খুন্দি মৃতদেহ কেইটি উদ্ধাৰ কৰে এক্সিভেটৰৰ জৰিয়তে। ঘটনাৰ পিছত ঘটনাস্থলীত গৈ উপস্থিত হয় এছডিআৰএফ আৰু সদৰ থানাৰ আৰক্ষী। আৰক্ষীয়ে মৰণত্তৰ পৰীক্ষাৰ বাবে কৰিমগঞ্জ অসামৰিক হাস্পিতাললৈ মৃতদেহ কেইটা প্ৰেৰণ কৰে। ইফালে মৃতলোক সকলক উদ্ধাৰ কৰিবলৈ যাওঁতে আহত হৈছে প্ৰায় দহ গৰাকী লোক। লগতে দুখন কৈ ঘৰ মাটিৰ তলত সোমাই যোৱাৰ ফলত দুটাকৈ গৃহপালিত জন্তুৰ মৃত্যু হৈছে বুলি জানিব পৰা গৈছে।      ঘটোনাটো সংঘটিত হৈছে  পুৱতি নিশা আৰু এই ৬ গৰাকী সদস্য সকলো নিদ্ৰাৰত অৱস্থাত আছিল সেয়ে নিজকে ৰক্ষা কৰিব পৰা নোৱাৰিলে । ঘটনাকটোক লৈ সমগ্ৰ অঞ্চলটোত শোকৰ ছাঁ নামি আহিছে।

নগাঁও

 নগাঁও চহৰৰ আমিনপট্টিৰ এজন যুৱকৰ অস্বাভাৱিক মৃত্যুক কেন্দ্ৰ কৰি ৰহস্যৰ  সৃষ্টি হৈছে । প্ৰাপ্ত তথ্য মতে,আমিনপট্টিৰ ইমদাদ আহমেদ নামৰ যুৱকজন কালি সন্ধিয়া নিজ গৃহৰ পৰা ওলাই যোৱাৰ পিছত ঘৰলৈ ঘূৰি অহা নাছিল । আনহাতে আজি পুৱা যুৱকজনৰ মৃত্যুৰ সংবাদ তেওঁৰ পৰিয়ালৰলোকে আৰক্ষীৰ পৰা লাভ কৰে ।পাচত যুৱকজনৰ মাতৃয়ে চিকিৎসালয়লৈ গৈ ইমদাদৰ মৃতদেহ চিনাক্ত কৰে । আৰক্ষীয়ে মৃত যুৱকজনৰ পৰিয়ালক জনোৱা মতে নিশা যুৱকজনক নগাঁও চহৰৰ ইটাচালি অঞ্চলত পথৰ দাঁতিত অচেতন হৈ পৰি থকা অৱস্হাত দুজন লোকে উদ্ধাৰ কৰি  নগাঁও ভোগেশ্বৰী ফুকননী অসামৰিক চিকিৎসালয়ত  ভৰ্তি কৰায় যদিও নিশাই যুৱকজনৰ মৃত্যু ঘটে । আনহাতে যুৱকজনক কোনো লোকে  হত্যা কৰাৰ  সন্দেহত তেওঁৰ মাতৃয়ে আজি নগাঁও সদৰ আৰক্ষী থানাত এজাহাৰ দাখিল কৰে। কালি সন্ধিয়াৰ পিছতে ইমদাদে সাজি কাচি ৰ’জ নামৰ লগৰীয়া এজনৰ লগত ঘৰৰ পৰা ওলাই গৈছিল বুলি তেওঁৰ মাতৃয়ে জানিবলৈ দিয়ে ।  উক্ত যুৱকজনৰ লগত কেইমাহমান পূৰ্বে ইমদাদৰ সংঘাট হৈছিল আৰু পিছত যুৱকজনে ক্ষমা খুজি সংঘাটৰ ওৰ পেলাইছিল । ইপিনে মৰণোত্তৰ পৰীক্ষাৰ পাচত আজি বিয়লি ইমদাদৰ মৃতদেহ ঘৰলৈ অনাৰ পাচত আমিনপট্টি অঞ্চলত এক উতপ্ত পৰিস্থিতিৰ সৃষ্টি হয় । স্হানীয় একাংশ লোকে অঞ্চলটোৰ ইমৰোজ নামৰ যুৱকজনে ইমদাদক হত্যা কৰাৰ অভিযোগ তুলি পৰিস্থিতি অধিক উত্তপ্ত কৰি তোলে। একাংশ লোকে আনকি ইমৰোজৰ ঘৰলৈ  শিল ,ইটা দলিয়াই আক্ৰমনাত্মক হৈ পৰে। আনহাতে ঘটনাস্থলীত আৰক্ষী উপস্থিত হৈ পৰিস্থিতি নিয়ন্ত্ৰণৰ চেষ্টা চলাই যদিও একাংশলোকে আৰক্ষীক উদ্দেশ্যি শিল, ইটা দলিওৱাত ৰাজু আলি নামৰ এজন আৰক্ষী কনিষ্টবল আহত হয়। আনহাতে আৰক্ষীয়ে প্ৰথমতে লাঠি চালনা আৰু পাচত শূন্যলৈ গুলী চালনা কৰি পৰিস্থিতি নিয়ন্ত্ৰণৰ চেষ্টা চলায়। আৰক্ষীয়ে ইমৰোজ নামৰ যুৱকজনক আটক কৰি থানালৈ লৈ যায় । আনহাতে আৰক্ষী আৰু জিলা প্ৰশাসনৰ উচ্চপদস্থ বিষয়া ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে যদিও আমিনপট্টি অঞ্চলত বৰ্তমানেও চেপা উত্তেজনাই বিৰাজ কৰি আছে।

দিলীপ হাজৰিকা : নাজিৰা

আজি বিয়লি প্ৰায় ৩-৪৫ বজাত নাজিৰাৰ ওপৰৰে যোৱা এজাক প্ৰচণ্ড ধুমুহাই মহকুমাটোৰ প্ৰান্তে প্ৰান্তে বহু পৰিয়ালৰ ঘৰ-দুৱাৰ, গছ-গছনি ভাঙি বিস্তৰ ক্ষতিসাধন কৰে। নাজিৰা নগৰৰ সমীপৰ বৰবৰুৱা গাওঁ পঞ্চায়তৰ অন্তৰ্গত ৫ নং ৱাৰ্ডৰ ৰাতুল বৰগোহাঁই, ৰহদৈ গাওঁ পঞ্চায়তৰ ১ নং ৱাৰ্ডৰ অমৃত বৰগোঁহাইৰ ঘৰ সম্পূৰ্ণ কৈ ভাঙি পেলোৱাৰ উপৰি বিভিন্ন প্ৰান্তৰ বহু পৰিয়ালৰ ঘৰৰ টিংপাত এৰোৱাই নি বহু দূৰৈত পেলায়। তাৰোপৰি প্ৰান্তে প্ৰান্তে সৰু ডাঙৰ গছ-গছনি ভাঙি উঘালি যান-বাহন আৰু বৈদ্যুতিক টাৰত পৰাত বিস্তৰ ক্ষতিসাধন হয় । ইফালে মহকুমাটোৰ বিভিন্ন প্ৰান্তৰ বিদ্যুৎ সৰবৰাহ বন্ধ হৈ পৰিছে। এই ধুমুহাত ক্ষতিগ্ৰস্ত হোৱা পৰিয়াল সমূহৰ ক্ষয় – ক্ষতিৰ বুজলৈ তৎকালে সহায় তথা চৰকাৰী আচনি অনুসৰি সহায়ৰ হাত আগবঢ়াবলৈ নাজিৰা সমষ্টিৰ বিধায়ক তথা বিৰোধী দলপতি দেৱব্ৰত শইকীয়াই মহকুমা প্ৰশাসনক অনুৰোধ জনাইছে । আনহাতে মহকুমা প্ৰশাসন তথা ৰাজহ চক্ৰ বিভাগৰ তৰফৰ পৰা ক্ষতিসাধন হোৱা পৰিয়ালসমূহৰ ক্ষয় – ক্ষতিৰ বুজ লোৱা বুলি জানিব পৰা গৈছে ।