✍ সুনীল দাস

বৰ্তমানৰ মাৰাত্মক কৰ’ণা ভাইৰাছৰ পৰা নিজকে বচাই ৰাখিবলৈ বিশ্বৰ প্ৰায়বোৰ দেশত তলাবন্ধৰ ব্যৱস্থা গ্ৰহণ কৰিছে। তাৰ প্ৰতি সহাৰি জনাই আমি প্ৰতিজন নাগৰিকে নীতি-নিয়মবোৰ ভালদৰে পালন কৰিব লাগিব। তলা বন্ধৰ বাবে কোনোদিনেই আজৰি নোপোৱা পৰিয়ালৰ সদস্যসকলেও একেলগ হৈ সময় কটাবলগীয়া হ’ল। কিন্তু কিছু সংখ্যকৰ বাবে এয়াই এক ভৱিষ্যতৰ সু-জাননী দিলে। সময়ৰ সদ্‌ব্যৱহাৰ কৰি সময়ৰ লগত মিলি গৈ সময়ৰ গতিবেগত শৰ মাৰিলে একাংশ লোকে। কি শিশু, কি বৃদ্ধ, যুৱক সকলোৰে ভিতৰত লুপ্তপ্ৰায়ী সুপ্ত প্ৰতিভাৰ এক বহিঃপ্ৰকাশ ঘটিবলৈ ধৰিলে। চিন্তাশক্তি গভিৰ হ’বলৈ ল’লে। কোনোৱে যদি গীত ৰচিলে, কোনোৱে আকৌ সেই গীতৰ সুৰ মিলালে, কোনোৱে নৃত্য কৰিলে। আকৌ বিশুদ্ধ পৰিৱেশৰ উমান পায় কাৰোবাৰ মনত কবিতাৰ সৃষ্টি হ’ল। কোনোৱে যদি প্ৰকৃতিৰ ছবি অংকণ কৰিলে কোনোৱে আকৌ মানৱ জীৱনৰ বাবে অহা এই দুৰ্দিন কথা লিখিলে। বহাগৰ বিহুত ঢুলিয়াই ঢোলত চেওঁ দিব নোৱাৰি, নাচনী ককাল ভাঙিব নোৱাৰি লিখিলে মনৰ আবেগৰ কথা। আৰু লিখিলে বহাগৰ বৰদৈচিলাৰ  আগমণৰ কাহিনী। কোনোৱে আকৌ কিতাপ পঢ়িলে আৰু নৱ নৱ চিন্তাৰ উদ্ভৱ কৰিলে। এনেকৈ দিন পাৰ কৰি গৈ আছে অধিকাংশ লোকে। ইয়াৰ বাবে সামাজিক মাধ্যমৰ প্ৰভাৱও নাইকীয়া কৰিব নোৱাৰো। প্ৰতিজন ব্যক্তিৰ বাবে নিজৰ প্ৰতিভা প্ৰকাশ কৰিবলৈ এক বিশেষ মঞ্চৰূপে থিয় দিছে সামাজিক মাধ্যমবোৰে। আকৌ প্ৰতিজন প্ৰতিভাশালী ব্যক্তিক অধিক উৎসাহিত কৰিছে বিভিন্ন সংগঠন, বিভিন্ন সামাজিক মাধ্যমে আয়োজন কৰা প্ৰতিযোগিতাবোৰে। আনহাতে অপ্ৰিয় হলেওঁ সত্য যে অধিকাংশ ছাত্ৰ-ছাত্ৰীয়ে নিয়মীয়া পাঠ্যপুথিৰ লগতে প্ৰায় আনুসংগীক কিতাপ, ভাৱধাৰাতহে গুৰুত্ব অধিক প্ৰদান কৰিছে। যিবোৰে এজন ছাত্ৰক বা এজনী ছাত্ৰীক সম্পূৰ্ণৰূপে বিকাশ সাধন হোৱাত সহায় কৰিব। আকৌ দেশৰ ভিন্নপ্ৰান্তত প্ৰতিফলিত হ’ল শিল্পকলাৰ। কোনোৱে যদি কাঠত প্ৰতিছবি খদিত কৰিলে কোনোৱে বাহৰ পৰা আঁতক ধুনীয়া সামগ্ৰী তৈয়াৰ কৰিলে। বাৰীত পৰি থকা পেলনীয়া সামগ্ৰীবোৰকো নৱ ৰূপ দি ঘৰৰ অতিথিশাল শুৱনি হ’ল। পেলোনীয়া কাগজৰ টুকুৰাক ও বিভিন্ন আকৃতিত ৰূপ দিলে। এয়াই প্ৰতিভা। এনেকৈ কষ্টসাধ্য দুৰ্দিনত নিজকে বছায় দিন পাৰ কৰি গৈ আছে প্ৰতিজন নাগৰিকে। এয়া যিয়েকি নহওঁক, নিজকে ব্যস্ত ৰাখিবলৈয়ে হওঁক বা অন্য কিবা। কিন্তু আমি সকলোৱে লাভ কৰি গৈ আছো কিছুমান নতুন উদ্ভৱৰ। প্ৰকৃততে যিকোনো সৃষ্টিৰ আগমূহুৰ্তত প্ৰত্যেকে তেনে এক বিশেষ  পৰিস্থিতিৰ সন্মূখীন হ’ব লাগিব, যিয়ে তেওঁলোকক সৃষ্টিৰ বাবে প্ৰেৰণা জোগাব। অন্যহাতে নিয়মীয়া আনুষ্ঠানিক শিক্ষাৰ ক্ষেত্ৰত যথেষ্ট সমস্যাৰ সন্মুখীন হৈছে শিক্ষাৰ্থীসকল। এয়া এক জটিল সমস্যা। যদিও বিভিন্ন মাধ্যমৰ জৰিয়তে শিক্ষা প্ৰদানৰ ব্যৱস্থা কৰা হৈছে সেয়াই যথেষ্ট নহয়। যদিও কোৱা হয় বৰ্তমান ডিজিটেল যুগ তথাপিও সকলোধৰণে সকলো ঠাইত  ব্যৱহাৰৰ উপযুক্ত হৈ উঠা নাই। আকৌ সকলো শিক্ষাৰ্থী অৰ্থনৈতিকভাৱে সম্বল নহয়। কিছুসংখ্যক কলেজীয়া শিক্ষাৰ্থীৰ হাতত এতিয়াও নাই মোবাইল ফোন। একে পৰিস্থিতি নিম্নশ্ৰেণীৰ শিক্ষাৰ্থীসকৰো, বয়সৰ অনুপাতে ব্যৱহাৰশৈলী সম্পূৰ্ণৰূপে জ্ঞাত নহয়। এয়া হৈ পৰিছে তেনে শিক্ষাৰ্থীৰ বাবে এক জটিল সমস্যা। আকৌ যিসকলে বিভিন্ন মাধ্যমৰ জৰিয়তে নিয়মীয়া পাঠদান বৰ্তি ৰাখিছে তেওঁলোকৰ কিছু পৰিমাণে শৈক্ষিক দিশ আগবাঢ়িব যদিও হিচাপত কিছু শতাংশহে লাভ কৰিব জ্ঞান। কিন্তু উপায়হীন সকলো। জীৱনৰ খাতিৰত দেশৰ কথা ভাৱি সকলো ঘৰতে থাকিবলগীয়া হৈছে। তাৰ বাবে বিভাগীয় কৰ্তৃপক্ষই এবাৰ শিক্ষাৰ্থীসকলৰ কথা ভাৱি সকলোৰে সুবিধা হোৱাকৈ সিদ্ধান্তসমূহ গ্ৰহণ কৰিব বুলি আশাবাদী বৰ্তমানৰ শিক্ষাৰ্থীসমাজ। কিয়নো পৰীক্ষাত উত্তীৰ্ণ হোৱাটোৱে শিক্ষাৰ্থী লক্ষ্য নহয়।সদৌ শেষত সকলোৱে চৰকাৰৰ নীতি-নিৰ্দেশ মানি চলি নিজৰ কৰ্তব্য পালন কৰি যাওঁক। সুবিধা বুজি নিজৰ সুপ্ত প্ৰতিভাৰো বিকাশ কৰক। ঘৰতে থাকক, সুস্থ থাকক। সুস্থ মনত সৎ চিন্তাৰ উদ্ভৱ ঘটোৱা। কিয়নো আজিৰ ছাত্ৰ ভৱিষ্যতৰ নাগৰিক।

✍ সুদীপ শৰ্মা চৌধুৰী

প্ৰধানমন্ত্ৰী নৰেন্দ্ৰ মোদীয়ে কোৰোনাৰ ফলত আক্ৰান্ত হোৱা অৰ্থনীতিক যোৰা লগাবলৈ ২০ লাখ কোটি টকাৰ পেকেজ ঘোষণা কৰিলেও ভাৰতীয় মুদ্ৰাৰ প্ৰতীক চিহ্নত থকা বাস্তুদোষ সংশোধন নকৰালৈ অৰ্থনীতিক সুস্থিৰ কৰাটো সম্ভৱ নহ’ব বুলি দাবী জনাইছে। বাস্তুৰ জৰিয়তে মানুহৰ জীৱনত সুখ, শান্তি, সমৃদ্ধি কঢ়িয়াই অনাৰ মহান প্ৰচেষ্টাত ব্ৰতী ৰি-বিল্ড ন’ৰ্থইষ্টৰ সভাপতি তথা অসমৰ বিশিষ্ট বাস্তু বিশেষজ্ঞ ৰাজকুমাৰ ঝাঁঝৰীয়ে প্ৰধানমন্ত্ৰী নৰেন্দ্ৰ মোদীক দেশৰ অৰ্থনীতি ৰক্ষাৰ্থে ততালিকে টকাৰ প্ৰতীকটোত থকা বাস্তুদোষ সংশোধন কৰাৰ বাবে আহ্বান জনাইছে। উল্লেখযোগ্য যে শ্ৰীঝাঁঝৰীয়ে ২০১১ চনতে প্ৰধানমন্ত্ৰী ডঃ মনমোহন সিঙক এক চিঠিযোগে টকাৰ প্ৰতীকটোত ভয়ংকৰ বাস্তুদোষ থকাৰ বিষয়ে অবগত কৰি তাক সংশোধন নকৰিলে টকাৰ অৱমূল্যায়ন আৰু দেশৰ অৰ্থনীতি বিপৰ্যস্ত হোৱাৰ ভৱিষ্যবাণী কৰিছিল। কিন্তু মনমোহন চৰকাৰে কথাটোত গুৰুত্ব নিদিয়াৰ ফলত দেশৰ অৰ্থনীতি চূড়ান্ত বিপৰ্যয়ৰ সন্মুখীন হৈ ৯ শতাংশৰ পৰা শূন্যলৈ আৰু টকাটো ৪৪ টকা প্ৰতি ডলাৰৰ পৰা ৭৬ লৈ অৱনমিত হৈছে। প্ৰধানমন্ত্ৰীৰ পদত অধিষ্ঠিত হোৱাৰ পিছত নৰেন্দ্ৰ মোদীকো কামৰূপ জিলা উপায়ুক্তৰ জৰিয়তে পত্ৰ প্ৰেৰণ কৰি শ্ৰীঝাঁঝৰীয়ে টকাৰ প্ৰতীকটো বাস্তুদোষ মুক্ত কৰাৰ অনুৰোধ জনাইছিল, কিন্তু মোদীয়েও কথাটোত গুৰুত্ব নিদিয়াত আজি দেশৰ অৰ্থনীতি ভয়ংকৰ বিপৰ্যয়ৰ মুখত পৰিছে। উল্লেখযোগ্য যে শ্ৰী ঝাঁঝৰীয়ে অৰুণাচল প্ৰদেশৰ মুখ্যমন্ত্ৰী নবাম টুকীকো মুখ্যমন্ত্ৰীৰ চৰকাৰী বাসভৱনত থকা ভয়ংকৰ বাস্তুদোষ সংশোধন কৰাৰ পৰামৰ্শ দিছিল, যদিও তেওঁ বাস্তুৰ দোষ সংশোধনকৰ কোনো ব্যৱস্থা হাতত নল’লে। স্মৰণীয় যে উক্ত বাসভৱনত থকা দজ¹ খাণ্ডুৰ হেলিকাপ্টাৰ দুৰ্ঘটনাত অকাল মৃত্যু হোৱাৰ লগতে গামলীনৰ হৃদৰোগ আক্ৰান্ত হৈ আৰু কালিখো পুলে আত্মহত্যা কৰি অকাল মৃত্যুক আঁকোৱালী লৈছিল। বৰ্তমান মুখ্যমন্ত্ৰী পেমা খাণ্ডুৱে উক্ত বাসভৱনত থকাৰ পৰিৱৰ্ত্তে ইয়াক অতিথিশালাত পৰিণত কৰিছে। শ্ৰী ঝাঁঝৰীয়ে প্ৰকাশ কৰা মতে উত্তৰ-পূৰ্বাঞ্চলৰ ৰাইজে সম্পূৰ্ণ বাস্তু পৰিপন্থী বাসগৃহ সাজি বাস কৰি অহা বাবেই এই অঞ্চলটো যুগ-যুগ ধৰি যুদ্ধ-বিগ্ৰহ, উগ্ৰবাদ, আৰ্থিক আৰু অনুন্নত সমস্যাত সৰ্বস্বান্ত হৈ আহিছে। অঞ্চলবাসীক সুখ, শান্তি, সমৃদ্ধিৰ জীৱন প্ৰদানৰ উদ্দেশ্যেৰেই তেখেতে বিগত ২৫ বছৰ ধৰি কোনো ধৰণৰ পাৰিশ্ৰমিক নোলোৱাকৈ মানুহৰ ঘৰে-ঘৰে গৈ বাস্তু পৰামৰ্শ দি আহিছে। বৰ্তমানলৈ শ্ৰী ঝাঁঝৰীয়ে ১৬,০০০ পৰিয়ালক বিনামূলীয়াকৈ বাস্তু পৰামৰ্শ দিছে আৰু যি সকলে বাস্তুৰ নিয়মানুযায়ী বাসগৃহত সংশোধন কৰিছে, তেওঁলোকৰ জীৱন পূৰ্বতকৈ বহুখিনি উন্নত হৈছে। শ্ৰী ঝাঁঝৰী দাবী কৰে যে দেশৰ অৰ্থনীতিক সুচল কৰিবলৈ হ’লে চৰকাৰে টকাৰ প্ৰতীকটো তথালিকে সংশোধন কৰি বাস্তুসম্মত কৰিবই লাগিব।    

দৈনন্দিন বাৰ্তা

বহিঃৰাজ্যত কৰ্মৰত প্ৰায়ভাগ অসমীয়া ল’ৰাই এতিয়া নিজ ঘৰলৈ উভতিছে৷ কিছুসংখ্যক চৰকাৰৰ উদ্যোগত ঘৰ আহি পালেও। ভাৰতৰ অন্য বহু প্ৰদেশত ক’ৰ’নাৰ সংহাৰ আমাৰ ৰাজ্যতকৈ বহু বেছি। বহু ভয়ানক পৰিস্থিতিৰ সাক্ষী ইতিমধ্যেই এইসকল যুৱক হৈছেই৷ পদে পদে মৃত্যুৰ ভয়৷ অন্যপ্ৰদেশত অসমীয়া যুৱক যুৱতীয়ে সেই চৰকাৰৰ পৰা প্ৰয়োজনীয় সুবিধা লাভ নকৰাৰ অভিযোগ শুনিবলৈ পাইছোঁ৷ তেনে পৰিস্থিতিত পৰিয়ালৰ সদস্যসকলে তেওঁলোকক উভতি আহিবলৈ জোৰ দিয়াটো স্বাভাৱিক৷ ইতিমধ্যেই লকডাউনৰ বাবে প্ৰায়ভাগ অফিচ কোম্পানী বন্ধ থকা বাবে বহু কৰ্মচাৰীয়ে পোৱা নাই দৰমহা, আনকি বহুতৰ চাকৰি থাকিব নে নাই সেইয়াও নিশ্চিত নহয়। মালিকপক্ষৰ পৰাও পোৱা নাই সুদুত্তৰ৷ ঘৰলৈ আহিয়ে বহিঃৰাজ্যৰ পৰা অহা যুৱকসকল হৈছে কোৱাৰেন্টাইন। এক দীঘলীয়া সময়ৰ বাবে তেওঁলোক আঁতৰি থাকিব নিজ কৰ্মক্ষেত্ৰৰ পৰা। সমস্যা এইখিনিতে আৰম্ভ হ’ব৷ ক’ৰ’নাৰ আতংক অহা ছমাহমানলৈ শেষ হোৱাৰ আশা নাই৷ গতিকে প্ৰায়ভাগ যুৱকৰ পৰিয়ালে তেওঁলোকক হয়তো পুনৰ কৰ্মক্ষেত্ৰলৈ উভতি যাব বাধা দিব,  তেওঁলোকৰ নিজৰো পৰিয়ালক এৰি হয়তো সংকটৰ মুখলৈ আগবাঢ়ি যাব মন নাযাব৷ তাৰ পিছত প্ৰশ্ন আহিব ইয়াত থাকি তেওঁলোকে কৰিব কি! ইয়াত ইতিমধ্যেই ইমানবোৰ সমস্যা, নিবনুৱা অসংখ্য৷ নতুনকৈ হাজাৰ হাজাৰ নিবনুৱা বাঢ়ি যোৱাৰ ফলত সমস্যা বাঢ়িব৷ বহিঃৰাজ্যত কৰ্মৰত বহুতেই হয়তো ইয়াৰ কামক লৈ সন্তুষ্ট হ’ব নোৱাৰিব, সমস্যাবোৰ কাকো ক’বও নোৱাৰিব৷ যোৱা বছৰকেইটা নিৰীক্ষণ কৰিলে এই সংকটপূৰ্ণ সময়ত চৰকাৰৰ পৰা চাকৰিৰ ক্ষেত্ৰত একো আশা নকৰাই ভাল হ’ব যেন লাগে৷ আত্ম সংস্থাপনৰ ক্ষেত্ৰত চৰকাৰৰ সাহায্য পালে ভাল৷ এতিয়া নিজৰ পথাৰ আৰু বজাৰ দখলৰ পৰিকল্পনা আৰু সুপৰিকল্পিত নীতিৰ মাজেৰে শ্ৰম কৰাৰ বাহিৰে আন ৰাস্তা নাই যেন লাগে৷ ইয়াক সম্ভৱ কৰাবলৈও লাগিব সু নেতৃত্ব৷ যিসকল অসমীয়াই নিজৰ বলত থলুৱা  সামগ্ৰীৰ উৎপাদন, কৃষি ক্ষেত্ৰৰ উন্নতিৰ বাবে অহৰহ কাম কৰি আহিছে তেওঁলোক স্বইচ্ছাই জাতিৰ স্বাৰ্থত এই সংকটকালত আগবাঢ়ি আহিব লাগিব৷ তেওঁলোকৰ নেতৃত্বত আৰু ৰাইজৰ সহযোগতহে অসমীয়াৰ বজাৰ দখলৰ প্ৰচেষ্টা সফল হ’ব৷ অন্যথা অকল্পনীয় বিপদৰ মুখত পৰিম আমি সকলো৷ কৰ্মক্ষেত্ৰত আগবাঢ়ি যাবলৈ পৰিয়ালৰ সহায়ৰ প্ৰয়োজন হব এইসকল যুৱকক৷ কাৰণ হঠাৎ পইচা ঘটাৰ পথ বন্ধ হৈ যোৱা এইসকল ব্যক্তি থাকিব প্ৰচণ্ড মানসিক চাপত৷ এতিয়াৰ পৰাই অসমীয়াই অসমীয়াক তুলি ধৰাৰ নীতি আৰাম্ভ কৰিবৰ হ’ল৷ আৱেগিক ৰাজনীতি আৰু টানি ধৰাৰ স্বভাৱ সময়ৰ আহ্বান বুজি সকলোৱে এৰিব পাৰিলেহে আমাৰ মংগল হ’ব৷ আশা ৰাখিছোঁ, চৰকাৰে চাকৰি দিব নোৱাৰিলেও অন্তত ব্যৱসায় বাণিজ্যৰ বাবে মূলধন যোগাৰ কৰাত সহায় হোৱাকৈ নীতি নিয়মৰ মাজেৰেই এইসকল যুৱক যুৱতীক বেংকৰ ঋণ বা ৰাজসাহায্য যুক্ত ঋণ লাভ কৰাৰ পথ সুচল কৰি দিব৷