নাজিৰা

তৃতীয় পৰ্যায়ৰ লকডাউনৰ দ্বিতীয় দিনা অৰ্থাৎ মঙলবাৰে জনাৰণ্যত পৰিণত হ’ল নাজিৰা আৰু শিমলুগুৰি নগৰ। ইয়াৰ লগে লগে জনসাধাৰণ, যানবাহন আৰু মুকলি হোৱা ব্যৱসায়ীক প্ৰতিষ্ঠানে নাজিৰা মহকুমাটোলৈ স্বাভাৱিক জীৱনযাত্ৰা ঘূৰি অহাৰ ইংগিত দিলে। কিন্তু ইয়াৰ মাজতো কেতবোৰ বেমেজালি আৰু দিনটোক কেন্দ্ৰ কৰি গভীৰ শংকা। তৃতীয় পৰ্যায়ৰ লকডাউনত গ্ৰীন জ’ন অঞ্চলসমূহৰ বাবে বিশেষ কেতবোৰ শিথিলতা প্ৰদান কৰা হৈছিল যদিও মঙলবাৰে নাজিৰা আৰু শিমলুগুৰি নগৰত দেখা গ’ল আন এক পৰিস্থিতি। ব্যৱসায়িক মহলৰ মাজত দেখা পোৱা গ’ল চৰম অনিশ্চয়তা৷ কোনে কি খুলিব, কোনে কি নুখুলিব এনে এক বিমোৰত নগৰ দুখনৰ ব্যৱসায়ীক প্ৰতিষ্ঠানবোৰ বিশৃংখল ৰূপত আধা খোলা, আধা বন্ধ অৱস্থাৰ সৃষ্টি হয়৷ সাধাৰণভাৱে চৰকাৰী নিৰ্দেশনা ব্যৱসায়িকভাৱে প্ৰয়োগ কৰাৰ ক্ষেত্ৰত প্ৰশাসনো বিমোৰত পৰে। এক তৃতীয়াংশ ব্যৱসায়িক প্ৰতিষ্ঠান খোলাৰ নিৰ্দেশ দিয়াৰ পাছত সেই এক তৃতীয়াংশ ব্যৱসায়িক প্ৰতিষ্ঠান কোনে নিৰ্ধাৰণ কৰিব, তাকেলৈ এক বেমেজালি সৃষ্টি হয়৷ আনহাতে স্বাভাৱিক দিনৰ দৰে নগৰ দুখনত পুৱাৰ ভাগৰ পৰা দেখা যায় ব্যক্তিগত যানবাহনৰ মুকলি চলাচল। এনে ক্ষেত্ৰত স্বাভাৱিকতে নগৰ দুখন জনাৰণ্যত পৰিণত হয়। তেনে পৰিস্থিতিত নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামী, ৰাজহ চক্ৰ বিষয়া কবিতা কাকতি কোঁৱৰ, দণ্ডাধীশ ক্ৰমে অদিতি বৰ্মণ, সুজাতা গগৈ, ৰাজীৱ সোণোৱাল তথা মহকুমা প্ৰশাসনৰ তৎপৰতাত মঙলবাৰৰ পৰা নাজিৰা আৰু শিমলুগুৰি নগৰ দুখনত সুশৃংখলিতভাৱে দোকান পোহাৰ খোলাৰ সঠিক পদক্ষেপ গ্ৰহণ কৰে।

হাটশিঙিমাৰী

ক’ৰ’ণা ভাইৰাছৰ সংক্ৰমণৰ পৰা ৰক্ষা পাবলৈ হাটশিঙিমাৰী জনস্বাস্থ্য কাৰিকৰী বিভাগে গ্ৰহণ কৰিছে নতুন পদক্ষেপ। বিভাগটোৰ বিষয়া-কৰ্মচাৰীৰ সহযোগত টেকনিকেল অফিচাৰ আকিব সৰকাৰ আৰু ইলিয়াছ আহমেদে নিজৰ প্ৰচেষ্টাত প্ৰস্তত কৰি উলিয়াইছে অটোমেটিক ছেনিটাইজৰ মেচিন। মেচিনটো মঙলবাৰে দিনৰ ১১ বজাত হাটশিঙিমাৰী জিলা উপায়ুক্তৰ কাৰ্যালয়ৰ প্ৰৱেশ পথত স্থাপন কৰে৷ বিভাগটোৰ এই কাৰ্যক বিভিন্ন মহলে প্ৰশংসা কৰিছে। এই মেচিনটো শুভাৰম্ভ কৰে জিলা উপায়ুক্ত আতিকা চুলতানাই৷ অনুষ্ঠানত উপস্থিত থাকে হাটশিঙিমাৰী জনস্বাস্থ্য কাৰিকৰী বিভাগৰ সহকাৰী কাৰ্যবাহী অভিযন্তা ছফিয়ৰ ৰহমান মোগলৰ লগতে জনস্বাস্থ্য কাৰিকৰী বিভাগ আৰু জিলা উপায়ুক্তৰ কাৰ্যালয়ৰ বিষয়া-কৰ্মচাৰীসকল৷ উল্লেখ্য যে এই পথৰে কোনো মানুহ প্ৰৱেশ কৰিলে তেওঁৰ সম্পূৰ্ণ শৰীৰ স্বয়ংক্ৰিয়ভাৱে ছেনিটাইজৰ হৈ যায়। হাাটশিঙিমাৰী জনস্বাস্থ্য কাৰিকৰী বিভাগৰ এনে পদক্ষেপক জিলাবাসীয়ে শলাগ লৈছে।

 গোলাঘাট

 ক’ভিড-১৯ৰ লগত মুখামুখি হ’বলৈ ৰাজ্য চৰকাৰৰ নিৰ্দেশ অনুসৰি গোলাঘাটতো সাজু হৈছে জিলা প্ৰশাসন। মঙলবাৰে জিলা উপায়ুক্তৰ সভাকক্ষত  অনুষ্ঠিত হোৱা সংবাদমেলত এইকথা সদৰি কৰে উপায়ুক্ত বিভাস চন্দ্ৰ মোডীয়ে। জিলাখনৰ প্ৰায় দুই লাখ চৌত্ৰিছ হাজাৰ ঘৰত হ’ব ক’ভিড-১৯ পৰীক্ষণ। ইতিমধ্যে আঠাৱন্নটা স্বাস্থ্যকৰ্মীৰ দল গঠন কৰা হৈছে। এজনকৈ মেডিকেল অফিচাৰ সম্বলিত প্ৰতিটো গোটে জিলাখনৰ প্ৰতিটো অঞ্চলৰ প্ৰতিঘৰত কৰিব এই পৰীক্ষা।  কাৰোবাৰ শৰীৰত ক’ভিড-১৯ৰ কিবা লক্ষণ দেখা পালে দ্বিতীয় পৰ্যায়ত চিকিৎসক আৰু লেৱৰটৰী টেকনিচিয়ানৰ দল উপস্থিত হৈ উক্ত ব্যক্তিজনৰ দেহৰ নমুনা সংগ্ৰহ কৰিব। জিলাখনত থকা ১৪৪ টা ছাব চেন্টাৰৰ আশা কৰ্মী, এছ পি ডব্লিউ আদিৰ জৰিয়তে গঠন কৰা হৈছে এই চিকিৎসা  কৰ্মীৰ দলবোৰ। ইতিমধ্যে জিলাখনত ক’ৰ’ণা আক্ৰান্তৰ বাবে মুঠ ৬৭০ খন বিচনা প্ৰস্তুত কৰি তোলা হৈছে। পৰবৰ্তী সময়ত অধিক সম্প্ৰসাৰণ কৰিব। সমগ্ৰ বিশ্বতে এতিয়া এক আতংকময় পৰিবেশে বিৰাজ কৰা জীৱকুলৰ এনে সংকটৰ সময়ত ক’ৰ’ণাৰ সৈতে সাহসিকতাৰে মুখামুখি হ’বলৈ ৰাইজক আহ্বান জনাইছে। পৰীক্ষণৰ সময়ত কোনো অশুভ পৰিৱেশৰ সৃষ্টি নকৰি সকলো সময়তে প্ৰশাসনৰ লগতে চিকিৎসা কৰ্মীসকলক সহযোগ কৰি ক’ৰ’ণা প্ৰতিৰোধৰ বাবে একত্ৰিত হ’বলৈও অনুৰোধ কৰে। তদুপৰি এই সময়ছোৱাত কোনো সামাজিক বিৰোধ সৃষ্টি নহ’বৰ বাবে গাঁও পঞ্চায়তৰ সদস্য বা ৱাৰ্ডৰ সদস্যসকলৰ সহায় লোৱা বুলিও ব্যক্ত কৰে উপায়ুক্তগৰাকীয়ে। চেম্বাৰ্চ অৱ কমাৰ্চৰ লগত হোৱা আলোচনা মৰ্মে  লকডাউনৰ এই সময়ছোৱাত গোলাঘাট চহৰত দোকানবোৰ এ, বি, চি-তিনিটা গোটত বিভক্ত কৰি খোলাৰ ব্যৱস্থা কৰিছে। এ গোটৰ দোকানবোৰ খোলা থাকিলে বি আৰু চি বন্ধ থাকিব। অৱশ্যে অত্যাৱশ্যকীয় সামগ্ৰী, ফাৰ্মাচী, কৃষি সামগ্ৰী তথা হাৰ্ডৱেৰ দোকানবোৰ এই গোটত অন্তৰ্ভুক্ত নহ’ব। মঙলবাৰে চহৰখনৰ সকলো দোকানত এই মাৰ্ক কৰা হ’য় আৰু তৎকালীনভাৱে এই ব্যৱস্থা কাৰ্যকৰী হ’ব।