উজনি-মাজুলী : অসম চৰকাৰৰ সাংস্কৃতিক সঞ্চালকালয়ৰ উদ্যোগত প্ৰদান কৰা শিল্পী পেঞ্চনৰ পৰা আজিও বঞ্চিত হৈ আছে ৭৪ বছৰীয়া বিশিষ্ট সত্ৰীয়া শিল্পী প্ৰফুল্ল বৰা| মাজুলী জিলাৰ কমলাবাৰী পঞ্চায়তৰ অন্তৰ্গত বেজগাঁৱৰ নিবাসী বিশিষ্ট খোলবাদক, বৰগীতৰ প্ৰশিক্ষক প্ৰফুল্ল বৰাই আজিও অব্যাহত ৰাখিছে অসমীয়া সংস্কৃতিৰ প্ৰাণ-প্ৰতিষ্ঠাতা মহাপুৰুষ গুৰু দুজনাৰ অমিয়া সৃষ্টি বৰগীত, সত্ৰীয়া সংগীতৰ ব্যাপক চৰ্চা| নিচেই সৰুতে পিতৃহাৰা হোৱা প্ৰফুল্ল বৰাই নানা দুৰ্যোগৰ মাজতো সংগীত সাধনাৰ প্ৰতি আকৃষ্ট হয়| কম বয়সৰে পৰা পৰিয়ালৰ ভৰণ-পোষণৰ কথা চিন্তা কৰিবলগীয়া অৱস্থা এটা থকাৰ পিছতো গাঁৱৰ প্ৰসিদ্ধ বায়ন বিষ্টুৰাম শইকীয়াৰ অধীনত খোলৰ প্ৰশিক্ষণ গ্ৰহণ কৰে| একেজন গুৰুৰ তত্বাৱধানতে ঢোল বাদনৰো প্ৰশিক্ষণ গ্ৰহণ কৰি সময়ত জনাজাত ঢুলীয়া হিচাপে পৰিচিত হয়| প্ৰশিক্ষক শইকীয়াই প্ৰফুল্ল বৰাৰ আগ্ৰহ দেখি বাদ্যৰ প্ৰশিক্ষণৰ লগতে বৰগীত আৰু অন্য সংগীতৰো প্ৰশিক্ষণ প্ৰদান কৰে| সত্ৰীয়া সংগীতৰ বিশেষ শিল্পী আৰু ওজাপালি গায়ক শ্ৰীশ্ৰী ভোগপুৰ সত্ৰৰ বুঢ়াভকত প্ৰয়াত বকুল ওজাৰ তত্বাৱধানত সত্ৰীয়া সংগীতৰ শিক্ষা গ্ৰহণ কৰে| একে সময়তে এই সত্ৰৰে বিশিষ্ট গায়ন প্ৰয়াত লক্ষীৰাম নেওগ গায়নৰ অধীনতো সংগীত শিক্ষা গ্ৰহণ কৰে| ঢোল-খোল বা তালৰ শিক্ষা-বিদ্যাতে ক্ষান্ত নাথাকি প্ৰফুল্ল বৰাদেৱে তবলা আৰু হাৰমনিয়াম শিক্ষাৰ বাবে মাজুলীৰ বুঢ়াকলিতা গাঁৱৰ প্ৰয়াত চিদানন্দ গায়ন ওস্তাদৰ ওচৰত শিক্ষা গ্ৰহণ কৰি সময়ত তেৱোঁ ওস্তাদ হিচাপে স্বীকৃত হয়| প্ৰসিদ্ধ বায়ন বিষ্টুৰাম শইকীয়াৰ তত্বাৱধানত চৈধ্য প্ৰসংগৰ শিক্ষাৰে সত্ৰীয়া আৰ্হি-পৰম্পৰাৰে নাম-প্ৰসংগৰ শিক্ষা গ্ৰহণ কৰি সময়ত নতুনচাম শিকাৰুক ইয়াৰ শিক্ষা প্ৰদান কৰি আছে| সম্প্ৰতি, অঞ্চলৰ সমীপৰ আইদেউ সন্দিকৈ ৰঙ্গমঞ্চত ৰাস মঞ্চায়ণত শিল্পীসকলক সত্ৰীয়া নৃত্যৰ গীতৰ প্ৰশিক্ষণ, অংকীয়া নাটৰ প্ৰশিক্ষণ প্ৰদান কৰি আহিছে| অঞ্চলৰ প্ৰায় সকলো সাংস্কৃতিক অনুষ্ঠানৰ লগতে কল্পতৰু কৃষ্টিসংঘ, বুঢ়া কলিতা জনগোষ্ঠীয় ৰূপালী কৃষ্টি সংঘ, কমাৰগাঁও, শঙ্কৰদেৱ কলা-কৃষ্টি কেন্দ্ৰ, কমাৰগাঁও ইত্যাদিত নতুন প্ৰজন্মক সত্ৰীয়া সংস্কৃতিৰ শিক্ষা দান কৰি আহিছে| শ্ৰীশ্ৰী ভোগপুৰ সত্ৰৰ ৰঙ্গমঞ্চৰ স্থায়ী শিল্পী হিচাপে বৰ্তমানো সেৱা আগবঢ়াই অহা প্ৰফুল্ল বৰাই অসমৰ বিভিন্ন মঞ্চ-সাংস্কৃতিক অনুষ্ঠানত নিজৰ শিল্পীসত্বাৰ পৰিচয়, বিকাশ কৰাৰ লগতে প্ৰশিক্ষণো প্ৰদান কৰি আহিছে| বিশেষকৈ তিনিচুকীয়া জিলাৰ সদৰ অঞ্চল তুলসীৰাম পথ নামঘৰত কেইবা বছৰো গায়ন-বায়ন, বৰগীত, দিহানাম, প্ৰসংগীয়া নামৰ প্ৰশিক্ষণ প্ৰদান কৰি শিল্পী গৰাকীৰ অনবদ্য প্ৰতিভা বিকাশ কৰাৰ লগতে অসমত মাজুলীৰ সাংস্কৃতিক সুষমা বিলাই আহিছে| সমগ্ৰ অসমতে প্ৰসংগীয়া নামৰ অন্যতম এজনা শ্ৰেষ্ঠ শিল্পী বুলি পৰিচিত প্ৰফুল্ল বৰাক বিভিন্ন অনুষ্ঠান-প্ৰতিষ্ঠানৰ পৰা সংবৰ্ধনা জনোৱা হৈছে| জীৱনৰ ভাটী বয়সতো শিল্প সাধনাৰে গুৰু দুজনাৰ অমিয়া সৃষ্টিক নতুন প্ৰজন্মৰ মাজত বিলাই ফুৰা, গীত-বাদ্যৰে উদ্বুদ্ধ কৰি অহা প্ৰফুল্ল বৰা আজিও চৰকাৰৰ দৃষ্টিত নপৰাতো পৰিতাপৰ কথা| চৰকাৰী শিল্পী পেঞ্চনৰ আওতালৈ আনিবলৈ চৰকাৰক অনুৰোধ জনাইছে শ্ৰী শ্ৰী ভোগপুৰ সত্ৰৰ সত্ৰাধিকাৰ দত্তদেৱ গোস্বামী প্ৰমুখ্যে মাজুলীৰ বিশিষ্ট সংগীত পৰিচালক, সংগঠক দীপক বৰুৱা, বিশিষ্ট সংগীত প্ৰশিক্ষক ধ্ৰুৱজ্যোতি বৰা, সংগীত নাটক অকাডেমী বঁটা প্ৰাপক মানিক বৰা বৰবায়ন প্ৰমুখ্যে শিল্পীপ্ৰাণ ৰাইজে| সকলো সচেতন ৰাইজে চৰকাৰৰ এক হিতৈষী পদক্ষেপৰ দ্বাৰা প্ৰফুল্ল বৰা দেৱক শিল্পী পেঞ্চন বাবে মনোনীত কৰিবলৈ অনুৰোধ জনাইছে|
কানপুৰৰ কাষত গাড়ী দুৰ্ঘটনা : আৰক্ষীৰে ‘সংঘৰ্ষ’ত নিহত দুৰ্ধৰ্ষ অপৰাধী বিকাশ ডুবেৰ ৷
দৈনন্দিন বাৰ্তা ডেস্ক :
মধ্যপ্রদেশৰ উজ্জয়িনীৰ এটা মন্দিৰৰ পৰা গ্ৰেপ্তাৰ হোৱা গেংষ্টাৰ বিকাশ ডুবেক আৰক্ষীয়ে কানপুৰলৈ আনিছিল ৷ কিন্তু কানপুৰ পোৱাৰ আগেয়ে শুকুৰবাৰে আৰক্ষীৰ সৈতে হোৱা সংঘৰ্ষত বিকাশৰ মৃত্যু হয় ৷ এই সংঘৰ্ষক লৈ ইতিমধ্যে বিভিন্ন প্ৰশ্ন উদয় হৈছে৷ আৰক্ষীয়ে দাবী কৰা মতে ৰাষ্ট্ৰীয় ঘাইপথেৰে যোৱাৰ সময়ত আৰক্ষীৰ কনভয়ৰ যি গাড়ীত বিকাশ আছিল সেই গাড়ীখন দুৰ্ঘটনাত পতিত হৈ বাগৰি উল্টা হৈ পৰে ৷ তেতিয়া এজন আৰক্ষীৰ পিষ্টল টানি আনি বিকাশে পলায়নৰ চেষ্টা কৰে৷ আৰক্ষীয়ে তেতিয়া বিকাশক আত্মসমৰ্পণ কৰিবলৈ কয় ৷ কিন্তু আত্মসমৰ্পণৰ পৰিৱৰ্ত্তে বিকাশে গুলী চালনা কৰে৷ আত্মৰক্ষাৰ বাবে আৰক্ষীয়েও গুলী চলায় বুলি আৰক্ষীয়ে দাবী কৰে ৷ কানপুৰ আৰক্ষীৰ শীৰ্ষ বিষয়া এজনে জনোৱা মতে গাড়ী দুৰ্ঘটনা হওঁতেই পিস্তল লৈ পলাবলৈ চেষ্টা কৰে বিকাশ ডুবেয়ে ৷ আৰক্ষীয়ে বিকাশক আত্মসমৰ্পণ কৰিবলৈ কৈছিল ৷ কিন্তু অপৰাধীটোৱে গুলী চালনাহে কৰে৷ বাধ্য হৈ আৰক্ষীয়ে গুলী চলাব লগা হয় ৷ আৰক্ষীৰ গুলীত গুৰুতৰভাৱে আহত হোৱাৰ পাছত বিকাশক চিকিৎসালয়লৈ নিয়া হয় ৷ তাতেই অপৰাধীটোক চিকিৎসকে মৃত ঘোষণা কৰে ৷ আনহাতে কানপুৰৰ আৰক্ষী মহাপৰিদৰ্শক মোহিত আগৰৱালাই জনায় যে এই সংঘৰ্ষত চাৰিজন আৰক্ষী আহত হয় ৷ উল্লেখ্য যে যোৱা সপ্তাহত কানপুৰৰ কাষৰ ভিকৰু গাঁৱত বিকাশ ডুবেক ধৰিবলৈ যাওতে এজন ডিএছপিসহ আঠজন আৰক্ষীৰ মৃত্যু হৈছিল ৷ তাৰ পাছত কানপুৰৰ ডনক গ্ৰেপ্তাৰ কৰিবলৈ চলিছিল এক নাটক ৷ অৱশেষত বৃহস্পতিবাৰে উজ্জয়িনীৰ মহাকাল মন্দিৰৰ পৰা অপৰাধীটোক গ্ৰেপ্তাৰ কৰে ৷ গ্ৰেপ্তাৰৰ পাছত উত্তৰ প্ৰদেশলৈ ঘূৰাই অনাৰ সময়তে এই ঘটনা ঘটে৷ ইপিনে বিকাশৰ গ্ৰেপ্তাৰৰ পাছত বিভিন্ন মহলত বহু প্ৰশ্ন উত্থাপন হৈছিল ৷ আৰক্ষীৰে সংঘৰ্ষত মৃত্যু হোৱাৰ পাছত আন বহু প্ৰশ্ন উত্থাপন হৈছে ৷ কি দৰে বিকাশ থকা গাড়ীখনে দুৰ্ঘটনা কৰিলে সেয়া জানিব পৰা নাই ৷ অপৰাধীটোক হাতকেয়াৰ লগোৱা নাছিল নেকি ? সেই কথা জানিব পৰা নাই ৷ ইয়াৰ পাছত বিকাশৰ মৃত্যুক লৈ উত্তৰ প্ৰদেশৰ চৰকাৰক লক্ষ্য কৰি বিৰোধী পক্ষই বিভিন্ন টুইট কৰিছে ৷ সমাজবাদী পাৰ্টিৰ নেতা অখিলেশ যাদৱে লিখিছে, আচলতে এই গাড়ী উল্টা হোৱা নাই ৷ এই গাড়ী উল্টি খাই নোযোৱা হ’লে চৰকাৰেই উল্টি খালেহেতেন ৷ কংগ্ৰেছ নেতা দিগ্বিজয় সিঙে লিখিছে, আমি যিটো সন্দেহ কৰিছিলো সেইটো ঘটিল ৷ বিকাশ ডুবেৰ সৈতে কোনো ৰাজনৈতিক নেতা বা আৰক্ষী বিষয়া জড়িত আছিল সেয়া জনা নহ’ব ৷
ডুমডুমা ৰাজহ চক্ৰ বিষয়া কাৰ্যালয় সন্মুখত ধৰ্ণা সদৌ মৰাণ ছাত্ৰ সন্থাৰ ।
ডিৰাক সীমান্ত : মৰাণ জনগোষ্ঠীক জনজাতিকৰক, ষষ্ঠ অনুসূচীভুক্ত স্বায়ত্বশাসন প্ৰদান, শেহতীয়াকৈ ৰাজ্যিক কেবিনেটে জাৰী কৰা ভূমি নীতি অধ্যাদেশ-২০২০ বাতিল আৰু অত্যাৱশ্যকীয় সামগ্ৰীৰ মূল্যবৃদ্ধি ৰোধ কৰাৰ দাবীত আজি সদৌ মৰাণ ছাত্ৰ সন্থাৰ ডিৰাক, কাকপথাৰ, ডুমডুমা, তালাপ-কৰ্দৈগুৰি আঞ্চলিক সমিতিৰ যৌথ উদ্যোগত কেন্দ্ৰীয় সমিতিৰ নিৰ্দেশ মৰ্মে তিনিচুকীয়াৰ জিলাৰ ডুমডুমা ৰাজহ চক্ৰ বিষয়াৰ কাৰ্যালয় সন্মুখত ধৰ্ণা কাৰ্যসূচী ৰূপায়ণ কৰে। “মৰাণ জনগোষ্ঠীক জনজাতিকৰণ প্ৰদান কৰক”, “বিজেপি চৰকাৰৰ কাম নাই”, “বিজেপি গ’বেক”, “বিজেপি চৰকাৰ হুঁচিয়াৰ” আদি বিভিন্ন শ্লোগানেৰে ডুমডুমা ৰাজহ চক্ৰ বিষয়াৰ কাৰ্যালয় চৌহদৰ আকাশ বতাহ কঁপাই তোলে। কাৰ্যসূচীটোত উপস্থিত থাকে সদৌ মৰাণ ছাত্ৰ সন্থাৰ কেন্দ্ৰীয় সমিতিৰ ভাৰপ্ৰাপ্ত সভাপতি দিলীপ মৰাণ, উপ সভাপতি হেম বৰুৱা, সাধাৰণ সম্পাদক নৱ মৰাণ, সহকাৰী সাধাৰণ সম্পাদক হেমন্ত চুতীয়া, আলোচনী সম্পাদক গিৰীণ মৰাণ, ডিৰাক আঞ্চলিক সমিতিৰ উপদেষ্টা কুলজিত মৰাণ, সভাপতি চৌবিক মৰাণ, উপ সভাপতি ভীমন্ত মহন্ত, সম্পাদক প্ৰশান্ত মৰাণ, কাকপথাৰ আঞ্চলিক সমিতিৰ সভাপতি মৃদুল দহোতিয়া, ডুমডুমা আঞ্চলিক সমিতিৰ সভাপতি থমেন মৰাণ, তালাপ কৰ্দৈগুৰি আঞ্চলিক সমিতিৰ সম্পাদক শিৱ বৰুৱাৰ লগতে কেউখন আঞ্চলিক সমিতিৰ শতাধিক কৰ্মকৰ্তা।
খৈৰাবাৰীত সদৌ বিটিচি ব্ৰাহ্মণ যুৱ পৰিষদৰ সংবাদমেল । অতি শীঘ্রেই বেগম জান ধাৰাবাহিকৰ সম্প্ৰচাৰ বন্ধ কৰক নহ’লে আইনমুখী হ’ব বিটিচি ব্ৰাহ্মণ যুৱ পৰিষদ : গোস্বামী।
টংলা : সমগ্র বিটিচি অঞ্চলৰ ব্ৰাহ্মণসকলক প্ৰতিনিধিত্ব কৰা ব্ৰাহ্মণ সকলৰ একমাত্র সামাজিক অনুষ্ঠান সদৌ বিটিচি ব্ৰাহ্মণ যুৱ পৰিষদৰ কেন্দ্রীয় নেতৃত্বৰ উপস্থিতিত শুকুৰবাৰে খৈৰাবাৰীত এক সংবাদমেল সম্বোধন কৰে বিটিচি ব্ৰাহ্মণ যুৱ পৰিষদৰ কেন্দ্রীয় সভাপতি তীৰ্থ ৰঞ্জন গোস্বামীয়ে। সংবাদ মেলত অসমত বৰ্তমান ব্যাপকভাৱে সামাজিক মাধ্যমত চৰ্চা হৈ থকা ৰেঙনী টিভিৰ ধাৰাবাহিক (বেগম জান)ৰ সন্দৰ্ভত তীব্র ক্ষোভ প্রকাশ কৰি সভাপতি গোস্বামীয়ে কয় যে অসমত বসবাস কৰা সকলো হিন্দু-মুছলমানৰ মাজত যি ভাতৃত্ববোধৰ সম্বন্ধ আছে তাক এচাম দুষ্ট চক্ৰই বিনষ্ট কৰিবৰ বাবে ষড়যন্ত্রত লিপ্ত হৈছে। বৰ্তমান অসমৰ আগশাৰীৰ কেইবাখনো বাতৰি কাকতত প্ৰকাশিত বাতৰি অনুসৰি কেইবাগৰাকীকৈ হিন্দু ভনী প্ৰতাৰণাৰ বলি হৈছে। এই জটিল সময়ত কিছু ঠাইত এনে বিষয়বোৰ গা কৰি উঠিছে আৰু কিছু ঠাইত এনে সমস্যাবোৰ বেয়া দিশলৈকে গতি কৰিছে, ঠিক তেনে সময়তে যোৱা ৬ জুলাই ২০২০ৰ পৰা অসমীয়া মনোৰঞ্জন ধৰ্মী চেনেল ৰেঙনী টিভিয়ে “বেগম জান” নামৰ এখন নতুন ধাৰাবাহিকৰ আৰম্ভণি কৰিছে য’ত হিন্দু সমাজৰ আৰাধ্য দেৱতা গণেশক দলিয়াই অপমান কৰাৰ লগতে এগৰাকী হিন্দু ব্ৰাহ্মণ কুলৰ ছোৱালীৰ কাহিনী উপস্থাপন কৰি অসমৰ সমগ্র হিন্দু আৰু মুছলমানৰ মাজত বিষবাষ্প বিয়পাব বিচাৰিছে। অনৈতিকভাৱে হিন্দু বিৰোধী বিষয়বোৰ প্ৰচাৰ কৰি সনাতন হিন্দু ধর্মৰ ভনীসকলক বিপথে পৰিচালিত কৰিব বিচাৰিছে তাক বিটিচি ব্ৰাহ্মণ যুৱ পৰিষদৰ পৰা তীব্র ভাষাৰে গৰিহণা দিয়ে লগতে ৰেঙনী চেনেলক সকীয়াই দিয়ে যে অতি শীঘ্রেই বেগম জান ধাৰাবাহিকৰ সম্প্ৰচাৰ বন্ধ কৰক নহ’লে বিটিচি ব্ৰাহ্মণ যুৱ পৰিষদে আইনি ব্যবস্থা গ্রহণ কৰিবলৈ বাধ্য হ’ব।
ক’ৰোনাতকৈ বেছি মানুহ মৃত্যু অনাহাৰ, দৰিদ্ৰতাত : এপ্ৰিলত ক’ৰোনত ১০ হাজাৰ, অনাহাৰত প্ৰতিদিনে ১২ হাজাৰৰ মৃত্যু ৷
দৈনন্দিন বাৰ্তা ডেস্ক :
সমগ্ৰ বিশ্ব ক’ৰোনাৰ আতংকত ত্ৰস্তমান ৷ এই ভাইৰাছত বহুলোকৰ ইতিমধ্যে মৃত্যু হৈছে ৷ কিন্তু ক’ৰোনাত যিমান সংখ্যক লোকৰ মৃত্যু হৈছে তাতকৈ ভয়াৱহ দৰিদ্ৰতা আৰু ক্ষুধাত বেছি মানুহৰ মৃত্যু হৈছে ৷ ক’ৰোনাক ৰোধ কৰিবলৈ বিভিন্ন দেশে বহু পদক্ষেপ গ্ৰহণ কৰিছে৷ আনহাতে বিশ্বৰ লাখ লাখ মানুহ তীব্ৰ দৰিদ্ৰ হৈ ভোগ কৰিছে বুলি সতৰ্ক কৰি দিছে আন্তর্জাতিক খাদ্য সুৰক্ষা বিষয়ক স্বেচ্ছাসেৱী সংস্থা অক্সফামে ৷ দৰিদ্ৰ বিষয়টোক গুৰুত্ব নিদিলেও ক’ৰোনাতকৈ বেছি মানুহ অনাহাৰত মৃত্যু হৈছে বুলি আশংকা কৰিছে এই সংস্থাটোৱে ৷ সংক্রমণ ৰোধ কৰিবলৈ লকডাউন দিয়াত মানুহৰ খাদ্য সমস্যা হৈছে ৷ বিশ্বত বহু মানুহে কাম হেৰুৱাইছে ৷ আৰ্থিকভাৱে দুৰ্বল দেশবোৰত খাদ্য সৰবৰাহ ব্যাহত হৈছে ৷ ফলত তীব্ৰ খাদ্য সংকট হৈছে ৷ যুদ্ধবিধ্বস্ত য়েমেনত দুই তৃতীয়াংশ মানুহ চৰম দাৰিদ্ৰতাৰ মাজত আছে ৷ সেই দেশত কোনো অৰ্ধাহাৰ আৰু কোনো অনাহাৰত দিন কটাইছে ৷ আফগানিস্তানৰ পৰিস্থিতি দিনক দিনে বেয়াৰ দিশলৈ গৈছে ৷ এইখন দেশৰ ১০ লাখ মানুহ দুৰ্ভিক্ষৰ কৱলত পৰিছে ৷ অক্সফামৰ প্ৰতিবেদনত এই তথ্য পোহৰলৈ আহিছে ৷ যোৱা বছৰ ছেপ্টেম্বৰ মাহত আফগানিস্থানত ২৫ লাখ মানুহ দুৰ্ভিক্ষৰ কৱলত পৰিছিল ৷ এই বছৰ মে’ মাহত সেই সংখ্যা বাঢ়ি ৩৫ লাখ হয়গৈ ৷ যোৱা এপ্ৰিল মাহত বিশ্বত ক’ৰোনা ভাইৰাছত আক্ৰান্ত হৈ ১০ হাজাৰ মানুহৰ মৃত্যু হৈছিল ৷ কিন্তু ক’ৰোনাৰ পৰিস্থিতিৰ মাজতে প্ৰতিদিনে ১২ হাজাৰ মানুহ অনাহাৰত মৃত্যু হৈছে বুলি অক্সফামৰ প্ৰতিবেদনত প্ৰকাশ ৷ আনহাতে কংগু, ভেনিজুৱেলা, আফ্ৰিকাৰ ইথিওপিয়া, ছুদান, দক্ষিণ ছুদান, মধ্য প্ৰাচ্যৰ ছিৰিয়া আৰু কেৰিবিয়ান দ্বীপপুঞ্জৰ হাইতিৰ দৰে দেশ বৰ্তমান চূড়ান্ত দৰিদ্ৰতাৰ কেন্দ্ৰ বিন্দুত পৰিণত হৈছে বুলি অক্সফামে জনাইছে ৷
বৃহৎ নদীবান্ধৰ সামগ্ৰী কঢ়িয়াই নিয়া তিনিখনকৈ গাড়ী জামুগুৰিহাটত জব্দ কৰিলে ছাত্ৰ সন্থাই।
জামুগুৰিহাট : সোৱনশিৰি নদীৰ ওপৰত গেৰুকামুখত নিৰ্মীয়মান হৈ থকা বৃহৎ নদীৰ বাবে সামগ্ৰী কঢ়িয়াই নিয়া তিনিখনকৈ ট্ৰাক কালি সন্ধিয়াৰ ভাগত সদৌ জামুগুৰি ছাত্ৰ সন্থাই জব্দ কৰিবলৈ সক্ষম হয়। লকডাউনৰ সুযোগ গ্ৰহণ কৰি বৃহৎ নদীবান্ধ নিৰ্মাণ প্ৰতিষ্ঠানটোৱে পশ্চিম বংগৰ পৰা গোপনে গেৰুকামুখলৈ সৰবৰাহ কৰা এই সামগ্ৰীসমূহ জামুগুৰিহাটৰ ১৫ নং ৰাষ্ট্ৰীয় ঘাইপথত শোণিতপুৰ জিলা ছাত্ৰ সন্হাৰ সভাপতি অভিজিৎ নাথৰ নেতৃত্বত ছাত্ৰ সন্হাৰ দলটোৱে জব্দ কৰে। ঘটনাস্থলিত বৰ্তমান জামুগুৰি আৰক্ষী উপস্থিত হৈ পৰিস্থিতি নিয়ন্ত্ৰণ কৰাৰ লগতে বৃহৎ নদীবান্ধৰ সামগ্ৰীসমূহ নিজৰ কবজাত আনিবলৈ সক্ষম হয়। ইফালে শোণিতপুৰ জিলা ছাত্ৰ সন্থাৰ সভাপতি অভিজিৎ নাথে লকডাউনৰ সময়ছোৱাত এইদৰে বৃহৎ নদী বান্ধৰ বাবে সামগ্ৰী কঢ়িয়াই নিয়া কাৰ্যৰ বাবে বৃহৎ নদী বান্ধ নিৰ্মাণ প্ৰতিষ্ঠানটোৰ লগতে শাসকীয় চৰকাৰখনক দোষাৰোপ কৰে।
আয়ুর্বেদৰ জৰিয়তে ক’ৰোনাৰ বিৰুদ্ধে যুঁজ আমেৰিকাৰ : সংগী ভাৰত ৷
দৈনন্দিন বাৰ্তা ডেস্ক :
এইবাৰ আয়ুর্বেদৰ জৰিয়তে ক’ৰোনাৰ বিৰুদ্ধে যুঁজ কৰিব আমেৰিকাই ৷ সংগী হ’ব ভাৰত ৷ আমেৰিকাত আয়ুর্বেদিক ঔষধৰ সূত্ৰ (ফৰ্মূলা) পৰীক্ষা হ’ব বুলি জনালে দেশখনত নিযুক্ত ভাৰতীয় ৰাষ্ট্রদূত তৰণজিৎ সিং সান্ধুৱে ৷ সেই পৰীক্ষাত আছে দুয়োখন দেশৰ বিজ্ঞানী ৷ ক’ৰোনাক হৰুৱাবলৈ এতিয়াও উপায় ওলোৱা নাই ৷ কিন্তু বিশ্বজুৰি এই ৰোগ ৰোধ কৰিবলৈ আয়ুৰ্বেদ ব্যৱহাৰ কৰা হৈছে ৷ সুফল পোৱা গৈছে ৷ এইবাৰ ভাৰতৰ পথত আমেৰিকাতো ক’ৰোনা ৰোগীৰ ওপৰত আয়ুৰ্বেদ পৰীক্ষামূলক প্ৰয়োগ কৰা হৈছে ৷ দেশত ক’ৰোনা চিকিৎসাত আয়ুর্বেদিক থেৰাপিত সন্মতি দিছে কেন্দ্ৰীয় স্বাস্থ্য মন্ত্ৰালয়ে ৷ আয়ুস মন্ত্ৰালয়ৰ তত্ত্বাৱধানত আয়ুর্বেদিক উপাদানৰ পৰীক্ষাৰ বাবে তৈয়াৰ হৈছে টাস্ক ফ’ৰ্চ ৷ দেশৰ ক্লিনিকেল ট্ৰায়েল ৰেজিষ্ট্ৰিত ১৯ বিধ আয়ুর্বেদিক উপাদানৰ পৰীক্ষামূলক প্রয়োগৰ বাবে অনুমোদন দিয়া হৈছে ৷ এইবাৰ সেই ট্ৰায়েল হ’ব আমেৰিকাত৷ এই বিষয়ি টুইট কৰিছে ৰাষ্ট্রদূত তৰণজিৎ সিং সান্ধুৱে ৷ তেওঁ লিখিছে, ক’ৰোনা ৰোধত যৌথভাৱে কাম কৰিব ভাৰত আৰু আমেৰিকাৰ বিজ্ঞানীয়ে ৷ ক’ভিড সংক্ৰমণ নিৰ্মূল কৰাত কিদৰে আয়ুর্বেদ, সিদ্ধা, ইউনানিৰ ফৰ্মূলা কামত লগোৱা যায় তাক লৈ গৱেষণা কৰিব দুয়োখন দেশৰ বিজ্ঞানীয়ে ৷ তেওঁ লগতে জনায় যি এই ট্ৰায়েলৰ নেতৃত্বত থাকিব ইন্দো-মাৰ্কিন ছায়েন্স টেকন’লজী ফ’ৰাম৷ ভাৰতত ক’ৰোনা চিকিৎসাত ১৯টা উপাদানৰ ট্ৰায়েলৰ বাবে অনুমতি দিয়া হৈছে ৷ তাৰ মাজত আছে অশ্বগন্ধা, যষ্টিমধু আদি ৷
বাতিল হ’ল এছিয়া কাপ ৷
দৈনন্দিন বাৰ্তা ডেস্ক :
ক’ৰোনা ভাইৰাছৰ বাবেই বাতিল হ’ল এছিয়া কাপ ৷ বুধবাৰে বিচিচিআইৰ সভাপতি সৌৰভ গাংগুলীয়ে এই কথা নিশ্চিত কৰে ৷ গাংগুলীয়ে কয়, ছেপ্টেম্বৰত এছিয়া কাপ হোৱাৰ কথা আছিল ৷ এইবাৰ এছিয়া কাপৰ আয়োজক আছিল পাকিস্তান ৷ শ্ৰীলংকাত এই টুৰ্ণামেণ্ট আয়োজনৰ চেষ্টা কৰিছিল আয়োজক পিচিবিয়ে ৷ আইপিএলক বাদ দি পাকিস্তানে এই টুৰ্ণামেণ্ট আয়োজনৰ ব্যৱস্থা কৰিছিল ৷ কিন্তু সেয়া নহ’ল ৷ আনহাতে টি-২০ বিশ্ব কাপও প্রায় বাতিল হোৱাৰ পথত ৷ উল্লেখ্য যে যোৱা এছিয়া কাপত ভাৰত চেম্পিয়ন হৈছিল ৷ তেতিয়া বিৰাট কোহলিৰ বিশ্ৰামৰ বাবে ৰোহিত শৰ্মাই দলৰ নেতৃত্বৰ ভাৰ লৈছিল৷ গ্ৰুপ পৰ্যায়ত দুবাৰ পাকিস্তানক ভাৰতে পৰাস্ত কৰিছিল ৷ ফাইনেলত বাংলাদেশক হৰুৱাই ভাৰত চেম্পিয়ন হৈছিল ৷
ৰাজনৈতিক ক্ষমতাৰ অপ-ব্যৱহাৰেৰে ষড়যন্ত্ৰমূলক ভাৱে সাংবাদিকৰ বিৰুদ্ধে গোচৰ ৰুজু মন্ত্ৰী যোগেন মহনৰ । মুখ্যমন্ত্ৰী, প্ৰেছ কাউন্সিলৰ হস্তক্ষেপ দাবী, নাজিৰাত ব্যাপক প্ৰতিক্ৰিয়া।
নাজিৰা : নতুনকৈ মন্ত্ৰীত্ব লাভ কৰা বিজেপি নেতৃত্বাধীন চৰকাৰৰ মন্ত্ৰী যোগেন মহনৰ বিভিন্ন কুকীৰ্তি উদঙাই সংবাদ মাধ্যমত প্ৰকাশিত এক বাতৰিৰ পাছতেই সাংবাদিকৰ বিৰুদ্ধে ষড়যন্ত্ৰমূলকভাৱে মন্ত্ৰীজনে থানাত গোচৰ ৰুজু কৰাৰ ঘটনাক লৈ জাঙুৰ খাই উঠিছে নাজিৰাৰ সাংবাদিক সকল। খবৰ অনুসৰি শেহতীয়াকৈ অসম চৰকাৰৰ ৰাজহ আৰু গড়কাপ্তানী বিভাগৰ দ্বায়িত্ব লাভ কৰাৰ পাছতেই বিভাগীয় বিভিন্ন নিবিদাত মন্ত্ৰীজনে হস্তক্ষেপ কৰি একাধিক দুৰ্নীতি সংঘটিত কৰা বুলি যোৱা ১ জুলাইত তথ্য সহ এক বাতৰি প্ৰকাশ পায়। উক্ত বাতৰি প্ৰকাশৰ পাছতেই খড়্গহস্ত হৈ পৰা মন্ত্ৰী মহনে নাজিৰাৰ সাংবাদিকজনৰ বিৰুদ্ধে মৰাণহাট আৰক্ষী চকীত ভাৰতীয় দণ্ডবিধিৰ 120(বি)/384/500/501/502/506 ধাৰাত 99/2020 ধাৰাত এক গোচৰ ৰুজু কৰে। সাধাৰণতে যিকোনো বাতৰিৰ সত্যতা খণ্ডন কৰি আইনী জাননী প্ৰেৰণ কৰাটো গণতান্ত্ৰিক অধিকাৰ যদিও মন্ত্ৰীজনে তাকে নকৰি ৰাজনৈতিক ক্ষমতাৰ অপব্যৱহাৰেৰে সংবাদকৰ্মী জনৰ বিৰুদ্ধে আৰক্ষী থানাত পোনপটীয়াকৈ জামিনবিহীন ধাৰাত গোচৰ ৰুজু কৰাটো সহজভাৱে লোৱা নাই নাজিৰাৰ সংবাদকৰ্মী সকলে। ৰাজনৈতিক ক্ষমতাৰে সাংবাদিকৰ মুখ বন্ধ কৰাৰ চক্ৰান্তত মন্ত্ৰীজন নামি পৰা বুলি নাজিৰাৰ সংবাদকৰ্মী সকলে বিষয়টো সম্পৰ্কত মুখ্যমন্ত্ৰী সৰ্বানন্দ সোনোৱাল আৰু প্ৰেছ কাউন্সিল অৱ ইণ্ডিয়াৰ কাষ চপাৰ সিদ্ধান্ত লৈছে। মুক্ত সাংবাদিক সন্থা নাজিৰাৰ সভাপতি খাইৰুল হাছানৰ সভাপতিত্বত অনুষ্ঠিত এক ভিডিঅ কনফাৰেঞ্চত মিলিত হৈ নাজিৰাৰ সাংবাদিক সকলে মন্ত্ৰী জনে গণতান্ত্ৰিক প্ৰক্ৰিয়াক ভৰিৰে মোহাৰি আক্ৰোশমূলক ভাৱে সাংবাদিকৰ কলম ৰুদ্ধ কৰাৰ প্ৰচেষ্টাক গৰিহণা দিয়াৰ লগতে মন্ত্ৰী জনৰ দুৰ্নীতিৰ সমূহ তথ্য মুখ্য মন্ত্ৰীৰ লগতে গৃহ বিভাগক অৰ্পণ কৰাৰ সিদ্ধান্ত লয়। ইফালে সমগ্ৰ ঘটনাক নাজিৰাৰ বিভিন্ন দল সংগঠনে গৰিহণা দিছে।
লংকাত নকল সোণসহ আটক দুই প্ৰৱঞ্চক ।
লংকা : লংকা আৰক্ষী থানাৰ অধীনৰ পশ্চিম ডাবলঙত গাঁৱত মাটিৰ তলৰ পৰা সোণ উলিয়াই দিয়াৰ প্ৰলোভনেৰে ধন লুটিবলৈ আহি হাতে লুটে ৰাইজৰ হাতত আটক হ’বলগীয়া হ’ল দুজন প্ৰৱঞ্চক। প্ৰৱঞ্চক দুজন হ’ল নগাঁৱৰ জুৰিয়াৰ শিঙাৰীৰ ইদ্ৰিছ আলী আৰু হিফজুৰ ৰহমান। দুয়োজনৰ পৰা দুটা সোণৰ ৰঙৰ প্ৰলেপ দিয়া বিস্কুট আকৃতিৰ ধাতু, দুটা কলহ আৰু এখন ৰঙা ৰঙৰ কাপোৰ উদ্ধাৰ কৰা হৈছে। জব্দ কৰা হৈছে এখন চুইফট ডিজায়াৰ গাড়ীও। জানিব পৰা মতে, দুয়ো প্ৰৱঞ্চকে কালি নিশা AS 02M1646 নম্বৰৰ চুইফট ডিজায়াৰ গাড়ীৰে পশ্চিম ডাবলঙৰ তাজ উদ্দিন নামৰ এজনৰ ঘৰলৈ আহিছিল। ঘৰত থিতাপি লোৱা অশাৰিৰীক আত্মাক ঘৰখনৰ পৰা খেদি পঠিওৱাৰ লগতে মাটিৰ তলত থকা সোণ উলিয়াই দিয়াৰ প্ৰলোভনৰ নাটক ৰচনা কৰিছিল দুয়োজনে। কিন্তু গাঁৱৰ ৰাইজৰ সন্দেহ হোৱাত সোধাপোছা কৰাত ওলাই পৰে উৰহি গছৰ ওৰ। লগে লগে হাতে লুটে আটক কৰি লংকা আৰক্ষীক গতাই দিয়ে দুয়োজনকে। উল্লেখ যোগ্য যে, কিছুদিন পূৰ্বে তাজ উদ্দিনৰ পৰিয়ালৰ এজন লোক আকস্মিকভাৱে মৃত্যু হৈছিল। মৃত্যুৰ কাৰণ ঘৰত থকা অশাৰীৰিক আত্মা বুলি দুই প্ৰৱঞ্চকে প্ৰতিয়ন নিয়াইছিল। তাজ উদ্দিনৰ পৰা তিনিটা মান কিস্তিত ১ লাখ ২৬ হেজাৰ টকাও সৰকাইছিল দুই প্ৰৱঞ্চকে। অৱশেষত জেল হাজে পাবলগীয়া হ’ল দুই প্ৰৱঞ্চক।