গেলেকী : ভাৰতীয় সংবিধানৰ নীতি-নিৰ্দেশনা অনুযায়ী দেশ তথা ৰাজ্যৰ জনসাধাৰণৰ সুৰক্ষা আৰু জনতাৰ সম্পতি সুৰক্ষা দিয়াৰ নামত শপত বাক্য লোৱা অসম আৰক্ষীত চৰম বেমেজালি। শিৱসাগৰ জিলা অন্তৰ্গত নাজিৰা মহকুমা নাজিৰা আদৰ্শ আৰক্ষী থানাত অ’ চিৰ ‘আদৰ্শ’। থানাত বজাৰ মেলি দিছে বিষয়াই। গোচৰ দিলেও টকা, ৰিপ’ৰ্ট দিলেও টকা। নাজিৰাত সৰিয়হৰ ডুলিত ভূত। নামত নাজিৰা থানাখন আদৰ্শ থানা। কিন্তু এতিয়া থানাখনৰ ভাৰপ্ৰাপ্ত বিষয়াই কেতবোৰ নতুন ‘আদৰ্শ’ স্থাপন কৰিছে থানা খনত। প্ৰাপ্ত তথ্য ও ৰাজহুৱা অভিযোগ অনুযায়ী বিগত দীৰ্ঘদিন ধৰি থানা খনত ভাৰপ্ৰাপ্ত বিষয়া আৰু তেওঁৰ কেইজনমান অনুগতই কৰি পেলাইছে এটিয়েম। চৰকাৰী ধনত চলিব নোৱাৰা এই এচাম আৰক্ষী বিষয়াই কোনোবাই সহায় বিচাৰি থানালৈ আহিলেই এতিয়া আৰম্ভ হয় দৰ-দাম। শেহতীয়াকৈ পোহৰলৈ অহিছে লিগিৰীপুখুৰীৰ বাসিন্দা বুবুল আলী নামৰ লোকজনে তেওঁৰ গাড়ীখনৰ এক খেলিমেলি সন্দৰ্ভত থানাত তৰা গোচৰৰ কিছু ৰহস্য। সামান্তৰালভাৱে অ’ চিৰ বিশ্বস্থ সহঃকাৰী আৰক্ষী বিষয়া ৰাজীৱ গগৈয়ে আৰম্ভ কৰিলে দৰ-দাম। গোচৰীয়াই খাকী পোচাক ধাৰি ৰূপত কলংক সনা সহকাৰী আৰক্ষী বিষয়া ৰাজীৱ গগৈৰ কৰিলে ক’ল ৰেকৰ্ডিং। ওলাল জোলুঙাৰ মেকুৰী। বুঢ়া সম্বোধনেৰে অ’ চিৰ নামত গোচৰীয়াৰ পৰা সহকাৰী আৰক্ষী বিষয়া ৰাজীৱ গগৈয়ে দহ হাজাৰ টকা দাবী কৰাৰ অভিযোগ ভুক্তভূগীৰ। উভয় পক্ষ্যই গোচৰীয়াৰ বিৰুদ্ধে এটা গোচৰ তৰা আলম লৈ ভাবুকি, ধনদাবী কৰি উভয় পক্ষ্য তথা তাহাতৰ ওপৰত অ’ চিয়ে টাইট কেচ ঠেকি দিব বুলি ফ’নত ভাবুকি দিয়ে অভিযুক্ত সহঃকাৰী আৰক্ষী বিষয়া ৰাজীৱ গগৈয়ে। উৎকোচ দিলে গোচৰ টাইট কৰি বিপক্ষ্যক বিপদত পেলাব অ’ চিয়ে। দাবী কৰা ধন নিদিলে গোচৰীয়াৰহে বিপদ হ’ব। বিষয়াই মেলা বজাৰৰ নেতৃত্ব দিয়ে থানা খনৰ তিনি বিশ্বস্থ কাণ্ডাৰী ক্ৰমে দুই সহঃকাৰী আৰক্ষী বিষয়া সহ এগৰাকী মহিলা আৰক্ষী কনিষ্টবলে। উল্লেখ্য যে উক্ত তিনিগৰাকী অভিযুক্তৰ সৈতে ধনৰ লেনদেন মিলাৰ পাছতহে কথা পাতে দুৰ্নীতিগ্ৰস্ত থানা খনৰ ভাৰপ্ৰাপ্ত বিষয়া গৰাকীয়ে। এই অভিযোগ আমাৰ নহ’য়! এই অভিযোগ সহকাৰী আৰক্ষী বিষয়া আৰু গোচৰীয়াৰ। গোচৰীয়াৰ পৰা দাবী কৰা ধন সহঃকাৰী আৰক্ষী বিষয়া ৰাজীৱ গগৈয়ে সংগ্ৰহ কৰি অ’ চিক দিয়া বুলি মন্তব্য কৰে। এতিয়া বোলে অ’ চিৰ সৈতে গোচৰীয়াৰ নিৰাপদে আলোচনা হ’ব। গোচৰীয়া বুবুল আলী নামৰ লোকজনে সংবাদ-মাধ্যমক অভিযোগ দিয়া মতে ধন নিদিয়াৰ বাবে এজাহাৰ দাখিল কৰা দহ দিনৰ পাছতো তেওঁৰ গোচৰ পঞ্জীয়ন কৰা হোৱা নাই। কেৱল এটা বা দুটা গোচৰেই নহয়। সকলোতেই বজাৰ মেলি দিছে বিষয়াই। নাজিৰাবাসী কোনো লোকৰ কিবা সামগ্ৰী হেৰালে ৰিপ’ৰ্ট আনিবলৈকো এতিয়া ধন দিব লাগে। নহ’লে কাম নহয়। ৰিপ’ৰ্টৰ ধন সংগ্ৰহ কৰে থানা খনৰ জনৈক দাস উপাধিৰ মহিলা কনিষ্টবল গৰাকীয়ে। সঁচাকৈয়ে এই অ’ চি আমাৰ সমাজৰ বাবে এক ‘আদৰ্শ’। নাজিৰা আদৰ্শ আৰক্ষী থানা খনকে তেওঁ এতিয়া ‘আদৰ্শ’ কৰি পেলাইছে। সম্প্ৰতি নাজিৰা সমষ্টিৰ বিধায়ক তথা ৰাজ্যৰ বিৰোধী দলৰ দলপতি দেৱব্ৰত শইকীয়াই আৰক্ষীৰ এনেবোৰ কৰ্ম কাণ্ডত অতিষ্ঠ হৈ ছ’চিয়েল মিডিয়া ফেচবুকত নিজৰ প্ৰতিক্ৰীয়া প্ৰকাশ কৰাৰ লগতে এই সন্দৰ্ভত অসম চৰকাৰক জগৰীয়া কৰিছে। নাজিৰা মহকুমা অন্তৰ্গত আৰক্ষী বিষয়া সমূহে বিগত সময়ত কৰা দুৰ্নীতি বিষয়ে ২৪ জুলাই দিনা অসম আৰক্ষী সঞ্চালক প্ৰধান ভাস্কৰজ্যোতি মহন্তলৈ বিধায়ক দেৱব্ৰত শইকীয়াই এখনি পত্ৰ লিখি তেখেতৰ দৃষ্টি আকৰ্ষণ কৰাই। লগতে আৰক্ষীয়ে বিভিন্ন অনৈতিক কাম-কাজ চলাই সাধাৰণ ৰাইজক হাৰাশাস্তি কৰাৰ অভিযোগ তুলিছে। আনহাতে ভৰলুমুখ থানা আৰক্ষীয়ে এগৰাকী বিশেষভাৱে সক্ষম কিশোৰক তেওঁৰ পিতৃৰ লগত গৈ থকা অৱস্থাত মাৰধৰ কৰা সন্দৰ্ভতো নিজৰ প্ৰতিক্ৰীয়া প্ৰকাশ কৰিছে বিধায়ক দেৱব্ৰত শইকীয়াই।

দৈনন্দিন বাৰ্তা ডেস্ক : নিজৰ পচন্দত বিয়া কৰাব বিচাৰিছিল এগৰাকী কন্যাই ৷ তাৰ বিপৰীত স্থিতিত কন্যাৰ পিতৃ ৷ কন্যাগৰাকী নাবালিকা ৷ তাতে পাত্ৰ অপচন্দ পিতৃৰ ৷ সেয়ে বিয়া কিদৰে ভাঙিব তাকে লৈ পিতৃৰ চিন্তা ৷ কন্যাগৰাকীয়ে ৰেজিষ্টাৰ কৰি বিয়া কৰাৰ চিন্তাৰে পিতৃয়ে তৰিলে এক অদ্ভুদ ফন্দি ৷ শেষত ক’ৰোনা ভাইৰাছৰ কথা দোহাই দি কন্যাৰ বিয়া সাময়িকভাৱে ৰাখিলে মধ্যপ্ৰদেশৰ এজন ব্যক্তিয়ে ৷ ঘটনাটো মধ্যপ্ৰদেশৰ ধাণ্ডাউৱাৰ ৷ যোৱা সোমবাৰে ১৯ বছৰীয়া যুৱতীগৰাকীয়ি তেওঁৰ প্ৰেমিক আৰু বান্ধৱীসকলক লৈ জিলা আদালতত উপস্থিত হয় ৷ বিবাহ পঞ্জীয়ক বীৰেন্দ্ৰ ভাৰ্মাৰ ওচৰত প্ৰয়োজনীয় নথিপত্ৰ জমা দিয়ে৷ সেই সময়ত আদালতত উপস্থিত হ’ল কন্যাৰ পিতৃ ৷ তেওঁ বিবাহ পঞ্জীয়কক জনায় যে কন্যা ক’ৰোনাত আক্ৰান্ত৷ এতিয়া উপায় বিহীন৷ লগে লগে কন্যাক ঘৰলৈ পঠিয়াই দিলে বীৰেন্দ্ৰ ভাৰ্মাই ৷ উল্লেখ্য যে কন্যাৰ ক’ৰোনা পৰীক্ষা হ’ল যদিও ফলাফল এতিয়াও অহা নাই৷ অহা ১৪ দিন তেওঁক হোম আইছ’লেচনত ৰাখিবলৈ কৈছে স্বাস্থ্য বিভাগে ৷ ঘটনা সন্দৰ্ভত বীৰেন্দ্ৰ ভাৰ্মাই জনাই যে দুয়োয়েই নাবালক-নাবালিকা ৷ তেওঁলোকে বিয়া কৰাৰ বাবে মোৰ ওচৰলৈ আহিছিল৷ কিন্তু কন্যাৰ পৰিয়াললৈ চাই বুজা গ’ল তেওঁলোকে বিয়াখনত সমৰ্থন নকৰে ৷ সেয়ে কন্যা ক’ৰোনা আক্ৰান্ত বুলি বিয়াখন পিছুৱাই দিয়াৰ চেষ্টা কৰিলে৷ তেওঁ লগতে কয়, কন্যা ক’ৰোনাত আক্ৰান্ত বুলি শুনিবলৈ পাই আমাৰ একো কৰিবলৈ নাছিল ৷ তেওঁক ঘৰলৈ ঘূৰি যাবলৈ কোৱা হ’ল ৷ আদালতৰ কৰ্মীয়ে তেওঁক ঘৰলৈ ঘূৰাই পঠিয়ায়৷ কন্যাৰ পিতৃৰ এই বুদ্ধিক প্ৰশংসা কৰিছে বিভিন্নজনে৷ ছচিয়েল মিডিয়াত এই বিষয়টো সম্প্ৰতি ভাইৰেল হৈ পৰিছে ৷

ডিৰাক সীমান্ত : বিগত কেইবাদিনো ধৰি সমগ্ৰ ডিৰাক অঞ্চলত অব্যাহত আছে বিদ্যুতৰ সঘন লুকাভাকু। বিদ্যুতৰ সঘন কর্তনেৰে শক্তি বিভাগে এক নাৰকীয় যাতনা ভূগাই আহিছে অঞ্চলবাসীক। স্মৰ্তব্য যে, প্ৰতি বছৰেই গ্ৰীষ্মকালত শক্তি বিভাগে বিদ্যুৎ কৰ্তনৰ প্ৰতিযোগিতাত নামি পৰে। পৰম্পৰাগতভাৱে এই বছৰো শক্তি বিভাগে ডিৰাকৰ সমান্তৰালকৈ ৰাজ্যৰ বিভিন্ন প্ৰান্ততো সঘনাই লোডশ্বেডিং কৰি ৰাইজক যমৰ যাতনা বিহিছে। শাসনলৈ অহাৰ পাছতেই ৰাজ্যখনত ২৪ ঘণ্টাই বিদ্যুৎ যোগান ধৰাৰ প্ৰতিশ্ৰুতি দিয়া বিজেপি, অগপ আৰু বিপিএফ মিত্ৰজোঁট চৰকাৰখনে প্ৰতিশ্ৰুতি ৰখাত সম্পূৰ্ণৰূপে যে ব্যৰ্থ হৈছে এই কথা অঞ্চলবাসীৰ মাজত সৰৱ চৰ্চা চলিছে। উল্লেখযোগ্য যে, বাৰিষাৰ আগমণৰ লগে লগে সাধাৰণ এজাক কিনকিনিয়া বৰষুণ আহিলেই বিদ্যুৎ কৰ্তন কৰে বিভাগটোৱে। ৰাতিৰ ভাগত প্ৰতি ৫-১০ মিনিটৰ মূৰে মূৰে বিদ্যুৎ কৰ্তন হয় বুলি কলেও বঢ়াই কোৱা নহ’ব। অনাগত দিনত বিদ্যুৎ বিভাগৰ এনেধৰণৰ গাফিলটিক তথা অনিয়মীয়া যোগানৰ ক্ষেত্ৰত পৰিবৰ্তনৰ শ্ল’গান আখৈ ফুটা দি ফুটি থকা সোনোৱাল চৰকাৰে কেনেধৰণৰ ব্যৱস্থা গ্ৰহণ কৰিব সেয়াহে লক্ষ্যণীয় হ’ব।

দৈনন্দিন বাৰ্তা ডিজিটেল ডেস্কঃ ২০২১ চনৰ বিধানসভাৰ নিৰ্বাচনৰ পূৰ্বে কংগ্ৰেছ দলত বৃহত্‍ খহনীয়া। একেলগে পদত্যাগ কৰিলে ডিব্ৰুগড় জিলাৰ সভাপতি-সম্পাদক সহ মুঠ ৩৬ গৰাকী সক্ৰিয় NSUI কৰ্মীয়ে। দলৰ বিসম্বাদ আৰু শীৰ্ষ নেতৃত্বৰ কাম-কাজত অসন্তুষ্ট হৈ দলত্যাগ কৰিলে আটাইকেইজন নেতাই। সদ্য পদত্যাগী ডিব্ৰুগড় NSUIৰ নেতা কেইজনে কংগ্ৰেছ দলৰ বিৰুদ্ধে স্বজন-তোষণৰ অভিযোগ উত্থাপিত কৰিছে। সদ্য পদত্যাগী ডিব্ৰুগড় NSUIৰ সম্পাদক জয়দীপ গগৈয়ে সংবাদ মাধ্যমক জানিবলৈ দিয়া মতে, দলৰ পৰা অব্যাহতি লোৱা কৰ্মী সকলে বিজেপি দলত যোগদান কৰাৰ পূৰ্ণ সম্ভাৱনা আছে। একেলগে ৩৬ গৰাকী NSUI ৰ কৰ্মী দলটোৰ পৰা পদত্যাগ কৰাত এতিয়া একপ্ৰকাৰ শূন্য হৈ পৰিলে NSUI ৰ ডিব্ৰুগড় জিলা সমিতি। ফলত অনাগত নিৰ্বাচনত ডিব্ৰুগড় জিলাত কংগ্ৰেছ দলে বিপদৰ সন্মুখীন হ’ব সেয়া একপ্ৰকাৰ নিশ্চিত।