দৈনন্দিন বাৰ্তা সেৱা,জামুগুৰিহাট

ইচ্ছা শক্তি থাকিলে দৰিদ্ৰতা যে কেতিয়াও  যিকোনো কামত হেঙাৰ হ’ব নোৱাৰে সেয়াই যেন প্ৰমাণ কৰি দেখুৱালে জামুগুৰিহাটৰ মৰনাকুৰি গাঁৱৰ এগৰাকী মেধাবী ছাত্ৰীয়ে৷নিলাক্ষী বৰা নামৰ ছাত্ৰীগৰাকীয়ে আৰ্থিক দৈন্যতাকো প্ৰত্যাহ্বান হিচাপে লৈ সদ্যঘোষিত হাইস্কুল শিক্ষান্ত পৰীক্ষাত জামুগুৰি আদৰ্শ উচ্চ মাধ্যমিক বিদ্যালয়ৰপৰা উজলি উঠিবলৈ সক্ষম হৈছে৷দৰিদ্ৰতাৰ বাবেই আন হাজাৰজন ছাত্ৰ ছাত্ৰীয়ে ঘৰৰপৰা লাভ কৰা নতুবা পোৱা সুবিধাৰ বিপৰীতে নিলাক্ষীয়ে পোৱা নাছিল তেনে সুবিধা৷কৃষক পিতৃয়ে ছাগলী পোহপালন কৰি বিক্ৰী কৰা লাভৰ টকাকেইটাৰে নিলাক্ষীক পঢ়াৰ সামান্য সুবিধা কৰি দিয়াৰ উপৰিও পৰিয়ালটোও পোহপাল দিবলগা হৈছিল৷কিন্তু প্ৰৱল ইচ্ছাশক্তি আৰু একাগ্ৰতাৰ বাবেই ঘৰৰ সকলো কাম কাজত সহযোগ কৰিও সদ্যঘোষিত হাইস্কুল শিক্ষান্ত পৰীক্ষাত ৮৭.৮ শতাংশ নম্বৰসহ ডিষ্টিংচন লাভ কৰি নিলাক্ষীয়ে প্ৰমাণ কৰি দেখুৱালে যে পঢ়াশুনাৰ দিশত দৰিদ্ৰতা কেতিয়াও হেঙাৰ হ’ব নোৱাৰে৷আটাইকেইটা বিষয়তে লেটাৰ নম্বৰ লাভ কৰা নিলাক্ষীৰ এই ফলাফলে কেৱল অঞ্চলটোলৈ সুনাম কঢ়িয়াই অনাই নহয় দৰিদ্ৰ পিতৃ মাতৃৰ চকুতো আনন্দৰ বন্যা দেখা পোৱা গৈছে৷কিন্তু ভৱিষ্যত শিক্ষা জীৱণৰ দিশটোত আগুৱাই যোৱাত ক’ৰবাত নিলাক্ষীয়ে উজুতি খাবলগীয়া হ’ব পাৰে নেকি৷কিয়নো নিলাক্ষীয়ে বিজ্ঞান শাখাত নাম ভৰ্তি কৰি ভৱিষ্যতলৈ এগৰাকী অধ্যাপিকা হোৱাৰ মন৷যাৰবাবে প্ৰচুৰ পৰিমাণৰ অৰ্থৰ প্ৰয়োজন আৱশ্যম্ভাৱী৷দৰিদ্ৰ পৰিয়ালৰ মেধাৱী ছাত্ৰী নিলাক্ষীক যদি কোনো সদাশয় লোকে এতিয়াৰপৰাই অধ্যয়নৰ দিশটোত সহায় কৰে তেন্তে ছাত্ৰীগৰাকীৰ সপোন বাস্তৱ ৰূপ পোৱাত কিছু সহায়ক হ’ব বুলিয়েই আশা কৰিব পাৰি৷সি যি কি নহঁওক আৰ্থিক দৈন্যতাকো নেঁওচি ঘৰুৱা কামৰ মাজতে পঢ়াৰ দিশটোক সময়মতে বৰ্তাই ৰাখি মেধাৱী ছাত্ৰী নিলাক্ষীয়ে কঢ়িয়াই আনিবলৈ সক্ষম হোৱা এই সফলতাই গৌৰৱাম্বিত কৰি তুলিছে বিদ্যালয় কৰ্তৃপক্ষৰ লগতে মৰণাকুৰি গাঁওবাসীক৷জোন বৰা , জামুগুৰিহাট ।

• যদি আপুনি আমাৰ ৰিপোৰ্ট পঢ়ি ভাল পাইছে, তেনেহ’লে ইয়াত ক্লিক কৰি আপুনি আমাক ফেচবুকত ‘লাইক‘ কৰিব পাৰে। 

দলগাও ৭ জুন:-  সদ্য ঘোষিত হাই স্কুল শিক্ষান্ত পৰীক্ষাত পাঁচটা বিষয়ত লেটাৰ সহ ৮৩% শতাংশ নম্বৰলৈ উত্তীৰ্ণ হৈ দৰঙ জিলাবাসীলৈ  গৌৰৱ কঢ়িয়াই আনিলে ফাইজুৰ ৰহমানে। ফাইজুৰ ৰহমানে ভকতপাৰা উচ্চতৰ মাধ্যমিক বিদ্যালয়ৰ পৰা   হাই স্কুল শিক্ষান্ত পৰীক্ষাত অৱতীৰ্ণ হৈছি। দৰঙ জিলাৰ দলগাও সমষ্টিৰ অন্তৰ্গত অতি পিচ পৰা দুলিয়াপাৰা বাসিন্দা পিতৃ হবিবুৰ ৰহমান আৰু মাতৃ তাহেৰা বেগমে আৰ্থিক অনাটনৰ বাবে যোগান ধৰিব পৰা নাছিল উপযুক্ত পঢ়াৰ খৰছ। মঙ্গলদৈ সমষ্টিৰ অন্তৰ্গত শ্বেৰপুৰ গাওঁত থকা মোমায়েক ছাইফুল ইছলাম(আমছুৰ কেন্দ্ৰীয় সমিতিৰ সাংগঠনিক সম্পাদক)ৰ ঘৰত থাকি পঢ়া শুনা কৰিছিল ফাইজুৰ ৰহমানে।  অলেখ কষ্ট আৰু তেওঁৰ পৰিশ্ৰম স্বীকাৰ কৰি ইংৰাজী,সাধাৰণ গণিত, সাধাৰণ বিজ্ঞান,সমাজ বিজ্ঞান,আৰু তথ্য প্ৰযুক্তি বিদ্যা বিষয়ত লেটাৰ সহ সৰ্বমুঠ ৪৯৬ নম্বৰৰে নিজ পিতৃ-মাতৃ আৰু মোমায়েকক এটা ভাল ফলাফল উপহাৰ দিবলৈ সক্ষম হল ফাইজুৰ ৰহমানে। তেওঁৰ সপোন ভৱিষ্যতে তেওঁ এগৰাকী সুদক্ষ আই পি এছ বিষয়া হোৱাৰ সপোন ফাইজুৰৰ। কিন্তু উচ্চ শিক্ষাৰ বাবে আৰ্থিক সমস্যাই বাধা দিব নেকি মেধাৱী ছাত্ৰ ফাইজুৰ ৰহমানক ?সেয়েহে মেধাৱী ছাত্ৰ ফাইজুৰ ৰহমানক সংখ্যালঘু সংগ্ৰাম পৰিষদৰ দৰঙৰ উপ সভাপতি মহিদুল ইছলামে এখন ফুলাম গামোছাৰে সম্বৰ্ধনা জনোৱাৰ লগতে মেধাৱী ছাত্ৰ জনক উচ্চ শিক্ষাৰ বাবে বিভিন্ন হৃদয় বান লোকক আৰ্থিক সাহাৰ্য আগবঢ়াবলৈ আহ্বান জনায়। আনহাতে  ধূলা একচেলেণ্ট ৰেইজ একাডেমীৰ পৰা হাই স্কুল শিক্ষান্ত পৰীক্ষাত অৱতীৰ্ণ হৈছিল মকিবুৰ ৰহমান। একাডেমী খনৰ অধ্যক্ষ মনিৰ মহম্মদ ছাঁফীয়ে মকিবুৰৰ ঘৰৰ অৱস্থা অতি দুৰ্বল হোৱাৰ বাবে তেওঁক আৰ্থিক ভাৱে বিশেষ সুবিধা প্ৰদান কৰিছিল। অৱশেষত মকিবুৰ ৰহমানে সমাজ বিজ্ঞান আৰু অসমীয়া বিষয়ত লেটাৰ সহ ৭২.৩৩% নম্বৰৰে ভাল ফলাফল কঢ়িয়াই আনিবলৈ সক্ষম হল। পিতৃ মাতৃৰ লগতে বিদ্যালয় খনৰ শিক্ষক শিক্ষয়িত্ৰীৰ পৰিশ্ৰম অথলে যাব দিয়া নাই মকিবুৰ ৰহমানে।কিন্তু উচ্চ শিক্ষাৰ বাবে আৰ্থিক সমস্যাই বাধা দিব নেকি মেধাৱী ছাত্ৰ ফাইজুৰ ৰহমানৰ লগতে মকিবুৰ ৰহমানৰ ?

আবুল হাছেম
দলগাও

• যদি আপুনি আমাৰ ৰিপোৰ্ট পঢ়ি ভাল পাইছে, তেনেহ’লে ইয়াত ক্লিক কৰি আপুনি আমাক ফেচবুকত ‘লাইক‘ কৰিব পাৰে। 

দৈনন্দিন বাৰ্তাৰ সেৱা,ননৈ

সফলতাৰ ধাৰা অক্ষুন্ন ৰাখিবলৈ সক্ষম হ’ল নগাঁৱৰ বঢ়মপুৰ শ্ৰীমন্ত শংকৰ মিছন অন্ধ বিদ্যালয়ে। ১০০ শতাংশ উৰ্ত্তীণৰে শাৰীৰিক বাধাগ্ৰস্ততাকো নেওচি  বঢ়মপুৰ শ্ৰীমন্ত শংকৰ মিছন অন্ধ বিদ্যালয়ে বিজয়ৰ ধাৰা অক্ষুন্ন ৰাখিলে । আজি ঘোষিত হাইস্কুল শিক্ষান্ত পৰীক্ষাৰ ফলাফলত উজলিল নগাঁৱৰ বঢ়মপুৰ শ্ৰীমন্ত শংকৰ মিছন অন্ধ বিদ্যালয়ৰ চাৰিগৰাকী ছাত্ৰ- ছাত্ৰী । বিদ্যালয় খনৰ পৰা মুঠ চাৰিগৰাকী ছাত্ৰ ছাত্ৰী অবতীৰ্ণ হৈছিল হাইস্কুল শিক্ষান্ত পৰীক্ষাত। শাৰীৰিক বাধাগ্ৰস্ততাকো নেওচি বিদ্যালয় খনৰ ছাত্ৰ  চম্পক নাথে প্ৰথম বিভাগত উত্তীৰ্ণ হোৱাৰ লগতে গণিত বিষয়ত লেটাৰ মাৰ্ক লাভ কৰিছে। আনহাতে, বিদ্যালয় খনৰ ছাত্ৰ টালিবুল ইছলামে গণিত বিষয়ত লেটাৰমাৰ্কসহ উত্তীৰ্ণ হৈছে প্ৰথম বিভাগত। ঠিক তেনেদৰে অনামিকা বৰদলৈ নামৰ ছাত্ৰীগৰাকীয়ে গণিত বিষয়ত লেটাৰমাৰ্কসহ প্ৰথম বিভাগত আৰু কমল হাজৰিকা নামৰ দিব্যাংগ ছাত্রজনে গণিত বিষয়তে লেটাৰমাৰ্ক লাভ কৰি প্ৰথম বিভাগত উত্তীৰ্ণ হ’বলৈ সক্ষম হৈছে ।
উল্লেখ্য যে, বিদ্যালয়খনৰ পৰিচালনা সমিতিৰ সভাপতি নৱজ্যোতি নাথে জনোৱা মতে , বিদ্যালয় খনৰ ছাত্ৰ ছাত্ৰী সকলৰ পৰ্যাপ্ত নাছিল কিতাপ । ৰেকৰডিং শুনি কঠিন সংগ্ৰামক জীৱনৰ ব্ৰত হিচাপে লৈ কাঁইটীয়া পথেৰে চাৰিওগৰাকী ছাত্ৰ-ছাত্ৰী পৰীক্ষাত অৱৰ্ত্তীণ হৈছিল আৰু কিতাপ নথকা প্ৰত্যাহবান বুকুত বান্ধিয়ে সফলতাৰে উত্তীৰ্ণ হৈ শ্ৰীমন্ত শংকৰ মিছন অন্ধ বিদ্যালয়ৰ লগতে বৃহত্তৰ বঢ়মপুৰ অঞ্চললৈ ছাত্ৰ-ছাত্ৰী কেইগৰাকীয়ে গৌৰৱ কঢ়িয়াই আনিলে। ছাত্ৰ-ছাত্ৰী কেইজনৰ এই সাফল্যক লৈ এতিয়া উৎফুল্লিত হৈ পৰিছে বিদ্যালয়ৰ ছাত্ৰ-ছাত্ৰী, শিক্ষক-শিক্ষয়ত্ৰী সকলৰ লগতে সমগ্ৰ বঢ়মপুৰবাসী ৰাইজ।