গেলেকী : নাজিৰা বিধানসভা সমষ্টি শক্তিশালী ভেটি স্বৰূপে দীৰ্ঘদিনে কংগ্ৰেছৰ দখলত থকা ৰাইজে প্ৰত্যক্ষ কৰিছে। অপেক্ষা নহয়, শাসকীয়ৰ বাবে গভীৰ প্ৰত্যাহ্বানৰ বিষয় হ’ব নাজিৰা সমষ্টিৰ পৰা কংগ্ৰেছৰ ভেটি উৎখাত কৰাটো। সমাগত ২০২১ চনৰ বিধান সভাৰ নিৰ্বাচনৰ বাবে কংগ্ৰেছৰ দুৰ্গ আখ্যা বিভিন্ন মহলৰ। সম্প্ৰতি ১০৪ নং নাজিৰা বিধান সভা সমষ্টিটো বিজেপি দলে দখল কৰাৰ বাবে কুচকাৱাজ আৰম্ভ কৰিছে৷ ইতিমধ্যে প্ৰাক্তন কেন্দ্ৰীয় ৰাজ্যিক ৰে’লমন্ত্ৰী ৰাজেন গোহাইঁ নাজিৰাত উপস্থিত হৈ জন সম্পৰ্ক ৰক্ষাৰ অভিযান চলাই গৈছে৷ সমান্তৰালভাৱে চৰাইদেউ জিলা। বিশিষ্ট সমাজকৰ্মী, প্ৰাক্তন শিক্ষক, প্ৰকৃতিপ্ৰেমী হিচাপে ধৰ্মেশ্বৰ কোঁৱৰে বিজেপিৰ হৈ সমষ্টিটোত বানপানী, লক ডাউনৰ সময়ত ঘৰে-ঘৰে গৈ সহায়ৰ হাত আগবঢ়োৱাৰ দৰে বিজেপিৰ যুৱ মৰ্চাৰ উপ সভাপতি ময়ূৰ বৰগোহাঁইয়েও সমষ্টিটোৰ বিভিন্ন ৰাইজক সহায়ৰ হাত আগবঢ়াই আহিছে ৷ তেনেদৰে শিমলুগুৰি নগৰ সমিতিৰ প্ৰাক্তন সভাপতি প্ৰাক্তন ৱাৰ্ড সদস্য ও বৰ্তমান শিৱসাগৰ জিলা ভাৰতীয় জনতা পাৰ্টিৰ সাধাৰণ সম্পাদক পলাশ পবন শইকীয়ায়ো সমষ্টিৰ বিভিন্ন ৰাইজৰ সহযোগত সমষ্টিটোৰ জনসাধাৰণৰ বাবে কাম কৰি আছে৷ প্ৰাক্তন মুখ্যমন্ত্ৰী প্ৰয়াত হিতেশ্বৰ শইকীয়াৰ ভাতৃ টংকেশ্বৰ শইকীয়াৰ পুত্ৰ পলাশ শইকীয়াৰ একাংশ কংগ্ৰেছ নেতা-কৰ্মীৰ লগত সু-সম্পৰ্ক থকাৰ বাবে কংগ্ৰেছক আঘাত দিব পাৰিব বুলি বিজেপিৰ লগতে একাংশ কংগ্ৰেছ কৰ্মীয়েও মন্তব্য কৰা দেখা গৈছে ৷ সংসদীয় নিৰ্বাচন, ত্ৰিপুৰাৰ নিৰ্বাচনত ওতঃপ্ৰোত ভাৱে জড়িত পলাশ শইকীয়া টিকটৰ দাবীদাৰ হিচাপে ৰাইজৰ আহ্বানত আত্মপ্ৰকাশ কৰিছে। যদিহে পলাশ শইকীয়াই দলীয় প্ৰাৰ্থীত্ব লাভ কৰে তেনেহ’লে এইবাৰ দুই ভাতৃৰ যুঁজ দেখিবলগীয়া হ’ব। উল্লেখ্য যে বিগত নিৰ্বাচনত কংগ্ৰেছৰ প্ৰাৰ্থী দেৱব্ৰত শইকীয়াই প্ৰায় ১৮হাজাৰ ভোটত বিজেপিৰ প্ৰাৰ্থী চাহ জনগোষ্ঠীৰ নেতা প্ৰহ্লাদ গোৱালাক পৰাস্ত কৰিছিল ৷ বিজেপিৰ সত্বেও প্ৰাৰ্থীত্ব কেন্দ্ৰীক সংঘাটৰ বাবে বিজেপি দল পৰাস্ত হোৱা বুলি প্ৰচাৰ হৈছিল। যদিও এইবাৰ পুনৰ বিজেপি দলত কেইবাগৰাকীও প্ৰাৰ্থীত্ব প্ৰয়াসী হোৱাত পুনৰ বিজেপি বিৰোধী দলৰ নেতা তথা কংগ্ৰেছৰ দেৱব্ৰত শইকীয়াক পৰাস্ত কৰাৰ ক্ষেত্ৰত যথেষ্ট প্ৰত্যাহ্বানৰ সন্মুখীন হ’ব শাসকীয় প্ৰাৰ্থী।

জামুগুৰিহাট :  চতিয়া সমষ্টিৰ জামুগুৰিহাটৰ দক্ষিণ-পশ্চিমাঞ্চলৰ চকীঘাটত আজি চৰকাৰী বেদখলমুক্ত ভূমি দখলক কেন্দ্ৰ কৰি এক উত্তপ্ত পৰিস্থিতিৰ সৃষ্টি হোৱাৰ লগতে একাংশ সন্দেহজনক লোকৰ আক্ৰমণত আৰক্ষী বিষয়া,ৰাজহ চক্ৰ বিষয়া সহিতে ১২ জনকৈ লোক আহত হোৱা ঘটনাই সমগ্ৰ আঞ্চলটোতেই তীব্ৰ প্ৰতিক্ৰিয়াৰ সৃষ্টি কৰিছে৷চৰ চাপৰি অঞ্চলৰ চৰকাৰী ভূমি একাংশ লোকে বেদখল কৰি বসবাস কৰি দখল কৰি থকা হাজাৰ হাজাৰ বিঘা ভূমি বিগত সময়ত চতিয়াৰ বিধায়ক পদ্ম হাজৰিকাৰ প্ৰচেষ্টাত শোণিতপুৰ জিলা প্ৰশাসনে উচ্ছেদ অভিযান চলাই বেদখলমুক্ত কৰিছিল৷পৰৱৰ্তী সময়ত বেদখলমুক্ত মাটিত ৰাজ্যৰ মূখ্যমন্ত্ৰী সৰ্বানন্দ সোনোৱালে নিজে ট্ৰেক্টৰ চলাই সেই ভূমি সমষ্টিৰ থলুৱা যুৱক যুৱতী,আত্ম সহায়ক গোট,কৃষি গোট তথা দল সংগঠণক কৃষি কাৰ্য্য সম্পন্ন কৰিবৰ বাবে  আনুষ্ঠানিকভাৱে মুকলি কৰি দিছিল৷যাৰ পৰিপ্ৰেক্ষিতত আত্মসহায়ক গোট,কৃষি গোট,থলুৱা যুৱক তথা দল সংগঠনক সেই ভূমি আজি পৃথক পৃথককৈ গটাই দিবৰ বাবে নদুৱাৰ ৰাজহ চক্ৰ বিষয়াৰ এটি দল সহিতে আৰক্ষী তথা প্ৰশাসনৰ লোক সেইস্থানত উপস্থিত হৈছিল৷কিন্তু ভূমি দখল কৰিবলৈ যোৱা লোকসকলৰ লগতে চমজি দিবলৈ যোৱা প্ৰশাসনৰ লোকক একাংশ সন্দেহযুক্ত দুৰ্বৃত্তৰ দলে হাতে হাতে জাঠি জোং,দাঁ,কোৰ লৈ বাধা প্ৰদান কৰাৰ লগতে আক্ৰমণ কৰিবলৈ উদ্যত হয়৷অৱশ্যে সন্দেহজনক লোকৰ এই আগ্ৰাসি  ৰূপক বাধা দিবলৈ চেষ্টা চলাওতেই সন্দেহজনক লোকৰ আক্ৰমণত জামুগুৰি আৰক্ষী চকীৰ ভাৰপ্ৰাপ্ত বিষয়া,নদুৱাৰ ৰাজহ চক্ৰ বিষয়া,চৰকাৰী মণ্ডল সহিতে ১২ জন লোক আঘাতপ্ৰাপ্ত হয়৷দুৰ্বৃত্তৰ আক্ৰমনত জামুগুৰি আৰক্ষী চকীৰ ভাৰপ্ৰাপ্ত বিষয়া প্ৰাঞ্জল কুমাৰ নাথে মুৰত গুৰুতৰভাৱে আঘাত পোৱাৰ লগতে,নদুৱাৰ ৰাজহ চক্ৰ বিষয়া আকাশদ্বীপ কাকতী,মণ্ডল মানস বৰাইও ভৰিত আঘাত পোৱাৰ উপৰিও স্থানীয় যুৱক বিষ্ণু বৰা,বুলু আহমেদ, প্ৰকাশ শইকীয়া,ম: ইমামুদ্দিনকে ধৰি ১২ জনকৈ লোক আহত হয়।পৰিস্থিতিৰ ভয়াবহতাৰ প্ৰতি লক্ষ্য ৰাখি আৰক্ষীয়ে শূণ্যলৈ গুলিচালনা কৰাতহে অৱশেষত সন্দেহজনক লোক সকল সেইস্থানৰপৰা আতৰি যায়৷খিলঞ্জীয়াৰ ওপৰত সন্দেহজনক লোকৰ আক্ৰমণৰ এই খবৰ বিয়পি পৰাৰ পাছতে ঘটনাস্থলীত চতিয়াৰ বিধায়ক পদ্ম হাজৰিকা উপস্থিত হৈ পৰিস্থিতি পৰ্য্যবেক্ষণ কৰাৰ লগতে স্হানীয় খিলঞ্জীয়াৰ ওপৰত হোৱা এই আক্ৰমণ দুৰ্ভাগ্যজনক আখ্যা দিয়াৰ লগতে আমাৰ জাতি,মাটি,ভেটি বচাবৰ বাবে এতিয়া ঐক্যবদ্ধতাৰে আগবাঢ়ি যাব লাগিব বুলি উল্লেখ কৰে।শোণিতপুৰ জিলাৰ আৰক্ষী অধীক্ষক মুগ্ধজ্যোতি মহন্ত,অতিৰিক্ত আৰক্ষী নোমল মাহাতুও ঘটনাস্হলীত উপস্থিত হৈ তদন্ত আৰম্ভ কৰাৰ লগতে দোষীক চিনাক্ত কৰি বিহিত ব্যৱস্থা গ্ৰহণ কৰা হ’ব বুলি উল্লেখ কৰে৷মনকৰিবলগীয়া যে জামুগুৰিহাটৰ দক্ষিণ পশ্চিম প্ৰান্তৰ চকীঘাট,লালেটাপু, মকুৱাচাপৰি,ভৰলীচাপৰিকে ধৰি  চতিয়া সমষ্টিৰ ভোটাৰ তালিকাত নাম নথকা চৰ অঞ্চলত একাংশ সন্দেহজনক লোকে চৰকাৰী ভূমি বেদখল কৰি থকাৰ পাছত সেই মাটি কিছুদিন পূৰ্বে শোণিতপুৰ জিলা প্ৰশাসনে উচ্ছেদ চলাই  বেদখলমুক্ত কৰিছিল।

মুদৈজান : নাগৰিকত্ব সংশোধনী আইন বিৰোধী আন্দোলনৰ অংশ হিচাপে সদৌ যোৰহাট জিলা ছাত্ৰ সন্থাৰ আহ্বানত টীয়ক আঞ্চলিক ছাত্ৰ সন্থা, শিমলুগুৰি মৌজা আছুৰ উদ্যোগত টীয়ক আঞ্চলিক চুতীয়া ছাত্ৰ সন্থা, তথা ৰাইজৰ সহযোগত টীয়কৰ জগদুৱাৰত যোৰহাট জিলা বিজেপিৰ উপ সভাপতি তথা টীয়ক পৌৰসভাৰ সদ্যপ্ৰাক্তন পৌৰপতি ৰফিক উজ জামানৰ বাসগৃহৰ সন্মুখত সামাজিক দূৰত্ব অটুট ৰাখি প্ৰতিবাদ সাব্যস্ত কৰে। শতাধিক ছাত্ৰ কৰ্মী তথা ৰাইজে অংশগ্ৰহণ কৰা প্ৰতিবাদী কার্যসূচীত প্ৰতিবাদকাৰীসকলে কা আমি নামনো, সৰ্বানন্দ সোণোৱাল মূর্দাবাদ, বিজেপি গ’ বেক, সাম্প্ৰদায়িক ৰাজনীতি নচলিব, ক’লা আইন বাতিল কৰক আদি ধ্বনি দি আকাশ বতাহ কঁপাই তোলে। কাৰ্যসূচীত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে অংশগ্ৰহণ কৰি কয়, কৰোনাৰ এই বিভীষিকাৰ সময়ত সামাজিক দূৰত্ব বজাই ৰাখি প্ৰতিবাদ কৰি অসমৰ মুখ্যমন্ত্ৰীজনক এটা কথা সোঁৱৰাই দিব বিচাৰিছোঁ সংগ্ৰামৰ মাজেৰে জাতি মাটি ভেটি সুৰক্ষাৰ শ্লোগান কৈ আজি মুখ্যমন্ত্ৰী হ’ল কিন্তু অসমৰ ৰাইজৰ আৱেগক ভৰিৰে মোহাৰি পেলোৱা কাৰ্যক ৰাইজে অনাগত ২১ ৰ নিৰ্বাচনত উচিত শিক্ষা দিব সেইটো স্পষ্ট। কাৰ্যসূচীত টীয়ক কৰ্মচাৰী পৰিষদৰ উপদেষ্টা কিশোৰ দাস, অধিবক্তা বিশ্বজিৎ নাথ, জ্ঞানপীঠ একাডেমীৰ সঞ্চালক সৌৰভ বৰা, কা বিৰোধী আন্দোলনৰ শ্বহীদ ৰাজেন বৰুৱাৰ পত্নী জোনমণি বৰুৱা, টীয়ক শাখা কবি সন্মিলনৰ সম্পাদক বিমান শইকীয়া, যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱা, টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা, সাধাৰণ সম্পাদক প্ৰীতমজ্যোতি শইকীয়া, শিমলুগুৰি মৌজা আছুৰ ভাৰপ্ৰাপ্ত সম্পাদক পবিত্ৰ বৰা, টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়া, কাৰ্যকৰী সভাপতি উজ্জ্বল সাধনিদাৰ, টীয়ক আছুৰ উপ সভাপতি পাপু কলিতা, ৰক্তিম হাজৰিকা, সহকাৰী সম্পাদক ভাস্কৰজ্যোতি গগৈ, দীপাংকৰ বেজবৰুৱী, শিক্ষা সম্পাদক বিতোপন পুদ্দাৰ, মুখ্য সাংগঠনিক সম্পাদক ৰূপক সৰকাৰ, সাংস্কৃতিক সম্পাদক আকাশ গগৈ, প্ৰচাৰ সম্পাদক দীপাংকৰ দাসৰ লগতে টীয়ক আঞ্চলিক ছাত্ৰ সন্থাৰ অন্তৰ্গত টীয়ক কেন্দ্ৰীয়, কলিয়াপানী, জগদুৱাৰ, বলমা, মুদৈজান, কাৱৈমাৰী, জাঁজীমুখ আদি শাখা ছাত্ৰ সন্থাৰ বহু ছাত্ৰ কৰ্মী উপস্থিত থাকে। আনহাতে টীয়ক আছুৰ সভাপতি ৰন্টু ভূঞাই ‘কা’ৰ বিৰুদ্ধে হবলগীয়া এই দীঘলীয়া সংগ্ৰামখনত টীয়কৰ ৰাইজে ছাত্ৰ সন্থাক প্ৰতিটো খোজত সহযোগিতা বিচাৰে আৰু অনাগত নিৰ্বাচনত এই জাতিদ্রোহীবোৰক পোলিয়ে পোখাই উচ্ছেদ কৰিবলৈ আহ্বান জনায়। ইফালে এই কাৰ্যসূচীত অংশগ্ৰহণ কৰি কা বিৰোধী আন্দোলনৰ শ্বহীদ ৰাজেন বৰুৱাৰ পত্নী জোনমণি বৰুৱাই কয়, দেশ আৰু জাতিৰ স্বাৰ্থত মোৰ স্বামীৰ মৃত্যুৰ পাছতো মই হতাশ হোৱা নাই, চৰকাৰে কা বাতিল নোহোৱা পৰ্যন্ত আমি সংগ্ৰাম কৰি যোৱাৰ কথা কয়।

নলবাৰী : কৰণা মহামাৰীৰ পিছতে এতিয়া বানপানীৰ সংহাৰী ৰূপে এতিয়া ৰাজ্য বিভিন্ন প্ৰান্তৰ সৰ্ব সাধাৰণ ৰাইজক সমস্যাৰ দিশলৈ থেলি পঠিয়াইছে। এনে পৰিস্থিতিৰ সময়ত নলবাৰী জিলাৰ স্বেচ্ছাসেৱী সংস্থা সন্ধানৰ তৰফৰ পৰা বানপীড়িত অঞ্চলত যোৱা কেবাদিন ধৰি একেৰাহে শিশুৰ বাবে পুষ্টিকৰ খাদ্য গাখীৰ, হৰলিক্স, মেগী, বিস্কুট, কেক, শিশুৰ বাবে পুষ্টিকৰ বিভাৰেজ আৰু মাস্ক বিতৰণ সেৱা চলাই থকা হৈছে। সন্ধান স্বেচ্ছাসেৱী সংস্থাৰ সাধাৰণ সম্পাদক তাজিমউদ্দিন আহমেদে জনোৱা মতে নলবাৰী জিলাৰ বৰভাগ অঞ্চলত ইতিমধ্যে বানপীড়িত অঞ্চলৰ প্ৰায় দুশ শিশুক শিশু খাদ্য বিতৰণ কৰিছে আৰু এই বিতৰণ সেৱা পৰ্যায়ক্ৰমে বিভিন্ন বানপীড়িত অঞ্চলৰ শিশুৰ মাজত অব্যাহত থাকিব। অন্যহাতে আনৰ ঘৰত কাম কৰি একমাত্ৰ ৭ বছৰীয়া পুত্ৰৰ সৈতে কোনোমতে জীৱন নিৰ্বাহ কৰা তথা সাম্প্ৰতিক বান পৰিস্থিতৰ কবলত দুৰ্ভোগ ভোগা বৰভাগৰ পাণ্ডুলা গাঁৱৰ অৰ্পনা মেধি নামৰ স্বামীহাৰা মহিলাগৰাকীক সন্ধান স্বেচ্ছাসেৱী সংস্থাটোৰ মাধ্যমেৰে অসম জাতীয়তাবাদী যুৱ-ছাত্ৰ পৰিষদ, নলবাৰী জিলা সমিতিৰ সাধাৰণ সম্পাদক নিৰোদ দাসে কিছু আৰ্থিক সাহায্য আগবঢ়োৱাৰ লগতে খাদ্য সামগ্ৰীও আগবঢ়ায়। উল্লেখযোগ্য যে স্বেচ্ছাসেৱী সংস্থাটোৱে ২০১৬ ৰ পৰা শিশুৰ বিকাশ আৰু সমাজত মানৱতাবাদ স্থাপিত কৰাৰ বাবে বিভিন্ন কাৰ্যসূচী চলাই আহিছে। শিশুৰ খাদ্য বিতৰণ কাৰ্যসূচী সফল কৰাত বিশেষ তৎপৰতা বহন কৰে সন্ধানৰ স্বেচ্ছাসেৱক ক্ৰমে পাৰবিন চুলতানা, জ্যোতিষ্মিতা শৰ্মা, জিয়াউল ৰহমান, পূজা তালুকদাৰ, মোস্তফা হ’ক, প্ৰীতম লহকৰ, ইৰছাদ আলী, চাজিদ আহমেদ আৰু ডিম্পল ডেকাই। বিতৰণ কাৰ্যসূচীটোত অংশ লয় কেবাগৰাকী সমাজ সচেতন যুৱক তথা সন্ধ‍ানৰ উপদেষ্টা আৰু শুভাকাংক্ষী ক্ৰমে নৱজিৎ চক্ৰৱৰ্তী, দেৰাজউদ্দিন আহমেদ, সঞ্জীৱ মেধি, জ্যোতিৰ্ময় ডেকা, মানৱ কলিতাই। সন্ধানৰ এই শিশুৰ খাদ্য বিতৰণ সেৱাত সহায়ৰ হাত আগবঢ়াইছে অসমৰ ভিন্ন প্ৰান্তৰ শুভাকাংক্ষীয়ে। সন্ধানৰ সাধাৰণ সম্পাদকে সহায়ৰ হাত আগবঢ়োৱা সকলোলৈ কৃতজ্ঞতা প্ৰকাশ কৰে আৰু সামাৰ্থ্যৱান সকলক বানাক্ৰান্ত ৰাইজলৈ সহায়ৰ হাত আগবঢ়াবলৈ আহ্বান জনায়।