নাজিৰা পৰা দিলীপ হাজৰিকা

  দেশৰ মহাৰত্ন উদ্যোগ তেল আৰু প্ৰাকৃতিক গেছ নিগমৰ অসম সম্পদৰ অধীনৰ সৰ্বাধিক উৎপাদনশীন তৈলক্ষেত্ৰ দিচাংমুখ , চফ্ৰাই , ডিমুৱাল , পাটসাকো আদিকে ধৰি অসমৰ আঠখনকৈ তৈলক্ষেত্ৰ বহিৰাগত পুজিপতি গোষ্ঠীক গতাই দিয়াৰ সিদ্ধান্তকলৈ সমগ্ৰ ৰাজ্য উত্তাল হৈ থকাৰ সময়তে নিগমৰ অসম সম্পদৰ লাকুৱা আৰু ৰুদ্ৰসাগৰ তৈলক্ষেত্ৰৰ অন্তৰ্গত দুটাকৈ ভৰাল গৃহৰ পৰা মূল্যৱান সা — সামগ্ৰী চুৰি কৰি অবাধ ব্যৱসায় চলাই অহা আৰু ইয়াৰ এক বৃহৎ ছিণ্ডিকেট চক্ৰৰ বিষয়ে ইতিমধ্যে পোহৰলৈ অহাৰ পিচতো ৰহস্যজনক ভাৱে নিৰবতা অৱলম্বন কৰিছে নিগমৰ কৰ্তৃপক্ষৰ লগতে অসম সম্পদৰ কাৰ্যবাহী সঞ্চালক গৰাকী । অ’ এন জি চিৰ অসম সম্পদত প্ৰতিবছৰে খনন — উৎপাদনত ব্যৱহাৰৰ অনুপযোগী হৈ পৰা কোটি কোটি টকা মূল্যৰ স্কেপৰ লুণ্ঠনত জড়িত শিৱসাগৰ জিলাৰ এই প্ৰভাৱশালী ছিণ্ডিকেট চক্ৰটোৰ বিৰুদ্ধে অদ্যপৰিমিত নিগম কৰ্তৃপক্ষ আৰু অসম সম্পদৰ কাৰ্যবাহী সঞ্চালক গৰাকীৰ এনে ৰহস্যজনক ভূমিকাই জনগণৰ মাজত ব্যাপক প্ৰতিক্ৰিয়া সৃষ্টি হৈছে । অসম আৰু অসমীয়া জনগণৰ আবেগ , শ্ৰম , ত্যাগ জড়িত থকা মহাৰত্ন উদ্যোগটোক নিগমৰ ভিতৰৰ পৰাই ধ্বংসযজ্ঞ চলাই অহা সুনন্দ নেৰ্তৃত্বাধীন চফিকুল , লহকৰ , তাৰিক , উদ্দীপ্ত , উমেশৰ দৰে মাফিয়াই এফালৰ পৰা নি:শেষ কৰি অহাৰ পাছতো কিয় অ’ এন জি চি ৰ অসম সম্পদৰ কাৰ্যবাহী সঞ্চালক তথা কৰ্তৃপক্ষই তদন্ত ঘোষণা কৰাটো দূৰৈৰে কথা কোনো পদক্ষেপ গ্ৰহণ নকৰা ঘটনাই ৰাইজৰ সন্দেহ আৰু অধিক গভীৰ কৰি তুলিছে । অ’ এন জি চিত কেন্দ্ৰীয় ঔদ্যোগিক নিৰাপত্তা বাহিনী , অসম চৰকাৰৰ ২৫ নং ( অ’ এন জি চি ) আৰক্ষী বেটেলিয়ন , নিগমৰ নিজা নিৰাপত্তা বাহিনী আৰু গৃহৰক্ষী জোৱান কৰ্তব্যত থকাৰ পিছতো নিগমৰ লাকুৱা আৰু ৰুদ্ৰসাগৰ তৈলক্ষত্ৰৰ বহু কোটি কোটি টকাৰ স্কেপ জমা থকা গুদামত এহাল বৃদ্ধ – বৃদ্ধা , দুজনকৈ গৃহৰক্ষী জোৱানকহে নিৰাপত্তাৰ বাবে নিয়োগ কৰি ৰখাৰ ঘটনাই বহু ৰহস্যজনক প্ৰশ্নৰ সৃষ্টি কৰিছে । 

নগাঁও

নগাঁও ভোগেশ্বৰী ফুকননী অসামৰিক চিকিৎসালয়ত স্থাপন কৰা কোডিড-১৯ চিকিৎসালয়ত কৰোনা আক্ৰান্ত ৰোগীক চিকিৎসা প্ৰদান কৰা প্ৰথমটো চিকিৎসক-নাৰ্চ-চাফাই কৰ্মীৰ দলক আজি প্ৰতিষ্ঠানিক কোৱাৰেনন্টীনলৈ প্ৰেৰণ কৰা হয়। কৰোনা বিৰোধী যুদ্ধত অৱতীৰ্ণ এইসকল যোদ্ধাৰ ভিতৰত আছে তিনিগৰাকী চিকিৎসক, তিনি গৰাকী নাৰ্চ আৰু তিনি গৰাকী চাফাই কৰ্মী। প্ৰতিষ্ঠানিক কোৱাৰেনন্টীনলৈ প্ৰেৰণ কৰা চিকিৎসক কেইগৰাকী হৈছে নগাঁও ভোগেশ্বৰী ফুকননী অসামৰিক চিকিৎসালয়ৰ ই এন টি বিভাগৰ চিকিৎসক ডাঃ শেখৰ জ্যোতি নাথ, মানসিক ৰোগ বিশেষজ্ঞ চিকিৎসক ডাঃ সত্যগোপাল দত্ত আৰু পুৰণিগুদাম ৰাজ্যিক চিকিৎসালয়ৰ চিকিৎসক ডাঃ বিজন সিং। আনহাতে, নাৰ্চ কেইগৰাকী হৈছে ক্ৰমে চুমী ডেকা, শিখামনি বনিয়া আৰু দিপামনি মেধি আৰু চাফাই কৰ্মী সকল হৈছে ভবী বাচফ’ৰ, হিৰা হাজাৰ বাছফ’ৰ আৰু কবি বাচফ’ৰ। স্বাস্থ্য বিভাগৰ নিয়ম অনুসৰি, সাত দিনৰ বাবে প্ৰতিষ্ঠানিক কোৱাৰেনন্টীনলৈ যোৱাৰ পূৰ্বে এই চিকিৎসক,নাৰ্ছ আৰু চিকিৎসা কৰ্মী সকলক আজি নগাঁও সদৰ সমষ্টিৰ বিধায়ক ৰূপক শৰ্মা, জিলা উপায়ুক্ত যাদৱ শ‌ইকীয়া, স্বাস্থ্য বিভাগৰ যুটীয়া সঞ্চালক ডাঃ অতুল পাটৰ আৰু চিকিৎসালয়খনৰ অধীক্ষক ডাঃ জে আহমেদ গামোচা, ফুলৰ থোপাৰে সম্ভাষণ জনায়। ইয়াৰ পিছত আজি কডিড-১৯ চিকিৎসালয়খনত আন এটা চিকিৎসক-নাৰ্চৰ দলে কোভিড ১৯ ত আক্ৰান্ত ৰোগীক চিকিৎসা সেৱা আগবঢ়োৱাৰ বাবে যোগদান কৰে। উল্লেখ্য যে আজি ৰিলিজ দিয়া চিকিৎসক-নাৰ্চৰ দলটোক নগাঁও চহৰৰ অন্যতম বিলাসী হোটেল নগাঁও প‌ইন্টত কোৱাৰেনন্টীন কৰাৰ বিপৰীতে চাফাই কৰ্মী সকলক চহৰখনৰ হোটেল ব’হাগীত কোৱাৰেনন্টীন কৰা হয়। ইপিনে, কোৱাৰেনন্টীনলৈ যোৱাৰ পৰত চিকিৎসক আৰু চিকিৎসা কৰ্মী সকলে চিকিৎসা সেৱা এক মানৱ সেৱা বুলি উল্লেখ কৰি মাৰাত্মক কৰোনা ৰোগীক চিকিৎসা কৰিবলৈ পাই তেওঁলোক সুখী বুলি সংবাদ মাধ্যমৰ আগত মন্তব্য কৰে । আনহাতে কৰোনা মানেই মৃত্যু নহয়। সেয়ে এই ৰোগক লৈ ৰাইজ আতংকিত আৰু চিন্তিত হ’ব নালাগে বুলিও কৰোনা বিৰোধী যুঁজৰ যুজাৰু সকলে মন্তব্য কৰে । ইফালে নিজৰ জীৱনক তুচ্ছ জ্ঞান কৰি চিকিৎসা সেৱা আগবঢ়োৱা চিকিৎসক আৰু নাৰ্চ সকলক কিঞ্চিত আদৰণি জনাবলৈ পায় যথেষ্ট সুখী অনুভৱ কৰা বুলি উল্লেখ কৰে বিধায়ক ৰূপক শৰ্মাই।

দৈনন্দিন বাৰ্তা সেৱা, জামুগুৰিহাট

বহি:ৰাজ্যৰপৰা উভতি অহা যুৱকসকলক ৰখা জামুগুৰিহাটৰ কোৱাৰেন্টাইন চেন্টাৰৰ বাবে আজি কনকলতা অসামৰিক চিকিৎসালয়ৰ ষ্টাফ নাৰ্ছ অঞ্জলী প্ৰধানে মাস্কসহিতে যোগান ধৰিলে চেনিটাইজৰ,স্প্ৰে-মেচিন,চেনিটাইজৰ ষ্টেণ্ড ৷ ৰক্তদাতা(এইচবিএছ) স্বেচ্ছাসেৱী সংগঠণৰ জৰিয়তে যোগান ধৰা এই সামগ্ৰীসমুহ আজি চতিয়া সমষ্টিৰ বিধায়ক পদ্ম হাজৰিকাক অৰ্পন কৰে স্বেচ্ছাসেৱী সংগঠণটোৰ বিষয়ববীয়া সকলে ৷ জামুগুৰি উচ্চতৰ মাধ্যমিক বিদ্যালয় আৰু কাষতেই থকা বাৰেচহৰীয়া সামুহিক ভৱণত স্থাপন কৰা কোৱাৰেন্টাইন চেন্টাৰত থাকি ১৪ দিনীয়া কোৱাৰেন্টাইনৰ সময় সম্পূৰ্ণ হোৱা ১৮ গৰাকী যুৱকক আজি স্বাস্থ্যবিভাগে আনুষ্ঠানিকভাৱে নিজ গৃহলৈ যাবলৈ অনুমতি দিয়া এক অনুষ্ঠানত ৫শ মাস্ক,৬ লিটাৰ চেনিটাইজৰ,স্প্ৰে-মেচিন ১টা,ছ’ডিয়াম হাইপ’ক্লৰাইড ১০ লিটাৰ আৰু ১টা চেনিটাইজৰ ষ্টেণ্ড সহিতে সামগ্ৰীসমুহ আজি চতিয়াৰ বিধায়ক পদ্ম হাজৰিকাৰ হাতত অৰ্পন কৰে ৷ মহামাৰীসদৃশ কৰ’নাৰ বাবেই দেখা দিয়া জটিল সময়ত ষ্টাফ নাৰ্ছ অঞ্জলী প্ৰধানৰ এনে কৰ্ম প্ৰশংসিত হিচাপে বিবেচিত হৈছে ৷

জোন বৰা, জামুগুৰিহাট।

মঙলদৈ,

দৰঙতো ক্ৰমাৎ বৃদ্ধি পাইছে ক’ভিড আক্ৰান্তৰ সংখ্যা। মঙলদৈ অসামৰিক চিকিৎসালয়ত শনিবাৰে পুৱতি নিশা ভৰ্তি কৰোৱা হ’ল আন দুজন ক’ভিড আক্ৰান্ত ব‍্যক্তিক। এই দুজনকে ধৰি মঙলদৈ অসামৰিক চিকিৎসালয়ত থকা ক’ভিড আক্ৰান্তৰ সংখ্যা ৪ জনলৈ বৃদ্ধি পালে। উল্লেখ‍্যযোগ্য যে পূৰ্বৰে পৰা চিকিৎসালয়খনত আমিৰুল ইছলাম আৰু নিজামুদ্দিন আলি নামৰ দুজন ক’ভিড আক্ৰান্ত চিকিৎসাধীন হৈ আছিল।শনিবাৰে পুৱতি নিশা ভৰ্তি কৰোৱা লোক দুজন হ’ল নন্দ বৰ্মন (৪৪) আৰু জালাল আলি (২৩) । নন্দ বৰ্মনৰ ঘৰ নামখলাৰ আঠিয়াবাৰীত হোৱাৰ বিপৰীতে জালাল আলিৰ ঘৰ ১/২ নং বৰুৱাঝাৰত । নন্দ বৰ্মন চেন্নাইৰ এখন ৰেষ্টুৰেন্টত কৰ্মৰত হৈ আছিল আৰু যোৱা ২৬ মে’ ত ৰেলযোগে আহি দৰঙত উপস্থিত হৈছিল । আনহাতে জালাল আলি মধ্যপ্ৰদেশত শ্ৰমিক হিচাপে কৰ্মৰত হৈ আছিল আৰু ২৫ মে’ ত আহি দৰঙত উপস্থিত হৈছিল । দৰঙত উপস্থিত হোৱাৰ পিছৰে পৰা দুয়োজন কেন্দ্ৰীয় বিদ্যালয়, মঙলদৈৰ কোৱাৰান্টাইন চেন্টাৰত আছিল । ইফালে, আমিৰুল ইছলামৰ লগত প্ৰত্যক্ষভাৱে সম্পৰ্ক থকা ৮ জন ব্যক্তিও মঙলদৈ অসামৰিক চিকিৎসালয়ৰ “ছাচপেকটেড ৱাৰ্ড” ত ভৰ্তি হৈ আছে ।

দৈনন্দিন বাৰ্তাৰ সেৱা, সোণতলী

কৰ’না ভাইৰাছৰ ভয়াবহ ৰূপ আৰু লক ডাউনৰ  মাজতে তথা শেহতীয়াভাৱে অহা নেৰানেপেৰা বৰষুণ আৰু সেই বৰষুণে সৃষ্টি কৰা আবতৰীয়া বানপানীয়ে সম্প্ৰতি ৰাজ্যৰ আন আন কৃষি প্ৰধান অঞ্চলৰ লগতে  কামৰূপ জিলাৰ বকো সমষ্টিৰো কৃষি প্ৰধান অঞ্চলত সৃষ্টি কৰিছে এক ভয়াংকৰ দূৰ্যোগময় পৰিস্থিতিৰ ৷ বৰ্ষটোৰ এই  আগতীয়া বানে ডুবাই পেলাইছে  সমষ্টিটোৰ হাজাৰ হাজাৰ হেক্টৰ ইৰিধানৰ খেতি পথাৰ ৷ গোটেই বছৰটো পৰিয়াল পোহপাল দিয়াৰ বাবে বকো দ’ কৃষিপ্ৰধান অঞ্চলসমূহত কৰা ইৰিধানৰ পথাৰসমূহ ৬/৭ ফুট পৰ্যন্ত পানীৰ যোৱাত ইয়াৰ কৃষকৰ মাজত সৃষ্টি হৈছে এক হাহাকাৰ পৰিস্থিতি  ৷ এনে এক ভয়াংকৰ দূৰ্ভিক্ষৰ  সম্ভাৱনা সৃষ্টি কৰি তোলা পৰিস্থিতিৰ মাজতে বকো সমষ্টিৰ কংগ্ৰেছী বিধায়িকা নন্দিতা দাসে আজি বকোৰ বানপীড়িত অঞ্চলসমূহ পৰিদৰ্শন কৰি এই বানে কৃষক  ৰাইজৰ কৰা ক্ষয় ক্ষতিৰ বুজ লয় ৷ যন্ত্ৰচালিত ভূটভুটী নাৱেৰে চৰকাৰী বিভাগৰ বিষয়া- কৰ্মচাৰীক লগত লৈ ছমৰীয়া ৰাজহ চক্ৰৰ এলেকাধীন প্ৰায় কুৰিখন বানাক্ৰান্ত ৰাজহ গাঁৱ পৰিদৰ্শন কৰি সংহাৰী বানে ইয়াৰ কৃষক ৰাইজৰ কৰা ক্ষতিৰ পৰিস্থিতি চাই বাৰুকৈয়ে মৰ্মাহত হৈ পৰে ৷ দিনজোৰা কাৰ্যসূচীৰে বিধায়িকা গৰাকীয়ে  ছমৰীয়া, বগুৰিগুৰী, পিজুপাৰা, টুপামাৰী,  ৰাঙাপানী আৰু কিচমত কাঠমী গাওঁপঞ্চায়তৰ এলেকাধীন ছমৰীয়া, পুঠিমাৰী, শালমাৰা, মন্দিৰা এন চি, মালিবাৰী, বঠিয়ামাৰী, বদলা, টিয়াপাৰা, সুঁতিৰপাৰ ,বেলতলা, জয়বাংলা, জাওঁকাটাদিয়া, জাওঁকাটা,  দুৰামাৰী , দক্ষিণ ৰাঙাপানী, আদি অঞ্চল পৰিদৰ্শন কৰি কৃষকৰ ক্ষয় ক্ষতিৰ বুজ লয় ৷ বিধায়িকা গৰাকীয়ে এই বানপীড়িত অঞ্চল পৰিদৰ্শন কালত শালমাৰা পাৰঘাট, মালিবাৰী বজাৰ, জয়বাংলা বজাৰ, জাওঁকাটাদিয়া আৰু দক্ষিণ  ৰাঙাপানীত সামাজিক দূৰত্ব বজাই ৰাখি কৃষক ৰাইজৰ পৰিস্থিতিৰ বুজ লোৱাৰ লগতে সাম্প্ৰতিক বান সমস্যা আৰু কৃষকৰ দুখ – দুৰ্গতিৰ ওপৰত মত বিনিময় কৰে ৷ মত বিনিময় কালত বিধায়িকা গৰাকীয়ে বকোৰ বানবিধ্বস্থ কৃষকসকলক সহায়ৰ হাত আগবঢ়াবলৈ আশ্বাস প্ৰদান কৰাৰ লগতে চৰকাৰীভাৱে পৰ্যাপ্ত সাহায্য ও ক্ষতিপূৰণ আদায় দিবলৈ চৰকাৰৰ ওচৰত দাবী তোলে ৷ এই বানপীড়িত অঞ্চলসমূহ পৰিভ্ৰমন কালত বিধায়িকা গৰাকীক সংগ দিয়ে সোণতলী আঞ্চলিক কলেজৰ সহকাৰী অধ্যাপক ভ° আজমল হক, ছমৰীয়া কৃষি চক্ৰৰ কৃষি উন্নয়ন বিষয়া  দীপক ডেকা, এ ই এ যঞ্জিত ঠাকুৰীয়া, ছমৰীয়া ৰাজহ চক্ৰৰ লাট মণ্ডল ক্ৰমে পদৰ দৈমাৰী, ৰাধাচৰণ ৰাভা, দীপক কুমাৰ, এচ  কে প্ৰদীপ ৰাভা, ছমৰীয়া ব্লক কংগ্ৰেছৰ সভাতি ধনেশেব বায়ন, সাধাৰণ সম্পাদক হাচেন আলী,  ব্লক মিডিয়া চেলৰ সমন্বয়ক দিলবৰ হুছেইন যুৱ নেতা পিংকু কলিতা প্ৰমূখ্যে কেবাগৰাকী দলীয় কৰ্মীয়ে ৷

প্ৰেৰক, ৰেজাউল কবিৰ, সোণতলী ৷

লংকা

 লংকাৰ নখুটীত লংকা আঞ্চলিক বন বিভাগ আৰু নখুটী বন বিভাগৰ যুটীয়া অভিযান । নিশাৰ অভিযানত নখুটীৰ চাৰ্থেগাও অঞ্চলৰ পৰা বন বিভাগে জব্দ কৰে এখন চোৰাং কাঠ ভৰ্টি টাটা মেজিক গাড়ী । জব্দকৃত কাঠখিনিৰ বজাৰ মূল্য প্ৰায় চল্লিছ হাজাৰ টকা । জব্দকৃত মেজিক খনৰ নম্বৰ AS-07-C-3089 । আনহাতে, নিশাৰ আন্ধাৰৰ সুযোগ লৈ মেজিক গাড়ী খনৰ চালক আৰু চোৰাং কাঠ সৰবৰাহকাৰী গাড়ী এৰি পলায়ন কৰাত কাকো আটক কৰিব নোৱাৰিলে  বন কৰ্মীয়ে ।পিছত আজি জব্দকৃত গাড়ী সহ কাঠখিনি লৈ অহা হয়  লংকা আঞ্চলিক বন বিষয়াৰ কাৰ্য্যলয়লৈ ।