দৈনন্দিন বাৰ্তা প্ৰতিবেদন

নগাঁও জিলাৰ  ৩৬ নং ৰাষ্ট্ৰীয় পথৰ মৰিকলং চাৰিআলিৰ পৰা পাৱাৰ হাউছ তিনিআলি হৈ ৩৭ নং ৰাষ্ট্ৰীয় পথৰ পানীগাওঁ চাৰিআলি সংযোগী পথটো নগাঁৱৰ এটা অতি গুৰুত্বপূৰ্ণ পথ৷ গড়কাপ্তানি বিভাগৰ ৰাজ্যিক পথ সংমণ্ডলৰ অধীনস্থ নগাঁৱৰ এই গুৰুত্বপূৰ্ণ পথটো বৰ্তমান ঠায়ে ঠায়ে বিধ্বস্ত ৰূপে তীব্ৰ সমস্যাৰ সৃষ্টি কৰিছে পথচাৰীৰ লগতে মটৰচাইকেল, স্কুটি আদিকে ধৰি সৰু বৰ বিভিন্ন যান-বাহন আৰোহী সকলক৷ পথটোৰ মৰিকলং চাৰিআলি গ্ৰামীণ বিকাশ বেংকৰ সন্মুখৰ পৰা আৰম্ভ কৰি নগাঁও ৰে’ল ষ্টেচনৰ কাষৰ দূৰ্গা মন্দিৰৰ সন্মুখৰ কাৰ্লভাট পৰ্যন্ত অংশৰ বিধ্বস্ত ৰূপে বহু সময়ত পথচাৰী সকলক যমৰ-যাতনা পেলাই আহিছে৷ নগাঁও চহৰলৈ বুলি সোমোবা সদাব্যস্ত এই পথটোৰে বহু কেইখন  বিদ্যালয়, মহাবিদ্যালয়, প্ৰশিক্ষণ প্ৰতিষ্ঠানলৈ ছাত্ৰ-ছাত্ৰী, কেইবাটাও চৰকাৰী, বেচৰকাৰী কাৰ্যালয়ৰ কৰ্মচাৰীৰ লগতে শ্ৰীমন্ত শংকৰ মিশ্ৰণৰ ওপৰি কেইবাখনো ব্যক্তিগত খণ্ডৰ চিকিৎসালয়লৈ ৰোগী তথা নগাঁও ৰেল ষ্টেচনলৈ ৰেল ধৰিবলৈ বুলি বহু লোক আহ-যাহ কৰাৰ ওপৰিও আই টি আই বজাৰ, পানীগাওঁ চাৰিআলি বজাৰলৈ বুলি বহুলোকে যাত্ৰায়ত কৰে এই পথচোৱাৰে৷ নগাঁওবাসীৰ এটি সদাব্যস্ত এই চিনাকী পথচোৱাৰ বৰ্তমান এক বিধ্বস্তৰূপে সকলো পথচাৰীকে জলাকলা খোৱাইছে৷ মৰিকলং চাৰিআলিৰ গ্ৰামীণ বিকাশ বেংকৰ পৰা আৰম্ভ কৰি পথচোৱাৰ ঠায়ে-ঠায়ে এজাক বৰষুণতে একাঠু পানী জমা হৈ পথচাৰী ৰাইজক যাত্ৰায়তত ব্যাঘাত জন্মাই আহিছে৷ আনহাতে,  নগাঁও ৰেল ষ্টেচনৰ পৰা উলাই আহিয়েই মৰিকলং চাৰিআলি দিশলৈ যোবা পথত তথা দূৰ্গা মন্দিৰৰ সন্মুখ ভাগত অৱস্থিত এটা কাৰ্লভাটৰ আধাভঙা অংশই পথচাৰীক নগুৰনাগতি কৰিছে৷ নিশাৰ কথাতো বাদেই দিনৰ ভাগতে এই আধাভঙা কাৰ্লভাটটোৰে জীয়াতু ভুগাইছে সৰ্বসাধাৰণ পথচাৰী তথা ৰাইজক৷ বহু সময়ত চাইকেল, মটৰচাইকেল, টমটম্ আৰোহী এই আধাভঙা কাৰ্লভাটত পৰি দূৰ্ঘটনাত পতিত হৈ ঘুনিয়া হ’ব লগাত পৰিছে ৷ আজি ডেৰ বছৰৰো অধীক সময় এই ভঙা কাৰ্লভাটটো নিৰ্মাণ কৰিবলৈ দেখা নাই নগাঁৱৰ গড়কাপ্তানি বিভাগৰ ৰাজ্যিক পথ সংমণ্ডলৰ বিভাগীয় দায়িত্বপ্ৰাপ্ত অভিযন্ত্ৰা-বিষয়াই৷ একাংশ পথচাৰী তথা স্থানীয় ৰাইজে জানিব দিয়া অনুসৰি মাত্ৰ তিনি বছৰৰ পূৰ্বে নিৰ্মাণ কৰা এই কাৰ্লভাটটো নিৰ্মাণৰ সময়ত গড়কাপ্তানি বিভাগৰ ঠিকাদাৰে অতি নিম্ন মানদণ্ডৰ সামগ্ৰী ব্যৱহাৰ কৰাৰ ফলতেই আজি এই অৱস্থা হোৱাৰ অভিযোগ কৰিছে স্থানীয় ৰাইজে৷ যাৰ ফলত অতি কম দিনৰ ভিতৰতে কাৰ্লভাটটোৰ আধাঅংশ ভাঙি যোবাত আজি ৰাইজ ভিশন সমস্যাৰ সন্মুখীন হ’ব লগাত পৰিছে৷ বহু সময়ত স্থানীয় ৰাইজৰ লগতে পথচাৰী সকলে দায়িত্বপ্ৰাপ্ত বিভাগীয় কৰ্তৃপক্ষক উন্নত প্ৰযুক্তি তথা উন্নত সামগ্ৰীৰে নিৰ্মাণ কৰিবলৈ দাৱী জনাই আহিছে যদিও গড়কাপ্তানি ৰাজ্যিক পথ সংমণ্ডলৰ বিভাগীয় কৰ্তৃপক্ষৰ গাৰ নোম এডালো লৰাব পৰা নাই ৰাইজৰ এই দাৱীয়ে৷ উল্লেখ্য যে,পথচোৱাৰে সৰু-সৰু গাড়ী সমূহ পাৰ হৈ যায় যদিও বৰ সাৱধানে আৰু ভয়ে-ভয়ে পাৰ হৈ যাব লগা হয় ৷ কিন্তু ট্ৰাক, বাছ, ট্ৰেভেলাৰ আদি পাৰ হ’ব নোৱাৰে৷   এই পথচোৱাৰ মৰিকলং চাৰিআলি দিশত আৰু পাৱাৰ হাউছ তিনিআলি দিশত পথৰ বিধ্বস্ত ৰূপৰ কোনো আগতীয়া জাননী ফলক নথকাত ডাঙৰ যান-বাহন সমূহ দুয়োফালৰ পৰা সোমাই আহি বিমোৰত পৰিব লগা হয় আৰু পোনৰ ডাঙৰ যান-বাহন সমূহ উলোটাকৈয়ে উলিয়াই নিয়াৰ ফলত তীব্ৰ যান-যটৰ সৃষ্টি হৈ আহিছে পথচোৱাত৷ এইক্ষেত্ৰত গড়কাপ্তানি বিভাগৰ ৰাজ্যিক পথ সংমণ্ডলৰ  বিভাগীয় উদ্ধতন কতৃপক্ষক অতিশীঘ্ৰে পথচোবাৰ নিৰ্মাণ কৰাৰ লগতে পূৰ্বতে নিম্ন মানদণ্ডৰ সামগ্ৰীৰে নিৰ্মাণ কৰা  কাৰ্লভাটটো উন্নত প্ৰযুক্তিৰে নিৰ্মাণ কৰি পথচাৰীৰ বাবে মুকলি কৰিবলৈ ৰাইজে দাৱী জনাইছে

দৈনন্দিন বাৰ্তা

নগাঁও চহৰৰ বৰবজাৰৰ ঢাকাইপট্টিত থকা ৭খনকৈ গো-মাংস বিক্ৰীৰ দোকান বন্ধ কৰাৰ দাবীত আজি একাংশ সচেতন ৰাইজে অঞ্চলটোত প্ৰতিবাদ সাব্যস্ত কৰে। উল্লেখ্য যে চহৰখনৰ মূল ব্যৱসায়িক অঞ্চলৰূপে চিহ্নিত বৰবজাৰৰ ঢাকাইপট্টিত থকা গো-মাংস বিক্ৰীৰ দোকানকেইখনৰ পৰা ইছলামধৰ্মী লোকৰ বসতি প্ৰধান অঞ্চলটোত এক অস্বাস্থ্যকৰ পৰিবেশৰ সৃষ্টি হোৱা বুলি স্হানীয় বাসিন্দাই অভিযোগ উত্থাপন কৰি আহিছে। গো-মাংসৰ ব্যৱসায়ীসকলে মূল পথৰ কাষতে থকা নলাত অৱশিষ্ট আবৰ্জনাসমূহ পেলোৱাৰ ফলত সৃষ্টি হোৱা দুৰ্গন্ধই অঞ্চলটোৰ পৰিবেশ দূষিত কৰাৰ লগতে নলাসমূহ নানা বিষাক্ত বীজাণুৰ বসতি স্থল হৈ পৰা বুলিও ৰাইজে অভিযোগ কৰে। ইপিনে অঞ্চলটোৰ ৰাইজে গো মাংস বিক্ৰীৰ দোকান কেইখন উক্ত স্থানৰ পৰা স্থানান্তৰৰ দাবীত নগাঁও পৌৰসভাক বহুবাৰ অভিযোগ দি আহিছে যদিও ৰহস্যজনকভাৱে পৌৰসভাই নীৰৱতা অৱলম্বন কৰা বুলিও ৰাইজে অভিযোগ কৰে। সেয়ে ৰাইজে উপয়ান্তৰ হৈ এই সন্দৰ্ভত নগাঁও জিলা উপায়ুক্তৰ জৰিয়তে ভাৰতবর্ষৰ প্ৰধানমন্ত্ৰীলৈ অভিযোগ পত্ৰ প্ৰেৰণ কৰিছিল আৰু তাৰ পিছতে চৰকাৰে উক্ত স্থানৰ পৰা গো-মাংসৰ দোকান সমূহ স্থানান্তৰৰ নিৰ্দেশ দিয়ে বুলি জানিব পৰা গৈছে। কিন্তু ইয়াৰ পিছতো গো-মাংস বিক্ৰীৰ দোকানসমূহ স্থানান্তৰৰ ক্ষেত্ৰত প্ৰশাসনে পদক্ষেপ গ্ৰহণ নকৰাত অঞ্চলটোৰ বাসিন্দাসকল ক্ষুব্ধ হৈ পৰে। সেয়ে আজি ক্ষুদ্ধ ৰাইজে অঞ্চলটোৰ পৰিবেশ দূষিত কৰাৰ অভিযোগ তুলি গো মাংস বিক্ৰীৰ দোকানসমূহ উক্ত স্থানৰ পৰা স্থানান্তৰৰ দাবীত উত্তাল প্ৰতিবাদ সাবস্ত কৰে। ক্ষোভিত ৰাইজে গো-মাংসৰ বিক্ৰীৰ দোকান কেইখন বন্ধৰ দাবীত বিভিন্ন শ্লোগান দি প্ৰতিবাদ সাবস্ত কৰে।

এ জে আকন্দ:

পৰিবৰ্তনৰ শ্লোগান দি ৰাজ্যৰ শাসনৰ গাদী দখল কৰা সৰ্বানন্দ সোণোৱাল নেতৃত্বাধীন চৰকাৰৰ দিনতো কোনো পৰিবৰ্তন পৰিলক্ষিত হোৱা নাই। পূৰ্বৰ দৰে বিভিন্ন বিভাগত চলি আহিছে কেৱল ব্যাপক দুৰ্নীতি আৰু অনিয়ম আৰু এই দুৰ্নীতি অনিয়মেই যেন এক নিয়মত পৰিণত হৈছে হোজাই জিলাৰ বিন্নাকান্দি উন্নয়ন খণ্ডত। ২৪ টা গাঁও পঞ্চায়তৰে গঠিত উন্নয়ন খণ্ডটোত একাংশ পঞ্চায়ত সভাপতি, পঞ্চায়ত সচিব, জিআৰএচ, কনিষ্ঠ অভিযন্তাই বিডিঅ’ৰে মিলি এতিয়া কেবল চলাইছে লুন্ঠনৰ অঘোষিত প্ৰতিযোগিতা। শেহতীয়াকৈ চতুৰ্থ বিত্তীয় আয়োগ, পঞ্চম বিত্তীয় আয়োগ, এমজিএন ৰেগাকে ধৰি একাধিক চৰকাৰী আঁচনিৰ অধীনত নামমাত্ৰ কাম কৰিয়েই আঁচনি সমুহ বগা হাতীত পৰিণত কৰি লুন্ঠনৰাজ চলোৱাৰ অভিযোগ উঠিছে। বিভাগীয় প্ৰাককলন অনুসৰি কোনো কামেই সম্পাদন হোৱা নাই উন্নয়ন খণ্ডটোৰ অন্তৰ্গত অধিকাংশ গাঁও পঞ্চায়তত। উন্নয়ন খণ্ডটোত দীৰ্ঘদিন ধৰি চলা লুন্ঠনৰাজ সন্দৰ্ভত সংবাদ মাধ্যমত সততে বাতৰি প্ৰকাশৰ পিছতো গা লৰা নাই বিয়োগোম গ্ৰামোন্নয়ন বিভাগৰ। বিভিন্ন সময়ত স্থানীয় ৰাইজে একাংশ আঁচনিত চলা দুৰ্নীতি অনিয়ম সন্দৰ্ভত বিভাগীয় কৰ্তৃপক্ষক অভিযোগ দিয়াৰ পিছতো চকু মুদা কুলিৰ ভাও ধৰিছে গ্ৰামোন্নয়ন বিভাগৰ বৰমুৰীয়া সকলে। কাৰ আশীৰ্বাদত এতিয়াও উন্নয়ন খণ্ডটোত চলি অহা দুৰ্নীতি অনিয়ম তদন্ত হোৱা নাই, সেয়াও এক অবুজ সাথৰৰ দৰে হৈ পৰিছে। মনকৰিবলগীয়া যে, উন্নয়ন খণ্ডটোত সংঘটিত হোৱা দুৰ্নীতি-অনিয়মৰ তথ্য ফাদিল হোৱাৰ ভয়তে তথ্য জনাৰ অধিকাৰ আইনকো ভেঙুচালি কৰি আহিছে। নগাঁৱৰ এগৰাকী আৰটিআই কৰ্মীয়ে সৌৰ চাকি আৰু চতুৰ্থ বিত্তীয় আয়োগৰ তথ্য বিচৰাৰ পিছতো তথ্য দিয়াৰ পৰা বিৰত থকাৰ অভিযোগ উঠিছে। উল্লেখ্য যে উন্নয়ন খণ্ডটোৰ কনিষ্ঠ অভিযন্তা খনীন্দ্ৰ মোহন দাস, ঠিকা ভিত্তিক কনিষ্ঠ অভিযন্তা ক্ৰমে পাঠক, বৈশ্য, ফকৰ, তৌফিক আদিৰ লগতে আন একাংশ কনিষ্ঠ অভিযন্তাই পঞ্চায়ত সচিব, জিআৰএচ, পঞ্চায়ত সভাপতিৰে মিলি উন্নয়ন খণ্ডটোত দুৰ্নীতিৰ বজাৰ বহুৱাৰ গুৰুতৰ অভিযোগ উঠিছে। এই ক্ষেত্ৰত একাংশ শাসকীয় দলৰ একাংশ নেতা পালিনেতা জৰিত থকাৰ অভিযোগো উঠিছে। উন্নয়ন খণ্ডটোত দীৰ্ঘদিনীয়া দুৰ্নীতি অনিয়মসমুহ তথ্য সহকাৰে অচিৰেই ডিবি নিউজে ফাদিল কৰিব।

দিলীপ হাজৰিকা :

অসম নগালেণ্ড সীমান্তত অতি সঘনাই সংঘটিত হ’বলৈ ধৰা নগাৰ আগ্ৰাসনৰ ঘটনাই অসমৰ নাগৰিক সকলক বাৰে বাৰে শংকিত কৰি অহাৰ লগতে অসামৰিক প্ৰশাসনক বাৰে বাৰে ব্যতি-ব্যস্ত কৰি আহিছে । ১০ জুনত শিৱসাগৰ জিলা অসামৰিক প্ৰশাসনে নাজিৰা মহকুমা প্ৰশাসন আৰু জিলা আৰক্ষী প্ৰশাসন সহ লিগিৰীপুখুৰীস্থিত ১ম অসম আৰক্ষী বেটেলিয়নৰ সমৰ্থনত চিআৰপিএফৰ এক দল লগত লৈ কাহিলী পুৱাতে এক অভিযান চলায় । অসমৰ চাৰিসীমাৰ ভিতৰত সোমাই নগাই সুপৰিকল্পিতভাৱে শিঙিবিল অঞ্চলত নিৰ্মাণ কৰা তিনিটাকৈ বাঁহ আৰু টিনপাতেৰে সজা ঘৰ উচ্ছেদ ঘটায় । ইয়াৰ পূৰ্বে যোৱা ৮ জুনতো শিঙিবিলত অৱস্থিত সীমান্ত আৰক্ষী চকীৰ কাষতে নগাই অসমৰ মাটিত আগ্ৰাসীভাৱে স্থাপন কৰা নঙলাসহ বুৰুজ উভালি উচ্ছেদ সাধন কৰে শিৱসাগৰ সদৰ আৰক্ষীৰ লগতে নাজিৰা পুলিচ আৰু মহকুমা প্ৰশাসনে । নগালোকে এই বুৰুজ সমূহ পুতি অসমৰ নিজা এলেকাতে অসমৰ ক্ষুদ্ৰ চাহ খেতিয়কে কৰি অহা চাহ বাগিচা সমূহলৈ আহ-যাহৰ বাট বন্ধ কৰি দিয়াৰ প্ৰচেষ্টা চলোৱাৰ বাতৰি সবিস্তাৰে প্ৰকাশ হৈছে । ১০ জুনৰ অভিযানৰ বেলিকা নগাৰ অবৈধ নিৰ্মাণ সমূহৰ নাতিদূৰত নগালেণ্ডৰ সশস্ত্ৰ আৰক্ষী বাহিনীৰ উপস্থিতি মন কৰিবলগীয়া। এয়া কেৱল লকডাউনৰ সময় অতিক্ৰম কৰিবলৈ ধৰাৰ সময়ত নগাৰাজ্যৰ ফালৰ পৰা অসমৰ সীমাত চলি থকা  নিস্ক্ৰিয়তাৰ সুযোগ লৈ নগাপক্ষই ঘটোৱা কূটাঘাত। য’ত শিৱসাগৰ জিলা অসামৰিক প্ৰশাসনে কৌশলগতভাৱে নগাৰ কাৰ্য্যৰ বিৰুদ্ধে সময় আৰু শক্তিসহ ব্যস্ত হৈ পৰিল। আনহাতে মন কৰিবলগীয়া দিশটো হ’ল যে যিখিনি এলেকাত নগাই বেদখল কৰি নিৰ্মাণ কাৰ্য্য ঘটোৱা, অসমৰ খেতিয়কৰ চাহ-বাগিছাৰ উচ্ছেদ ঘটাবলৈ পাকঘৰ ভাঙি পেলোৱা, চাহ গছ কাটি পেলোৱা আদি ঘটনাবোৰ বছৰ বছৰ ধৰি চলাই আহিছে সেই অঞ্চল সমূহেই গেলেকী বনাঞ্চলৰ ভিতৰুৱা । বনাঞ্চলত ৰাজ্য চৰকাৰ আৰু কেন্দ্ৰীয় চৰকাৰে এই সমস্যা দূৰ কৰিবৰ কাৰণে কোনো উপযুক্ত পদক্ষেপ গ্ৰহণ কৰা নাই । মন কৰিবলগীয়া যে নাজিৰা মহকুমা প্ৰশাসনৰ অন্তৰ্গত এই এলেকাসমূহত লক্ষ্মীজান আৰু শিঙিবিল সীমান্ত আৰক্ষী চকীৰ পৰা মূগাপাৰা, চৰাইসজীয়া, সোণাপুৰ, বৰহোলা, দেওপানী সামৰি সাতোটা সীমান্ত আৰক্ষী চকী সক্ৰিয় হৈ আছে। মুখ্যতঃ অসম চৰকাৰৰ বন বিভাগৰ অধীনত এক ঘোষিত বনাঞ্চল হিচাপে গেলেকী বনাঞ্চল থকাৰ বাবেই গেলেকী আৰু আঠখেল দুটাকৈ বন বিভাগৰ বিট অফিচো এই এলেকাত সক্ৰিয়।  নগাৰ ফালৰপৰা যিমানবোৰ বে-দখল সংঘটিত হৈছে এই সকলোবোৰৰ থলীয়েই হ’ল গেলেকী বনাঞ্চল । তৎস্বত্ত্বেও নগালেণ্ডৰ ফালৰপৰা চৰকাৰী আৰু বে-চৰকাৰী দুই প্ৰকাৰেই অবাধ বে-দখল সংঘটিত হোৱা কাণ্ডই দীৰ্ঘদিন ধৰি চৰকাৰী পৃষ্ঠপোষকতাতেই যে নগাই আসৈ পাই আহিছে সেই বিষয়ে সন্দেহো ঘনীভূত হৈছে। এক বিশেষ সূত্ৰত জানিব পৰা মতে অসমৰ সীমাত নাজিৰা মহকুমাত এতিয়া আৰু গেলেকী বনাঞ্চল বুলি কোনো অংশই নাই । “গাৰোপৱন” যৌথ বন ব্যৱস্থাপনা সমিতিৰ ফালৰপৰা বন প্ৰকল্প এলেকা হিচাপে চিহ্নিত কৰি তোলা কমলাবাৰীয়েই এতিয়া গেলেকী বনাঞ্চলৰ এক পৰিচয় হৈ ৰোৱাৰ বাহিৰে গেলেকী সংৰক্ষিত বনাঞ্চল বুলি আন কোনো এলেকাই নোহোৱা হৈ পৰিল । জানিব পৰা মতে গেলেকী বনাঞ্চলৰ শ শ হেক্টৰ ভূমি বন বিভাগৰ বিষয়াই বিগত প্ৰায় এক দশক কালৰ ভিতৰত নগালোকৰ হাতত বিক্ৰী কৰি দিছে।  অভিযোগ মতে দুই এক অসমৰ খিলঞ্জীয়া ব্যৱসায়ীয়েও মধ্যস্থতা কৰি অথবা পোনপটীয়াকৈ  নগা ব্যৱসায়ীৰ সৈতে টকাৰ দাম-দৰ কৰি হেক্টৰে হেক্টৰে গেলেকী বনাঞ্চলৰ ভূমি মৌখিক দৰত বিক্ৰী কৰি চমজাই দিয়া হৈছে। স্বয়ং বন বিষয়াৰ পোন-পটীয়া সিদ্ধান্ততে গেলেকী বনাঞ্চলৰ ভূমি নগালোকক বৃহৎ ধনৰ বিনিময়ত বিক্ৰী কৰা হৈছে। পৰৱৰ্ত্তী সময়তো কোনো প্ৰকাৰেই বন বিভাগৰ তৰফৰ পৰা গেলেকী বনাঞ্চলৰ মাটিৰ জৰীপ কৰা দূৰৰে কথা  প্ৰায় দহ বছৰৰ পূৰ্বে অসম নগালেণ্ডৰ সীমাত নিৰ্মাণ কৰিবলৈ কেন্দ্ৰীয় চৰকাৰৰ পুঁজিৰপৰা  অহা সীমা স্তম্ভও নিৰ্মাণ নহ’ল বুলিহে অভিযোগ  উঠিছে। যাৰ ফলত ৰাইজৰ ৰাজহেৰে দৰমহা দি ৰখা এটা বৃহৎ বন বিভাগ থাকিও নাজিৰা মহকুমাই এখন সংৰক্ষিত বনাঞ্চলক জীয়াই ৰখাৰ গৌৰৱৰপৰা বঞ্চিত হৈ পৰিছে। জিলা আৰু মহকুমা প্ৰশাসনে নগাৰ অবৈধ নিৰ্মাণ এবাৰলৈ উচ্ছেদ কৰিয়েই ক্ষান্ত নহৈ বনবিভাগৰ সংমণ্ডল বিষয়াৰ পৰা বিট অফিচলৈকে তদাৰক কৰি গেলেকী ৰিজাৰ্ভ ফৰেষ্টৰ নামত আহি থকা বন্য প্ৰাণী সুৰক্ষা, বন সুৰক্ষা, পহৰা কাৰ্য্যৰ বাবে বাট-পথ মোকলোৱাৰ হেতু অহা ধনৰ হিচাপো তদাৰক কৰক। অন্যথা আহোম স্বৰ্গদেউ সকলৰ দিনতে নগাৰাজ্যৰ সীমাত নিৰ্মাণ কৰা ঐতিহাসিক লাদৈগড়  আৰু ইয়াৰ পৰা নিৰাপদ দূৰত্বত নিৰ্দেশ কৰা অসম নগালেণ্ডৰ সীমা এনে চৰকাৰী হঠকাৰীতাৰ বাবেই এদিন সংকোচিত হৈ আহি লাদৈগড়ৰ ভিতৰৰ পৰাহে সূচিত হোৱাৰ ইংগিত কঢ়িয়াই আনিছে। গেলেকী সংৰক্ষিত বনাঞ্চলে সৰ্বমুঠ ৫৯৭৬ হেক্টৰ ভূমি সামৰি আছিল বুলি জনা যায় । বিপৰীতে যি খণ্ড বনভূমিত যৌথ বন পৰিচালনা সমিতিৰ জড়িয়তে কমলাবাৰী হিচাপে বিকশিত কৰি ৰখা হৈছে সেই ভূমি বনাঞ্চলৰ চাৰিভাগৰ এক অংশহে। বিষয়াৰ দুৰ্নীতিৰ ফলত সংকোচিত হৈ পৰা গেলেকী বনাঞ্চল কেৱল কমলাবাৰীতে সীমাৱদ্ধ হৈ ৰোৱাৰ উপক্ৰম ঘটিছে।  বনবিভাগৰ এনে সংহাৰী দুৰ্নীতিৰ এক উপযুক্ত তদন্ত চৰকাৰী ভাৱে কৰিলেহে পৰিস্ফুট হ’ব প্ৰকৃততে এতিয়ালৈ গেলেকী সংৰক্ষিত বনাঞ্চল বুলিবলৈ কিমান আয়তনৰ অৰণ্য ভূমি আছেগৈ ।